( سنوكا ) يقنص ( خنافس ) بروضة خريم!

[حفرلوجيا]

سلام يالربع
قريب صحته لاتساعده على ( الشيل والحط ) طلب اختيار موقع يكشت هو وأنا والعائلتين يوم الخميس.. نبهته إلى أن ولدك ( سعد : ثاني ثانوي ) - الله يحفظه - لم تعطه حق قدره .. خله يجيني ونسنع طلبك .. سلمت سعد السيارة وطلبت منه يجهم بعد صلاة الفجر يضبط لنا مكان بجهة الطعيسات بروضة خريم لأنه أقل زحمة و( أستر) .. وحرصته على نصب الرواقات والخيمة - إذا لزم الأمر - حتى يأخذن النسوان والبنيات راحتهن .. ووصيته يكون مسؤول عن الصغار والجذعان اللي معنا لايقربون أو ( يضايقون ) العوايل الكاشتة حولنا . قال : سم ..وترى جذعاننا أعرفهم زين مايضايقون أحد ..... رديت : تسلم ياسعد وهذا الرجاء فيكم .
( وسعد هذا ولد نشيط ومتعافي وعنده سيقان حجم (عائلي ) ماتفرقهن بالشبه لو صفهن جنب جذوع شجر الكين اللي بالملز .. إضافة إلى أنه دايما والم للفزعات .. ويعجبك انه مايحب ( الدنفسة ) ويكره السرمحة والترزز لمضايقة ( الناس ) بالأسواق .. وغيور .:good:
أصبحنا عنده .. الأمور مخليها كما ينبغي .. وقفنا ودب النشاط .. الجذعان ينزلون العفش والصغار يلعبون والبنيات ( الله يحفظهن ) يجهزن الفطور .. كنا مرتاحين ومروقين حتى حول الظهر بدأ ( القلق ) .. هظلوا دشير ( المدينة ) وتناتقوا ( الخساس ) من جحورهم ..:mad:
لمحت سيارة صغينونة تقل قبون ( ولد عم الخنفس ) وينزل منها جذع يشبهها ( خنفس ) ويدلبح على سيارته من جهتنا و(يدعي) انه ينسم الكفر ::( ( من التنسيم اللي براسه ) .. ويمطط رقبته بإتجاه رواقاتنا البيض:no: ( سود الله وجهه ) ومتربس على كفر واحد .. ليا (....) > مايبي لها مفهومية < والبنيات المسيكينات تراكضن للخيمة.:(
تنهضت ( بدون شوشرة ) ابسنعه .. والمشكلة بـ( سعد ) اللي رصد الموقف وانطلق مثل الفشقة شايل معه حطبة سمر تشبه سيقانه ناحر ( الخنفس ) .. أشوى تماكنت سعد ومسكته بإيدي اليمنى وأتل الخنفس بإيدي اليسرى : وش عندك يا( العفن ) لك شوي تبي ( تبصبص ) :mad:.. قال برقة : أن انسم الكفر ( ابتعس ) ..
ياجعل حياتك للتعاسة .. قوطي الصلصة اللي معك تدقر بعود رمث وشلون تبي تطعس بها .. احمد الله لحقت عليك وإلا كان صرت من صيد أمس .. وانقلع لأبوك ( لابو آبوك ) يعلمك إن اللي ( يتجرأ ) على محارم غيره ( تهون ) عليه محارمه .. وإلا الفشلة أظنه ماهمتك ولا هي أكبر هم اللي وراك:no2: .
هو ماصدق إني تركته .. لكن سعد قال بزعل : ليش ماخليتني أأدبه ؟! .. لا ياسعد .. أنت ودك تدبه ماهو تأدبه .. ولا أضمن انه مايفطس بين ايديك .. خلك حليم ياسعد ونبي كشتتنا تنتهي بدون مشاكل :(.
وبعد الغداء زانت الجلسة والجميع مبسوطين .. وفجأة .. انطلق سعد يقتحم الجهة اليمنى لرواق البنيات ويصرخ ( تغطوا يالحريم ) وانطلق يرقى طعيس مواجهنا واختفى ..
أفا .. وش اللي صار ؟! :looney:

---------------- (( يتبع ))-------------

[راع الكحيلة]

وش بلاه سعد؟؟؟ تراك روعتنا

وشفيه ؟؟ هو رايح يصد هجوم معاكس ؟؟

والاّ ناوي يجرب التطعيس برجليه على الطعيس؟؟


ياالله عجل بالسالفة أتحرّاك الليلة

[كشات]

بسم الله الرحمن الرحيم
السلام عليكم ورحمة الله وبركاته

ياهلا هم هلا بابو سليمان

كل هالوقت ينسم هوا لكفرات القبون
اجل لو معه لوري والا عايدي كفراته بالون وش بيسوي؟
بيفرش فراشه ويمكن يسوي له مخيم جنب الكفر

هذا اللي يسمونه المصاريه (بيتلكّك)

تسان خليت سعد يلكّه

ابو سليمان سعد ذا لاتفرط فيه ابد
بس يبيله دورة (تقويه قلوب)من القوّه
وش بعد ذا
قوة قلب + جرم مب صاحي + سيقان كينه

وتدري ان هالنوعيه اللي مثل سعد مايدرون عن قدراتهم
يحسبون كل الناس مثلهم
وياويلك ان مزح معك مزح على مقاسه هو

على العموم يابو سليمان
تراني احتري باقي السالفه
ابشوف الطعس(الله يعينه على شي يشيله) اللي رقاه سعد وش وراه؟
لا تقول لقى الارض اللي بافلام كرتون (عدنان ولينا)
:good:


انجز علينا

[حد السيف]

حفرلوجيا
هلابك ونقضت المواجع
الله يقطع ابليس هالنوعية ذكرتني اول ماجت سيارات الدفع الامامي والغو الدفرنس الخلفي ببعض السيارات
طراف الثمامة بعد المركز كانت هناك احل الاماكن وخصوص(ن) انة صادة وبعيدة عن المطافيق والمتطفلين
جار راعي سيارة كنها علبة ساردين ومعة رفيق لة يستطلع المنطقة وسوالة شباب معكم اشتراك
رد علية واحد من الشباب فية وين سيارتكم اروح معكم وتراة ماهو بعيد من سعد وقشارتة قالو لالا تكلف على نفسك اصر شبية الريح الاسم الحركى لة لا مايصير اخدم مندوبكم وحاولو التخلص منة وركب معهم بعد اكثر من ساعة رجع على رجلية ليش وين الشباب قال نسخة سعد كفخت ابوهم وتركتهم مغرزين والله العالم
انهم ماراح يرجعون الى اهاليهم قبل ماتطيب جروحهم وبعد الاستفسار اتضح انة لاسيارة ولا يحزنون تبي اشتراك




محبك اخيك
حد السيف

[حفرلوجيا]

أخوي راع الكحيلة: شكرا .. سعد مافيه إلا العافيه .. ابشر بـ( سعدك ).
أخوي كشات : شكرا.. :D .. حسبي الله على شيطانك .. تجيك باقي السالفة .
أخوي حد السيف : شكرا .. وجاتك علوم النسخة ( الأصلية ).

---------------------- الجزء الأخير ----------

طلع لنا سعد من الجهة الثانية من وراء الطعس من جهتنا رافع مراهق ( خنفس ثاني ) ويحلته بإتجاهنا ويجيك متدربي الخنفس هو ودربيله اللي معلقه على رقبته حتى صار حول طرف الزولية :mad:.. والمشكلة سعد مااكتفى عمل حركة طيران تشبه حركة المصارع سوبر فلاي سنوكا ( قديم :p).. ويطب ( يبزخ ) عليه وخلانا نسمع من تأثير الضغط والذراقه صوت مش ولابد من الخكري .. ومن تأثير فشلته إدعى إنه يكح يحاول يقلد الصوت اللي طلع ( على باله يغطي ) :D.. وتلطمتنا .. و سعد لقط الخنفس ورفعه بين ذرعانه يبي يرجد به مرة ثانية :eek:.. وفز ابوه : لا لا ياسعد يكفي اللي جانا لايصير ( مثل قران الخليفي على ولده ) ويخلي مجلسنا دبل خياس .. خله يولي الله يبلاه بدنياه .. وخذ منه الدربيل كود أبوه يجي ونعلمه انه يبصبص على بنات الأجواد :mad:..
عاد بعد ماطس الخنفس الأخير قلت لإبوسعد : ماكل مرة تسلم الجرة.. خل نغير مكاننا وندور خلا خالي .. زعل وقال مايقوموننا اللي مايستحون.. مابقى إلا هي .. رديت : المشكلة ماهي باللي مايستحون .. أخشى من سعد هالغيور يطيح بواحد منهم ولاحنا حوله ويروح بين ايديه فطيس:( .. وتقعد أنت وإلا ولدك باقي حياتكم بالسجن قال : ماهي لهالدرجة :confused:..
إلا لهالدرجة ونص .. شف ذرعان ولدك لاصار مقفي تقل إسطوانتين غاز ( 25 ) من يمين ويسار:p.. هالذرعان هي اللي تبي تقضي على اللي ( يدبغه ) بهن .. قم .. مشينا .. لابارك الله بولد مايغير على بنات الحمايل :mad:.
وسلامتكم

[صقر]

بدأ ( القلق ) .. هظلوا دشير ( المدينة ) وتناتقوا ( الخساس ) من جحورهم ..

لمحت سيارة صغينونة تقل قبون ( ولد عم الخنفس ) وينزل منها جذع يشبهها

هههه هههه هههه والله انك ضحكتني ... ويا كثرهم هالخنافس

حفرلوجيا:

الحقيقة طرح رائع وجديد ومهم ومفيد...

والحقيقة ان هؤلاء يفسدون الكشتات العائلية حتى ان بعضهم يتحاشى الطلعة بعائلته أو يحرمهم من بعض الاماكن بسبب هؤلاء.

جزاك الله الف خير وضاعف الله لك الحسنات بعدد حروف هذه المشاركة الرائعة.

أخيرا ما أحوجنا الى هذه الاطروحات المفيدة والمغلفة بقالب فكاهي .. فهي تأتي من القلب الى القلب....

وبارك الله فيك...

[راع الكحيلة]

كانت كاميرا مكشات متواجدة في أرض الحدث
وقد تم إلتقاط صورة الأخ حفرلوجيا وهو يحاول
أن يفك الاشتباك بين سعد والسلوقي راع التنسيم
وكانت هذه الصورة

http://www.mekshat.com/pix/upload/images4/haf.jpg


....ومن تأثير فشلته إدعى إنه يكح يحاول يقلد الصوت اللي طلع ( على باله يغطي ) ...

الله يقطع ابليسك والله اني اضحك وانا اكظم الضحك ..لا يجيني أحد من الورعان ويفتح ملف تحقيق
وشهوله تضحك خلني اضحك علمنا خلنا نضحك ..ثم تروح عليهم فزة المدارس من الصبح

[المربد]

بنتي تسمع من امي عن طلعات خوالي قبل وشلون البنات يمشون ويلعبون بالبر من غير غطاء.
عاد تقول لي اتمنى لو يوم واحد اشوف بر ما فيه احد، قلت لها يا بنتي راحت عليكم ما لقينا مكان للعائلة ياخذون راحتهم فيه.
الله يوسع صدرك يا بو سليمان،

[برق شلع]

والله انالخنافس بالبر هاليومين مسويين زحمة على غير سنع00
بس ماعليك الا الصبر00وخل معك عجر:flog:اواذا كانت المسافه بعيده بينك وبينه وحسيت انه
يدربل:BUTT1::butt3: فتناول داير 11 وثتنين مضيئات من فوقه اضمنلك انه بيعقل00
والطريقه مجربه000

[الملثم]

وعليكم السلام ورحمة الله وبركاته
الله يستر علينا وعليكم والله ذي السالفة بس عندي سؤال وش تقصد بـ ( مثل قران الخليفي على ولده )

[المسفهل]

أعتقد أن أبا سليمان لا يستطيع أن يجيب على سؤالك أخي الغالي الملثم !!!
يمنعه الحياء لأنني أعرفه فهو رجل حيي وخجووول مررررة ، ولذلك فسأجيبك
بالنيابة عنه فهذا الذي ذكره مثل قديم يضرب لمن يريد أن يصلح شيئا فيفسده
ومثله قولهم : يبي يداويه ( أي العين ) واعماه ...
وهذا الخليفي له ولد - أعزكم الله يبول على فراشه إذا نام وكبر وتقدمت به
السن وهو على هذه الحال فقرأ عليه والده لعله أن يشفى ولكنه بدأ يهرب
من السبيلين :D

[الطبيب]

سنوكا يا القديييييييييييم

بس عز الله انك جبته يا ابو سليمان

فعلا اذا كان الاب ما ربى ولا وجه عياله التربيه والتوجيه الرجولي الصحيح راح يطلعون خنافس ( وبريحه بعد )

اما اذا تربوا على المرجله والشيمه مثل (( سعد )) الله يخليه لاهله ويكفيه شر عينك:) فانهم هم رجال المستقبل المعتمد عليهم لاقامة عماد هذا الوطن

وفعلا اللي يحسب بنات الناس لعبه ربي يعاقبه باهله واذكر كل الشباب (((((من زنى يزنى به )))))

الموضوع الآخر
وش يستفيد الهيس من قزه لبنات الناس الا اذا كان عنده شي عادي اذا احد قز اهله ويحسب باقي الناس مثله (( الديوث )) بعيد عن من يقرأ

=========================

ارجع واقول

ما زلت تتحفنا يا ابو سليمان بفنك العذب وكتاباتك الراقيه والمنظومه كأجمل قصائد الشعر

والاهم انها تهمنا ككشاته ودايم في خطر من الخنافس (( ام ريحه ))

وتقبل تحياتي القلبيه

[النبراس]

سلم لي على سعد
هذا والله الرجال
وتسلم على السالفه مع انك جريتنا اول شي

[شبوب]

السلام عليكم

ابو سليمان يازين سواليفك وهريجاتك( التصغير هذا من ملحها والله )

ونا برأي الشخصي ما مثل البعد عن المحلات المشهوره منها ، اذا كنتم عوائل انهم
يأخذون راحتهم لان البنيات ( الله يستر عليهن ) مهن مثل ( سعد ) اذا بغى يقضي حاجته
يروح عند اي قشعه أو محل طامن والسلام:D

وهذا كثير من اصحاب العوائل ما يأخذون حسابه وينسونه لانهم مثل سعد00؟


يحياااااتي ،،،

[مراكي الذيب]

الله يعطيك العافيه اخوي ابوسليمان.


الله لايكثرهم , الناس تهج عنهم وهم يلحقونهم بهالبران .

لكن اذا ابلشك واحد منهم ادخل بوجهه ومد يديك لين تطلع مع اذانه ونزل رجولك بين جلده ولحمه والبسه تقل اوفرول (هذا لباس للعمل قطعه وحده) واذا لبسته دور اكبر سدره وهات يادوس لين تصير السدره تبن وبهالطريق مارايح يعودها:D

[تواق]

نعم اخوي حفرلوجيا لابارك الله برجل مايغار على بنات الحمايل

بارك الله فيك واخواني الاعظاء

اخوكم / تواق

[خشم الحصان]

الاخ الغالي ابو سليمان
انا معاد اقراء لك الا بعد اكتمال الموضوع وانت تدري علشان اضحك مره وحده والله ماعندي استعداد
علي الضحكتين اخاف من الفتق في بطني عوم الله يجزاك خير علي هالتوجيه والتنبيه وكنة زي ماتوقعة
والله انك بتقول يوم راح سعيدان يرقي ورا الطعيس قلة اكيد قز واحد معه دربيل المهم ان الدربيل ماهوب
لليلي بلي الموت الحمر في الدربيل الليلي الي يضن الوحد ان في الليل استر وعيونه عمياء عاد انا اقول
من طلع مع عياله ياخذ معه رواق او حمام الله يكرمكم ولا يقول ان الليل اعماء هذي كلمه قديمه للشيبان
منول لنهم مايدرون ان فيه دربيل تشتغل في الليل عاد علي وصفك لسعيدان تبي احد ينضله انا خابر ان فيه ناس تنضل علي الوصف تبي ترقده انت ثم نسمعه في الراديو في برنامج (اخوتآ اجبرتهم ضروف المرض)
يجرون معه مقابله وسبه توصيفك له الله يرج بليسك انا منول وادي اقابلك ولحين هونة عوذا منك ومن
وصفك والله لو توصف لوحد اعماء واطرم وصقه كان دل علي طول
اخوك
خشم الحصان:D :D :D :D :cool:

[حفرلوجيا]

أخوي صقر : شكرا .. وجزاك الله بمثله .. وصدقت اصبحت العوائل تحاصر حتى بالبر .

أخوي راع الكحيلة : شكرا .. ايها الفنان التشكيلي اللحين كأني مافهمت الرسم ( أو ماودي أفهم ) إذا كان سعد هو اللي بين الأثنين فأنت ظلمته .. وإذا هو اللي يسار الصورة فأنت ظلمت غيره :mad:.. بس رسمك أضاف بعدا فنيا للموضوع .. أقدره لك .

أخوي المربد : شكرا .. وسؤال العفيفة يكدر .. ياحول ماهي مصدقة .. لكنه الواقع للأسف .

أخوي برق شلع : شكرا .. :D طريقتك قد تكون غير مأمونة .. يعني لو ( هزع ) شوي داير 11 و( شلع ) طباقة رأس الموذي من اللي يتأذى أخيرا ؟

أخوي الملثم : شكرا .. ولاأزيد على توضيح الريس المسفهل في هذا الموضوع .

أخوي المسفهل : شكرا .. وأشوى انك انقذتني من الإحراج وقطعت عنا الخجل .. ياسلام لما ( المشرفين ) يدارون طبايع وخواطر الأعضاء .. أخجلتنا ياريس >>> ماصرناش .:p

أخوي الطبيب : شكرا .. قلنا لك قديم و( لابس شماغ ;) قطن بعد كان ماهو مرضيك .. بس ليت اللي يضايقون بنات الأجواد يدركون ماتضمنته عباراتك .

أخوي النبراس : شكرا .. وأنت سالم .. بس ترى سعد اللي جرجرنا .:p

أخوي شبوب : شكرا .. وما يحتاج بين الأقواس توضح كلامك مليح بكل الأحوال .. وانا فيم تفضلت في أن نبتعد عن الزحمات .. معك بس وش ذنب المضطر .:confused:

أخوي مراكي الذيب : شكرا .. :D الله يضحك سنك ..

أخوي تواق : شكرا .. والموضوع فيك يتبارك .

أخوي خشم الحصان : شكرا يا( زين ) صاير افقد التركيز إذا قريت ردودك:D .. بس خل عنك اليوم بموضوع المشراق أخذت حقك . ;):D

[سيف السيف1]

ياليتك ياحفر لوجيا حاجرهم داخل الرواق وأنت الحكم .. وسعد يفقع وجهه والحريم يتفرجن :p ولاخلصت الجولة ضف عفش ومش:cool: والله إن ايحرم الحريم حرم..
أجل لاأقفى ذرعانه تقل براميل غاز 25:D

[خشم الحصان]

الاخ العزيز
حفرلوجيا و الاخ الغالي المسفهل
السلام عليكم
بعد البحث والتنقيب في عقول الشيبان واهل الامثال واجدنا ماهو اتي .
1-ان الخليفي ماقراء علي ولده
2-المثل يقول كوه عن الز....(يعني التبول )الله يكرمكم وفي الصبح لقوه............... علي فراشه يعني دق الطمه من الريحه يعني لوهم تاركينه مهوب افضل
اخوكم
خشم الحصان:D :p :cool:

[عنبري تمير]

والله يعجبك سعد هذا ودك ان يحطون هيئة في البران كلهم من اشكال سعد
وليس جميع البران بل الاكثر ازدحاما مثل:-
1-روضة خريم.
2-روضة الخفس.
3-روضة نورة.
4- ام شقووق (الرغبة).
5- الدهناء (( مافيه امل)).
6- وغيرها.
وكل واحد معه مشعاب طويل علشان يميسرهم الي هم اشكال الخنافس
مع احترامي للخنافس


ملاحظة
----------------------

الي بيطلع بالعوايل للبر
لايروح في الاماكن التي ذكرت سابقا او الي فيها زحمة

بل يصد عن العالم

حتى ياخذون راحتهم

وشكراا اخوي حفر لوجيا على القصة الممتعة الى روعتنا في جزئها الاول

خفنا على سعد ((الي ماينخاف عليه)) بس قصدي خفنا عليه

يعني اننا خفنا انه مطسله خنفس ثمين يروح في خرايطها

الله يستر

واذكرو الله

[حفرلوجيا]

أخوي ابو فارس : شكرا .. :D أكيد يبي يحرم مادام سعد اللي يتولى المهمة .. لانه ببساطه يبي يصير من صيد أمس .. بس أبو سعد بهالحالة يبي يحرم البر .. لأنه أو ولده بالسجن .

أخوي خشم الحصان : شكرا على التوضيح .. بس متأكد إنك بحثت ونقبت بعقول الشيبان أو إكتفيت بـ( عقيلك ) :p

اخوي عاشق الدداسن : شكرا .. حلك هذا سيكون فعالا .. ولو طبقوه تبي تسمع كل يوم خبرمن نوع

( لقي اليوم ( ... ) شابا مصرعهم وأصيب ( ... ) اخرون كلهم بين الحياة والموت .....

بس هالخنافس ( يستاهلون ).:mad:

[تالي الاولين*]

.


والله ان سعد مقدى فيهم ... وهالاشكال ماينفع معهم الى كذا

يامال السلامة يابو سليمان


.

[حفرلوجيا]

أخوي تالي الاولين : شكرا .. وأنت سالم .. وصدقت هالخنافس ماينفع معهم إلا ......
بس ظنك إنهم ( ماينجسون ) يدك .. لذلك نصحهم قد يكون أفضل لكي ( يطهرون )