المساعد الشخصي الرقمي

مشاهدة النسخة كاملة : الفزعه أبوراشد ( ولا يهون الربع)


Abu Saleh 40
08/02/2004, 04:20 PM
السلام عليكم جميعا

إنشاء الله عندي رحله الى منيفه اللي سمعت عن الحداق فيها كثير
وودي القى المناطق اللي فيها صيد جعل رحلتنا تتزفر بشوية سمك. أبو راشد في واحد من مواضيعك مدحت المكان وأنا من موقعي هذا ( خلف الكيبورد) أطالب بأن تعطيني بعض المعلومات عن أحسن مواقع الحداق في منيفه .

هل نهاية الإسفلت هي المنطقه الجيده أو دلنا بارك الله فيك ومن قال أمين ( أمين)

على العموم خويكم البدوي في قصة الهوامير شكله مابقى أي هامور :p


وأكون شاكر لكل من يدلو بدلوه ويعطيني نصائح عن أحسن مناطق الحداق في منيفه

ودمتم
Bo Rashed
09/02/2004, 12:33 AM
السلام عليكم ورحمة الله وبركاته

حياك الله يا ابو صالح وما طلبت شي يا الغالي

هذي خريطة بسيطة لمنيفة توضح لك افضل اماكن الصيد وهي العلامات الخضراء ومرقمة حسب احسن المواقع يعني 1 هو احسن مكان وبعده 2 وانت ماشي، طبعا الخريطة هي للمنطقة بعد ما تلف من خط الكويت وتدخل لفة منيفة وتمشي شوي

http://www.mekshat.com/pix/upload/images4/mnifah094map.jpg

عموما منيفة معروفة بكثرة الدرادير او الخارور او السايور وهو مجرى ماء البحر في حالة السقي والثبر وهي احسن اماكن تحدق فيها واكثر هذي الدرادير هي عند المكان 1 و 2 وهذي من احسن الاماكن لصيد الشعوم والسبيطي وانا صدت فيها شعوم وسبيطية كبار وسمان

الهامور حاليا قليل تلقاه على السيف في منيفة وانت وحظك والمكان الي صدنا فيه الهوامير هو رقم 8 لكنه تغير وجربناه مره ثانيه ومافيه صيد وخبرك البحر ارزاق فما انصحك تتعب نفسك ركز على الاماكن 1 و 2 و 3 و 4 هي اضمن شي انك تصيد فيها والارزاق بيد الله

المكان رقم 3 هو احسن مكان تصيد فيه على السقي وانا و2 اخوياي صايدين فيه ما لا يقل عن ثلاجة في ليلة وحده شعوم وقرقفان ولكن على السقي بس وحطيت خيوط مد فيه صدت سبيطية كبار وواجد ولكن فيه بعض اللخم والهريريه وهو يكون ورا عدامه مرتفعه وهذي العدامه يطلع تحتها حميض اذا ودك تاكل لك شوي

المكان رقم 6 هذي حفرة كبيرة عند معمل ارامكو المهجور واحيانا يتجمع فيها السمك وتصيد فيها صيد تمام ولكن احيانا تخلى من السمك وانت وحظك لكن ما يمنع انك تجرب

الاماكن 5 و 7 بعيدة شوي لكن فيها احيانا شعم زين اذا لك خاطر تتمشى في الربيع دق سلف وجرب

بعد مركز سلاح الحدود في شركة القصيبي للصيد يبيعون ثلج بس انت وحظك اذا سمح لك العسكري انك تدخل، والماي لا تنسى تاخذ معاك لكن عب المطارات في محطة ابو حدرية او راس الزور عشان يخف على الموتر واحيانا يجي وايت يعبي ماي في منيفة بفلوس طبعا

العلامة الصفراء: هذا مخيمنا اذا احتجت اي مساعده او نقص عليك اي شئ فلا تتردد ابد وروح للمجلس وانشد عن واحد ينقاله ابو جبر عنده لومينا رصاصية تراه نشمي ويعرف منيفه شبر شبر وبينبسط اذا لقى احد يحدق معاه بس قوله انا جايك من طرف ولد اختك ابو راشد وان شاء الله ما راح يقصر معاك

لا تنسى تدور فقع ترى منيفة ارضها معروفة بالفقع واكيد بتشوف ناس قاعدة تدور

( احذر ) منيفة ترى فيها صبخ اقشر فانتبه من اي صبخه ولا تغامر وانتبه من الرمل والتغريز

اخيرا ادعو الله ان يوفقك في هذه الرحلة ويرزقكم من فضله وان يحفظك من كل مكروه، واي استفسار انا حاضر.

وفقك الله
تحياتي
Abu Saleh 40
09/02/2004, 08:05 AM
تسلم أبو راشد كفيت ووفيت وما فيه أوفى وأوضح من اللي شرحته

جزاك الله خير

طيب أبو راشد سؤال بري وين مواقع الفقع في منيفه على نفس الخريطه:D
Bo Rashed
09/02/2004, 09:15 AM
الله يسلمك يا ابو صالح

الفقع تلقاه حول المكان رقم 2 وحول معمل ارامكو بس يبيلك تدور زين لان انا سمعت ان ما لقوا الا قليل مره بس هذا الخبر من مده يعني الحين ان شاء الله طلع زيادة

وفقك الله
تحياتي
غواص الخليج
09/02/2004, 06:19 PM
ماشاء الله عليك يا بو راشد شايل هلمنتدي شيل;) ;) ;)
الصياد الكبير
11/02/2004, 02:11 PM
السلام عليكم ورحمة الله وبركاته

ممكن سوأل:D :D
كيف جبت الخريطه;)
Bo Rashed
12/02/2004, 06:48 AM
اخوي غواص الخليج

تسلم وهذا واجبنا

اخوي الصياد الكبير

:D الخريطة محفوظه في الذاكرة المخية :D اقصد حافظها من كثر الروحات والرسمة على الفوتوشوب

تحياتي
وفقكم الله
راعي النحل
17/02/2004, 12:18 PM
السلام عليكم ورحمة الله
جزاك الله خير يا بوراشد....كفيت ووفيت
ونبي نجيب عسل نبدله بسبيطي .....
ومشكور على التوضيح...
gulfhunter
17/02/2004, 04:43 PM
السلام عليكم ورحمة الله وبركاته

تسلم يابو راشد .....

وين نلاقي الهومير في منيفه ....... طبعاٌ غير رقم 8 .......

الهامور حاليا قليل تلقاه على السيف في منيفة وانت وحظك والمكان الي صدنا فيه الهوامير هو رقم 8 لكنه تغير

و غير السيف.... نجيب طراد اذا يستاهل.......

والله يعطيك العافيه أنت والربع.....
Bo Rashed
18/02/2004, 05:21 AM
وعليكم السلام ورحمة الله وبركاته

اخي الكريم راعي النحل
بارك الله فيك وحاضرين للطيبين اللي مثلك وشرواك
وبالنسبة لعرض السبيطي مقابل العسل فانا موافق وترى انت الربحان :D

اخي الكريم gulfhunter
راحت ايام هوامير منيفة للاسف وما عاد تلقاه الا نادر جدا وحداق السيف اكثره قرقفان وشعم ونيسر واحيانا شعري وسبيطي وخيوط المد في منيفة هي احسن شي انا اذا رحت امتر منيفة واحط لي على الاقل 3 خيوط مد كل واحد 100 ميدار والحمد لله احيانا اصيد واحيانا اجي ما القى خيوط المد الظاهر ان السمك الجارح يقطعها

والطراد بصراحة ما يسوى توديه منيفه واذا انت من اهل الدمام خلك على مرك لا يجيك اللي امر منه لان انا شفت صيد بحارة منيفة 99% شعري وعيبها ان مباحرها بعيدة ويبيلك مشوار لما توصل للمحلات الزينة حسب ما اسمع من البحارة هناك
والشباب عندهم طراريد المنيوم حق الحداق حول السيف يعني ما نبعد ويصيدون شعم وسبيطي زين بس هامور قليل مره

واذا انت تدور الهامور تراه عندك بالدمام ليش تروح منيفة روح النيوة اللي ما تبعد عن بندر الدمام الا 15 دقيقة هامورها اكثر من منيفة وفيها شعري واحيانا سبيطي

واي استفسار انا حاضر

وفقكم الله
تحياتي
gulfhunter
18/02/2004, 07:51 AM
السلام عليكم ورحمة الله وبركاته

جزاك الله خير يا بوراشد
أبوسبيع
07/11/2008, 08:24 PM
عدل شغلك يا بو راشد


بوجبر وما ادراك ما بو جبر راعي اللومينة الرصاصية


عبد الله جبر الدوسري


اشهد انه رجال نشمي ويستاهل من يتعنا له



طيب عبد الله جبر واخوااااااانه كلهم اعرفهم


لكن انت بو راشد انا يمكن اني اعرفك انت سلمان راشد الدوسري؟؟؟؟



بس ما اظن انك سلمان سلمان ما يحدق



على فكرة انا حافظ خورة منيفه والقطع كلها شبر شبر واذا تبيني ادليك محادق علمني


اناااا من رواد الصنادق


قعدت في منيفة اكثر من قعدتي في بيتنا


ويشهد الله علي اني جاي من منيفة امس عشان آخذ ملابسي الشتوية وهذا انا حزمتها في الشنطة وماشي بكرة في الليل ان شاء الله
أبوسبيع
10/11/2008, 12:42 AM
اذا تبي تعرفني اسال خالك عبد الله وقول له

من اللي كانو مخيمين عند الصيهد الكبير على البحر قبل سبع سنين وقام ولدهم حفر حفرة على السليته وطحت فيها باللومينة وقلصوك

كنت كل يوم عندهم

اهو بيعرفني على طووووووول
راعي منيفه
16/03/2010, 04:49 PM
سلام عليكم ورحمة الله وبركاته
اخوي ابو راشد ابيك تفيدني وش احسن وقت الصيد في المنيفه

ورجو الرد سريعاً عشان انا طالع البحر يوم الخميس موافق 2\4
والله يعطيك اعافيه اخوي ابو راشد
حياتي البحر
16/03/2010, 05:35 PM
ان شاء الشباب فادوك انا من الغربية بس حبيت اشاركك
wl-wl
16/03/2010, 06:32 PM
يعطيك العافيه ابو راشد ماقصرت وفزعت للرجال ....................تقبل مروري ياراعي الموضوع
بو اليازية
17/03/2010, 08:28 AM
سلام عليكم ورحمة الله وبركاته
اخوي ابو راشد ابيك تفيدني وش احسن وقت الصيد في المنيفه

ورجو الرد سريعاً عشان انا طالع البحر يوم الخميس موافق 2\4
والله يعطيك اعافيه اخوي ابو راشد



وعليكم السلام ورحمة الله وبركاته


عزيزي راعي منيفه الموضوع انطرح في سنة 2004


وآخر مشاركة لـ بوراشد Bo Rashed كانت بتاريخ 13/9/2005
((الله يذكره بالخير))
http://www.up.ma/images/xblv5hhph9wircwiz34p.jpg (http://www.up.ma/)
راعي منيفه
17/03/2010, 02:05 PM
ممكن تفزعلي
مكشتاني
11/09/2010, 01:37 AM
رايك بالخريطه يابوعبدالرحمن
بحرالخبر
11/09/2010, 10:21 AM
اخوي مكشتاني
الخريطة عندي من قبل 6 سنوات او اكثر ومنيفة الحين ماتشجع وايد تصيد بس موذاك الزود الله كريم ان شاء الله يرزقنا
وحدآني
11/09/2010, 11:01 AM
استفدنا من الموضوع جزاكم الله خيير
accentkool
12/09/2010, 10:25 AM
ماشاء الله بوراشد شرح وافي ولا احلى سلمت يمناة ويعطية الف عافية
بحرالخبر
17/09/2010, 11:58 PM
معلومات ابوراشد القيمة عن منيفة
ود التوبي
18/09/2010, 04:13 PM
بس اي رقم فيهم راس بلبول
بحرالخبر
18/09/2010, 06:45 PM
اذا تعديت رقم 4 وروحت شمال توصل رأس البلبول
الجزيرة الي عند 5 و 7 اسمها ابوفارس
انا رحت قبل اسبوع وحرس الحدود افادونا ان هذه المناطق ممنوعة للمعلومية
ماادري ليش بس يمكن علشان زحمة عطلة العيد
تحياتي
ابوعبدالرحمن
DevDas
23/01/2017, 04:47 PM
ما شاء الله خوش موضوع وفيه كل المطلوب رغم قدمه

ناوي يوم الجمعة اروح منيفة ، كيف الصيد فيها أيام البرد !
وش تنصحوني

ألف شكر