اكرر عشان خاطر الوالده مساعده تكفون الموضوع الاول انحذف وهذا بداله

[خالد 22]

ملا حظه :

في الموضوع الاول جيت بغير اللون وطار الموضوع وياليت يحذفه المشرف

الموضوع اعيده هنا

بسم الله الرحمن الرحيم

السلام عليكم ورحمة الله وبركاته

احب اشيد بهذا الموقع الرائع اللي بصراحه حببني في طلعات البر والمكشات

من خلال اللي شفته من الصور الاكثر من رائعه وقررت اني لازم اشوفه لان اكيد الشوفه المباشره افضل والتفاعل المباشر مع الطبيعه شعور جميل جدا

الصراحه يا اخوان انا ما عمري طلعت بر واذا ابعدت حدي بر المطار يعني اقل من مبتدء

والمشكله ان الوالده ملزمه علي بطلعه بر وخصوصا بعد ما شافت صوركم وحست ان عندي خبره شوي وانا:D

اتمنى تدلون على مكان يصلح للمبتدئين يكون قريب وطريقه ما يضيع وسهل واهم شي يكون فيه ربيع ويكون جميل المنظر عشان ما ننحرج قدام الاهل:D
وما يكون فيه زواحف وحشرات عشان الاطفال والنساء ما يرتاعون
<<<<<يعني مهوب انت اللي بترتاع:cool:

واذا فيه نصايح اكون شاكر لكم

وترى اي شخص لازم يبدا صغير عشان يكبر

ويعطيكم العافيه

[صالح ناجي]

انت في اي منطقة او مدينة علشان نقدر نساعدك

[المربد]

اخوي خالد
الله يخليلك الوالدة
بس انت ما ذكرت لنا وينك فيه علشان نذكر لك اقرب واحسن مكان لك؟

اما بالنسبة للرياض ،
فاشور عليك بالآتي:
1- روضة خريم وهي على خط الشرقية ثم مخرج رماح ثم لها لوحة على اليمين ولكنها مزحومة شوي
2- روضة الخفس الجنوبية وهي على خط الجنادرية وتستمر على نفس الخط يجيك مكان مهرجان الجنادرية على يمينك استمر على نفس خطك ثم يجيك منتزه الثمامة على اليمين (ان كان امورك المالية زينة ادخل به واجر لك خيمة بمنافعها ليلة وحدة بـ 500 ريال) والا استمر حوالي 40 كليو الى ان يجيك مفرق الصمان والتنهاة على يمينك من المفرق احسب لك خمسة كيلو على نفس الخط اللي انت عليه وتشوف الروضة على يمينك.
3- روضة نورة وهي الاحسن والانسب للعوائل اللي ما يحبون الزحمة : امسك خط القصيم الى ان ياتيك مخرج رقم (9) الى الرويغب واتبع اشارة الرويغب والخاتلة لف معاها وبعد حوالي عشرين كيلو تجد منزل عليه اشارة وطريق ممهد الى روضة نورة

آمل اني قد جاوبت على سؤالك

[مهلاش]

ابشر لعيناك امر وحنا نجيك انطامر:D

اقرب روضه لك بالذات روضة الفوطه وروضة العليا :p

للمبتدئين ثم بعدين منتزه الياسمين ومنتزه قرية الثمامه

وبعددددين خلاص صار عندك انفتاح ومقدوريه ومعرفة في المطاليع نسمحلك يلله انبسط تروح لمنتزه الثمامه البري :D

ابسط ياشيخ ;)









لا تزعل مجرد مداعبات :)
عندك ياطويل العمر حسب طلبك روضة الحور بعد ضرما ب25 كيلو تجي على يدك اليمين . واتمنى لك وقتً ممتعاً .

[خالد 22]

انا في الرياض


والف شكر على ردودكم بس كنت اتمنى تزودوني ببعض النصايح والتوجيهات

وجزاكم الله الف خير

[جلال]

اخوي خالد .. وش معك موتر ... .؟؟

وطلعت يوم كامل ولا نص يوم ... يعني طلعه من الفجر ولا راعي نوم انت :)

واذا بغيت تطلع ناوي تبعد ولالا .. يعني حدك 150 الى 200 كيلو .. اكثر ولا دون منها ..
___
انت راعي طبخ ونفخ ... يعني معاميلك معك .. ؟؟
ولاتنسى الحطب .. :)

[كشاف]

اخوي خالد ان كانك مابعد طلعت فانصحك تروح لروضة خريم لعدة اسباب :

1- انها ممتازه وبينبسطون الاهل فيها
2- اشجارها كثيره ومهما كثر عدد الناس فيها الا انك ممكن تاخذ راحتك خصوصا للعوايل
3- خطها سيدين تقريبا الاجزء يسير والمزفلت يوصلك الى عند بابها
4- سهله وما يمكن تضيع باذن الله بالنسبة للمبتدى مثلك
و انصحك تاخذ معك لروضة خريم شراع وهذا يباع عند محلات الرحلات بـ 100 ريال تقريبا ارتفاعه متر واحد فائدته انه يوقي عنك الهواء اذا كا فيه هواء او يستخدم كساتر وهو سهل الحمل سهل التركيب
وانصحك تاخذ معك عربيه صغيره بكفرين لأن روضة خريم او روضة الخفس ما يمكن تدخل السياره لذلك عليك حمل العفش والدخول الى الداخل وكلما دخلت اكثر كلما زان الربيع وقل الناس
وما انصحك تروح روضة نوره ولو انها الأفضل لأنك ربما تتوه قليلا .

عموما اذا تامر على الجيب والعده فهي تحت امرك وسلمني على ام خالد حفظها الله وقل لها تدعي لي في الأيام الفاضله . اخوك كشاف
الله اكبر الله اكبر الله اكبر لا اله الا الله
الله الكبر الله اكبر ولله الحمد

[abos3d]

اخوي خالد فيه مكان يعجبك ولا يبعد الا حدود الـ 40 كم والطريق مزفلت لين توصل له
الوصف:
رح للمطار وامش مع الخط حقه لما تتعدى الصالات وتتعدى المطار كله بتجيك اشاره مالك الا تروح يمين والا قدام والا فيه شارع جاي في الزاوية بين الثنين يعني قدام على اليمين يسمونه شارع ( بسم الله ) لان فيه لوحة مكتوب عليها كذا المهم امش نعه لين تجيك خزام ( مزرعة الملك فهد الله يطول عمره ) يا تروح يمين او يسار لف يسار وامش مع الخط تلقى الارض مربعه على اليسار وطبعا شبك خزام على يمينك


ملاحظة المنطقة على كلام بعض الشباب لكني مارحت لها شخصيا وسلامتكم

[النبراس]

السلام عليكم ورحمة الله وبركاته

هذا ملف برفقه مع المشاركه لأني ما قدرت انقله هنا تمام
هذا فيه تقريباً كل اللي تحتاجه إذا بغيت تطلع للبر
هذا مجهود شخصي ومتعوب عليه لكن انت تستاهل كل خير واللي يبي يستفيد بعد كنت بنزله بالمنتدى لكن الجهاز اللي انا عليه الحين ما فيه امكانيه وشكلك مستعجل قلت ارفقه احسن وانشاء الله انزله بموضوع مستقل
بالنسبه للأماكن الشباب ما قصروا لكن انا انصحك اول مره روح للخفس والمره الثانيه روح لخريم والمره الثالثه لنوره والرابعه إذا تبي الحور لكن مو مرررره زينه يعني تمشي وفيه احسن منها لكن بعيد
واتمنى تعجبك الهديه.
الملف مكتوب على الورد
وادعلنا بالتوفيق والهدايه

[العليمي]

اذا تبي مكان قريب من الرياض و حسب مواصفاتك الي طلبتها يعني قريب و طريقه سهل و مناسب .
1_ روضة الخفس تبعد عن الرياض 85 كيلو و الشباب ما قصرو حطو لك الوصف ..
2_ روضة خريم ..

[badr97]

الاخ الكريم : خالد22
جزاك الله خير على حرصك في ارضاء الوالده وبرها

وجزا الله خير جميع الاخوان على حرصهم

ام بنسبه لختيارك الموقع
فهناك كتب تسعدك على ذالك وفيها وصف دقيق لمناطق التنزه القريبه من الرياض
مثل كتاب الدليل البري المصور للمؤلف محمد ال الشيخ و عبدالله الحقباني
ويوجد العديد من الكتب
تجدها عند محلاة الرحلاة

اتمنى ان لا اكون قد تئخرت عليك
والسلام عليكم

[خالد 22]

السلام عليكم


انا والله عاجز عن شكركم جميعا كل واحد بلقبه لانكم اكثر من رائعين وجزاكم الله الف خير على النصيحه والتوجيهات


والحقيقه الوالده دعت لي ولكم الله يتقبل


اخوكم

خالد

[حد السيف]

خالد 22
السلام عليكم ورحمة الله وبركاته
كل عام وانت بخير
:D :) :cool: دايم قابل الوالدة بهاشكل تراء تذيد من عمرة وانت مادريت
اللة يعينك ويزيدك على برة واللة لا يحرمك من دعاة اللة يحفظة لك ويطول بعمرة على الطاعة


محبك اخيك
حد السيف