وش الحل يالربع مكيف الصالون 2003 جمس اتعبني

[راعي طويق]

يالربع عندي صالون موديل 2003خرب المكيف يطلع له صوت وتوقعته شداد السير وغيرت الشداد وعرفت ان السبب الكمبروسر المهم اتكلت على الله وشريت كمبروسر جديد وفلتر وغسيل ليات وتمديدات وركبه واشتغل وبرد وبعد 3 شهور عود على نفس المشكلة السابقة
وخرب الكمبوسر الجديد وش السوات معه

اشتري كمروسر من التشليح يقول انه احسن من الأصلي وهل بيعود على خرابه الأول الحقيقة اني ضايق صدري منه الفزعة بالمشورة والحل الناجح والكمبروسر المستعمل الي اخو الجديد

[Dead]

طيب أخوي راعي طويق الكمبرسر اللي خرب ماعليه كفالة ؟؟ المفروض إنه مكفول سنة ..

إذا مافي كفالة نصيحتي إنك تروح لفني تكييف شاطر يرهم لك كمبرسر ثاني أحسن من شد البلد .

[Magellan]

مالك بعد الله إلا مركز البلبيسي
يكشف على الموتر ويعلمك بالخراب ويقول لك كلفة التصليح وأنت ونفسك تقبل بهم أولا
وشغل مضمون وإن شاء الله تقول وداعاً للحر
http://www.mekshat.com/pix/upload02/images83/mk11979_balbisii1.jpg

وهذا الوصف
http://www.albalbeesi.com/RiyadhMap.gif

[راعي طويق]

جزاكم الله خير على تفاعلكم
لكن اظن ان مافيه ضمان عليه انا شاريه من موزع على انه اصلي وكالة
لكن الظاهر ان الأدوات الكهربائية ماعليها ضمان

[بن داود]

فيه محل تريستار زين بس غالي

[الثويرات]

هل انت متأكد ان الكمبرسر خربان؟

تأكد من ضغط الغاز هل مليان ام لا



تحياتي،،،،،،،،،،،

[راعي طويق]

هل انت متأكد ان الكمبرسر خربان؟

تأكد من ضغط الغاز هل مليان ام لا



تحياتي،،،،،،،،،،،


اذا شغلته طلع صوت الا انكانه كلتش الله كريم
عموما لابد اروح به لفني واشوف وشبيقول لي
لكن الصوت هو نفس الصوت الأول الي غيرت منه الكمبروسر

[عاشق الموج]

انا مره صارت لي الحركه هذا في جمس ضرب عندي الكمبرسر وانواع الاصوات تطلع منه


المهم انه صاحب الورشة قالي اذا بتغير الكمبرسر لازم تغير معه لديتر المكيف ودبة الفريون والسبب انه في

داخله براده و اوساخ من الكمبرسر القديم واذا ركبت كمبرسر جديد راح تطلع كل الاوساخ من الديتر للكمبرسر الجديد

وبكذا بخترب عندك الكمبرسر الجديد خلال فتره بسيط المهم اني جبت له كل شي جديد كمبرسر ولديتر ودبة فريون وفلتر فريون

وايضا حط فيه فريون اصلي وزيت

والحمدلله الحين السيارة لها تقريبا سنه كل شي تمام

[راعي طويق]

هذا هو الحل الأكيد ياعاشق الموج وانا ايضا قالو لي نفس الكلام

[الوحش79]

اخوي الغالي
نصيحتي لك ولجميع الاعضاء

لذيتر المكيف اذا ماجاه صدوم او خراب لاتغير
كل اللي يبيلك تشوف لك واحد فاهم وراعي ضمير يصلح مكيفات

واطلب منه ينظف لك المواصير بالنتيتروجين واللديتر الخاص بالمكيف
وراح تشوف الفرق بالنسبه للكمبريسر الخاص بك اذا اهو خراب يبيلك تبدله بس اذا صوت ظاهر فيه وهو يبرد نصيحتي احقر الصوت لين يخرب الكمبريسر لانه في كلتا الحالتين راح تبدل بجديد واذا بدلته شيل القديم لاتخليه عند الورشه والسب اغلبهم يوضبون الكمبرير ويبوعونه بعد كذا وهم مخبرين صاحب الكمبريسر الاصلي انه مايتصلح
وبكذا انت منعت حالت نصب على غيرك
ويكفينا ربنا
وتراني مسويها بصابونه وعلمنيها خويي صاحب ورشه وصارت له نفس مشكلتك وهو عنده وانيت غمارة ونص شفر موديل2001
وركب له مروحة تبريد وموتره ثلوج بالعن زحمه بالدمام


ولك الخيار بعد ماتشيك وحط بالك من النصابين والمحتالين خاصتا البنقاليه


والله يعينك


تحياتي

[راعي طويق]

الله يجزاك خير يالوحش وماقصرت وانا كلمت الي صلحت عنده الكمبروسر المرة الي فاتت وقال لي مر علي وبمره اشوف كيف يسوي

[adil33]

اكشف على الثلاجة قبل لا تغير او تصلح شيء احتمال يكون فيها مشكله وهي الي تعطلك الكمبرسور ...احيان الثلاجة تجمع اوراق شجر او غبار واتربه وهذه تاثيرها يوصل الى الكمبرسور بعد فتره من التغيير

[الوحش79]

اخوي الغالي
عذرا قد نسيت لابد ان تغير الفلاتر وتنظف الثلاجه وان شاء الله تدعيلي


تحياتي لك