وش رايكم هايلوكس دفرنسين ولا ددسن دفرنسين؟؟

[يا لبيه]

السلام عليكم
أحبابي أنا عزمت أن شاء الله على أخذ موتر هايلوكس 2009 دفرنسين
أو ددسن دفرنسين والله يعينا على ألأقساط

فماذا تنصحووني؟؟؟؟؟؟؟؟

[ابوسعودد]

الله الله بالاستخاه قبل كل شي
والله يكتب الخير لك ان شاء الله

[ديزب]

وعليك السلام ورحمة الله وبركاته .
انصحك لاتاخذ تقسيط مهما كلفك الأمر لو تمشي رجلي
الدين بتشديد الدال وفتحها اللي هو التقسيط يسمى (قطاع الرزق المقبل )
لو ما فيه من الغبن الا ان المقسط يتعب ويكرف ويتبهذل وصاحب المعرض او الوكالة مرتاح وآخر الشهر يقوم بحلب الموظفين
اخي ارجوك ان تنظر بعين البصيرة :
الفلوس اللي ناوي تقسطها جمعها مهما طال الزمن واشتر لك سيارة جديدة او مستعملة ولا تنس انك بعد ما تركب السيارة يكون ما عليك دين او تقسيط .
هذي نصيحة من مجرب وانت بكيفك والله يوفقني واياك وجميع المسلمين لكل خير ..آمين

[Abu Saad]

انصحك لاتشتري لاهذا ولاذاك . من واقع تجربة الاثنين جميعن .
اي ونيت دفرنسين 4 سلندر عزمه بااااااااااااااااااااارد .
بالعربي اي سيارة دفع رباعي 4 سلندر لاتقربها .
هذي نصيحة مجرب وان شريت واحد منهن ستذكر كلامي هذا جيدا.
وبالتوفيق .

[طبعي شمالي]

ددسن دفرنسين افضل

اماا اذا تبي دفرنس خذ هلي

وبالنسبه للتقسيط كل العالم تقسيط الله يعين بس

[شامخ ألهيلا]

اخوي الاول هايلكس

والثاني عندك الي زي الددسن اتوقع اسمه نيفارا من نيساان

[ولد العويني]

ياخوي صدقوا الاخوان التقسيط يذبح الادمي


انا كنت ناوي على جيب لكزس Lx 570 وبدفع 150 الف كاش والباقي اقساط !

لكن فكرت فيها ورانا عرس ومصاريف

وابشرك اخذت اف جي فل ب120 ومبسوووووط بالحيل يكفي انه باسمي



ماسمعت المثل وش يقول ؛؛؛ مركوري مزيون احسن من رنج مديون

وانت براحتك

[ابودعسان]

عليك بمشاورة اصحابهن احسن لك
واذا حصلت لك وحده منهن جربها واحكم بنفسك
لان كل وحده له مميزات
وبالتوفيق

[راعي ددسن]

هلا اخوي انا انصحك بالددسن ولا خذلك بقيمة وحدة منهن جيب مستعمل ولا شاص احسلك من الددسن والهايلكس بعدين الهايلكس غالية بمية وشوي والددسن بسبعين الف وزيادة الا خذ جيب مستعمل ابركل لا اقصاد ولاهم وان شريت وحدة منهن الله اباركلك والله يعطيك من خيرها ويكفيك شرها واسف على اني طولت عليكم

[مساير الليل]

انصحك لاتشتري لاهذا ولاذاك . من واقع تجربة الاثنين جميعن .

اي ونيت دفرنسين 4 سلندر عزمه بااااااااااااااااااااارد .
بالعربي اي سيارة دفع رباعي 4 سلندر لاتقربها .
هذي نصيحة مجرب وان شريت واحد منهن ستذكر كلامي هذا جيدا.

وبالتوفيق .




لا أزيد على كلام آخوي أربعه سلندر في دفرنسين ماتنفع

وآنصحك بالجيب عندك أكستيرا 6سلندر من نيسان حلو وسعره مناااسب
مثل سعر الهايلكس دفرنسين

[سوبر VTC]

و عليكم السلام و رحمة الله
حلاة الددسن او الهايلوكس على كلام الشيبان :d
غرفتين و سطح :)
انا انصحك بالددسن افضل لك بحكم الراحة و سعره اعتقد معقول جدا
اما الهايلوكس ميزته غمارته و سيعه جدا و عدادته و طبلونه انيق جدا
و عيبه بدي خفيف جدا و يلزمك مقابل ذلك تركب دعامية امامية لان الصدام فيبر و لا يوجد دعامات قوية داخلية
و الهايلوكس سعره مبالغ جدا فل كامل تماتيك 2008 شراه احد الربع ب85000الف بدون مثبت سرعة و لا ثلاجة و لا دفلوك و لا هزاز ...الخ
لاتنسى الاستخارة
تحياتي