أسئلة وأجوبه حول الصيد

[الصياد الكبير]

بسم الله الرحمن الرحيم

الحمدلله والصلاة والسلام على رسول الله وعلى آله وصحبه أجمعين



سأطرح أسئله حول الصيد للفائده العامه واللي عنده الأجوبه عنها ما يبخل علينا .

وش أحسن وقت للصيد النهار اوالليل او عند الغروب اوعند الشروق؟

وش أحسن الصيد وهي تسقي او وهي تثبر ؟

لما ينقد عليك الخيط شتسوي تنتظر ولا تسحب على طول(هذي يبيلها شرح)؟

وش أكثر شيء تستخدمه (الطعم) خثاق ولا ربيان ولالمصران الدجاج ؟ و وش هو الافضل؟

أي أحسن الصيد بالسناره ولا الخيط ؟ ومالفرق بينهم ؟ وأيش الأحسن ؟

وهل الصيف او الشتاء يأثر على وجود السمك ؟

[الملثم]

السلام عليكم ورحمة الله وبركاته
أول شي تصدق عاد إني حبيتك :)
وبعدين مشكووووووووور لأنك نشطت الخيمة شوي ولا يهون إخواني
وخذ هالأجوبة المتواضعة من تجربه بسيطه منتظر التوجيهات عليها .
أول شي سؤالك عام يعني ما فصلت ذكرت الصيد ومابينت طريقة الصيد لأن كل طريقة لها جواب يختلف
مثلا راعي القرقور مايفرط في شهر 4 ميلادي لأن الهامور ( الدولار البحري ) يدش وهو مغمض حتى لو تحط له غترة بدل الييم ;) فهذا له وقت وذاك له وقت وهاك الجواب .
1-أحسن وقت للصيد .
أ- الحداق : مسيان قبل سلوم الشمس والفجر وليلة 12،11،10،9 وخل عندك باقي الليالي .
ب- الغزل: في السقيه العودة أحسن وإذا وافقت الليل نعومك وراس الشهر أحسن من القمرا . وإذا تقطه في النهار الغزل الأبيض أحسن من الأخضر .
ج- القرقور: يقولون السمكة أكثر ماتدخله الفجر وإذا بتقطه على السيف خل وجهه مشاهد السيف لأن السمكة تدخله والمايه ساقيه وإذا خليته العكس صعب تصيد فيه مجررررررررررررربه
2-صيد السقي أو الثبر
أ- الحداق ، إذا كان على السيف أكيد وهي تسقي وإذا كان داخل البحر يعتمد على مكان الحداق وعلى تيار المايه ( ترى تشوف الموج من فوق سقي شمال والمايه تحت تروح جنوب ، الموج يشكل تقريبا متر على سصح البحر ولايعطيك إتجاه حقيقي ، فيه أجهزة تححد لك مسار الماء يستخدمونها هل القرارير . فيهأماكن في البحر تصلح حق المايه لي صارت خربانه ( سقيه واحده ) عموما لازم تعرف القاع اللي تحتك هير أو غيره.
ب- الغزل على السيف تضرب السمكة والمايه تثبر وقي الغزير العكس .
ج- القرقور . قلنا على السيف وهي تسقي وفي البحر يقولون الفجر
3- عند وجود النقد .
يختلف من سمكة إلى سمكة والسماكة يعرفون السمكة من الجرة يعني الشعري يبلع الميدار ويروح يره ولا تفكر أما الضلعه وغيرها من اللي يلعبون بالخيط ترخيلها وتيرها شوي شوي تباريها ( كر وفر ) يعني لي شفت خيطك يروح يمن وشمال باره يعني عطه ليان حده وجره بالعدال وإذا جرك بالقو اتجاه واحد جره
4-أنواع الييم
كل سمكه ولها نوع جاوبك بوراشد الله يسلمه في مصران الدجاج
5- الصيد بالخيط أو السنارة
صراحة ماجربت السنارة لكن لازم تنتبه لشي أهم وهو لون الخيط يعني اللون الأبيض والأزرق الفاتح صياد والأخضر الغامج قليل الصيد في النهار يقولون ميزة السنارة أنك تقدر تقط بعيد.
6-الصيف والشتاء
نعم يأثر شلون مايأثر الشتاء السمكة تقرب السيف تدور الدفاء والمايه تقص يعني ثبرتها قويه تصلح حق الأسكار يعني في الأشتاء اشتغل على السيف أكثر وفي الصيف داخل
هذا ما عندي على عجله لأن الأسئله اطربتني والله يوفقك بس تراني أنتظر العزيمة :p
محبك الملثم

[الصياد الكبير]

بسم الله الرحمن الرحيم
السلام عليكم ورحمة الله وبركاته

ياخوي الملثم تراك ونستنابهذا الرد الممتع والمفيد بس أنا قصدي عن الصيد بالخيوووووووووووووط

وننتظر ردود البقيــــــــــــــــــــــــه

[Bo Rashed]

السلام عليكم ورحمة الله وبركاته

اخوي الصياد الكبير موضوع شيق ومفيد اشكرك على طرحه

اخونا الملثم جزاه الله خير ما قصر كفى ووفى ولو اني اختلف معاه في نقطتين:

1- اعتقد ان احسن وقت للحداق 13 و 14 و 15 و 16 و 17 لان هذا الوقت يكون قمره والييمه تشوفها السمكه والمايه مرتفعه

2- في الشتاء اعتقد ان السمك يروح للغزير وليس العكس لان الغزير هو اللي يكون دافي و سمك الشتاء هزيل الا الكنعد وغيرها اللي يكثر بالشتاء

تحياتي
وفقكم الله

[الملثم]

السلام عليكم ورحمة الله وبركاته
مع إحترامي الشديد لنوخذتنا أبو راشد وعلمي أني ما الحقه فضلا أني أجاره في علم البحر واضح هذا من مشاركاته أقول .
النقطة الأولى : ليالي القمرا لاشك إنها أحسن ومن المعلوم وهذا العلم عند الغالب وهذا اللي كنت أظنه قبل لكن بعد التجارب وسؤال السماكة المتخصصين .
النقطة الأولى : أشوف أن أحنا متفقين أن السمكة تدور الماء الدافي ولكن الأختلاف في مكانه أهو على السيف أو في الغبة ، أقول جرب ماية السيف بنفسك وقيس حرارتها وروح الغبة وغوص 6 أمتار وأكثر وستشعر بالفرق .

[mostashar15]

والله حرام موضوع مثل هذا يختفي لان الاسئلة كانت ممتازة و الاجوبة كانت حتى اروع.

نحتاج خبرات جديدة ومشاركات اكثر.

[mab1981]

والله حرام موضوع مثل هذا يختفي لان الاسئلة كانت ممتازة و الاجوبة كانت حتى اروع.

نحتاج خبرات جديدة ومشاركات اكثر.

صدقت يا أخوي .. الموضوع رووعة..
اجاباتكم يا أهل البحر ولا تهونون

[قبقب مشعاب]

اول شي الموضوع حلووووووووووو بالمررره
وشيق في وقت واحد
بس عندي ملاحظه على اخوي الملثم ليه الهامور يموت في القرقور في الشتاء يعني لازم تباري قراقيرك كل يوم في الشتاء او انا غلطان من ناحيت خبرتي في البحر البسيطه
عرفت إن الهامور يلحق المايه الدافيه يعني لاسقت المايه راح الهامور وراها وراح يدخل القرقور واذا رجعت المايه راح يموت الهامور داخل القرقور وهذا يدل ان الهامور يلحق المايه الدافيه.
وانا اتفق معى اخوي ابوراشد
وننتظر رد الشباب
(اللهم يامقلب القلوب والابصار ثبت قلوبنا على دينك)

[accentkool]

وش أحسن وقت للصيد النهار اوالليل او عند الغروب اوعند الشروق؟
عند الشروق الرواق
وش أحسن الصيد وهي تسقي او وهي تثبر ؟
وهي تسقي
لما ينقد عليك الخيط شتسوي تنتظر ولا تسحب على طول(هذي يبيلها شرح)؟
تنتضر يلقم بعدين تسحب
وش أكثر شيء تستخدمه (الطعم) خثاق ولا ربيان ولالمصران الدجاج ؟ و وش هو الافضل؟
ربيان وخثاق وميد والخثاق بتاع كلة
أي أحسن الصيد بالسناره ولا الخيط ؟ ومالفرق بينهم ؟ وأيش الأحسن ؟
السنارة تحس ان فية اكشن
وهل الصيف او الشتاء يأثر على وجود السمك ؟
الشتاء يأثر على وجود السمك عند السيف والشتاء عموما ياثر على جودة السمك

[dbdob]

شكرا لكم اخواني الصياد الكبير والملثم
شكرا لكم كثيرا على الفائده ونتمنى المزيدمنكم ومن غيركم
الصراحه استمتعت بالاسله والاجابه واخذت الفائده
كل الشكر لكم ولجميع الاخوان

[ابو شهد جدة]

يعطيكم الف عافيه جميعا.