قصتي مع القراند شيروكي

[مخايل سحاب]

بسم الله الرحمن الرحيم

سأتكلم عن قصه حصلت لي، وحبيت أني أكتبها لأفيد غيري كما غيري أفادني
القصه طويله ومتشعبه، ولكن بأختصرها على قدر إستطاعتي
قد يستفيد منها الكثير خاصه اصحاب القراند شيروكي لذا احفظها عندك في المفضلة، يمكن يجي اليوم اللي تحتاجها وتدورها وما تلاقيها!
سأتطرق سخريةً إلى بعض الورش والعمالة اللي كادوا ان يمصون ما بقي من سيولتي الماديه
........

معي قراند شيروكي ثمانيه سلندر موديل 99 امريكي
شغلت الجيب في ليله من الليالي وتفاجئت بنتقه لحظة تعشيقي للقير!
قلت يمكن كرسي قير.
كملت سواقه، ولحظة انه لما جاء يغير بالثاني ايضا نتق!
وكذالك في التغيير الثالث!
واستغربت انه رفض يغير للرابع! إلا عقب ما دعست بالجيب عشان يغير للرابع!
وبمجرد انه غير للرابع رجعه نمره للثالث فجأه (مع فحطه :) )
لحظتها عرفت ان الموتر في مشكلة قير .. وقفت عن مواصلة مشواري ورجعت للبيت
وخلال رجوعي للبيت ولعت لمبة المكينه!
.....

قمت بإختبار سريع لكمبيوتر الجيب وهي كالتالي (خاصه بسيارات الجيب والدودج والكلايزلر)
وهي انك تحط المفتاح في السوتش وتنقله من الـ OFF الى الـ ON ثلاث مرات حتى تشوف العدادات تدور
فإذا طلعت لك كلمة done في عداد الكيلوات بدون ارقام تسبقها فموترك سليم
اما اذا طلعت لك ارقام وهي تبدأ بحرف P فموترك في مشكله

اما أنا فطلع لي رقم P0700
.....

دخلت المنزل ثم فتحت الابتوب للبحث عن هذا الرقم
فتوصلت إلى هذا الموقع والذي فيه جميع الأرقام الخاصه بالقراند شيروكيات من 99 الى 2004
http://www.wjjeeps.com/faultcodes.htm

ومن خلال الموقع وصلت إلى رقم مشكلة جيبي ثم ضغطت على جملة Output Speed Sensor واللي نقلتني إلى هذه الصفحة
http://www.wjjeeps.com/speed_sensors.htm

الصفحة توضح ان المشكله شائعة في هذا النوع من الجيوب وفي الغالب تكون حلها تغير ثلاثه حساسات سرعة
إضافة لشرحه طريقة تغيير الحساسات (يعني شغله سهله ما تحتاج ميكانيكي)
وعرض أرقام القطع وأسعارها

أستمريت في البحث عن المشكلة حتى وصلت إلى منتدى إمريكي كتب أحد أعضائه عن مشكله حصلت له وكيف حلها
http://www.jeepforum.com/forum/showthread.php?t=163246
المشكله التي حصلت له مثل مشكلتي وسيارته مثل سيارتي
هذا الإمريكي إستطاع إنه يصلح سيارته بتغيير حساس واحد من الحساسات الثلاثه المذكوره أعلاه وهو
Input speed sensor حساس السرعه الأمامي إنبوت
ورقمها P/N 4799061AB
.....

في اليوم التالي
تفلسفت وشحنت سيارتي بسطحه للوكاله (المتحده للسيارات) أعزكم الله
وقفت في طابور لحالي ومع ذلك انتظرت حوالي ساعة لسوء الخدمة وقلة العاملين حتى اضطريت للدخول على مديرهم (اللبناني) عشان يتوسط لي ويخدموني !!
وكالة سعوديه تكره شي اسمه السعوده!!
قالوا لي يبي لك إسبوع، عشان نقولك وش فيها! وكشفيه 250 ريال!
قلت عادي..
وبعد أربعة أيام كلمتهم قالوا لي يبي لك إسبوع زود إلى عشره أيام! ترا هذا عشان يكشفون على السياره بس!!!
.....

أضطريت إني اشحن الجيب من الوكاله (أعزكم الله) إلى الصناعية القديمه
وإلى وين؟ إلى الورشه الوحيده المتخصصه بالجيب والدودج
آآآآآآآي داير تقولي المطيويع؟
نعم المطيويع (أعزكم الله)
جاني مديرهم يسحب رجليه من غير نفس وبعد موافقته طويل العمر فحص جيبي.
وبعد الفحص اللي كلف 100 ريال قالوا لي:
موترك فيه تروس قير و كراسي قير وحساسات قير و ... قير !!! يبي لك توضيب قير!
بكم ؟
بــ 4700 ريال يازول !!!!!
......

أخذت موتري لورشه جنبهم متخصصه قيور
وإلى وين؟ من أشهر الورشات في الصناعيه
بدك تئولي جيركو؟
نعم جيركو (أعزكم الله)
قابلوني بحفاوه (الله حق) شو بدنا نعمل لك حبيب ألبي؟
قلتهم فحص قير.. قال 100 ريال
قلت طيب زين افحصوه .. قال الفلووووس اول!
ولما دفعت الفلوس (ثم) فحصوه قالوا لي عندك القير الأول يبي له توضيب حسب معلومات برنامج كمبيوتر (إقعد يا التطور)!
المهم كم بيكلف؟
قالوا 4500 ريال وإحتمال أكثر، يمكن فيه قطع ثانيه تحتاج إلى تغيير!
.......

بعد هذه الرحلة الفلسفيه اللي ما كان له داعي أساسا، إلا أنها "حاجة في نفس يعقوب قضاها"
ولكن تعلمت منها الكثير
رأيت فيها النصب الكبير
وإستغفال الشعب السعودي بأساليب مختلفه
سوء التعامل، سوء الخدمه ، وسوء الصيانه

المهم بعد الرحلة رجعت للبيت
وفي اليوم التالي أخذت رقم قطعة الحساس وشريتها بقيمة 150 ريال (أصلي)
وهذه صورتها
http://i359.photobucket.com/albums/oo34/aahat83/28-07-08_1731.jpg


ورحت لفبلبيني في ورشه صغيره وقلت له ركب هذه بدل الحساس الأمامي
ركبها في اقل من دقيقه وبسعر 30 ريال (تغاليتها يوم ركبها في اقل من دقيقه :) )
ثم تفلسف (مثل امثاله السابقين) وقال سيارتك تولع لمبة المكينه.. ما انحلت المشكله..
قلت ما عليك انت ركبتها.. خذ فلوسك

ثم مشيت بالجيب للبيت راجعآ وقد اصبح القير افضل من اليوم اللي شريته فيه
واكثر مرونه وسلاسه،
وأثناء السواقه طفت لمبة المكينه ولله الحمد
وإلى يومك هذا (بعد مرور شهرين على الحادثه) والجيب شغال تمام تمام
وهذا بفضل الله ثم البحث في قوقل
وانحلت مشكلة القير بـ 180 ريال فقط من غير بربسة وفك قيور


انتهى...

ملاحظه: لمسح رقم المشكله في عداد الطبلون تحتاج الى تصفير الذاكره من خلال جهاز الكمبيوتر الموجود عند الوكاله والمطيويع وجيركو .. اتوقع يكلف 100، تقتعد يستاهلونها ؟!

[مكشاتي عنيزه]

أهنيك اخوى على تفكيرك العملي,,,,, وحنا الظاهر الشعب الوحيد فى العالم اللى كلن ينهبنا الله يعينا بس

[الساهر2003]

اول شي ماشاء الله عليك نفسك طوووووويل ورااااايق .

ثاني شي اذا انت لقيت المشكله على قولتك في المواقع الاجنبية .. لية تحاول تبربس في سيارتك ..؟؟

المفروووض على طووول غيرت الحساس ..

والحمد لله على سلامة الموتر والله يعطيك خيرة ويكفيك شره

[سوبر VTC]

الله يجزاك خير اخوي مخايل سحاب
على هذه النصيحة المباركة و باذن الله تفيد اخواننا اصحاب الشيروكيات
و الله يرحم الحال و لا يحيجنا لهم
و الله يطعمك من خير الموتر و يكفيك شره
***
اعرف 3 اشخاص معهم شيروكي كلاسيك تماتيك 2001 يحصل لهم ان القير ما يعشق من الاول الى الثاني و احيانا من الثالث الى الرابع
و ذلك في الشهر مرة تقريبا
طبعا الحل احيانا يعشق القير و يريح من نفسه اذا وصل الكمبريشن او انبير الضغط 3
و احيانا يطفي و يشغل الموتر و يضبط
و يحصل ذلك في جميع الاوقات سواء الموتر بارد ام حار
***
طبعا يوجد راعي ورشة سعودي مختص بالشيروكيات محترم جدا بمعنى الكلمة
يقول نقوم بتنظيف الحساسات و يزين الموتر
ايضا الموتر اذا كنت مسرع ثم وقفت عند الاشارة و طفى الموتر او صار فيه تقطيع و هو واقف
يقول==> ننظف الحساس اللي عند اللهاة و يضبط
قيمة اصلاحة فقط ب30 ريال
طبعا يقول اذا ما ضبط تغير الحساس بواحد جديد
عاد انا اخبر سعره تقريبا ب340 او 370
و للمعلومية قير الشيروكي الكلاسيك التماتيك عملي جدا بمعنى الكلمة
لانه قير لكزس ياباني حتى لو تفك القير تحصل مكتوب من الداخل
Maed In Japan
لكن ربما ان العيب بالحساسات فقط
اضف لذلك ان طبلون العدادات مكتوب من الخلف صنع في اليابان
حتى ان فيه موظف بالشركة العربية
يقول الشيروكي لو الله ثم ان قيره ياباني كان ما انباع في الاسواق
تحياتي لك

[شروكي ربع]

فعلا الأكواد هذه فادتنا كثير ..

وللأسف كثير لا يعرف التعامل معها أو يتجاهلها ..


الغريب ان الوكالة كذلك ما تعرف !!

ولا هالمطيويع الخايس ..

عموما الحمد لله على السلامة ..

والله يعطيك العافية على المعلومات القيمة .

[سوبر VTC]

فعلا الأكواد هذه فادتنا كثير ..



وللأسف كثير لا يعرف التعامل معها أو يتجاهلها ..



الغريب ان الوكالة كذلك ما تعرف !!


ولا هالمطيويع الخايس ..


عموما الحمد لله على السلامة ..


والله يعطيك العافية على المعلومات القيمة .



الله يعيننا واياك
طيب عندك ابو فهد الهاشل و نعم الرجل
له استراحة خاصة خلف الدائري الجنوبي من جهة الجنوب
حول سوق الغنم على طريق الحاير
تبي الشغل النظيف تعال لعنيزة او بريدة :) ;)
تحياتي لك

[SRAAB NAJD]

عز الله ان نفسك طويل تعرف وش العلة بموترك وتروح تفرفر على الورشات بغير لهط فلوس منهم على الفاضي حسبي الله عليهم .

[جمعان 22]

كود المتخلفين اللي بالكراجات اتركهم عنك ....

البهايم والمخلوقات الغير ذكية عموما تمشي بالضرب .... واذا ما لقت حد يضربها ... تخرب وتفسد و تستهبل

عموما ما دام الامر - لا حكومة تدافع عنك .... وان ضربت العامل واخذت حقك منه ولو بسلاح هو ومديره ..بتنسجن -

فلا بد من البحث بالانترنت والاستعانة بالبشر ( الاجانب ) لحل مشاكلنا

وتشجيع المحترمين لفتح كراجات .. ولو يسمي الكراج ( ملجأ المحتار ... من نصب المتخلفين الاشرار ) :d

ويبدأ بمراقبة عمل ( الاجانب ) وتقليدهم .. ولو حرفيا اول الوقت

ويستطيع تطوير العمل لراحة الزبون .. وذلك بان يكون بينه وبين الزبون تعهد مكتوب على الفواتير .. باستعادة القيمة كاملة اذا لم يكن التصليح للعطل المطلوب

[واقعي وعقلاني]

ماشاء الله عليك ...
أنا شخصياً اتجنب اروح للورش نهائياً وأذا احتديت فيه باكستاني اعرفه من عشرين سنه وهاديه الله ومعطيه على قد نيته ..
بس سؤال أخوي مخايل سحاب
أبي موقع في الأرقام الخاصه بالجيب الرانجلر 2000
بصراحه تعبت ادور بالنت ولا حصلت
غفر الله لك

[بدوي جنوبي]

ما شاء الله تبارك الله

الله يزيدك من فضله وعلمه ،،
هذا الشغل والا فلا ،، السائق يحاول يبحث عن المشكله
ولا يستعجل قد يكون حلها بسيط ،، ولا يخسر قير او مكينه
بسبب جهل اصحاب الورش

هنيأ لك علي هذا الانجاز
تحياتي

[أبا مجاهد]

والله انك ذيب

لو واحد ثاني كان4700طوالي

[مخايل سحاب]

مراسل عنيزه
أشكرك على مشاركتك


الساهر
الله يسلمك
فعلا أنا تفلسفت وأخطيت
بس أستفدت من حقيقة هالنصابيين وعرفت انه قليل جدا اللي عنده ذمه خاصه هالاجانب
رغم ان احدهم عنده خبره اكثر من 15 سنه في الشروكيات ومع ذلك يقول توضيب

سوبر
ويجزاك خير
وأتمنى من يملك يوزرات في منتديات اخرى بنشر الموضوع
فحقوق الطبع غير محفوظه :)

السعوديين والخليجيين اكثر ناس عندهم ذمه بس وين تلقى سعودي ميكانيكي؟!

شروكي ربع
نستطيع انا وانت وامثالك الطيبه توعية الناس بما يفيدهم
شكرا لك

سراب نجد
اذا عرفت ان فيها خمسة الاف ريال على موتر موديله ٩٩ والله ان تحفر ليل ونهار لين تلقى له حل ولا تدفع هالمبلغ الكبير

جمعان
الله يعينا مغلوب على امرنا :(

واقعي وعقلاني
هنا تلقى اللي تبي في الرد رقم ثلاثه واربعه
(احفظه في المفضله)
انشاء الله ما ترجع لها من شر
http://www.jeepforum.com/forum/showthread.php?s=&threadid=23788

بدوي جنوبي
حياك الله يا أستاذنا الكبير
منكم نستفيد ونتعلم

ابا مجاهد
شاكر لك جدا
طيبة قلوب ربعنا وحسن نيتهم اعطى فرصه للأجانب يستغلونا
إضافه إلى عدم وجود نظام رادع يضيق على الوكالات والورش

[الجوال1]

والله اني فاك قير الشيروكي ثلاث مرات وبالنهايه طلعت مشكلة حساس لكن اهنيك على المجهود والمعلومات الي تفيد الجميع

[العزوم]

السلام عليكم ورحمة الله وبركاته

فعلا الحياة تجارب وهذا المطلوب من التواجد في المنتديات وهي تبادل الخبرات من خلال ماينمر به في حياتنا اليوميه ...

انا بعرض قصتي ولو انها قديمه شوي ولكن افادتني كثير ;) سنة من السنين امرني الله وشريت جاكوار 83 مكينته 6 سلندر وكان مضى على موديله سنتين بس نظيف مره المهم اخذه واحد من الشباب بيشخص عليه في شارع الثلاثين ايام اسواق الجوهر:D ورجعه بالليل والصباح شغلت السياره والا قرقعه ودخان ابيض وحاله :( واخذه للصناعيه وامر المراكز الكبيره 3 كلهم اجمعو ان القير مخبط ويكلف 7500 وواحد منهم قال نولف له قير فولفو يكلف 4500ريال المهم انا اقتنعت من كلامهم بس بغيت ارخص ويوفقني الله بواحد متخصص بالقير ويسألني وش عندك قلت توضيب قير !!!!!!!

قالي بفحصه واقولك ويطلع من الطنجره مرتخيه مساميرها وشدووها وحتى القير مانزلوه وشغل يدهم150 ريال ومن هذاك اليوم الى الحين وانا معامله تصدقون انه مو مسلم من بلد عربي شقيق :cool: بس امين والا كان يلهط اقل شي الف وخمسميه عالبارد
اسف على الاطاله

[ابو شهد جدة]

هذي مشكلتنا.

وللأسف لايوجد حماية للمستهلك.

لكن الله يوفقك ويعيننا على هذه العمالة.

[M Z A G Y]

مشكور على موضوعك الرائع وازيدك معلومه مهمه عند تغيير الحساس ولكي ينمسح رقم العطل افصل اصبع البطارية لمدة خمس دقائق وبعدها لا يظهر رقم الخطاء ولا تروح لا لمكيويع ولا غيره ووفر مية ريال وهذا عن تجربه شخصه ........ دمتم بخير

[سوبر VTC]

مشكور على موضوعك الرائع وازيدك معلومه مهمه عند تغيير الحساس ولكي ينمسح رقم العطل افصل اصبع البطارية لمدة خمس دقائق وبعدها لا يظهر رقم الخطاء ولا تروح لا لمكيويع ولا غيره ووفر مية ريال وهذا عن تجربه شخصه ........ دمتم بخير


تاكيد على كلامك اخوي
يفضل فتح السويتش اولا ثم فصل البطارية
و هذه عن تجربة
اقرب مثال لتاكيد كلامك اذا فصلت حساس الحرارة اللي عند كوع الماء تولع لمبة===> تشيك افحص المكنية
افصل البطارية ربع دقيقة او اقل و تطفى اللمبة
لان الكمبيوتر يفرمت من جديد

[AMAZ]

انا حصلي موقف لكن الحمد الله ماهو مكلف لكن انضحك علي كانت مسافر ويوم وصلت من السفر وقربت من البيت وكانت السرعة اقل من اربعين اسمع صوت بالكفر الخلفي بعدين لما اسرعت راح الصوت ويوم امش اقل من اربعين يطلع الصوت وكل ماخفف السرعة يخف . رحت يومها لبنشري الله لا يعيده وقالت افحص الكفر طبعا الصوت كان في الكفر الخلفي اليسار قام الاخ ابو *** ورفع الكفر بالعفريته وفحصه وقال هذا انظف كفر عندك . لكن يمكن يكون من القماش . بعدها رحت لورشة وسمع الصوت قال هذا قماش وغيرت القماش الخلفي كله . ومازال الصوت بعدها رجعت للمهندس مره ثانية الا ووجه ميت ويحاول يتهرب مني قالي شوف بكره الصباح تجيب السياره من شان انا خايف يكون من العكوس الخلفيه قالت زين المهم رحت واثناء ماني ماشي بالطريق وتذكرت فحص ابو*** يوم فحص الكفر رفع الكفر بالعفريته قالت يمكن الكفر كان محبل لكن يوم رفع التحبيل يرجع وفعلا مريت على بنشري ثاني وقالت غير الكفر وغيرت الكفر وراحت المشكله ويوم ناظرت الكفر الا وحصل قطع تقول مقطوع في مشرط وكان يطلع منه التحبيل لكن يوم نرفع السياره بالعفريته يرجع . وانته مشكلتي بعد خساره تقريبا 500 ريال ولو ماالله الهمني كان ذاك خسرني عكوس .

تم تعديل في المشاركة بواسطة المشرف
بدوي جنوبي

[سوبر VTC]

قير الشيروكي التماتيك اذا خرب يباع عندنا بالقصيم مع الضمان ب1700ريال
طبعا اخو الجديد اللي هن استخدام ياباني سيارات شيروكي جايات من اليابان ماشيات على 60 او 80 الف فقط
يا بلاش :)
ايضا توضيب المكينة كامل بساتم اصلية مع مسح الراس
ب2800ريال===> مع شغل اليد
و ميزة مكينته خصوصا 6 سلندر انه عمليه جدا لو تلاحظ يفور الاديتر 50 مرة و لا تخبط :)
احد الربع موتره احتمى مره بزيادة بسبب تهريب في طبة الاديتر
الان له سنة و نص ما شاء الله اذا شغل الموتر و هو بارد يطلع لقلقلة لبنوز البساتم ثم اذا رقا الزيت اختفي الصوت
يسافر عليه و يروح لكل مكان و هو على الحال
علما انه لو يبي يوضبه بساتم اصلية مع سبائك متحركة و ثابتة
يمكن يكلف بحدود 2300 مع شغل اليد
لانه البنز او الخابور اللي يمسك بين البستم و ذراع البستم متوسع من الحرارة عشان كذا يسبب لقلقة
ايضا سبايك الكرنك متوسعه من الحرارة
فيطلع هذا الصوت
يا حبيلك يالشيروكي :d
جميع قطع غياره رخيصه

[سوبر VTC]

اخوي اماز
اي والله انك صادق
الحمدلله
زين اللي ما قال لك عكوس و لا تنسى بعد رمان العكوس

[سطام vip]

يالله جبت طاري جيركو الله لا يوفقهم وحسنا الله عليهم

ذكرتني فيهم انا لي سالفه مع فورد اكسبلورر وحطيتها هنا في المنتدى

احذر من هذي الورشه بس انا طقيت لهم الفلوس 4600 ريال

اذا ماني غلطان في المبلغ وتبي الصدق عورني قلبي شكل المشكله

في السياره مثل ما قلت ماهي الا حساسات واهم قالوا وضبنا القير

على العموم راح الي راح والله يعطيك العافيه على هالتنبيه

والله يعطيك من خير سيارتك ويكفيك شرها

[الربذي]

لا انا اقولك في جمله صغيره فقط
العلم نور والجهل ظلام
الله يزيدنا ويزيدك اخي علما وتنويرا
هذا الانسان الفاهم المتعلم الذكي الباحث من الصعب استغفاله
كثر الله من امثالك عشان تادب النصابين عندنا امثال ابو ****


تم تعديل بواسطة المشرف
بدوي جنوبي

[الربذي]

يعني تنصحنا بالجيب دام ادخل الكود ويطلع لك المشكله تصدق احسن من اليباني الي صجونا فيه
تصليحه سهل لو غيرك بهذله وخسره وبالاخير باعه تحت الماكرفون بعد ان دفع على تصليحه الاف مولفه واثاري تصليحه بكبسه زر من الكي بورد فقط وشغل يد ب30 ريااااال ولا تغيير زيت
مااقول الا ماشاء الله عليك ربي يحفظك ويكثر امثالك قصتك نورتنا وفتحت عيونا على مستر قوقل الخادم المطيع 0

[M Z A G Y]

تاكيد على كلامك اخوي

يفضل فتح السويتش اولا ثم فصل البطارية
و هذه عن تجربة
اقرب مثال لتاكيد كلامك اذا فصلت حساس الحرارة اللي عند كوع الماء تولع لمبة===> تشيك افحص المكنية
افصل البطارية ربع دقيقة او اقل و تطفى اللمبة

لان الكمبيوتر يفرمت من جديد


كلاامك سليم ميه بالميه ماشاء الله عليك ..... والظاهر بنزور القصيم نشيك على الشروكي بس وش تنصحن فيه اذا انك هناك وجربت شغل ورشه مضبوط لاعدمتك يابعدي

[سوبر VTC]

كلاامك سليم ميه بالميه ماشاء الله عليك ..... والظاهر بنزور القصيم نشيك على الشروكي بس وش تنصحن فيه اذا انك هناك وجربت شغل ورشه مضبوط لاعدمتك يابعدي


هلا اخوي مزاجي
الله يحييك
عين غطا و عين فراش
و ان بغيت الارقام ارسلتهن لك على الخاص
عندك ورشة ابو تركي الفهيد
و ورشة ابو سليمان القيضي
ببريدة
و عندك ابو علي الثويني ==> ورشة صحارى
و ابو ابراهيم الرشيد ==> ورشة المروى
بعنيزة
كلهم محترمين
لكن افضل تعامل و تقدير ابو ابراهيم الرشيد
قمة التواضع و الانصات و الاحترام
و عندكم بالرياض ابو فهد الهاشل له استراحه خاصة

[الفضلي اللامي]

جزاك الله خير أخي مخايل سحاب على الموضوع الرائع...
أخي سوبرفتك أين نجد أبوفهد الهاشل وهل له رقم جوال لا هنت ...

[مخايل سحاب]

أشكر الجميع على الإطراء الجميل

Mzagy
انا فصلت البطاريه في نفس اليوم اللي صلحت فيه السيارة بس ما انحذف الرقم
بس الله حق قعدت مدة دقيقة بس، يعني تهقاه لازم خمس دقايق؟

سوبر VTC
ما شاء الله أسعاركم رخيصه والله مهوب مثل اسعار تشليح المطيويع حسبي الله عليه.. إحتكار
الله لا يهينك ارسلي على الخاص ارقام التشليح عندكم اذا هي معك
جزاك الله خير

[مخايل سحاب]

جزاك الله خير أخي مخايل سحاب على الموضوع الرائع...
أخي سوبرفتك أين نجد أبوفهد الهاشل وهل له رقم جوال لا هنت ...

حياك الله يا ولد عمي :)
الكثيري

[Bader-M]

عندما تدخل الصناعية

يعتبرونك اصحاب الورش سيارتك (فار تجارب ) يتعلمون عليها
الا من رحم ربك


..........

استفدنا من تجرتك و كذالك الاعضاء

الله يعطيك العافية و ما قصرت

تحياتي اليك

[بـلـيـهـان 1]

الله يجزاك كل خير عزيزي و هذه المشاكل دائما تحصل و تكون مصدرها شي بسيط و لكن الاستغلال هو الذي يضخمها و ما همهم إلا كم ريال و كم ألف ولا همهم الضمير و الدين ، شكرا لك على النصيحه القيمه التي لا بد من الكل قرائتها ، تحياتي لك و بالتوفيق

[M Z A G Y]

هلا اخوي مزاجي

الله يحييك
عين غطا و عين فراش
و ان بغيت الارقام ارسلتهن لك على الخاص
عندك ورشة ابو تركي الفهيد
و ورشة ابو سليمان القيضي
ببريدة
و عندك ابو علي الثويني ==> ورشة صحارى
و ابو ابراهيم الرشيد ==> ورشة المروى
بعنيزة
كلهم محترمين
لكن افضل تعامل و تقدير ابو ابراهيم الرشيد
قمة التواضع و الانصات و الاحترام

و عندكم بالرياض ابو فهد الهاشل له استراحه خاصة


ياهلاابك زوود يابعدي انت ماتقصر تسلم العيون وراعيها ....... ابي ارقامهم لاهنت وابي الهاشل او عنوانه الله يجزاك الجنه ووالديك والجميع اللهم امين

[M Z A G Y]

[quote=مخايل سحاب;1943593]أشكر الجميع على الإطراء الجميل

Mzagy
انا فصلت البطاريه في نفس اليوم اللي صلحت فيه السيارة بس ما انحذف الرقم
بس الله حق قعدت مدة دقيقة بس، يعني تهقاه لازم خمس دقايق؟

------------------------

من واقع تجربه شخصيه يابعدي فصلت البطاريه لمدة خمس دقايق وراح رقم العطل وكان عندي رقم العطل p720 وهو حساس بالقير حق التغيير بالكيلو .. جرب خمس دقايق منت خسران شي يابعدي ,,,,,,,,, وتحياتي لك ..................

[المميـز]

ماشاء الله عليك

تفكيرك تمام

والحمد لله على سلامة الموتر ..

وماتشوف شر ان شاء الله

[سوبر VTC]

اخواي مزاجي
لاهنت
تسلم عيونك :d
لك رسالة على الخاص
تحياتي

[الفضلي اللامي]

لله يحييك يا ابن العم مخايل سحاب :) :) :)
و البركة بالمنتدى الي جمعنا :good: :good: :good: ...

[الفضلي اللامي]

هلا اخوي مزاجي

الله يحييك
عين غطا و عين فراش
و ان بغيت الارقام ارسلتهن لك على الخاص
عندك ورشة ابو تركي الفهيد
و ورشة ابو سليمان القيضي
ببريدة
و عندك ابو علي الثويني ==> ورشة صحارى
و ابو ابراهيم الرشيد ==> ورشة المروى
بعنيزة
كلهم محترمين
لكن افضل تعامل و تقدير ابو ابراهيم الرشيد
قمة التواضع و الانصات و الاحترام

و عندكم بالرياض ابو فهد الهاشل له استراحه خاصة

أخي سوبر فتك إذا تكرمت للمرة الثانية وصف ورشة أبو فهد الهاشل أو تلفونه

[الفضلي اللامي]

جزاك الله خير أخي سوبر فتك على المعلومات الكافيه و الوافيه ...
وصلت رسالتك على الخاص ...ولك مني جزيل الشكر بعد شكر الله ....

[Esam77]

هلا اخوي مزاجي



الله يحييك
عين غطا و عين فراش
و ان بغيت الارقام ارسلتهن لك على الخاص
عندك ورشة ابو تركي الفهيد
و ورشة ابو سليمان القيضي
ببريدة
و عندك ابو علي الثويني ==> ورشة صحارى
و ابو ابراهيم الرشيد ==> ورشة المروى
بعنيزة
كلهم محترمين
لكن افضل تعامل و تقدير ابو ابراهيم الرشيد
قمة التواضع و الانصات و الاحترام


و عندكم بالرياض ابو فهد الهاشل له استراحه خاصة



الله لايهينك يالحبيب عنوان ورقم ابو فهد الهاشل
وهل هو جيد في الشيروكيات ؟

وجزاك الله خير

[اشجعهم]

نفس المشكلة صارت معاي

وغيرت الحساس ولا صار شئ

ارجو الحل

اخوي مخايل اذا ممكن رقمك على الخاص

وشكرا