عندى استفسار عن جيب تويوتا الربع لاند كروزر..؟؟؟

[jemi_soul]

السلام عليكم

اخوانى انا اعتز برايكم واعتز بهذا المنتدى الى اكثر من رائع بناسه واهله.

اخوانى انا حبيت اشترى سياره لى وللزمن من ناحية الاستعمال وهى جيب ربع تويوتا لاند كروزر لكن قلت استشيركم انتم يا اهل الخبره فى هذى السياره واخذ رايكم :

1- انا عملى يبعد عن بيتى 100 كيلو رايح 100 راجع فى اليوم هل يصلح قصدى موتر يمشى ولا بطى وينسم عليك الهواء من كل مكان؟؟؟


2- هل يستهلك بانزين واجد؟؟


3- الموديلات الجديده مثل 2009 مركبها مريح ولا تكسر الظهر مثل ما سمعت؟؟


فيدونى جزاكم الله خير عنى وعن كل واحد راح يستفيد من هذا الموضوع.

[ABO AL-HESH]

وعليكم السلام ورحمة الله وبركاته
هو من ناحية التحمل ما عليه كلام..

لكن يبقى ثلاث نقاط :ـ
1ـ الراحه معدومه حتى بالجديد .
2ـاستهلاك زائد للبنزين وخاصه فوق الـ130
3ـسعره المبالغ فيه .. ويمكنك بسعره ان تشتري .. 1ـ سفاري 1 ـ2ـ اف جي ـ 3ـ اكستيرا وبالنسبه للاكستيرا ترا صرفيته للبنزين معقول جدا ويغطي على الددسن والكامري وهو سته سلندر...
هذا ما لدي وعليك بالاستخاره..
محبك :ابو الهش

[R7al-85]

وعليكم السلام والرحمة
ما ادري وش اقول اخونا ابو الهش ما قصر

[الربذي]

تبي الراحه ابعد عنه
تبي السلامه ابعد عنه
كل شي مقدر ومكتوب لكن مو مريح ابد سبق وان سقته انت سوقه ووشوف تحس انه يبي يقلب اذا لفيت يبي سواق محترف ومتاهب دائم لانه ماهو راكد وفته سريعه جد يعني مجرد تحرك الطاره وانت مسرع يحذف فيك حذفه ياستار 0
ارشح الباترول لسفر خذ ولد

[خالد030]

يارجال الربع موتر والجديد راسي اكثر من الاول

[غضنفر]

1- نعم ينسم وبقوة
2- نعم وبقوة اذا تعديت 140 لكن اذا ثبت دعستك على 120 صرفيته مقبولة
3- غير صحيح مركبها اقشر (افضل من 2006 لكنه يضل غير مريح)

بالنسبة لحالتك
الموتر ما يناسبك

فكر في

فورتشنر
اف جي
اكستيرا
فتك

[طبعي شمالي]

خذ سفاري

مع احترامي للتويوتا

على فكررررره انت ذكرت نقظه مهمه >>> لك وللزمن تويوتا ربع ماينفع نهاااااااااااااائي هو حق بر وبس

[RJA]

لابد ثم لابد انك تجرب ركوب السيارة قبل لاتشتري...
ترى الناس رايها ماهو واحد..
وفي نظري اذا مانت راعي مقانيص ومطراد ....فيه خيارات افضل

[سوبر VTC]

لابد ثم لابد انك تجرب ركوب السيارة قبل لاتشتري...




اؤكد على هذا الكلام و بقوة حاول انك تستاجر الموتر و تجربه او تاخذ حق احد ربعك و اي موتر تبي تشريه ما يمنع انك تستاجر
عشان ما تحسف مستقبلا انك شريته
(ان كنت تهوى الموتر و هو بنفسك خذه و لا تشاور لكن تحمل المناقز و ضيق المركب)
(الموتر يتعبك وقت السفر)
انا اخبر مره اول ما طلع م2003 رحت مع احد الربع المهم تعدينا طلعت الغاط و نضرب هوية خفيفة بالزفلت و انكبت بيالة الشاهي على ثوبي :mad:
غير كذا كلوتك توجع من شين المطب
غير راسي اطلاقا بالخط ==> انواع المناقز
ايضا لا توجد به مواصفات نهائيا
نصيحتي خذلك سفاري2 لؤلؤي تماتيك و راحة و مثبت سرعة و ثلاجة و دفلوك و سعره معقول جدا
او اف جي او فورشنر
تحياتي

[المتليك]

خذ الربع السفاري
اريح وافخم
وبالتوفيق ان شاء الله
تحياتي

[الربذي]

اقتباس -غير راسي اطلاقا بالخط ==> انواع المناقز
ايضا لا توجد به مواصفات نهائيا
نعم وصف ولا اروع واذكر في يوم واحد وقت امطار بنفسي اسعفت راعي ربع لقيته طايح من السياره الربع وكان علينا مطر ومحتاس الرجل من الطين وكان يون وسيارته منقلبه بعيدعنه وطاح اول ماقلب سبب الانقلاب نقعة ماء
الحادث الثاني بنفس اليوم وانا راجع من الدوام لربع منقلب يبعد عن انقلاب الاول 15كم تقريبا ونفس السبب كان يقوده رجل ومعه زوجته وابنتهما سنه وراحت عوض الله اهلها خيرا لحم مفروووووووووووووووووووووووووووووم تحت الربع انا شخصين واقف على الحادثين بنفسي زوجته اغمي عليها من هول الصدمه عندما علمت ان فلذت كبدها تحت السياره وقد انسحقت عظامها الرقيقه تحت ثقل الحديد وقساوة الاسفلت
وبعدها كرهت شي اسمه ربع تايوتا 0
غير اكثر من ثلاث انقلابات وامامي بالنفود ورح للورش شف الهباااااااااال اغلبهن انقلالالاب 0
وانت بكيفك لكن طلبت النصيحه والمشوره وربي يوفقنا واياك ويقاناواياكم شر الحوادث0
رجاء لاتنسى دعاء الركوب وقبله دعاء الخروج من المنزل له علي عجائب والفضل لله سبحانه وتعالى وحده 0

ملاحظه اخوي الميتاليك رجاء الانتباه ان شاء الله تكتب هكذا ان شاء الله 0
اخوك 0

[Abu Saad]

شف ياعزيزي ..
انت راعي خط واي شخص راي خط يبحث عن الراحة وتعتبر في المقام الاول بعد السلامة .
وانا ارى ان الربع مفارقته الراحة ومفارقته السلامة .
يعني مفلس من الثنتين ...
الشباب فوق ذكرو لك خيارات مناسبة وعليك بالتجربة والاستخارة .
الله يوفقنا وياك .

[كتاب]

إذا كنت ناوي تستعمله أيام العطل تتمشى به على راحتك بين النفود والشعبان أو على شاطئ البحر فهو أخو قلبك لكن إذا كنت تبي سيارة ( تطير ) بك من البيت للعمل وبالعكس وخايف من صرفية البنزين فاترك أي سيارة غير الكامري

إذا أخذتها جديدة فالله يبارك لك فيها وإذا هي مستعملة فأول شي تاخذها إلى ورشة وتغير بواجيها وفلاترها وتعمل لها تصفية مكينة وبتشوف . ما راح تصدق أنها أربعة سلندر وبتحسب أنها 6 سلندر .

[الربذي]

أدى حادث انقلاب وقع صباح هذا اليوم على طريق حائل – المدينة وتحديدا جنوب مدينة الحليفة بحوالي 3 كيلو لسيارة من نوع جيب "ربع " إلى وفاة شخص وإصابة مرافقه بإصابات بليغة.. وعلمت «إخبارية حائل » أن الحادث المروري المؤلم كان سببه انفجار احد الإطارات. تم نقل المصاب إلى المستشفى فيما تم نقل الجثة إلى ثلاجة الموتى لإكمال الإجراءات باشرت الحادث الجهات الأمنية بمدينة الحليفة .
«إخبارية حائل » تعزي أهل المتوفى في مصابهم داعين الله أن يدخله فسيح جناته وأن يلهم أهله وذويه الصبر والسلوان. إنا الله وإنا إليه راجعون

http://www.swahl.com/up/m139/swahlcom_d8f4e.jpg
تم إضافته يوم الأربعاء 08/10/2008 م - الموافق 8-10-1429 هـ الساعة 2:42 مساءً

[BLAZER-1991]

كفوووو والله بالاخواااااان ماقصروا
بس في واحد شفته راعي ربع ولا امداني اصور وش كاتب عليه من ورى
كااااتب ((اذا لفيت وخروا عني ترا ممكن اقلب )) هههههههه

[kbobe]

انا معي ربع 2010 مميزاته 1 خفيف ما تحس ان معك جيب 2 صغير ما تبلش بزحمه ويشيل 3 قوه -- عيوبه 1 تنسيم والنزين على حسب

[kbobe]

وعلى فكره 2010 اريح من الاول والله يوفقنا

[صياد االحره]

السلام عليكم
الموضوع قديم
لكن شدني له رد اخوي سوبرVTC ابي استاجر جيب ربع باي مكتب احصله وهل يوجد بالغربيه


اما بالنسبه للجيب الربع احسه مصنوع للبر فقط وللوعر يعني الي يبيه للخطوط الي فوق 100 كيلو سرداد مرداد نصيحه لاتاخذه الا اذا كان الطريق صحراوي وفيه وعوره في هاذي الحاله لك ولالزمن لا كن ضمنه وسو صيانه كل كم شهر


من واقع تجربه مستخدم للجيب الربع

الجيب يعز راعيها ولا يذله

[sahmdan]

مافيه اي نوع من الراحة
متعب جدا ويكسر الظهر
وبالخط مزعج جدا جدا
ولو فيه عج بسيط. الموتر يلعب بشكل ملحوظ
يعني معدوم السلامة

انا كان معي 2014 وبعته لهالأسباب
واخذت فتك ربع 2014 اتوماتيك
خط
بر
قوة
راحة


وهالحكي مهب منقول من احد
انا مجرب الاثنين

والاستخاره قبل كل شي

[كاسر الميل]

اخوي الكريم انا من قطر شوف لك نيسان باترول الجديد من موديل 2010 الى موديل 2012 حجم المكينه 320 اس اي لو تصيده ستاندر يجيك مكيفين ثلاجه احسن من كذا مافي رهيف وقوي وموتر خطوط وتلاقي سعره من 115 الف ريال الى 140 الف ريال شرط النظافه واذا بغيت تدور ادخل على موقع قطر سيل او كار سمسار قطر واذا بغيت تفحص مالك الا مركز الخبراء الالمان هو الاحسن وكلهم على طريق سلوى اول ماتدخل قطر تلاقي المعارض كلها على نفس الخط وياكثر اخوانا السعودين اللي يشترون من عندنا والله يوفقك يارب

[salih100]

الربع سياره قريه فيها وديان وجبال ونفوذ فقط

لا يصلح للسفر ومركبه زفت حتى الاماميه
تاني البانزين يمشيك 370 فقط واذا دعست اقل من كذا بكثير

نصيحه لوجه الله ابعد عنه
اذا انت متعصب تويوتا خذلك فورشنر
واذا ما عندك مشكله خذ فتك ربع ما تندم

[zayed98]

الربع الشاص سيارتين الامان عكسي فيهم الي بيفهمني

الراحه مرتبطه بلامان

بسبب لك امراض منها الاحتكاك في الظهر والام الرقبه


سياره معدومة الامن والامان
لونقلبت ابسط شي شلل رباعي ولو الله معاك تتهشش عظامك



ذكر مره وانا عند اشاره انصدم ربع من ورا صدمه واحد معاك رنج روفر راعي الربع انشطر راسه ورقبته انكسرت ! مع ان الصدمه ماكانت بذيك القوه بسبب رداوة الكرسي حق الربع !

[جيRX-]

التجربه خير برهان يمكن انت تشوف ان راحته معقوله وغيرك يقول مهنا راحه

[كم كيلو باقي]

والله يا اخي انا اختلف شوي مع رايك وراي الاخوان الكرام
أقترح عليك بمبلغ 130 الف تشتري سيارتين
فورد كراون فكتوريا 2009 بحدود 60 الف
جيب اف جي 2008 بحدود 70 الف

الجيب ماينفع للخط ابد ابد
عدا الجيوب الغالية مثل الباترول الجديد والاندكروزر

[فواز الوايلي]

السلام عليكم أخواني عندي استفسار بسيط بخصوص شاشة جيب الربع الجديد. كيف احول العداد للشاشه ؟

[بيليه9]

السلام عليكم
نصيحتي من واقع تجربة عشر سنوات
ابعد عن التويوتا بالتردد
وخذ فكتوريا وريح بالك
ربي يحفظك ويوفقك