صامل بس أبي رأيكم ....... بصراحة أنا محتار مرة .....

[محمد محمود]

بسم الله الرحمن الرحيم
كل عام وأنتم بخير وتقبل الله من الجميع صيامهم وقيامهم
بصراحة -وكما هو مكتوب في العنوان- انا محتار في اختيار سيارة لي . انا الان معي هايلوكس 2002 وللضروف ما أجبرتني على التغيير وقلت -وهذا كان من أحلامي- إني امتلك سيارة جيب. وبدأت لاحلة المعاناة للبحث عن الجيب المناسب. كان من أولى إختباراتي جيوب التويوتا ، لكن للآسف دراهمي مهيب واجد وسيارتي تويوتا معروفة وكويسة بس بصراحة غالييييييييييييييييييييييييييييييييية مرة على غير فايدة.فاتجهت إلى ثاني الخيارات بعد تويوتا وهي نيسان ولكني بصراحة متخوف من النيسان شوي وذلك لكثرة مشاكلة . ولكني مضطر له لانه الأنسب مالييييييييييييييا بالنسبة لي . ففكرت بالجيب باترول ربع 2008 وشفت أسعارها في المعارض ب89.500 إلى 89.000 قبل العيد وتبون الصراحة الموتر كويس وحلو بس مافيه أي شيء رادو مسجل ومكيف ومكينةوقير والسعر مقارنة بالتجهيزات غالي ، مع العلم أني ماعندي عايلة أن والوالد والوالدة . ومن خلال تصفحي في المنتيديات - وبالذات مكشات- جاء في بالي الاكستيرا وأن كثير من الاعضاء الي جربوه يمدحونه .وأن بأي حال منالأحول مارح أتعدى 90.000
فبالله عليكم شوروا علي هل أخذ الباترول الربع والا كسترا

محبكم محمد محمود

[ridan]

عزيزي الأكستيرا افضل من الباترول بصراحه وبالمواصفات بعد مقارنة بالسعر فلذالك انصحك بالإكستيرا

لكن ليش مافكرت بالإف جي تويوتا تراه حلوو ومواصفاته حلووة والراي لك وانا ليش قلت لك عن اف جي لأني اسمع بمشاكل مكاين النيسان تنسيم الثلاجه ومشاكل مسامير اللهات وغيرها من التفكك ومن هالأمور لكن لو خذيت لك اف جي يمكن الشكل يعجبك وممكن لا الناس اذواق لكن موتر ينشد به ماتخاف من مشاكله واللي جربوه ماشكوو من خرابات ولا شيء بس فيه ناس تقول ان الرؤيه من داخل السيارة صعبه شوي يعني مو واضحه وانت ممكن تجربه تستاجر ولا رح للوكاله واركب وشف الوضع يصلح لك ولا لا
والراي لك

[سهم VTC]

السلام عليكم..
اخوي محمد محمود..

الاكستيرا...ماشاء الله ممتاز ..وما شكوا منه اللي شروه..

كداخليه حلو مره..
اما كلام العضو اللي قبلي يقول مسامير الثلاجه هذي فقط في الباترول الصالون..2005 وتحت وتم التعديل عليه..

اما كلامك عن الربع النيسان..فهوكذلك ممتاز لكن انت خابر مسجل ورادو..فقط..>>ابعد عن الربوع وخذلك اكستيرا..

على الاقل الاكستيرا ملون الوان حلوه صراحه..

هذا موجز كلامي ..ولا تنسى الاستخاره..

[الوعب]

السلام عليكم

اختيار مناسب الي هو الاكستيرا ,, ولكن انا انصحك ماتاخذ النيسان الربع و ذلك لان افراد الاسرهم الله يخليهم لك اكثر من 2 يعني 3 اشخاص و السيارة بابين ماتنفع
انصحك بشراء سيارة مستعمله استعمال خفيف
90 الف تجيب لك شي زين ,, اما تيوتا او نيسان 3 ابواب
وبالتوفيق لك

[محمد محمود]

أشكر الأخوةالأعضاء ridan و سهم vtcعلى ردودهم .............وبيض الله وجيهم
لكن أنا حاب استفسر عن كذا شغلة :
1- كم أسعار الأكستيرا ....؟
2- مهوب الأفضل لون إني أباخذ اكستيرا ...... اخذ باثفايندر........" على الأقل مجرب وله كم موديل نازل"؟
3 سعر الأكستيرا عند البيع.......... ؟ هل هو يمسك سعره عند البيع إذا قارنته بالباترول؟

[مساير الليل]

آخوي الغالي الأكستيرا أرى أنه أفضل جيب سعره مناسب

وسعره يبدأ من 82 للسياحي إلى 102 آلف للفل كامل

وأفضل لون للأكستيرا الأسود أو العودي

[محب النياق]

انا رايي تاخذ gx مستعمل تكرفه ومتى مامليت تبيعه بخساره 5000 او مربح بعد

[ديزب]

موجز كلامي ..لا تنسى الاستخاره..

[أحمد الدهمشي]

اذا خياراتك بين الباترول والاكستيرا
الاكستيرا افضل لك
واذا تبي غيرها الفورتشنر ممتاز
والله يكتب لك اللي فيه الخير..

[كبسولة2]

خذلك gxr 2003 نظيف في حدود 80 إلى 85 الف

عائلي وبارد ووسيع وزين

[شمالات نجد]

عندك الباثفندر النوع se يمدحونه والموتر يدلعك ومريح مره

وعندك الفورتشنر 6 سلندر معروف

لا تنسى تستخير

سلام

[ساري 111]

فر من النيسان فرارك من الأسد .. مالك ومال الأعطال ووجع الرأس وغلا قطع الغيار والخساير عند البيع

عندك الأف جي تلقى مستعمل استمعال خفيف بالمعارض بـ 90 اوفوقه شوي
واذا انت ماتقدراو ماترغب الأف جي خذ اكستيرا ولاتقرب الباترول إطلاقاً

[بدوي جنوبي]

ارشح في المرتبه الاولي
الباث فندر

سيارة اثبتت وجودها من موديل 2006 وطالع
وترا المستخدم سعره مناسب جدااا

[محمد محمود]

السلام عليكم ورحمة الله وبركاته
مشكورين جداً على الردود :
حبيت أزيد شيء ياشباب إني اليوم الصباح الساعة 10.30 كنت وكالةالحمراني الي في شارع الأحساء وسألت عن الأكسيرا وقال لي :
الأكستيرا يجي ثلاث أنواع وهي
1- العادي " الستاندر" وهو أرخص شيء وسعره 84.000 ويشمل قزاز كهرب ومكيف ورادو بس بدون سيدي وبدون درج ويجي عادي وتماتيك .
2- نوع أرفع منه " بس مدري وش أسمه " وسعره 87.000 ويشمل جميع المواصفات السابقة بالاضافة إلا أن القير تماتيك وسيدي ودرج ومساكات الأبواب نفس لون السيارة
3- الفل وسعره 102.000 ويشمل بالاضافة إلى السابقة كشافات وشبك فوق السيارة

وبصراحة أعجبني الفئة الأولى وقررت - وقلت للموظف أبي أجربها وخذ رقم جوالي وعاد أبشوف وش يصير معي واعلمكم .


محبكم
محمد محمود

[باترول 82]

الله يوفقك اخوي محمد وننتظر تجربتك للسياره

[الفتكاوي]

الإكستيرا روووح وادعيلي

[بدوي جنوبي]

التجربة مهمه جداااا

[بـلـيـهـان 1]

وبصراحة أعجبني الفئة الأولى وقررت - وقلت للموظف أبي أجربها وخذ رقم جوالي وعاد أبشوف وش يصير معي واعلمكم .






هذا افضل شي سويته :good:

[الشقردي911]

الله يوفقك ويكتبلك الي فيه الخير ولا تنسا التجربة

[الوهاج]

اليومين هذي طالع الجيب المازدا والله مسكت
وياباني وشكله رهيب والعادي منه اعتقد 107 الف
والفل ابشن 120 الف
وعليه عرض مديل 2009 الفل ابشن 120 الف زي 2008
تحياتي ،،،

[برق الصمان]

الله يوفقك واهم شي -------------قناعتك انت وارتياحك النفسي للموتر لانه لك ------صح المشوره حلوه بس لاتصمل الا وانت مقتنع


تحياتي لك وللجميع

[محمد محمود]

يعطيكم العافية ياشباب على الردود ، بس حبيت أسألى :
هل الاكستيرا له عيوب أو سلبيات ؟
إذا مافيه أحد معه ممكن يفيدنا أو يعرف أحد معه اكستيرا يعطينا تجربته ؟

محبكم
محمد محمود

[محمد محمود]

السلام عليكم ورحة الله وبركاته ،
اليوم جايب لكم أخبار تجربة الأكستيرا الي كنت قد تكلمت عنها قبل يومين.
في البداية كلمت واحد من الأخوان علشان يروح معي وفي حوالي الساعة 10.30 صباحاً وصلنا الوكالة حقتهم الي في شارع الأحساء . وكان من حقين خدمات العملاء ينتظرنا بصراحة فالبدايةخذ مني الرخصة وصورها . بس أنا قلت له ترى رخصتي منتهية من سنتين، قل إن شاء الله مافيه مشكلة .
بعدها رحنا للحوش حقهم وقال لنا تبغون قير عادي ولا تماتيك فأن صراحةأحب القير العادي وبدأت تجربة السيارة لي لأول مرة .
السيارة الي كنت راكبها كانت ماشية بالظبط 15.500 وكان لونها عنابي . في البداية ركبت أنا وأخوي في المقدمة والشخص إلي من الوكالة ركب ورى. أول ماجيت أشغل السيارة السيارة عيت تشتغل قال لي الموظف لازم تدعس الكلتش وأنت تدق سلف ، وفعلاُ أشتغلت السيارة .
السارة بشكل عام عملية من الطراز الأول وبعدين الموتر فيه عزم مهوب طبيعي ، يعني بصراحة الموتر تعطيه النمره الثالثة مع اللفات عايدي جداً - أكيد بعدالموتر 2008- الموتر الي هو العايدي الي جربنا في Abs المتر خفيف جداً في اللفات التكييف حقه حلو الدبل حقه كهربائي . المراتب بصراحة مريحة وتعطيك منظر لجميع الزوايا . ارتفاع السارة عن الأرض مناسب جداً . القير حق الموتر عبارة عن ست نمرات . أنا يوم أجرب ماوصلت السادس . الملاحظة الي لفتت نظري الي القير . الآن انت لم تبغى تريوس لازم تضغط على رأس القير وبعدين تعشق ، هذي الي لفتت نظري " واحد متعود على هايلوكس" . الموتر إذا قارنته بالربع بالترول أحس أنه أفضل لانه أكبر وأوسع وعملي أكثر.
بعد ماسقته بفترة خليت أخوي يسوقه ويعطيني رأيه ، الصراحة أعجبه وقال هو أحس من الربع بالنسبة لي لكن النقطة الي هو شاك فيه هل الموتر يمسك سعره بعد البيع ولالا.
الموتر أحس مناسب لي بس أحي إن الموتر لو يكون فيه دف لوك يكون كامل - والكامل وجه لله سبحانه- سألت بعده الموظف عن الأسعار لزيادة التأكد قال العادي 84000 . قلت طيب 2009 نزل ولالا قال لا توه وبعدين يمكن يكون نفس 2008 مافيه دف لوك .
هذي صراحة تجربتي ........................حبيت أشارككم بها وكما وعدتكم إني أبعرضها هذاني عرضتها وأدعوا لي بالتوفيق ....... وما نستغني عن آرائكم وتعليقاتكم
محبكم
محمد محمود

[خطر]

لا تعدا التايوتا خذ لك اف جي مستخدم اطلق من النيسااان

[مواسي الطعوس]

لو رجعت لموضوعي (لايفوتكم ........تجربتي مع الاكستيرا )) ممن تحصل ماتريد , وفيه كلام حول سعر السياره بعد الاستخدام . لكن اقولك شيئين :

1/ صعب تحصل السياره مستخدمه بالمعارض . لي زميل موصي ناس بالرياض والقصيم والدمام وجده اذا حصلوا شي يدقون عليه , والى الان لم يحصل شي .

2/ قال له شريطي اشتر جديد .كل الاكستيرا اللي يحضر للمعارض قريب من سعر الجديد.(هذا ان حصلت شي , ويقول فعلا كلامه صحيح الى الان لم احصل شي )

[محمد محمود]

السلام عليكم ورحمة الله وبركاته
أنا صراحة متردد في الأكستيرا 2008 لاني ودي يجي فيه الدف لوك . رحت أمس وكالة نيسان إلى على شارع العليا العام وقال الموظف الأكستيرا ال2009 مابعد نزل . قلت له ماعندك خبر عن الدف لوك ؟ قال لي إستحالة ينزل فيه دف لوك لان الدف لوك مايجي إلى في الباترول الفل كامل ، وهذا تبي يحطون فيه دفلوك وهو أقل منه ! يقول الباثفايندر مايجي فيه .... حتىالكاميرا والحساسات الي في الباثفايندر شالوها كلها الي في 2009

[فتى التويم]

الباترول يمسك سعره بعدين لو ماجاز لك

اما الاكستيرا مايندرا عنه

صح ان مواصفاته ممتازه جدا

بس يمكن تاخذه ولا يصلح لك واذا جيت تبيعه يطيح من قيمته واجد

[محمد محمود]

السلام عليكم ورحمة الله وبركاته
شباب إذا عندكم معلومة عن الاكستيرا ياليت تضيفونها ............. رب إشارة أبلغ من عبارة .
الله يسهل الأمور يارب ..............
محبكم
محمد محمود

[أبوالمثنى]

تفضل أخوي أرجوا أني أكون أفدتك :)

http://www.mekshat.com/vb/showthread.php?t=130466

[محمد محمود]

جزاك الله خير ..........أخوي أبو المثنى


محبكم
محمود

[سوسة حطب]

أخوي محمد الموتر إللي سقته في الوكالة تراه قبل ثلاثة أشهر مصدوم مع وجهيته لونه عنابي قير عايدي لإني في تلك الفترة رايح أجربه بس كان طلبي أني أطلعبه للبر بحكم أن دبله كهرب و السست بس فيه موظف عندهم الله يجزاه خير معه واحد طلعت أنا وياه وجربته وشريت اقل نوع وقير تماتيك تؤكل على الله وإذا كانك تبي الشور فيه واحد من الجماعة يقول ان 2009 فيه تغيير خارجي من ناحية لون الصدام والشبك والله أعلم

[الربذي]

ياخي هو يبي نيسان والبعض يكره على تايوتا 0
المهم الله يوفقك وبصراحه الاكستيرا حلوا وفازت على الهمر وتويوتا اف جي في مسابقه عالميه طرحت هنا في مكشات وكل الشباب يقولون ان عزمه خيال وراح يصير له مستقبل باهر
وربي يوفقك0

[محمد محمود]

السلام عليكم ورحمة الله وبركاته
بعد انقطاع دام دام اسبوع كامل تقريباً هأنا أوفايكم بآخر أخبار الاكستيرا :
زرت وكلمت حوالي 4 فروع للنيسان اكستيرا وفوجئت بالآتي :
الموتر الآن منقطع ( القير العايدي) ولا فيه إلا لون أصفر والا قير تماتيك أو إنك تنتظر 2009 . بعد ذلك أوصاني بعض الشباب بمعرض نجد والفلاح ولكن للآسف مالقيت . فما أدري وش الحل.

[أبوالمثنى]

انتظر 2009 افضل لك :)

[راعي النياسين]

فر من النيسان فرارك من الأسد .. مالك ومال الأعطال ووجع الرأس وغلا قطع الغيار والخساير عند البيع

عندك الأف جي تلقى مستعمل استمعال خفيف بالمعارض بـ 90 اوفوقه شوي
واذا انت ماتقدراو ماترغب الأف جي خذ اكستيرا ولاتقرب الباترول إطلاقاً

يااخوي ممكن تقولي ليش مايقرب الباترول

الي يشوفك يقول هذا مجرب جميع موديلات الباترول وانت حدك هالبقره GX

فر من النيسان فرارك من الاسد اعووذ بالله كل هذا قهر لعنبووك ترى ذلحركاات تركناها من يوم كانت اعمارنا على 18 و19 سنه
معد صاار نيساان هذا صاار هيوندااي

لا يقرب الباترول والله انك غريب يعني كل هالامه الي شاره باترولات ماتفهم وانت الي تفهم

يااخوي ترانا مجربين وعارفين الباترول زين مجربينه وانت بزر في حفاظتك
موب انت على اخاار العمر تجي تعيب على الباترول

لكن الاحتراام لراعي الموضوع

اسفين يااخوي انا بصرااحه ماجربة الاكستراا لكن فيه نااس في لمنتدى يمدحونه مدح موب طبيعي

لكن الباترول يالبيه بس بكل انوااع الباترول وربي انا جفور في البراان نقطعها تقطيع ورماال بالربع الباترول
في قوة تحمل جبااره موب طبيعيه ماشاء الله تبارك الرحمن

استخر يااخوي وشف الموترين

والله يعطيك خيره ويكفيك شره سوان خذيت هذا او هذا

[شمالات نجد]

يااخوي ممكن تقولي ليش مايقرب الباترول

الي يشوفك يقول هذا مجرب جميع موديلات الباترول وانت حدك هالبقره GX

فر من النيسان فرارك من الاسد اعووذ بالله كل هذا قهر لعنبووك ترى ذلحركاات تركناها من يوم كانت اعمارنا على 18 و19 سنه
معد صاار نيساان هذا صاار هيوندااي

لا يقرب الباترول والله انك غريب يعني كل هالامه الي شاره باترولات ماتفهم وانت الي تفهم

يااخوي ترانا مجربين وعارفين الباترول زين مجربينه وانت بزر في حفاظتك
موب انت على اخاار العمر تجي تعيب على الباترول

لكن الاحتراام لراعي الموضوع

اسفين يااخوي انا بصرااحه ماجربة الاكستراا لكن فيه نااس في لمنتدى يمدحونه مدح موب طبيعي

لكن الباترول يالبيه بس بكل انوااع الباترول وربي انا جفور في البراان نقطعها تقطيع ورماال بالربع الباترول
في قوة تحمل جبااره موب طبيعيه ماشاء الله تبارك الرحمن

استخر يااخوي وشف الموترين

والله يعطيك خيره ويكفيك شره سوان خذيت هذا او هذا


ما أردى من رد أخونا ساري إلا ردك يا أخوي

الله يهديكم كلكم