مشاكل في سيارة أحد الزملاء ؟

[متعب بن فهد]

السلام عليكم ورحمة الله وبركاته


كل عام وأنتم بخير والله يتقبل منا ومنكم صالح الأعمال


أحد الاصدقاء زايرني من خارج الرياض هذي الأيام ومعه ددسن 91 ماشي 600000 الف كلم وفيه بعض الأعطال الي أتمنى تفيدوني عنها أو تدلوني على فني لتصليحها .


إذا شغل السيارة وكان الجو بارد تفتف وتطفي إذا ما دعس بنزين . ويطلع صوت إنفجار . مع أنه مغير البواجي قبل فترة و ونظف الكربوريتر وصفاي البنزين ولا زالت المشكله قائمة .

عزم السيارة طايح ويالله تجيب 120 بالقوة .

فيها تهريب زيت من حساس القير وقال الميكانيكي لازم تغير القطعه بس دورها ولا حصلها .

إمبير الحرارة ما يشتغل مع أنه غير حساس الحرارة ولا اشتغل .

لمبه البطارية تشتغل إذا ولع النور .

[طبعي شمالي]

والله انا عندي مرسيدس 91 اخس من الهايلكس هههه

انصح بالبيع لان السياره قضى عمرها

[الروقي نت]

امرين لاثالث لهما
اوزن البلوف
وإذا ماضبط معك لابد من تغيير الكربريتر

[عاشق السيل]

وعليكم السلام ورحمة الله وبركاته ،،

أخوي متعب بن فهد أنا بتكلم بكلام خارج الموضوع بس تكفى لاتزعل علي !!

أنت كتبت ( 600000 ألف ) وهذي الكتابة خاطئة لأنها بكذا صارت 600 مليون !! والصحيح ( 600 ألف ) أو ( 600000 ) !!! وهذي فائدة للجميع لأن كثير من الكتاب يخطئون بنفس الخطأ ....

وتقبل أرق واعذب تحية لك يالغالي .....

[المميـز]

إذا شغل السيارة وكان الجو بارد تفتف وتطفي إذا ما دعس بنزين . ويطلع صوت إنفجار . مع أنه مغير البواجي قبل فترة و ونظف الكربوريتر وصفاي البنزين ولا زالت المشكله قائمة .
اتوقع ان التماتيك حق الدعسه خربان فلذلك لازم هو يدوس بنفسه بانزين للسياره
اما الانفجار فلا علم لي فيه

عزم السيارة طايح ويالله تجيب 120 بالقوة .
وبالنسبه للعزم يشيك على البواجي وعلى اسلاك البواجي وينظف الكربريتر وماتشوف شر ان شاء الله

فيها تهريب زيت من حساس القير وقال الميكانيكي لازم تغير القطعه بس دورها ولا حصلها .
عليه بالوكاله يجيبونها له برقم الشاص حق السياره

إمبير الحرارة ما يشتغل مع أنه غير حساس الحرارة ولا اشتغل .
فيه سلك لأمبير الحراره يجي فوق المكينه اكيد انه مرتخي او منفك

لمبه البطارية تشتغل إذا ولع النور .
هذا معناته ان كهرب السياره ضعيف يشك على البطاريه اول شي واذا مو من البطاريه فالمشكله من الدينمو لامحاله


هذا اللي قدرت عليه وان شاء الله اهل الخبره يفيدونك اكثر

[ابوقاسم]

بالنسبة للعزم يخوك شيك على وزنية الديلكو اذا هي مظبوطة وشوف لك فني جيد او روح الوكالة يوزنونة
والباقي الشباب اخبر
موفقين

[مخاوي العريس]

هالددسن الله يعطيها العافيه اللي الى هالحين تمشي أكلت عمرها وعمر غيرها نصيحة غيرها 00000وأدع من الله ان اللي بتشتريها تمشي مثل هالمبروكه

[متعب بن فهد]

الله يعطيكم العافية وراعي السيارة راسه يابس ولا عندة نيه يبيعها حتى إني سمتها منه بـ 15 الف ورفض مع أني أتوقع إن سعرها ما يتجاوز الـ 10 ألاف ... ( عاشق السيل لا تقرأ السومه :) )


عاشق السيل يا جعلك تسلم ولاتخاف منيب زعول :) و والله مالي علم بالرياضيات لكن لو اني كتبتها بدون كلمه ( الف ) هل راح تكون 600 الف لأني متأكد إني كاتبها 6 و بجنبها 5 أصفار . ولو هو 6 أصفار كان صار 6 مليون .

[مدمن فتك]

بالنسبة لايام البرد فانصحه يحط قصدير او كرتون على الشبك لانه يساعد على تحمية الموتر ولابد يدوس بنزين حتى تحتمي الموتر ...
طبعا كلامي هذا من رحلة عذاب ومتعه في وقت واحد حينما كان معي ددسن 84 وماله حل بالشتاء الا كذا

[ابودعسان]

صوت الأنفجار هذا من الديلكو بس يوزن البليتين يخلي مقدار الفتحه سمك ورقة الريال
واما العزم ممكن يكون من الشنابر حقات البساتم تكون صغيره
اذا كانت موضبه
اما اذا لم توضب فهي على وشك التخبيط
هالكلام من واقع خبرة بالددسن 91 عندنا من الوكاله الى التشليح قبل 4 سنوات

[عاشق السيل]

الله يعطيكم العافية وراعي السيارة راسه يابس ولا عندة نيه يبيعها حتى إني سمتها منه بـ 15 الف ورفض مع أني أتوقع إن سعرها ما يتجاوز الـ 10 ألاف ... ( عاشق السيل لا تقرأ السومه :) )




عاشق السيل يا جعلك تسلم ولاتخاف منيب زعول :) و والله مالي علم بالرياضيات لكن لو اني كتبتها بدون كلمه ( الف ) هل راح تكون 600 الف لأني متأكد إني كاتبها 6 و بجنبها 5 أصفار . ولو هو 6 أصفار كان صار 6 مليون .



يابعد حيي والله ،،، خابر إنك منت زعول وهذا العشم برجال مكشات !!

وأنا برضو متأكد إنك ما أخطيت بالأصفار ،، لكن الخطأ اللي معظم الناس تطيح به إنهم يكتبون الرقم صح ومع الهواجيس بالرقم يكتب ( ألف ) لأنها على طرف لسانه !!!!

شاكر ومقدر أريحيتك وسعة صدرك فالله يبيض وجهك .......