قير الباث علق ياجماعة ...

[سالمي]

*
*
*
عندي الباث 2003 زي الحلاوة لا مشاكل ولا هم :D وفجأة صار القير الاتماتيك ما يفك من وضع ال p عند دعس البريك :mad: حتى أن صوت الفك اختفى :confused: من عنده حل يفيدنا لاني ما ودي بالوكالة :no: حتى انه صار السكروب عد القير كل شوي ضاغط على الحبة الحمرا :(


وما عليكم أمر

[فتى الثمامة]

الأخ سالمي\السلام عليكم ....أنا صار معي نفس مشكلتك وصلحتها في الوكالة بحدود 400ريال تقريبا وسلمت السيارة الساعة الثامنة صباحا واستلمتها منهم الساعة الواحدة ظهرا في نفس اليوم

[شروكي ربع]

صدقني مشكلتك بسيطة جدا ً ..

بس ودها لواحد فاهم , اتوقع سلك او شي بسيط فلت من مكانه ..

وبانتظارك بعد حلها ..

[سطام vip]

انا مع اخوي شروكي ربع

المشكله بسيطه بس من جد مخي مقفل الحين وناسي لانها صارت مع واحد

من الشباب في سيارته فورد وصلحتها بس والله ناس وش سويت

على العموم انت شيك على دعسة البريك من داخل الطبلون شوف فيها شي منفصل

سلك واير اي شي

وانزل تحت السياره وشيك على اسلاك القير والوايرات يمكن يكون احد الوايرات

منكسره المشكبيه حقته وطالع من مكانه

والله يسهل امرك اخوي

[إعصار]

ماتشوف شر ..

ومقدرو عليه بأذن الله ..


حبيت أدعيلك يالغالي ..

[فنجال السيف]

سؤال الفرامل فيه امان للقير يعني ماتقدر تعشق الالازم تضغط الفرامل؟
اذاكان لازم فيكون الامان خربان اومنفصل صارت لي وصلحتها ب 200ريال وماشيه تمام
تحياتي

[سالمي]

الله يسعدكم ويجعلكم ما تشوفون الشر يا فتى الثمامة ، وشروكي ربع ، وسطام ، وإعصار ، وفنجال السيف
وبالنسبة لسؤالك يافنجال السيف إي فيه امان والله يعين وابشر يا شروكي بدور وأسأل لين أجد حل وربك يفرجها من عنده

[فروس2003]

اخوي سالمي

شف فية زر احمر صغير قدام القير على اليمين تأكد وأكيد انه معلق

جرب تظغطه تحت بسكروب لاكن شوي شوي انا قاعد مره اتصفح الكتلوج وقريت عن الحركه ذي

وربي يكون بعونك

[&أبوخالد&]

السلام عليكم ورحمة الله وبركاته
هذا قد صارت لي في رمضان
لمن ادوس على الفرامل مايفك القير ولا تولع لمبت الفرامل
رحت عند اكثر من مهندس كل واحد يقول من راسه
وديتها عند سوداني في الصناعيه
مأخذت دقيقتي الي ثلاث دقائق
جاب مفك وجلس عند دعست الفرامل في حساس حق القير ولمبت الفرامل
صقعها مدري وش سوى الا وهي شغاله زي الفل
شغل يده خمسين ريال
طبعا السياره مكسما 2003
هذا العلم الوكاد
نصيحه ابعد عن وكاااااااااله الحمراني

[عيون الغلا]

العطل هذا من الحساس اللي بدواسة الفرامل إما يبيله تنظيف أو تغيير ولو تنزل راسك وتدقق كان تشوفه وتراه اذا ظغطت الدواسه تظغط عليه وإذا كان الحساس سليم تسمع صوته له طقه اللي هي طقة تأمين القير يعني إذا طق معناته شغال وفتح معك التأمين وأي كهربائي أعتقد يقدر يصلحه,أتمنى أن المعلومه وصلت وأني أفدتك يالغالي..

والله يوفقنا واياك ياعزيزي

تحياتي لك

[سالمي]

الجنوبي 070 وعيون الغلا يالله تجعل سعادتهم بين ايديهم والحقيقة مثل ماقلت اخوي عيون الغلا صوت الطقة ما عد اسمعه والله ييسر الامور

[القيصر007]

اخوي/ سالمي

انا صار لي اليوم نفس المشكله بالظبط مااعشق السياره الى بالظغط على الزر الاحمر

اذا تم التوصل الى حل ارجو افادتنا ..
السياره /باثفندر

.................................................. ....

اخوي/ الجنوبي070

ارجو ان توصف لنا مكان المهندس السوداني ..,,

المكــــان /الريــــاض
,,,,,,,,,,,,,,,,,

في أمــــــــــــــــــــــان الله..,,

[القيصر007]

الفزعه يالربع
اللي عنده حل يفيدنا

[سالمي]

أبشر أخوي القيصر أنا ما حطيت الموضوع إلا استفيد وأفيد ومنك بعد نستفيد إذا سبقتني بالحل
لا هنت

[القيصر007]

الله ييسر الامور

[القيصر007]

السلام عليكم
اللي عنده حل يفيدنا

[الساهر2003]

اخوي سالمي



شف فية زر احمر صغير قدام القير على اليمين تأكد وأكيد انه معلق


جرب تظغطه تحت بسكروب لاكن شوي شوي انا قاعد مره اتصفح الكتلوج وقريت عن الحركه ذي



وربي يكون بعونك


بالفعل الزر هذا تم وضعه احتياط لو تعطل الحساس اللي في الفرامل تغضط على الزر يدوي بأي شي يكون صغير
وراح يفك معك القير

وبالنسبة للتعليق اتوقع لو تفك الديكور اللي على القير وتسوي تنظيف راح يرجع احسن من الوكالة .. لان هذا يكون بسبب وجود غبار على الحساس وان شاء الله تنتهي مشكلتك