سيارة سمعنا عنها الكثير ديزل !! فهل أحد جربها ؟ وينصحنا بشرائها [الأرشيف]

مشاهدة النسخة كاملة : سيارة سمعنا عنها الكثير ديزل !! فهل أحد جربها ؟ وينصحنا بشرائها

يا لبيه

16/10/2008, 05:57 PM

السلام عليكم ورحمة الله بركاتة
أحبتي الكرام
سمعنا عن ددسن نيسان ديزل تيربو سواء من 2006 وفوق
سمعنا أنها أفضل من البنزين وعزمها ممتاز وتطوف على البنزين

تكفون الي جربها يقول لي
وأ يعرف أحد يجربها

أنا بشريها أن شاء الله وبأنتظر الموديل الجديد 2009 وبأخذ غمارة
والله يعينا على الأقساط
بس أبي شوركم لا عدمناكم

باوزير

16/10/2008, 06:18 PM

عندنا سيارات العمل نيسان تيربو ديزل في الخط عزمها زين بس ما جربتها في البر لانها سيارة العمل

يا لبيه

16/10/2008, 06:30 PM

مشكور با وزير على الأيضاح
وأن شاء الله نسمع البقية

انا أحترت بين الدي ماكس أيسيزو
والداتسون نيسان

ABO AL-HESH

16/10/2008, 06:42 PM

والله ياخوي وش لك بالديزل .. البانزين ممتاز فل 30 ريال ويمشيك 600 كيلو ..
وصيانه سهله ومافيه ازعاج من المكينه ولا ريحه.. وقطع الغيار تلقاه بالبقالات ورخيصه..
اما عن قولتك الديزل انشيط فاتوقع ان كانه تيربو اكيد بتكون انشط بس ترا عزمه يموت بالنفود والطلعات..

يا لبيه

16/10/2008, 06:50 PM

أخوي أبو الهش >>ما أدري كذا هو ولا لا
حياك ربي يالغلا
والله مذكور لي أن الديزل ددسن غمارة أفضل والله أعلم
ومشكور على طلتك

حمد الأحمد

17/10/2008, 01:05 PM

صقار سدير

17/10/2008, 01:27 PM

اخوي حياك الله واسال الله ان يكتب لك الخير ويسر امورك
لكن اذا كنت تفكر بالديزل فلا تاخذ الا دي ماكس ايسوزو لان الايسوزو لعبتهم الديزل
خصوصا الجديد صوت مكينة ما تسمعها وشكله حلو وعزم في النفود حلو مايعرفه الا الي جرب او شاف
وانا ماادري عن الددسن لكن اتوقع مايجي زي الدي ماكس
واذا ودك تاخذ بنزين فخذلك هايلكس -طبعا دفرنسين لان الدفرنس نازل وشكله ما هو طيب_اقوى وافضل من ناحية الصيانة حتى الوكيل صيانته ممتازة

مواسي الطعوس

17/10/2008, 01:52 PM

االموضوع طويل عريض . وانا ودي اقيل (انام)

لكن انا مجرب الديزل (الددسن) والايسوزو (والهايلكس على الخفيف)

** ودي اقول لك شي لكن مارايح تصدق . الديزل عيبه الثقل والطلوع يضعف .

** الددسن تسوي شي في الطلوع (اللي مايصدق يجرب . والا يحط 500 ريال ) ومستعد اخليه يشوف ويجرب .مثلا طلعة الغاط : ابتعدى الكوبري باتجاه الطلعه وانا امشي 120 والموتر بالخامس اذا ماوصل 135 قبل نهاية الطلعه فلوسك لك واذا وصل تراني اباخذ فلوسك . واتحدى على هذا سيارات البنزين .

علما انها غمارتين / دبل / جنط 16/كفر 245.واتحدى الدفرنس وغماره واحده اي سياره .

** وفيه شغلات ثانيه توجع راسك كان اقولها لك . واذا طلبتها ابشر بسعدك

مراسيل الوفا

17/10/2008, 01:57 PM

صحيح عزمها قوي

واحد من الربع مشتريها

وفعلن تغيرت من الـ6 وطالع

لكن عليها كبوت قبيح المنظر

ديزب

17/10/2008, 02:08 PM

وعليك السلام ورحمة الله وبركاته .
انصحك لاتاخذ تقسيط مهما كلفك الأمر لو تمشي رجلي
الدين بتشديد الدال وفتحها اللي هو التقسيط يسمى (قطاع الرزق المقبل )
لو ما فيه من الغبن الا ان المقسط يتعب ويكرف ويتبهذل وصاحب المعرض او الوكالة مرتاح وآخر الشهر يقوم بحلب الموظفين
اخي ارجوك ان تنظر بعين البصيرة :
الفلوس اللي ناوي تقسطها جمعها مهما طال الزمن واشتر لك سيارة جديدة او مستعملة ولا تنس انك بعد ما تركب السيارة يكون ما عليك دين او تقسيط .
هذي نصيحة من مجرب وانت بكيفك والله يوفقني واياك وجميع المسلمين لكل خير ..آمين

قناص خلاوي

17/10/2008, 02:14 PM

اللي يقول الديماكس اقوى من الددسن أكيد ما جرب الددسن الجديد
الددسن غطى على الديماكس بالقوة والدبل عصا ماهو كهرب
وأقل سعر من الديماكس
إذا انت صامل على الديزل لا تتعدى الددسن اخوي

مخاوي الكشات

17/10/2008, 03:45 PM

يا أخوي انا مستعجل وبأردي برد مختصر .. لكن لا تقارن ديزل ببنزين >> مافيه مقارنة البنزين أخف وأقوى عزم

مواسي الطعوس

17/10/2008, 05:27 PM

يا أخوي انا مستعجل وبأردي برد مختصر .. لكن لا تقارن ديزل ببنزين >> مافيه مقارنة البنزين أخف وأقوى عزم

***********************************
مع احترامي الشديد لك اسمح لي اقول لك ماعندك سالفه .

الديزل الددسن افضل عزم بمراحل عن البنزين وعن تجارب نفود وخط والفرق الاكبر بالطلعات .

مقلع الرمث

17/10/2008, 05:36 PM

والله واحد من الجماعه معه ددسن ديزل تربوا رحت انا وياه لم ابها ونتمشى هناك والله عجزت الحق مع الطلعات وانا معي باث فاندر 2007 مكينته 4 لتر

صلهامه

17/10/2008, 05:45 PM

((والله واحد من الجماعه معه ددسن ديزل تربوا رحت انا وياه لم ابها ونتمشى هناك والله عجزت الحق مع الطلعات وانا معي باث فاندر 2007 مكينته 4 لتر ))

كلامك صحيح 1000 %

معى سيارة ديزل مكينة ألمانى 5 سليندر تيربو ما خليت طعس فى الثمامه الا طلعته
وفى أبها من منتزه السحاب الى شاطىء الشقيق ما خليته ولا إزعاج ولا شي

فيه عيب اللى ما يعرف للديزل لا يتوهق به يعنى معاملته مهيب مثل معاملة البنزين

وسلامتكم

ford

17/10/2008, 06:33 PM

طيب الايسوزو ديزل 3 لتر تيربو

الددسن كم لتر؟

AMAZ

17/10/2008, 07:01 PM

نصحية لا تشتري سياره ديزل لن جميع سيارات الديزل بالسعودية فاشله والسبب يعود إلى نوع الديزل حيث ان الديزل الموجود عندنا غير جيد وذلك لوجود شوائب بعكس الدول الثانية وخصوصا اورباء حيث انه يوجد عندهم ثلاث انواع .

البرحه

17/10/2008, 07:15 PM

انصحك بالبنزين

ومافيه مجال مقارنه مكينه ديزل وبنزين
كل وحده لها خصائص واستخدامات غير الثانيه

مخاوي الكشات

17/10/2008, 07:53 PM

***********************************
مع احترامي الشديد لك اسمح لي اقول لك ماعندك سالفه .

الديزل الددسن افضل عزم بمراحل عن البنزين وعن تجارب نفود وخط والفرق الاكبر بالطلعات .

وهذا وأنت محترمني كيف لو أنت ما احترمتني >> مشكور على الأخلاق الرفيعة ..

أفضل عزم كلمة قوية شوي .. عفوا قوية مرة ..

الددسن البنزين أخف وأقوى عزم ومكينته 2400 و160 حصان ..

الددسن الديزل 2500 لكنه ليس أخف وليس في الحقيقة والوقع أقوى .. كللامك عن الددسن الديزل الديزل طبلونه 180 وإذا كان الموتر نشيط يجيب بالكثير وبالصدف 175 بدون فصلة لأن ماله فصلة .. والبنزين يصك 200 بالراحة شرط ما يكون يواجه هواء .. كلامك عن الديزل وممشاه في النفود هذا حتى الغبي يعرفها بأن ممشى الديزل في النفود أفضل والسبب أن الديزل مايحفر وكارونته مشروكة ودفرنسه قوى لذلك اللي يرهمون تلقاه يركب دفرنس ديزل وهذا شيء معروف .. لكن مهوب معناه أن ممشاه أحسن أنه أفضل لا البنزين خفيف ومن قوته يحفر ولكنه في المراقا أفضل وفي التطعيس أفضل ليه لأنه خفيف وةعزمه قوي ويطرب ويرقى من مسافات أقل .. طيب مثلاً الهليكس 2005 إلى 2002 كان البنزين مكينته 2700 والديزل 2800 ومع ذلك الديزل ما يميز لوحة البنزين إذا تقاوموا لو تجيب ددسن بنزين وهيلكس 2800 ديزل راح الددسن .. في الخط التيربو رهيب والسبب أنه لو واجهك هواء فتحة التيربو تستقبل هواء اكبر وبالتالي تعطيك نوعاً ما عزم ولكن لا يصف جنب البنزين ويكون في علمك لو تجيب فان هيونداي بنزين وددسن دبل ديزل وراعي الديزل مركب جنوط عريضة وكبار مقاس 16 مثلاُ يروح الفان رغم أن الفان 2400 وثقيل وحيله ميت .. >>وهذه مشيوفة .. لو تجيب سوزو 3000 مكينته دبل مع هيلكس 2700 دبل يروح الهايلوكس رغم أن سعة المكينة حقت السوزو أكبر لكن في الممشى في النفود والكارونة والدفرنس أفضل الديزل .. هذا بعض مالدي وأتمنى تكون إستفدت ..

مخاوي الكشات

17/10/2008, 08:59 PM

طيب الايسوزو ديزل 3 لتر تيربو

الددسن كم لتر؟

2500 لتر .. 131 حصان .. \ 4000 دورة .. >>>> ديزل

2400 لتر 160 حصان .. \ 5600 دورة >>>>>> بنزين

.أبوعبدالرحمن

17/10/2008, 09:29 PM

اخوي اذا انت ودك بالديزل فأنصحك بالدي ماكس

ماشاء الله تبارك الله سقت لي واحد وعزمه جدا ممتاز

ومن ناحية الددسن شفت واحد دعس قدامي ماشفت في

عزمه اي شيء يشد من رداه اما الدي ماكس ماشاء الله تبارك

قوي وتشيط في البر يمدحه راعيه

محب الماحي

17/10/2008, 10:23 PM

اخوي

الإيسوزو الديزل غمارة تيربو اقوى من الددسن الدبل بنزين

من تجربتي

و الإيسوزو أنا أرقى به الجدية

و في أثناء ما أنا أرقى الجدية و امشي 120 وهو بالخامس

ارص الأبنص زيادة يتعدى 120 ما شاء الله تبارك الله

عزمه في الشوارع و في الطلعات قوي بشيء تستغربه ما شاء الله تبارك الله

و خذ نصيحة الدَين جمع فلوسك و اشتر في الأخير

و شكرا

ابودعسان

17/10/2008, 11:11 PM

شف يالغالي كل اللي مدحوا الددسن الديزل تراهم صادقين
انا مجربه بالنفود اول مانزل التيربو 2006
بس العزم مايطلع الا اذا زاد ظغط المكينه عن200 د/د

هـدد

18/10/2008, 12:37 AM

هـدد

21/10/2008, 12:45 AM

النوء

21/10/2008, 03:04 AM

من واقع تجربة ...
شريت ددسن دفرنسين ديزل 2007 جديد
سيارة ماعليها كلام عزم وإذا قلت عزم يعني ثباااااااات على العزم التيربو يعجبك
الموتر شاد في الطلوع مايطيح عزمه
وفي الخط يعجبك يجيب طبلونه بشرط انك ماتغير جنوطه وكفراته ..( إذا غيرتهن مايجيب 150)
للمعلومية الدفرنس يختلف عن البنزين (الكارونة مشروكة) أنسى تغرز
مالك في الطويلة
الموتر بشكل عام ولا أروع منه عدا شي واحد ألا وهو
التيربو آآآآآه يالتيربو قيمته (5900) ريال قبل الخصم وبعد الخصم نقص تسعمائة
التيربو يوم رحت للوكالة أصلحه لقيت اللي عندهم ديزل أتلفت أبي بنزين خربان مالقيت
ويوم سألتهم قالوا كلها تيربو متعطل والمشكله لازم تغيير لان اللي فيه مراوح صغار تتكسر ولا لها حل
الموتر بعته راح الله يطرح لراعيه البركه فيه .
بعدها شريت بنزين الحقيقه فرق كبير كبير كبير الديزل أقوى بمراحل
لكن البنزين مافيه قطعه بــ 5900 ريال
أتمنى انك استفدت .

ghareeb

21/10/2008, 06:09 AM

أبو يوسف

21/10/2008, 11:51 AM

أنا مجرب دفرنس واحد غمارة 2006 الدفعة الثانية ، والغمارة هي ما أظنك تريد ، لكن العيب فيها أنها ما تجي إلا شاصي طويل والا لو كانت تجي شاصي قصير كان غطت على البانزين كله
عزم خيال ، وأول مرة أشوف ددسن تصل سرعتها لكامل الطبلون في الطريق المستوي ولو بتطول بالك كان جابت أزود
الشاصي الطويل في النفود ما يصلح لأن الحوض يلعب مع المرقا أما بالجواد والنفود المستوي خذ ولد
إذا كنت معزم على التيربو دفرنسين فكر بالميتسوبيشي لأن فيها تقنية الكارونة المنغلقة (إن صحت التمسمية) وهي بالعزم مثل النيسان أو قريبة منها ولكنها جميعا أقوى من تيربو الديماكس والهايلوكس
قومة الأول فيها كتمة شوي ثم يفز الموتر إذا عطيته وبدون مبالغة يتحرك العقال وتحس ظهرك يرجع زود للمرتبة (أتمنى أنك تكون فهمت وش أقصد)
أخيراً الموتر ما عليه كلام ويكفي أنه من نيسان وهم طلعو الديزل ددسن من 2000 ولا فيها أي مشاكل ، ونيسان وغيرها من الشركات العريقة مهب مغامرة بسمعتها بمواتر أقل من مستواها ..
العيب : صوت مزعج قليلاً... ما فيه كربون كثير إذا غيرت الفلاتر كل 30 ألف

تحيتي لك

AMAZ

21/10/2008, 03:53 PM

[quote=ghareeb;1977025]اسمح لي أخوي معلومتك غير صحيحة الديزل في أوربا نوع واحد [/quote

مشكور على تصحيح معلوماتي ولكن كان معاي سياره ديزل وجلست معاي اكثير من سنتين وكان هناك ثلاث انواع من الديزل وافضل شي كان من محطات شركات (توتال) حيث ان لون الديزل يكون ابيض يشبه القاز تقريبا وكذلك ورائحته تقريبا شبه معدومه لكن غالي . اما النوعين الاخرى يختلف السعر بينها والهدف من اختلاف السعر هو طبعا بسبب التكرير

هـدد

22/10/2008, 12:39 AM

من واقع تجربة ...

شريت ددسن دفرنسين ديزل 2007 جديد
سيارة ماعليها كلام عزم وإذا قلت عزم يعني ثباااااااات على العزم التيربو يعجبك
الموتر شاد في الطلوع مايطيح عزمه
وفي الخط يعجبك يجيب طبلونه بشرط انك ماتغير جنوطه وكفراته ..( إذا غيرتهن مايجيب 150)
للمعلومية الدفرنس يختلف عن البنزين (الكارونة مشروكة) أنسى تغرز
مالك في الطويلة
الموتر بشكل عام ولا أروع منه عدا شي واحد ألا وهو
التيربو آآآآآه يالتيربو قيمته (5900) ريال قبل الخصم وبعد الخصم نقص تسعمائة
التيربو يوم رحت للوكالة أصلحه لقيت اللي عندهم ديزل أتلفت أبي بنزين خربان مالقيت
ويوم سألتهم قالوا كلها تيربو متعطل والمشكله لازم تغيير لان اللي فيه مراوح صغار تتكسر ولا لها حل
الموتر بعته راح الله يطرح لراعيه البركه فيه .
بعدها شريت بنزين الحقيقه فرق كبير كبير كبير الديزل أقوى بمراحل
لكن البنزين مافيه قطعه بــ 5900 ريال

أتمنى انك استفدت .

أشكرك على هالمعلومات القيمة يعني مازالت الديماكس في صدارة الديزل .

يا لبيه

22/10/2008, 12:58 AM

وش رايكم بl200
سمعت انها 6 سرندل
وعزم عزم أتعب وانا أقول عزم
طبعا كلامي عن البنزين
أصلا مجرد تخيل بيك أب و6 سرندل يكفي !!!

السليطين

23/10/2008, 10:23 PM

الديزل مستحيل إنه يكون أفضل من البنزين من ناحية القوة
وإنكنت تبي القوة فالديمكس أقوى ولا فيه مقارنة
وإنكنت تبي بنزين فالهايلكس ولافيه مقارنه بينه وبين الددسن

الله يكتبلك كل خير ويبعد عنك كل شر ولاتنسى صلاة الإستخارة

ياخي اذا ماكنت مجرب الددسن لاتتكلم وانت ماتعرف ..
ولا يغرك اللي تشوفه بالشوارع .. غالبتها تلقاها ملغمة فلاتر وبواجي وغيرها ...

لكن انا كان معي ددسن 2001 عادي ودفرنسين ..
والله ثم والله ان الهايلكس الشد بلد مايطوف لويطير قومه وبالخط وكل المواتر فاكين الفاصل .. بس بدون اي تعديل ..
وبالنفود كذلك بالمراقى نرقى من مسافه اقرب من الهايلكسات .. وعددها 4 هايلكسات ..

ولكن اذاجبت هايلكس ملغم مع ددسن عادي . وتقول شف الفرق . فهذا مايصير ولكن للاسف هذا اللي انا اشوفه بالشوارع ..

وبالنسبه للدفرنسين فالديزل التيربو افضل بمئات المرات وذلك من واقع تجربه ..

الددسن والايسوزو في المقدمه ... اما الهايلكس انحش عنه اذا كنت تبي ديزل دفرنسين ..

ارجو انك ماتزعل .. لاني والله اسمع الناس يتكلمون بتعصب واللي اشوفه ومجربه عكس كلامهم ..

وتقبل كلامي بصدر رحب ..
لاني احبك في الله ...

محب الغيم

24/10/2008, 12:51 AM

من خلال ما قرأت وسمعت أن الايسوزو ديزل أفضل من غيره

لكن يا إخوان اشوف في منتديات السيارات إعلانات كثيرة عن الدي ماكس ، للبيع للبيع ...

وش السالفة

لا يكونون يتوهقون فيه ثم يبيعونه ، ومعظم المبيوع 2006

هـدد

28/10/2008, 01:09 AM

أخوي محب الغيم
تقصد أن العرض أكثر من الطلب
هذي سياسة شركة سوزو الجديدة صرفت كميات كثيرة بأكثر من طريقة سواء الديماكس أودينات أوالمعدات .
زي ماتشوف عندنا لها وكيلين معتمدين اليمني والعيسى
بالطريقة هذي تشتغل المنافسة وتكثر المبيعات
وهذي طريقة تويوتا قبل سوزو، ولاحظ اللاندكروزر بالمعارض .
هل معنى هذا أن أصحاب اللآندكروزرمتوهقين؟

sharp

30/10/2008, 01:35 AM

[quote=AMAZ;1978190][quote=ghareeb;1977025]اسمح لي أخوي معلومتك غير صحيحة الديزل في أوربا نوع واحد [/quote

بل معلوماتك يا عزيزي هي التي تحتاج تصحيح... بعض الأماكن في أوروبا يوجد فيها خمسة أنواع من الديزل

http://www.nesteoil.com/default.asp?path=1,41,540,2384,7906,7913

ابومناحي

25/03/2010, 08:33 PM

بشرنا ياراعي الديزل وشنهي الي شريتها

عشق الشمال

25/03/2010, 08:56 PM

حادي العيس

25/03/2010, 09:05 PM

السلام عليكم ورحمه الله

مساكم ورد

بالنسبه للاخوان اللي يتناقشون في انواع وقود الديزل ( ألمانيا وحدها يوجد فيها 3 أنواع وقود ديزل يسوق محلياً - والسيارات التجاريه الصغيره فيها تستخدم نوع الديزل النقي وهو ذو سعر أغلى من الانواع الاخرى وكفاءه أعلى ) أما في منطقه الشرق الاوسط فـ نوع الديزل يعادل أقل الانواع جودة مسوقه في أوربا .

صاحب الموضوع : أذا اردت ان تقتني سياره براحه الجمس مركب وفخامه وثقل واتزان وبقيمه ددسن فاشترلك ديماكس ..

أنا حقيقه لست متعصب ولكن من خلال التجربه فالديماكس أكثر راحه واقوى عزم وأكثر تحمل وأصلب بدي واترف مقصوره في فئته الديزليه : وان كان لنا مأخذ على أسعار قطع غياره ..

قيمه الديماكس الجديد بالتخفيض 2010 = 70 ألف من باخشب .

أتمنى أني أفدتك .

ذيب زلفاوي

26/03/2010, 01:45 AM

والله الددسن ماتحملناها بنزين تجينا ديزل
ياخوي لا تورط نفسك خصوصا انهها اقصاد
وانا انصخك انك تشننري سياره مضموته 100 بالـ 100 ولا جمع دراهمك وعقب 5 سنين طق اخيس موتر مدامه مهوب دين

ابوطاقية

26/03/2010, 02:06 AM

اذا مجبور على الديزل اقل شي خذ شي قوى 6 سرندل

المدير1

26/03/2010, 01:21 PM

السلام عليكم ورحمة الله وبركاته
جربت النسيان الغمارتين الديزل الدبل مديل 2006 ممتازة جدا
==الهايلكس ================= ممتازة جدا
== الديماكس ============2005 عيوبها الدبل الزر يعلف وهي قوية
هذا مالدينا وشكرا

تربو

26/03/2010, 02:52 PM

انا عندي ددسن دفرنسين ديزل 2006 ممتازة وعملية جدا وقمة في التوفير
اعبية ديزل ب 16ريال وتمشين 720 كيلو (ممتازة للطلاب الجامعين مثلي:j :good2: ) والعزم ممتاز نشيطة
هذا ما استنتجت من تجربتي له

عبدالملك 2010

07/04/2010, 03:34 PM

الســــــــلام عليــــــــــكم

اخووي لاتتعدى الديماكس تره قووي وسئل المجرب.... معي 2005 وترى بدلتها بــ2010 وخل عنك الي ماجربو دي ماكس معروف الديماكس شيـــــخ شيــــــخ الديــــــــــــــــــــــــزل Isuzu D-max

تدانو

30/06/2010, 11:48 AM

ياخوي مكاين الجديده مهي زي الموديل القديم خاصه يوم زودوها بتربو صارت ماتحمل الكرف انا عندي اسوزو 2008 ديزل دارت سبيكته على انها مامشت كثير بس 42 الف

خذلك بنزين وريح مخك والورشه الي صلحت سيارتي فيها عندهم هايلكس 2010 ديزل مخبط ولي ماهو مصدق يروح بنفسه للورشه ويشوف السيارات الديزل الجديده اناكان صدري ضايق على سيارتي يوم شفت الي عنده هديت شوي واستغربت مع العلم انا عندنا اسوزو موديل 2002 للحين تكد ولا جاه شي

حبل الوريد

30/06/2010, 12:18 PM

الموضوع عام 2008

الله يصلح الي جدده

الرجال شكله الحين شرى احد السيارتين وباعه

وانت جايين تنصحونه

N-xterra

30/06/2010, 12:37 PM

كلام الاخ / حمد الأحمد

منطقي 100 % :good2:

ولا تنسى صوت الديزل مزعج !!!

كل الشكر

مع ان الموضوع قديم جدا وطلع لي غبار يوم فتحت الصفحة لكن نو بروبلم

^^^^^^^^^^^^
هههههه
معليش أخوي كلامك وكلام حمد الأحمد غلط

النفارا الجديد الديزل نزل عندنا 2010 وأقوى من الهايلكس البنزين !!! قومه وخط !!! وأقوى من الديماكس وأقوى من الددسن البنزين !!!

ذيك اليوم تقاوم فيها واحد من الشباب مع فورتشنر6 سلندر وطلع عليه النيسان الديزل ويمشي بجنبي وعدادي على ال 200 وطلع علي!!!

النفارا الديزل الجديد ماشاء الله فيه قوة عجيبة ، للمعلومية هو يورد في استراليا من 2007 يجي نفس المكينة اللي عليه حاليا وهي 4 سلندر تيربو انتركولر

أتوقع راح تكون سيارة المدرسين والمزارعين الأولى خصوصا انها تجي دبل ويجي منها قير أوتو وفيها مثبت سرعة بعدوالعادي منها 6 نمر !!!

تحياتي

كيري ميري

30/06/2010, 05:33 PM

اخيرا جت الماكينة النشيطه .

انا شفت مقاطع للنفارا الديزل طبلونها 220 وتصك الطبلون .

هي 183 حصان وصافي 172 حصان . الددسن البنزين 160 حصان والصافي 139 حصان .

الهايلكس البنزين الصافي 158 حصان .

ضاوي البل

30/06/2010, 06:07 PM

الددسن 2006 وفوق ديزل نجحت نجاح باهر قوة وعزم ونشاط...

الوانيت1

28/01/2013, 06:17 AM

طيب وش صار الحين
وش رسيت عليه
عطنا خبر والله يبارك لك
باللي خذيتة
.........../////.

جرح نجد

29/01/2013, 08:14 PM

أخوي هذا شرح مبسط عن الاختلافات الجوهرية بين محركات الديزل والبنزين

محرك البنزين
محرك الديزل

المميزات
- أرخص سعرا
- أقل ضوضاء
- أكثر انتشار
- توفر مضخات البنزين في جميع محطات التموين.
- مصمم ليعطي قدرة أعلى من محرك الديزل
- تسارع أعلى
- سهولة الصيانة
- تكلفة صيانة أقل
- سرعة السيارة أعلى (عدد لفات محرك البنزين أعلى)
- قدرة أعلى لنفس سعة المحرك بالنسبة للديزل (سرعة دوران أعلى للبنزين, واحتكاك أعلى للديزل)
- أكثر اقتصاد للوقود, يستخدم وقود أقل من محرك البنزين للحصول على نفس القدرة
- وقود الديزل به طاقة حرارية 12% أكثر من وقود البنزين
- نظام العادم يعيش أكثر, لأن عادم الديزل لا يسبب تآكل مثل عادم البنزين
- عمر تشغيلي أعلى, ثلاث أضعاف العمر لمحرك البنزين
- دورة الديزل أكثر كفاءة من دورة البنزين, وعليه محرك الديزل 30% إلى 40% أكثر اقتصاد في الوقود من محرك البنزين المشابه عند الحمل الكامل, وعند ثلث حمل يكون أكثر اقتصاد بمقدار 50%
- أكثر أمان من ناحية أخطار الحريق (وقود ذو نقطة وميض عالية, درجة حرارة أنبوب العادم أقل, عدم وجود كبلات الضغط العالي للإشعال)
- زيادة التلوث بمعدل أبطئ مع زيادة عمر المركبة, وبعض الملوثات مثل أكاسيد النيتروجين NOx تقل مع زيادة عمر المركبة.
- مصمم ليعطي عزم أعلى من محرك البنزين
- محرك الديزل يستخدم ثلث الوقود الذي يستخدمه محرك البنزين المشابه عند سرعة اللاحمل idel
- تقطع السيارة بمحرك الديزل عدد كيلومترات أكثر لنفس السيارة بمحرك بنزين نفس كمية الوقود
- سعر وقود الديزل أرخص, تكلفة أقل في عملية التكرير
- الكثير من أنظمة التحكم في ملوثات العادم لا يحتاجها محرك الديزل
- لا يوجد مشاكل مع تعرض المحرك للمياه أو الرطوبة (مشاكل نظام الإشعال)
- أقل مشاكل وأقل متطلبات صيانة
- لا يوجد احتمال مشكلة الحريق الخلفي backfire
- أكثر مساواة لقدرة الاسطوانات (للمعايرة الدقيق لمضخة الحقن)

العيوب
- أكثر استهلاكا للوقود
- زيادة التلوث بمعدل عالي مع زيادة عمر المركبة
- الملوثات من العادم لكل كيلومتر يكون أكثر من محرك الديزل المتساوي معه في المقاس, مع وجود نظم التحكم في التلوث لكل المحركين
- أكثر تلوث للغازات المسببة لارتفاع درجة حرارة الجو* (زيادة 35% عن محرك الديزل), والهيدروكربون (زيادة 170% عن محرك الديزل), وأول أكسيد الكربون (زيادة 415% عن محرك الديزل) – وتزداد تلك النسب بمقدار 50% مع المقارنة بمحرك يعمل بالديزل الحيوي Biodiesel
- عرضة أكثر لحوادث الحريق, تسرب البنزين يؤدي إلى حدوث حريق
- يحتاج إلى احتياطيات عالية لتخزين البنزين والتعامل معه
- وجود فقد كبير للقدرة عند السرعات المنخفضة نتيجة فقد الضخ pumping losses حيث أن التحكم عن طريق الخانق
- أثقل وزناً, أجزاء أكبر لتحمل الإجهادات العالية
- أكثر ضوضاء, خاصة عند سرعة الحمل الخالي
- تعجيل أبطئ من محرك البنزين, ولكن يمكن التغلب على ذلك عن طريق تربو ديزل
- تغيير زيت المحرك بمعدل أعلى, بسبب تلوث الزيت عن طريق الديزل أعلى من البنزين
- في الأجواء الباردة تحتاج إلى إضافات للوقود لمنع تحوله إلى جيلي
- صعوبة بدأ التشغيل في الأجواء الباردة, بسبب الزيت الثقيل الذي يحتاجه محرك الديزل, وعدم وصول درجة حرارة غرفة الاحتراق إلى درجة الاشتعال الذاتي للديزل
- المحرك أغلى سعراً, حيث أن الأجزاء مصممة لتحمل إجهادات عالية
- رائحة بالعادم منفرة, لوجود نسبة من الكبريت بوقود الديزل
- يحتوي العادم على أكاسيد الكبريت SOx , التي عند اتحادها مع المياه تكون حامض الكبريتيك المسبب للأمطار الحامضية.
- أكثر تلوث بالنسبة للأجسام الصلبة (الهباب soot) (زيادة 70% عن محرك البنزين), أكسيد النيتروجين NOx (زيادة 55% عن محرك البنزين)- وتقل تلك النسب مع استخدام الديزل الحيوي Biodiesel
- تكلفة صيانة دورية أعلى, كمية زيت أكبر
- عدم توفر وقود الديزل في جميع محطات تموين الوقود, وعدم انتشار سيارات الديزل, أدت في بعض المناطق لارتفاع سعر وقود الديزل, وعدم تشجع المستهلك لشراء سيارات الديزل

ان السبب الرئيسي والجوهري لاختلاف سرعة دوران بين المحركين هو الاختلاف في سرعة احتراق الوقود في المحركين

البنزين سرعة اشعالة اعلى من الديزل وذلك لان محرك البنزين يعمل بمبداء دورة اوتو(ثبات الحجم) اما الديزل يعمل بمبداء دورة ديزل (ثبات الضغط)
محرك البنزين يتم سحب الهواء والوقود في شوط السحب وبعد ذلك يحدث شوط الانضغاط وعند النقطة الميتة العليا يتم اعطاء الشرارة من البوجية عندها يحدث الانفجار ويزداد الضغط في غرفة الاحتراق عندها يكون الكباس قد تعدى النقطة الميتة العليا بقليل وبداء الضغط الناتج عن الاحتراق بدفع الكباس ويبداء شوط القدرة

اما محرك الديزل يتم سحب هواء فقط في شوط السحب وبعد ذلك يتم ضغطه في شوط الانضغاط بنسبة 1:16 وقبل وصول الكباس الى النقطة الميتة العليا يبدء حقن الديزل ولا يشتعل فورا بل يشتعل بعد فترة قليلة تسمى فترة التاخير وعندما يبداء الوقود بالاشتعال يكون الكباس قد وصل الى النقطة الميتة العليا وتعداها بقليل عندها تبداء الزيادة في الضغط ويبداء معها دفع الكباس (شوط القدرة) نحو النقطة الميتة السفلى للحفاظ على الضغط الثابت(حتى تستمر عملية الاشعال الذاتي) وتسمر عملية الحقن حتى نحصل على السرعة والعزم المطلوب

ان عملية الاشعال في محرك الديزل بطبيعتها تحتاج الى وقت اكثر لذلك محرك البنزين يدور عدد دورات اكثر في الدقيقة الواحدة مقارنة بالديزل

الان سنقارن بالنسبة للعزم
ان السبب الرئيسي للعزم القوي لمحركات الديزل هو ان قوة الانفجار على سطح الكباس اكبر من البنزين وذلك بسبب الاختلاف الكيميائي بين وقود الديزل والبنزين حيث ان الديزل يحوي كمية طاقة اكبر من البنزين
لو قمنا باحضار كميتين متساويتين من الديزل والبنزين فان كمية الطاقة التي نحصل عليها من الديزل اكبر من التي نحصل عليها من البنزين وهذه خاصية كيميائية للديزل لان عدد روابط الكربون فيه اكثر وبما ان الطاقة اكبر اذا القوة المؤثرة على الكباس اكبر وبالتالي نحصل على عزم اكثر من محرك الديزل
وليس البنزين

راعي المكشايت

30/01/2013, 11:41 AM

انا ودي اعرف منهو الفاضي اللي يدور في المواضيع القديمه الموضوع له اكثر من 5 سنين من عام 2008 والحين حنا 2013

حر اليدين

31/01/2013, 06:59 PM

بما ان الموضوع قديم ابسالك موترك الديزل اللي طرحت الموضوع ثم شريته بكم بعته هههههههههه

انا مؤيد لكلامك بعد ماكنت معاررض له كانت معي ددسن دبل بنزين وكنت راضي عنها نوعا ما مع اني ما ارحمها
لكن بعد ما اشتريت ديماكس 3000 سي سي 2012 تغيرت نظرتي للديزل تمام سيارة قوية ماشاء الله عليها و متماسكة و منظرها جميل واللي جرب يعرف كلامي وانا اشوف ان اغلب الونيتات الحين جيدة بالنسبة لسيارات الديزل التربو على وجه التحديد

تقبلوا تحيتي اخوكم حر اليدين

hail_ksa

31/01/2013, 08:09 PM

طيب وش صار الحين
وش رسيت عليه
عطنا خبر والله يبارك لك
باللي خذيتة
.........../////.

وش يرسي عليه هههههههههه :D:D:D:D:D:D:D:D

الموضوع من عام 2008

وجعين

31/01/2013, 11:18 PM

مكينة الدييزل تعيش ضعف مكينة البنزين

وجعين

04/02/2013, 01:32 AM

جرح نجد يعطيك العافيه