معك تريل بليزر أو انفوي _ الله لايهينك أحتاج رأيك [الأرشيف]

مشاهدة النسخة كاملة : معك تريل بليزر أو انفوي _ الله لايهينك أحتاج رأيك

الوفي

26/09/2008, 11:14 PM

طبعي شمالي

26/09/2008, 11:41 PM

خالي شرا بليزر 2002 استخدام امريكي قبل شهر

سياحي فئه Ls ومدبل ولاهو راعي بر

للان مااشتكا منه وانا جربت سواقته

صراحه بالمدينه مثل عزم التويوتا ربع

اما البر الله اعلم

ولد العويني

26/09/2008, 11:52 PM

شف ياطويل العمر

الوالد معه تريل بليزر 2008 ls دبل

المواصفات :
4200 سي سي 291 حصان دبل كهرب ،مكيف واحد وفيه مكيف خلفي لكن فتحتين بس ، سي دي ومسجل كاسيت ، مثبت سرعه ، مكيف للجهتين يعني قسمين لك واحد تحكم خاص

المميزات ،

السعر العجيب الان اتوقع سعره بالعيسى 73 وبدبل 78 الف

العيوب،

1, ارتفاع صوت المحرك <=== يحن على طوووووووووووووووووووووووووووووووووول
2. اصوات الهواء بعد 120
3, الكهرب فيه دايم يتعطل مثل الامريكي عموما <== لمبات الطبلون ولمبات الفرامل

بالنسبه للقطع غاليه نسبيا

اي سوال انا حاظر

مخطط 2008

26/09/2008, 11:53 PM

بسم الله الرحمن الرحيم

السلام عليكم ورحمة الله وبركاته

الأخوان الكرام أكيد معك واحد من الموترين

ولا عليك أمر أحتاج رأيك وإجاباتك

1- نوع السيارة تريل بليزر أو انفوي؟

2- موديلها؟

3- هل صادف معك وجود عيوب في السيارة؟

4- هل صحيح مايقال عنها في كل من:

قطع غيارها غالية

صرفيتها عالية

صوت الهواء الخارجي قوي

خراباتها واجد

تتعلق في الطعوس والشعبان

مع العلم بأني أخذت هذه العيوب من خلال تجولي في الانترنت، وانا شخص ناوي اشتري واحد من هالموترين ورجلي ولله الحمد خفيفه على الموتر ولاني راعي مطاعس وتفجير كلها ان صادفني طعس رقيته ورحت لمبتغاي او شعيب وقطعته ايضاً لمبتغاي

رزقكم الله الجنة ووالدي ووالديكم وجميع المسلمين

معي تريليو بليزر 2007 ومشاكلة باختصارطبعاً ماشي 80 الف ومطلعه من الوكالة الجميح الله يجيرك يرحبون فيك ويحبون راسك اذا فية مشكلة ترتفع حرارك الى 40 الين تخليهم بمعنى يزهقونك ويطلعونك من ثيابك
1- المكيف اذا وقفت مايبرد اذا تمشي يبرد تعطل بعد ممشى 40 الف
2- الاصوات فيةمن طلعتة من الوكالة تسمع صوت الهواء داخل السيارة
3- غيرت لة كفرات قيمة الكفر 710 ريال مايركب علية الا شد بلدة ولا يتغير شكلة
4- السيارة سعرة بالنسبة للسيارات اعتقد حلو 84500 ريال يعني اعتقد اعتقد 3 سنوات ويبدى يطلب
5- اذا بغيت تبيع موديل 2007 يطيح فية 25 الف

سلامة عمرك

معن1420

27/09/2008, 02:05 AM

وش رايكم في الاكسبلورر

طبعي شمالي

27/09/2008, 02:28 AM

لايقارن بالشفر

مع احترامي

الوفي

27/09/2008, 10:24 PM

بيض الله وجيهكم كل منكم بإسمه، وجزاكم الله خير الجزاء

hms alqrob

28/09/2008, 03:02 AM

أنا معي انفوي 2002
وبليزر 2003

السيارة خفيفة وممتازة داخل المدينة وفي الطرق المعبدة ( عزم وخفة وراحة ) مقارنة بالجيوب الاخرى والسعر

السيارة يبغى لها رجل خفيفة عليها وصيانة باستمرار

السيارة تنزل للرمال وفيها دبل لا بأس به ... لكن السيارة نازلة شوي تحت ويبغى لها سواق يعرفلها عشان ما تتعلق

قطع الغيار متوسطة السعر يعني بأذكر لك بعضها :
فلتر الهواء 70
أقمشة أمامي 190 أصلي ، وأمريكي درجة ثانية 120 ، وكذلك الخلفي
البواجي 130
القزاز الخلفي غاااااالي مرة يمكن فوق 4000 بس ان شاء الله ما تحتاجه

أحلى مافي السيارة رخص سعرها يعني تشتري النظيف من 45 إلى 60 ألف مستخدم طبعا

الاستخدام الأمريكي يجي نظيف أحيانا إذا كنت تعرف تفحص السيارة زين انزل جدة وتحصل الكثير

صلهامه

28/09/2008, 04:32 AM

عليكم السلام ورحمة الله

انا اشتريت تريل بليزر موديل 2002 استعمال امريكة ( Ltz )

فل ابشن من كل النواحى ما خلوا ميزه بالسيارات الا حطوه فيه

قبل ما اشتريه رحت للعيسى وسألته عن المواصفات قال ما عندنا وما عمرنا سمعنا بهالمواصفات !

لا حظت عليه بعد أول سفره تفتفه قوية بالمكينه اذا السياره على الفاضى وواقفه سألت وكيل الضمان قال لى عادى هذا من تغير البنزين وفعلا بعدها راح ورحعت السياره زى اول .

بالنسبة للحراراه السيارة تحتمى شوى خاصة اذا واقفه

على فكره يوم رحت للعيسى كان فيه انفوى وبليزر جنب بعض وفتحت كبوتاتهن ابى افرق بين المحركات طلعن نفس الشي ما يفرق الا الوجه والهيكل وبعض الديكور الداخلى

فيه صوت هواء على السرعة

عزمة زين ما عليه

الدبل قوى ما شاء الله

عيبه طـااااااامـــن بالحيل بالحيل

ركبت له كفرات فايرستون من الوكيل اللى كان عليه مقاسه 245
واللى ركبت عليه مقاس 275 بقيمة 480 للكفر الواحد

وللحين فى طور التجربة

وسلامتكم

الحاتمي1

28/09/2008, 05:01 AM

السلام عليكم

انا معي بليزر 2003 اشتريته من الاردن بطاقه جمركيه
المهم الموتر نضيف والحمد لله
والموتر بالنفود خذ موتر اقوا من الجيب لانه خفيف ومكينته قويه ولكن لا ياقف وان وقف ما يطلع غير بسحب لانه نازل مره
واستخدامه على الطرق الصراويه جيد وراسي ولكن يقرقع من جوا ومن تحت بسرعه يعني يبي عنايه
وبالسفر على الخطوط الموتر ذيب ما يبيله كلام طياره وراسي وحراره طبيعيه على النص واحيانا ترتعع شوي

وقطع الغيار صلخ غااااااااااااااااليه وماتوجد ومتوفره غير من عند الوكاله
ولكن القطع الاستهلاكيه يعني لارخيص ولا غالي0

الموتر يبي عنايه ولاهو براعي بر وقنص ومطارد0

وبالنسبه لي الموتر جازلي ومتردد في بيعته 0
والي يبي يشتري تراي يمكن ابيع
ونزلتله اعلان بمواقع بيع السيارات وعليه طلب نوعا ما0

اخي العزيز بالمختصر المفيد
الموتر بالديره زين بس فيه صرف بنزبن لكن مو بالحيل0
اما اذا انت راعي بر ابعد عن الامريكي كله وعليك بالاندكروزر او سفاري 0

ولكم تحياتي

الوفي

01/10/2008, 05:40 AM

جزاكم الله كل خير كل من رد على وافادني في استفساراتي

وتقبل الله منا ومنكم صالح الأعمال

وعيدكم مبارك

المميـز

01/10/2008, 05:54 AM

عمي كان معه 2002 فاكه على يده

اللي خرب معه كلتش المروووحه

وكان واطي مره يمشي ويحك بالبر

بدوي متحضر

02/10/2008, 05:59 PM

تبي نصيحني وانا اخوك
انحــــــــــــــــــــــــــــــــــش
وربي اني انصحك من قلبي, لاأبوي ولا خالي ولا اخوي الي جريوا انا الي جربت وانت بكيفك
موتر خايس يشرب شرب مو طبيعي
نازل ودايم يتعلق بالبر, تنسيم على طووول, ولو اقولك شئ من مصدق انا ضرب عندي القير والمكينة ورحت غيرتها من تشليح الكويت , وموديل الي معي 2005 ماخذهمن التوكيلات
انت شف سعره بالسوووق محد يبيه
تبي نصيحتي خذلك تويوتا والا نيسان والله يوفقك
وانا اعترض مع اخوي الحاتمي مسألة انه خفيف انا ماوافقك الراي الموتر مرررررره ثقيل,,, حيل ثقيل
لكن خلها على الله

مجتازالأهوالي

02/10/2008, 09:05 PM

سيارة مدينة فقط
لايقربك انحش

قانون الجذب

02/10/2008, 10:21 PM

لولا اختلاف الأذواق لبارت السلع

http://www.autoenciclopedia.com/images/news/blazer102805.jpg
شف اخوي انا ما عندي بليزر
لكن الشهادة لله مع زميل لي موديل 2008
شد ينا على الموتر الى صلالة
في شهراغسطس ثمانية ميلادي عز الصيف والمكيف شغال على طول ثلج
ماشاء الله موتر ينفع في الخط
ورساوة طبعا الكل يعرف طريق صلالة كيف سيء
ومع ذلك والله مايخليك تحس انك ماسك خط
((((طبعا الموتر لاتقارنه بالجيوب المشهود لها بالقوة
يعني ما يبيك تجور عليه وأحس انه للمدينة يكون أفضل)))
تبي نصيحتي عشان تعرف المووتر
وانت تمشي في الشارع
حاول تشوف كثرة انتشار السيارة
ما راح تصدق والله من كثر ما تشوف بليزرات
مدينة الرياض
صرت اشك ا ن الموتر منتشر اكثر من الكراون فكتوريا
المشكلة اتوقع اخوي ان اغلب المشاكل تجي من المستورد من امريكا
وطبعا مثل هذي السيارات الله العالم وش كان حالها هناك
عشان كذا تشوف كثير يشتكي من الأمريكي بصفة عامة
لكن ابعطيك بعض الملاحظات على السيارة:
1- الشكل الخارجي للسيارة ممتااز وهذي طبعا تختلف حسب الاذوق
2- الديكوارات الداخلية سيئة
3- السيارة متوسطة الحجم يعني تصلح بر ومدينة شبابية وعائلية
4- الموتر نازل يعني في البر اتوقع يتعلق كثير
5- صرفية البانزين عادية
6- اذا تعديت 120 تسمع صوت الهواء مثل اغلب الأمريكي
7- راسي في االخط
8- كثرة انتشارها يدل على نجاحها
9- السعر ممتاز ورخيص بالنسبة لسيارة بحجم وشكل ومحرك البليزر يعني تطلعه باسمك جديد وكالة بسعر 74000 الستاندرد بدون دبل ويمكن اقل طبعا هذا السعر انا شايفة عرض قبل رمضان
10- الموتر اذا كنت مطلعة جديد اقل شي ء خمس سنين ما راح يطلب شيء
11- قطع الغيار ما اعلم عنها شي ء لكن اتوقع لو تسأل بنفسك افضل لان ليس كل ما يكتب صحيح
12- السيارة حجمها متوسط و امريكية ( شفر ) وبهذا السعر جديدة ولا فيها شي ء مجمع وملفق من اندونيسيا وتايلند والصين ...شف الحين أسعار السيارات الصغار وقارنها مع البليزر

ولد احمد

09/10/2008, 06:30 AM

السلام عليكم

انا معي بليزر 2002 LT امريكي

الصراحة الموتر جدا رائع

بالنسبة للكهرب والحمد لله ما شكيت منه بالرغم من اني مركب علية طقمين زنون عالي و واطي

وبالنسبة للهواء هذه فعلا موجوده ولكنها ما هي عيب تراها موجوده حتى بالكامري الجديد

وبالنسبة للبر الموتر ما عليه ممشاه زين بس حسب نوع التواير والهواء

وبالنسبة للدبل تراه كهرب وانا اشوفة أمن اكثر يعني لو احتمى كلها فيوز ولا حساس

والحمدلله ما قد اشتكيت لامن دبل ولا جير ولا محرك ولا دفرنسات

وللعلم انا امشي به بشكل يويم 200 كيلو لان دوامي يبعد 100 كيلو من البيت 100 رايح و 100 جاي

والحمدلله ماشكى

وبالنسبة للقطع اسعارها معقولة نفس اسعار باقي السيارات الامريكية ماهي مختلفة

وبالنسبة للامريكي انا افضلة للاسباب التالية

موتري 2002 به اكياس هواء بالمقاعد
موتر خالي 2006 سعودي مابه اكياس مع العلم انه نفس الدرجة LT

موتري به حافضة للنظاره فوق المراية + ريموت كنترول للكراج
موتر خالي فقط لمبة عادية

موتري المقعدين كهرب
موتر خالي فقط السائق كهرب

وفي كذا شي مختلف

بس بالنسبة للبليزر بشكل عااام الصراحة جيد جدا جدا ولله الحمد واكبر دليل انتشاره في كل المملكة

مروووق

10/10/2008, 01:03 AM

السلام عليكم ورحمه الله وبركاته

انا عندي تريل بليزر 2008 توي اشتريته من التوكيلات بالخبر شهر 6 عام 2008 وطلع علي بحوالي 86 الف ريال. طبعا Lt وبدون دبل
وعلى فكرة ترا الانفوي والتريل بليزر نفس الماكينة والقير والدفرنش. الفرق بالاكسسوارات ،، هذا جي ام و هذاك شفروليت

الحين السيارة ماشية معي 10 الاف وماشاء الله تبارك الله ماواجهت اي مشاكل في الكهرباء او التكييف. والمكيف ثلج ماشاء الله تبارك الله سواء والسيارة واقفة او تمشي.
بس ملاحظتي الوحيده على صوت الهواء الي يطلع بعد الـ 120 تقريبا. ورحت للصيانة التوكيلات بالخبر وبدلوا لي الربلات حق الابواب كلها مجانا على الضمان وشدوا لي على الجلنط
السيارة نازله (منخفضه) بشكل عام ولا تصلح بالبر. مثل ماقالو الشباب لا توقف. واذا وقفت هذا مكانها. لازم سحب. وتراه ثقيل مرررره مررره مررره بالبر. بس دامك ماوقفت ماعليك خوف هههههههههه. او سو مثلي نسم الكفرات 15 وادعس ولا عليك هههههههههههههههه
اسيات السيارة مريحة جداً اريح من الياباني بشكل عام واستهلاك البنزين اشوفه اقتصادري بالنسبة للسيارة ،، تقريبا 450 كيلو والتانكي 77 لتر والفل تقريبا على 37 ريال
السيارة راسية على الخطوط ووسط البلد ودعستها ماشاء الله تبارك الله مو صاحيه. تجيب 120 خلال 6 ثواني اذا تمغط الدعسة للاخير واقصى سرعه وصلت فيها شخصيا 180 وخفت. مادري فيها قفله او لا هههههههههههههه :)
اذا طلعاتك للبر خفيفة جدا ومنت راعي مقناص ، اتكل على الله. اما اذا تبيه حق تطعيس مثل اللاندكروزر ،، فـ ا قول لك ابعد ، تراه ماينفع
تحياتي لك واي استفسارات انا موجود

ولد العويني

10/10/2008, 02:59 AM

^^^^^^^^^

6 ثواني !!!

صادق؟

مروووق

10/10/2008, 04:06 AM

نعم. خلال 6 ثواني. انا مجربها شخصيا :)

خذ بليزر قيادة تجريبية و جرب. ماراح تخسر

ولد العويني

10/10/2008, 01:56 PM

يا طويل العمر

معنا واحد حق الوالد

Ls 2008
بالطقاق يجيب 120 ب10 ثواني!!!!!

6 ثواني قووووووووووووووووووويه يا شيخ!!!

طيب وش رايك تسكتني وتنزل فديو!؟

ولد العويني

11/10/2008, 01:29 AM

وينك فيه ؟ ولا هونت؟

أبو ليان00

11/10/2008, 02:45 PM

السلام عليكم ،،، وكل عام وأنتم بخير

بالنسبة للبليزر معي 2006 له الآن سنة lt دبل وارد الجميح وأنا رجال قبله كان معي لاندكروزر راعي بر بالمعنى لكن انحديت على بيعة اللاند وشريت البليزر لأن سعره بالسوق مقارنة بفئته يعتبر حلو ..

في المدينة أو على الطرق السريعة خذ سيارة رساوة وقومة وخفة دعسة بالنسبة لما ذكر من ارتفاع حرارة السيارة عند الوقوف وعدم تبريد المكيف .. فهي توفيق من رب العالمين قبل كل شي والحمد لله لم ألاحظ ارتفاع حرارة أو عدم تبريد عند الوقوف يعيبها في الطرق السريعة صوت الهواء ما تدري من وين ولا أريح في المقاعد من التويوتا ...

في البر أول ما أخذت السيارة تحك في كل شيء لكن بعد ماغيرت الكفرات حقت الوكالة الصغيرة أخذت مقاس أكبر ودنلوب وفكيت الرفارف الجانبية قبل أمشي للبر لأنها هي اللي تحك أكثر .. قطعت عليه مسافة 200 كيلو بر قطوع ما بين شعبان ورمل واللهم لك الحمد والشكر ما اشتكى ولا حك ولا غرز وتعلق وفي هذي تعتمد على السواق أحيانا ..

قطع الغيار /// لا بأس بها لاهي الرخيصة ولا الغالية ..

سيارة عائلية ، شبابية .. عرضتها للبيع قبل رمضان سيمت 60.000 ريال وفي رمضان 62.000 ريال ولا بعت كنت داخل اتمشى للمعارض وانسامت مني واحد يبغى يستخدم والسيارة منتشرة بشكل كبير وسجلت الشركة مبيعات قياسية بالنسبة لليوكون والبليزر لم تكن متوقعة ..

وعلى فكرة أنا قبل أشتري سويت مثلك بين هالمنتديات وصارت عيوبها أكثر لكن استخرت الله وتوكلت وشريتها والحين اللهم لك الحمد والشكر مرتاح ...