الاخوة اصحاب الباثفندر<<انتم مطلوبون هنا؟؟؟

[راعي الاكورد]

السلام عليكم ورحمة الله وبركاته,.,,



حيا الله اصحاب الباثفندر جميعا كلا بأسمه والاعضاء الذين يريدون المساعدة


اخواني الاعزاء انا قررت اشتري جيب باثفندر من موديل 2003-2005


ولكن لما استشرت واحد من اعضاء هذا المنتدى المبارك قالي لاتشتري باث


ويوم قلت له ليش ؟؟


عطان رابط موضوع مشاكل الباثفندر


و لما قريت انبهرت من المشاكل الكثيرة


صحيح ان لكل سيارة مشاكل بس يوم شفت الموضوع تغيرت نظرتي للباث


وانا الصراحه من قبل ناوي على الباث من ماشاء الله شكل قوي ومكينة اقوى


وبعد ما قريت الموضوع تغيرت نظرتي له


بس قلت لازم نستشيركم يا اعضاء مكشات



واللي يقول الباث مهب زين يقول موتر ثاني به دبل



حدي من 50 إلى 55

الله لايهينكم يا اعضاء مكشات الغالين :)

[ابو صقر 111]

الباث فاندر ليس سيئا وأنما الوكالة والقضية بالمسامير وأذا صلحتها انتهت المشاكل

[ابو النادر]

اخذ النظيف وماراح تندم انشاء الله الباث زين
والدليل شف سعره في السوق ما ينزل والنظيف
ما يجلس في السوق يطيرونه الرياجيل

[راعي الاكورد]

ابوصقر 111

مفرس

الله يعطيكم العافية ماقصرتو ياالغلا


ننتظر البقية :)

[المميـز]

الباثفندر موتر ومايعيبه الا مساميرالثلاجه والرجال لقوا لها حل

عليك بالاستخاره بعد الاستشاره

والله يكتب لك اللي فيه الخير

[راعي الاكورد]

الله يعطيك العافية اخوي المميز

وننتظر باقي اصحاب الباثفندر

[جول قميري]

والله وانا اخوك انا شريت واحد قبل خمس شهور ماشي 68 موديل 2004 فتحة تماتيك

اول ما اخذته لحمت مسامير الثلاجة ومشى الحين معي 20 الف الحمدلله ما شفت منه الا اللي يسر الخاطر

فيه عيب واحد اذا معسته مع الدبل بالنفود يحتر شوي و بالحر بالنهار اذا صرت تمشي 160 وفوق تشبك

المروحة الكبيرة وتسبب لك ازعاج تصير تقل راكب ددسن 82 غمارة هنقلين

واهم شي كل ما تغير الزيت مرتين او ثلاث مرات تغير فلترهواء الاصلي ابيض قيمته 75

لان لو ماغيرته يخرب عليك الحساس ويبدا يشتغل ومايخذ بنزين كود تطفيه وتشغله نوبتن ثانية

صارت معي مرتين لان اليماني لعب علي وركب فلتر تجاري ومن يوم غيرته لي ثلاث شهور الحمدلله

الامور زينه

واحرص على النظيف

ادري كثرت القرق بس احب لك ولكل اخواني التوفيق والخير

[4800VTC]

ياالغالي معي واحد 2003قير تماتيك جايبه من الكويت
والحمد لله ما شكيك من شي في الموتر الا منظم الهوا والسبب لاني لم انظف الفلتر لمده طويله وركبت منظم اصلي وشريت فلتر اصلي والحين الحمد لله ما أشتكي من شي فالموتر
اما بالنسبه للمسامير الثلاجه اتصلت هاتفيا على بعض الاخوان الاعضاء في المنتدى
واستفسرت عن المشكله وعرضت المشكله على الوالد الله يحفظه
وقال خلها على شكلها والى الحين الحمد لله ماصار اي شي معي من المشاكل اللي قالوا عنها الشباب والسياره مثل الحلاوه ولا تحتاج الا بنزين وتغيير زيت بعد5000 كيلوا

واي استفسار حاضرين للطيبين

اخوك /4800VTC

[راعي الاكورد]

vtc 400
فرتس قميري

والله انكم ماقصرتو ياالنشاما

بس فيه سؤال اخوي فتك 4800

الموتر كم له معك وكم ماشي

[البرق 99]

يا هلا باخوي الله حيييك
كل الي اعرفهم معهم باث فاندر يمدحونه وةلا فيه مشاكل سواء عادي او اوتماتيك
واحد له اربع سنوات معه مشاء الله تبارك الله يقول ما صار فيه اي مشاكل ولا يحط فيه الا زيت وبانزين وقمشات بس
دور النظيف وبعد الفحصوقبلها الاستخاره وموفق ان شاء الله

[همس الرعد]

والله وانا اخوك
انا معي باثفندر 2005 له سنتين معي

والحمد لله ما شفت منه شي

واقول توكل على الله وخذ لك وااحد

[gusoon]

الباث خوش سياره .
صغير حجمه قوي عزمه ولافيه أي عيب الا نقص الزيت وعلاجه استعمل سوبر شل وبنزين 95 وتوكل على الله
مع تحياتي

[.أبوعبدالرحمن]

هلا بك اخوي توكل على الله ودور لك باثفندر نظيف واشتره


وطبيعي انك لو تدخل موضوع وتلقى فيه اكثر من 100 شخص كل واحد يطرح مشاكل سيارته

وفي هذه الحالة انت تشوف مشاكل 100 سيارة وما تشوف مشاكل سيارة وحدة

ومن ناحية السيارة انا مستخدمها وماشية معي الى الان تقريبا 86 الف كم وموديلها 2003 الدفعة الاولى ولم اواجه اي مشاكل ولله الحمد الى الان


وهذا من فضل الله ايضا ومن الطبيعي ان كل سيارة وفيها مشاكل بسيطة وتتصلح في اسرع وقت ولا تخلو من العيوب




وشوري عليك توكل على الله ودور لك نظيف

[سحابه]

يااخي ما انت صاير مثلي في التردد
توكل على الله واستخر وخذ الموتر
وودي تسأل من دلك على الرابط هل جرب الموتر؟

[معشوق]

السلام عليكم
اخوي مافيه سياره ما فيها مشاكل
وكل سياره على الاستخدام
انا معاي 2003 ماشي 137 الف كم
الحمد لله ماصارت معاي مشاكل كبيره لا مسامير ولا حساس ولا غيرها

[امبراطوور]

الموتر زيييين بس انتبه وقف لا تاخذ تماتيك لان بالحرارة كريم و ضعيف مره خاصه با النفود


وخذ عادي وان شاء الله ماتشكي هم

[شروكي ربع]

شيك على الزيت كل 3 الى 5 آلاف لأنه ينقص ..

وهذا طبيعي في الباث ينقص علبة الى علبتين .

[سوبر VTC]

هلا اخوي
الاخوان كفو ووفو
عموما اذا لك نظر
يوجد باثفندر للبيع م2005 لؤلؤي فل كامل
فتحة قير عايدي لكن بدون مثبت و مراتب مخمل
الموتر ماشي 180000الف
البدي على الشرط
المكينة معروفة للجميع عند اهل الباث
تنقص كل 1500 الى 2000 نص علبة
بحكم انه عيب مصنعي
حاده راعيه ب65000الف
تحياتي

[alkongrs]

خذلك باترول موديل 99 او الفين بالحدذا تلقاه ان شالله

[ابو ليالينا]

السلام عليكم جميعا اخواني هل الباثفندر عند شبك الدبل يثقل او لا اردو الرد وهل سعر الدفرنس غالي

[المنيعي1]

هﻻبك
والنصيحة واجبة على المسلم تجاه اخيه

بنسبة للباث الي ذكرت يعتبر قديم يعني اخر موديل له الأن 9 سنوات يعني لو بحثت بالمعارض نادر تحصل نظيف والنضيف
رايح يحتفظ به صاحبه وان باعه يبيعه غالي.

نصيحتي لك اذا تبخص السيارات وتعرف النظيف زين اما اذا ماتعرف بسيارات خذ جديد لو اقصاد افضل من ان تأخذ موتر قديم وكل اخر شهر بالورشة وبهذله ولعنة جدف.

بنسبة للباث انا معي 2004 وله الأن 9 سنين وماشي 430 ولله الحمد محركاته وكاله
ماغيرت شي وﻻ اشتكيت من شي فلتر الزيت تغييره اغيره وتغييره بدون وهذا على سياراتي كله طبعاً الزيت من مشت 140 الف بدت تصرف وصرت ازوده اذا نقصت

فيه عيوب مصنعية وهي موجودة بالندكروزر الجديد الي هي مسامير الثﻻجة حليته بلحام بارد من الداخل
العيب الثاني رديتره صغير ويسكر من الداخل الحل ركبت رديتر اردني وانتهت المشكلة ولله الحمد.

[بحر الاشواق]

الباث يجي مكينتين
مكينه حجمه 3000 سي سي وهذي كويسه صبوره لكن العزم لك عليه شوي واظنه انتهت عند موديل 2003
وفيه المكينه الثانيه وهي اكبر من الاولى وحجمه 3500 سي سي وهذي سلمك الله عيبه مسامير الثلاجه ونقص الزيت واظن جت على موديل 2004 و 2005
ايضا عندك بالباث عامود الدبل خفيف مره واي ضربه ينعوج ويسبب لك رجه لهذا تلاحظ اكثر الباثات مركبين فرارات