خارطة الصمان

[القرقاص]

السلام عليكم ورحمة الله وبركاته

انا ابي اروح الى الصمان بكره او بعده. بس ماعندي خبره لأ ني حدي اول الشوكي وخريم بس يوم شفت علومكم وكشتاتكم الى الصمان قررت الذهاب بس يا لربع عندي كم سؤال؟
س 1 :ابي توصيف اقرب طريق من الرياض
س 2:اذا وجد خارطه مرسومه للفياض
س 3:سمعت ان الفياض الزينه محميه
س 4:كم المسافه من الرياض بالوقت والمسافه
س5: ابي اسأل عن الخدمات (1) الجوال (2) البانزين (3) الحطب (4)الماء(5)المواد الغذائية.طبعا في الصمان
انا اسف على كثر الطلابات ... تحملوني تراي غشيم بس احب علوم الرجال

[Abu-Sulaiman]

السلام عليكم،،،،

أقرب طريق تروح من الطريق اللي قدام محطة خزام بالثمامة وتياسر متجه شمال وتستمر اللي ما يجيك مفرق الطوقي تروح معه يمين وتستمر الى دوار حفر العتش و تاخذالدوار فيه لوحة (الصمان او الرفيعة وتستمر الى الرفيعه (جرارة سابقا) وبكذا تصير باول الصمان.

بالنسبة للخارطة ما تحضرني هالحين لكن لو تبحث عنه بالمنتدي ان شاء الله تلقاه- بالنسبة لك اول مرة تروح للصمان ما يكفيك خارطة تحتاج جهاز قارمن او ماجلان لان الصمان الضياع به ما يبيله شئ الارض تشابه-.

الفياض المحمية هي الحاصبيات باقصى الشمال الغربي لكن عندك ام قرين وحسناء ودغيم وفياض واجد صغيرات بالطريق ما يحضرني اسمهن كلهن مهيب محمية.

المسافة الى الرفيعة بمشي الركادة ساعتين ونصف.

الجوال ما حولك الا عند الهجر مثل الرفيعة وغيره. البنزين عب من الرفيعة وحط ببالك انه يكفيك ثلاث مية كيلو على الاقل علشان تروح لمحطة ثانية.

الحطب عندك الطايح من السدر اليابس بالفيض ولا هوب على كل حال لكن زبن نفسك

الماء يبيلك تعبي من الهجر مثل البنزين وبعض الفياض مليانة ماء للوضوء والغسيل مهوب للشرب.

المواد الغذائية (بكل فيضة فيه فرع للسيفوي ولا عندك مشكلة) الله يهديك طالع لشارع التحلية و لا للبر احزم امورك من الرياض وخذ معك صبارات بهن ثلج للحم وخلافه.

الخلاصة حاولت اني اعطيك فكرة مبسطة عن الوضع هناك لكن الافضل انك تروح ما احد يتردد على الصمان لان وضعك شكله من الاسئلة ذي صعب- وبعدين وش العيب بالشوكي وش زينه وربيعه الى الركبة واللي تبي تشوفه بالصمان هو بالشوكي او خريم-.

[الطيب]

وعليكم السلام ورحمة الله وبركاته

اتمنى لك رحلة سعيدة

:)

[ابو سمر]

من الافضل اخي الكريم ان يرافقك مرافق ذو خبرة في البر ، لان الدعوى يبيلها تجهيز وسعة بال . وترجع بالسلامة .

[طرثوث]

لا تنسى الجارمن

[جميل جمال]

اخوي قرقاص ..

اذا معك قارمن ,, اشتر كتاب روائع الاحداثيات للاستاذ الشلاش من اي محل رحلات ومرفق معه خريطه ..

وحمل كل عفشك من الرياض واتكل على الله ولا يردك الا الصمان ..

ولا تنسى تاخذ جركل بنزين ثلاثين لتر ولا اربعين ,, وطبعا كل المواد الغذائيه ..

البر نص المتعه به مغامره .

وصدقني راح تنبسط انشالله .

[fares_2003]

هلا بالقرقاص


اتمنى لك رحله موفقه بس من كلامك شكلك اول مره تروح الصمان .

على العمووووم انتبه على نفسك وجهز العزبه من ديرتك واخذ الحطب معك والمعاميل لا تخلي شي.

واهم شي الرفقه الصالحه اللى تعينك على الصلاح. والله الله الصور الزينه وخلنا نشوفيها فى المكشات.

وسلامتك;)

[النجم الملتهب]

Originally posted by fares_2003
هلا بالقرقاص


اتمنى لك رحله موفقه بس من كلامك شكلك اول مره تروح الصمان .

على العمووووم انتبه على نفسك وجهز العزبه من ديرتك واخذ الحطب معك والمعاميل لا تخلي شي.

واهم شي الرفقه الصالحه اللى تعينك على الصلاح. والله الله الصور الزينه وخلنا نشوفيها فى المكشات.

وسلامتك;)

[القرقاص]

شكرا ابو سليمان وباقي الخوان .............
جزاكم الله خير

[النبراس]

نصيحه لك اخوي
1- الخوي اللي يعتمد عليه (رجال شرواك ) حتى لو قل العدد اثنين ولا ثلاثه .
2- لاصار ماحولك احد يعني خلاوي لازم يكون معك سلاح . ( وإذا ودكم تحرسون ) بس الحين كل الناس كشاته وماعليكم خوف انشاء الله .
3- لاتنسون دعاء السفر واهم من ذالك دعاء نزول المكان ( اعوذ بكلمات الله التامات من شر ما خلق ) من قالها عندما ينزل منزلا لا يضره شئ بإذن الله.
3- احذر الطين وإياك إياك انك تقربه تراه مب مثل الرمل تراه مثل صمغ البتكس وإياك إياك تغامر به . (إن كانك تبي ترجع لهلك )
4-إحرص يكون الموتر اللي معك دفرنسين لأنك قد تحتاجه .
5-إذا كنتوا اكثر من سياره لازم يكون معكم كنود وتثبون لكم مكتب بس لا يكون العامه ولا حولها يعني ابعد عن الناس .
6-إطفاء النار عند النوم (ضرووووري ).
7- خذ حطب ترى السدر ما يزبنك .
والله هلله بسعه الصر وطاعه الأمير (مهم مهم مهم ) وترى أهم شي الوناسه
وبالتوفيق انشاء الله

[كايين]

يا كشاتة الصمان .. هل السلاح ضروري ؟؟

وكم لتر ماء يحتاط ان الواحد ياخذه ؟؟
اذا كان عدد الاشخاص 8 تقريبا ..

وسلامتكم .. :)