تبديل كفرات باثفايندر [الأرشيف]

نمر بن حثلين

14/02/2004, 11:24 PM

السلام عليكم ورحمة الله وبركاته

عندي باثفايندر 2003 كفراته برجستون جنط 17
والسياره قويه في الرمل ولكن الكفرات قاسيه مره وتثقل عزم السياره

من جرب كفرات وينصحنا بغير البرجستون للباثفايندر 2003 ؟

ددس

15/02/2004, 03:02 PM

شوف أخوي ان زميلي معاه مثلك وكان يعاني من الكفرات غيرها مافاده إلا بسيط

راح وركب 16 جنوط حقات باترول 2002 نفس الشكل بس صغيره وراح تحس بالقوة وتريح على موترك شوي ونخف المطبات بس الله يعينك اذا فقع بك كفر

نمر بن حثلين

15/02/2004, 07:02 PM

هلا والله اخوي وشكرا لك

بس كم تكلف الجنوط الجديده ؟

الطيب

15/02/2004, 07:09 PM

السلام عليكم ورحمة الله وبركاته

خوي انا معي باثفايندر 2001 جنط 16 و استعملت الكفرات شد بلده (بريجستون) لمدة اكثر من سنتين ..

عاد قمت و غيرت الى يوكوهاما 255/16/16 وبصراحة الموتر تغير على الرمل تماما ..

ولله يخوي اني ما صدقت .... الكفرات ضغك 40 و امشي على الرمل بالراحة ؟؟؟

طبعا الفرق الرئيسي في الدعسة ... البريجستون قاسي واجد ..

و لكن اخوي ما انصحك تركب جنوط الباترول لاني سمعت ان فيها مشاكل مع الباثفايندر

و اقترح تدورلك كفرات يوكوهاما توكون دعستها لينه و على جنط 17

ولله يوفقك ...

:)

محمود ابو محمود

16/02/2004, 12:22 AM

السلام عليكم ورحمة الله وبركاته

نصيحتي لك أخي تركيب كفرات دنلوب مقاس 275/60/17 فهي عريضة وقوية وممتازة على الرمل بدون إنقاص الهواء ، كما أنها لينة في المطبات ن وهذا الكلام عن تجربة شخصية ، وفقك الله لكل خير

نمر بن حثلين

16/02/2004, 06:15 AM

الطيب
صدقت ما تعرف مدى سوء البرجستون الا اذا جربت غيرها
واليوكوهاما معروف مريح وممتاز بالرمل وعلى الله القا منهم نفس مقاس الموتر
وشكرا لك اخوي

ابو يزن
275 :rolleyes: ما كانهم عريضات بزود ياخوي
اخاف العرض الزايد يشوه شكل الموتر :(
ما القا عندهم نفس مقاس شد البلد 245\65\16 ؟
وشكرا لك اخوي

ابو ســــاره

16/02/2004, 06:43 AM

انا ركبت يوكهاما الي يجي نقشتها وعره اشوي واطول مقاس باليوكوهاما وقيمة الكفر 430 ريال وكل شي فيه ممتاز للا من ناحية الرساوة ولا من ناحية المشي في البر مع اني ادخل لظلعان والوعر على سرعتى مستحيل ينشق او يتاثر ،،،

بس العيب فيه كبير جدا ،،، وهو الازعاج يعنى كنى امشي على جنزير دبابه ،،،
ونصحونى بعض الاخوان بالتويو يقولون ممتاز جداً واشوف اكثر الناس طايحين فيه وللمعلومية الكفرات يوكوهاما من ركبتهن قبل سنتين ما قد نسم ابداً يعنى الي الحين تيوبلس.

نمر بن حثلين

16/02/2004, 12:45 PM

يعطيك العافيه ابو ساره ومشكور

يوكوهاما كلن يمدحه ويثني عليه لكن ما لقيته :(

انت متاكد ان الي عندك جنط 17 ؟

الطيب

16/02/2004, 08:33 PM

السلام عليكم ورحمة الله وبركاته

يوكوهاما وكيله الجميح و الكفر اللي خذته ب 350 ريال

الجنوبي

17/02/2004, 06:26 PM

الله يعطيكم العا فيه يا شباب ..انا عندي 2002 والكفر شد بلد لاكن قاسي . وخلخل الموتر!!!!!!!
نبي واحد من الي جرب التو يو يعطينا خلفيه عنه وكم سعره بالسوق....
.

شرقاوي

19/02/2004, 01:06 PM

يالربع محد يخبر جنوط 15 حلوه للباث فندر وسعره رخيص ؟؟ لآن جنط الوكاله 17 وبالبر يطيح عزم السياره ولا تنسون مايتوفر لمقاسه كفرات كثيره

مطرد القمري

21/02/2004, 09:20 AM

صبحكم الله بالخير

اخوي الجنوبي حسب علمي الى الآن لا يوجد كفرات جنط 17 ( تيو ) انا سألت العمودي في جده وكيل تيو وافاد انه لا توجد الآن كفرات حنط 17

علينا الأنتظار وتحمل كفرات البرجستون الى ان نجد البديل لها

اخي نمر بن حثلين نعم الباثفايندر مقاس الجنط ( 17 )

تحياتي للجميع

الجنوبي

21/02/2004, 10:32 PM

الا خوه الا عزاء
وداعاً للبرجستون
شريت كفرات تو يو مقاس 255 \60\17
الكفرات لينه ودعستها حلوه. وشكلها انيق
والموتر اخف من اول . وبعد يوفر في البنزين
الكفر شاريه من جده . كيلو 3
السعر 2100مع التركيب.....................

شرقاوي

21/02/2004, 10:45 PM

طيب ياخوي الجنوبي انت مركب اربع ولا خمس كفرات ؟؟
وبعدين شلون تويو بالتحمل هل هي مثل بريجستون ولا كيف ؟؟؟؟

مطرد القمري

22/02/2004, 12:46 AM

اخبار حلوه الجنوبي .....

ممكن تليفون المحل او اسم المحل لو سمحت ... وهل غيرت اربع كفرات ام خمسه

تحياتي

ابو ســــاره

22/02/2004, 04:48 AM

اسف لتأخير في الرد ،،
ابشركم يالربع ركبت لي طقم تويو علي كيف كيفك كفرات رفيعه وهاديه وراسية وممشاها حلو كنك على لكزس ونقشتها حلوه و10غاط بعد يعنى نفس اليوكهاما الي كنت مركبهن بس فرق الراحة فرق السماء عن الارض وللمعلومية اكثر راعين الكفرات يقولي ما يجتمع نقشة حجرية مع هداوه وانا شريتهن من وكيلهن دقيت على 905 وقلت ابي وكالة تويو وعطاني رقمهم وعلى طول نصيتهم وركبتهن الكفر الواحد 320يعنى الطقم 1280 .
على فكرة المقاس الي انا مركبه هو اخر حد يعنى ما بين الكفر وبين الياي الامامي الا اربعة سنتى تقريبا ومقاسه اظاهر 245على 75 .
والجنوط شد بلد

الجنوبي

22/02/2004, 07:57 PM

الا خوه الاعزاء
شرقا وي
مطرد القماري
انا مغير اربع كفرات سعر الواحد 525 والكفر لحد الا ن ممتا زوعال العال .
ونقشته ريا ضيه.وتوجد منه 3 احجام ما ني فا كر منها الا ما كنت ابحث عنه
255\60\17
والمحل مركز البا روم ... طريق مكه .... كيلو 3 والوكا لات عديده وانت وشطا رتك

جميل جمال

23/02/2004, 01:00 AM

اخوي ابوساره ....

كم موديل موترك ؟؟ وكم مقاس الجنط ؟؟

يا جماعه انا اليوم شفت بايثفندر 2003 جنوط مقاس 17

عليه كفرات كوبر مقاسهن 245 /65/17

مادري احد جربهن من قبل ؟؟

ماتدرون كم سعرهن ..

او احد يعرف من هو وكيل الكوبر اوهن لينات ولا قاسيات ؟؟ لاني احتاجهن للنفود ..

بـــدر

24/02/2004, 04:12 PM

السلام عليكم ورحمة الله وبركاته
انا ركبت كفرات ( كوبر) على باثفيندر 2003 جنوط 17 ، صراحه شكله زين وراسيه شوي بس في الرمل ما حسيت ان فيه فرق بينها وبين شد البلد الي من برجستون، لاكن اتوقع ان برجستون اقصد في صرف البنزين نوعا ما لانها سطح الكفر شبه دائري من ناحية احتكاكها مع سطح الارض مقارنه بكفرات الكوبر
والله اعلم

BASSAM

22/05/2004, 11:12 PM

السلام عليكم ورحمة الله وبركاته

اخوي ابو ساره ولا يهنون الشباب وش رايك ب تويو مقاس 275/60/17 أو دنلوب 265/65/17 مع العلم ان سيارتي باثفيندير 2002 .

بعدين ممكن توضح مقاس كفرات سيارتك .

أصحاب الباثفيندير ما واجهتو مشاكل مع الكفرات اللي مقاسهن اكبر من الا صلي من ناحيه الاحتكاك بالرفرف.

وجزاكم الله الف خير

ابو ســــاره

23/05/2004, 08:53 AM

المقاس اضاهر انه 245 على 175 انا موتري 2000 يعنى جنط 15انا رحت لوكيل تويو شفه وانت نازل من كبري دويرا الصالحية باتجاه الجنوب يجي على اليمين قدام شوي وقلبت بالكفرات الي عنده واخر شي ركبت اعلى كفر عنده يركب على الباثفيدر مابينه وبين حافة الياي الامامي للكفر الا ثلاثة سنتى بس تراه مهوب عريض زي شد البلد اسخف شوي بس اطول وانا اهم شي عندي يكون الكفر طويل ورافع الموتر والكفر بصراحة راسي وهادي ماله صوت رح لمهم وشف الي عندهم .
والدنلوب ما لي به علم .

BASSAM

23/05/2004, 11:41 AM

السلام عليكم ورحمة الله وبركاته

مشكور اخوي ابو ساره

path_poth

24/05/2004, 10:10 AM

كوبر وكيله القحطاني ماريتايم بطريق خريص جهة المعارض.
ابو سارة: كم مقاس الجنوط؟
شباب نصيحة لحد يركب 275 اللي هو العرض لأن الباث مو زي السفاري او التويوتا مافيه عرض يستاهل
بالنسبه للـ17 فيه 265/65/17 برجستون زي حق البرادو
275/70/17 يوكوهاما زي اللاندكروزر 2003 خليجي
265/60/17 جود يـيـر وأتوقع إنه زين لأن الشباب يركبون زيه 16 على جيب الربع
275/70/17 دنلوب
وباقي الكفرات تقريبا مافيه مقاسات
بالنسبة للـ16
عندك الميشلان 245/75/16 وهذا انا مركبه على الجمس من ابدع مايكون وناوي افكهن مع الجنوط(الجمس لأنه6 مسامير) واجربهن
وعندك السومو تومو الشاهين، والبرجستون حلو على الـ16 والدنلوب واليوكوهاما والهنكوك والبريللي

path_poth

24/05/2004, 10:13 AM

للمعلومية:
تراي ماخليت وكيل كفرات او محل(بدون مبالغة) إلا وسألته عاد تراي للحين محتار هل أجيب جنوط سفاري 16 من التشليح بحدود1800 أو من الغرابي تجاري بحدود 900 أو أركب 17

BASSAM

24/05/2004, 10:50 AM

السلام عليكم ورحمة الله وبركاته
اخوي path

http://www.miata.net/garage/tirecalc.html

الرابط اللي فوق يوري الفرق بالشكل واللي اعرفه ان الفرق الى 3% عادي على حسب كلام بعض صفحات الكفرات .

بس المهم ان الكفرات ما تحك بالر فرف وقت المطاعس

path_poth

26/05/2004, 10:49 PM

مافهمت الكلام الموجود بالموقع لأني جنط

الله لايهينك عطنا الزبـــــــــده

مسداح مرداح

27/05/2004, 07:53 PM

اقول يا شباب

غير الوكاله لا تركبون

هم ما حطو جنط 17 الا انهم عارفين المقاسات

ولا تتفلسفون

alferis

27/05/2004, 10:16 PM

هلا بيك اخوي path_poth المسأله اوضح من القمر في يوم30 من الشهر
ابشرح لك لكن اذا مافهمت مهب ازيلك
لنفرض ان عندك باثفيندر جنط 17 (الاعلى فكرة انت جنط كم انش :D )
وتبي تغير كفراتك ومقاسهن 245 / 65 /17 وتبي تركب كفرات مقاس مختلف وتبي تعرف كم الاختلاف فاهم الى اللحين ولا اعيد. زين
تجي للموقع الله يحفظك وتحط قدام كلمت stock tire مقاسات كفرك الحالى وتحط قدام كلمت new tire مقاسات الكفر الى تبي تركبة بعدين تناظر الصورة الي تحت فالون الرصاصي هذا الجنط ولاسود هذا الكفر الى تبي تركبه والاطار الى يكون محيط بالكفر من الخارج او من الداخل حسب حجم الكفر بتاعك هذا الله يسلمك كفرك اللى تبي تغيره
ان شاء الله تكون فهمت

اما انت اخوي مسداح مرداح لا تقول ولا تتفلسفون....
صحيح ان جنط 17 افضل وامن اذا انفجر الاطار لا سمح الله واحسن شكل على الموتر واغلى سعر(1) وهذه كلها مميزات
لكن جنط 16 افضل في الرمل و بالصحراء اقل مطاب وبطانيج ووووو.....
وسلامتكم
(1)بناء علي قاعدة كل رخيص مخيس. :D

راعي الحمره

28/05/2004, 02:54 AM

السلام عليكم ورحمة الله وبركاته

اخوي نمر بن حثلين ترى الكفرات العريضه مثه 275 تراها ماهي زينه للهيئه الاماميه للسياره وتتعب باور السكان , واذا سقت الموتر راح تتغير عليك سورقته في الفات , انصحك لا تزيد عن 265 للباث فايدر .

مع تحيات
اخوك راعي الحمره

BASSAM

29/05/2004, 09:23 AM

راعي الحمره
alferis
مسداح مرداح
path_poth

السلام عليكم ورحمة الله وبركاته

شكرا على الاضافات

BASSAM

02/06/2004, 09:55 AM

اخوي الجنوبي

السلام عليكم ورحمة الله وبركاته

وشلون الكفرات تويو معك في الرمل والطعوس والمناطق الصخريه ؟

والعزم وشلونه؟

و شكراً لك

الجنوبي

02/06/2004, 01:26 PM

اخوي بسام
التويو مايحتاج شهادتي . وهو افضل الموجود بالسوق
ودعساته جميله جدا وراكبه على الموتر
ولا كن عيوبه ماينفع في المناطق الصخربه لليونته ..ولا نه يلقط حجاره .
ولا كن تسارعه ممتاز ورساوه في الخط . وممتاز في الطعوس.........

BASSAM

02/06/2004, 01:50 PM

شكرا اخوي ماقصرت.

mfad

05/06/2004, 02:45 PM

انحاشو عن التيو الله يقلعها بهذلتني قاسية في الرمل انقصها ((20)) ولا فيها فايدة عليكم ياسنايدي بالشاهين تراها لينه في المطب والرمل

BASSAM

06/06/2004, 12:50 PM

اخوي mfad
السلام عليكم ورحمة الله وبركاته
طيب وش تنصح المقاس الزين للباثفيندير جنط 17 وهل يوجد نفس المقاس الاصلي 245/65/17

وشلونها بالطرق السريعه ؟

و شكراً

كشتون

08/06/2004, 08:22 AM

السلام عليكم ورحمة الله وبركاته

يا شباب أحب أنقل لكم تجربتي الجديدة نوعاً ما .

انا ركبت كفرات مشلان صناعة كندية نفس مقاس شد البلد (باثفيندر 2002)
245/65/17
Traction A, Temperature A , Speed H
قيمة الكفر الواحد 670 ريال في شارع الغرابي بالرياض

الكفرات 100% إلى الأن بس ترى ما طلعت بها البر إلى الان .
و الفرق ملحوظ بينها و بين البرجستون

تحياتي
كشتون

الكاشت للبر

08/06/2004, 09:42 AM

السلام عليكم ورحمه الله وبركاته

بس قيم الكفر الواحد قيمة جيب (باثفيندر 2002)
انتقاد

متاخر

08/06/2004, 06:24 PM

كشتون ميشلان ماعليه كلام لكن سعره غالي جدا :confused:
حرام تشتري كفر بهذي القيمه وهو معرض دائما للمسامير والاحجار والمطبات :(

شفت راعي باثفايندر 2002 مركب كفرات هانكوك وميزتها انها لينه ورخيصه وتصبر
لكن المشكله انها اعرض من شد بلد وباعتقادي مشوهه شكل الموتر

الربذي

10/06/2004, 05:44 PM

انا عندي باثفايندر جنط 15 موديل 98 امريكي ورحت اليوم ادور كفرات 75 265 15 ولم اجد الا برجستون 235 75 15 240 ريال ومشلن 235 15 75 350ريال وش رايكم ياخوان المشلن ماهو قاسي والمشورة والنصيحة انتظرها من اهل التجارب والخبرة اخوكم

محمد العنزي

29/06/2004, 11:37 PM

السلام عليكم ورحمة الله وبركاته

ياخوان كفرات التو يو ممتازه جداًجداً واستعملتها على باترول سفاري

لكن عيبها الوحيد ما تتحمل الارض الوعره .. يعني تنسطح على طول

اما بالرمل عزالله انها خوش كفرااااااااات ... وما استعملتهن غير سنة وحده وغيرتهم لأنه خرب منهم اثنين

وما كل وعر وعر .. حسب تجربتي .. يمكن فيه احد له تجربه غير

وتحياتي للجميع

swzw2003

29/07/2004, 01:16 PM

السلام عليكم ورحمة الله وبركاته
الموضوع جميل
لكن ودي من الاخ الجنوبي يفصل عن كفراته أكثر
من ناحية الفرق بينها وبين البرجستون وتحملها
للأرض الصخرية والصحراوية والرملية
وكم غاط هي؟
والارتفاع يختلف عن شد بلد ولا نفسه-أقصد الموتر بشكل عام-
والله يوفقك لكل خير.....

ابو مرهش

31/07/2004, 12:15 AM

يالربع بالنسبه لهالمقاس من بريجستون 265/65 محد جربها على الباثفندر جنط 17 ؟

الأسد

01/08/2004, 06:31 AM

يالحبيب إذا كان موديل سيارتك 2003 تدري وش تسوي ؟؟؟؟؟؟؟؟

( مالك إلا خشمك لاصار عوج )

فهمت ؟؟؟ يعني إذا بغيت نفس مقاس شد البلد بالضبط فلا تعب حالك وتدور غير
البرجستون وبشرني إذا لقيتهن بعد ؟؟؟؟والله يعينك على (480 ) ريال للكفر الواحد
أما اليوكوهاما ماعندهم نفس مقاس شد البلد ،،، لكن عندهم أكبر شوي على حسب الوكيل الجميح ...

وسلالالالالالالالالالالالالالالامتك ...

سهم الشمال

06/08/2004, 03:29 PM

عساكم على القوه ياشباب.............
عندي جنوط 17 ومدحلي احد الزملاء الشاهين ويقول نقشتها حلوه(تصبر) وموجودهبالإمارات ما ادري وشرايكم ؟
كذلك وش ميزات وعيوب تبديل جنط17 بجنط16 وهل تنصحون ؟

مع العلم ان معي باثفايندر 2003 .

.................................................. ..............................................

ابو مرهش

07/08/2004, 02:29 AM

بعد تعب وفراره بالبناشر مالقيت غير هالكفر الي اهو نفس مقاس الوكاله للباث فندر بالشرقيه الي اهو كفرات بريللي
ويالربع انا ناوي اركبها بأذن الله بس ابي اعرف عنها اكثر هل هي ازين من شد البلد من حيث التحمل والليونه والرساوه ولا لآ.
مع العلم ان الطقم اربع كفرات تقريبا 2000 ريال يعني قريب من سعر البريجستون

alkongrs

10/05/2007, 05:30 PM

جرب هانكوك أو ميشلان

عبدالرحمن السالم

12/05/2007, 11:27 AM

لا تتعب راسك ولا شى .. انا معي باث 2005
وغيرت كفرات الوكالة البرنجستون وحطيت دنلوب مقاس 265/65/17 راحه راحه قمه الراحه ولا فيه احلى منها
وصدقني راح تتعب من الكلام ركب اللى براسك وتوكل على الله

واحد من زملائي معاه 2003 جنط 17 ركب يوكوهاما ويمدحها بالحيل ركب مقاس 265/65/17

وسلامتكم

عبدالرحمن السالم

12/05/2007, 11:30 AM

واذا تبون نصيحتي بالدنلوب شوفو هذا الموضوع للأخ قرم

http://www.mekshat.com/vb/showthread.php?t=40536

salehhd

13/05/2007, 12:13 AM

السلام عليكم

موضوع قديم لاكن مفيد وانا في صدد تغيير الكفرات ان شاء الله

وهذا تسجيل للمتابعة ويعطيكم العافية

بـــدر

23/03/2008, 06:13 PM

معلومات مفيده

المحترف800

23/03/2008, 10:26 PM

أنا معي باثفيندر 2005 ومركب له كفرات يوكوهاما وأنصحك فيه...

باثفندري2004

28/05/2009, 11:00 PM

ما فهمت تقريبا .. لذا وجب طرح سؤال جديد على هالموضوع المفيد

باث عليه جنوط 16 مقاس الكفرات الحالية 16/70/245

ينفع يركب عليه جنوط 17 مقاس الكفرات 17/65/265

ايش يحتاج نبدل؟

استخدامي للباث هوا السفر فقط لا تطعيس ولا شي

ارجو الافادة اخواني لاني بصدد تبديل كل شي

التعـ King ـديل

29/05/2009, 02:53 AM

اخوي الغالي انا كان معي باثفيندر 2005

المشكله اصلا مو بالكفر واذا تبي تلاحظ الفرق بالكفرات ركب فايرستون 265/70/17

واذا انت راعي بر وتبي جنوط خفيفه ركب جي تي 16 على كفرات دمنيتور زي ماكنت مركب على الباث حقي

ياشيخ صدقني بتنسى ان فيه جنط بالموتر من الخفه

تايه22

29/05/2009, 09:15 AM

السلام عليكم انا مركب كفرات دنلوب 265/265/17الصراحة ممتازة مع الطعوس اما مع المطبات قويةعلى
السيارةومع الخط الموتر ثقيل

باثفندري2004

29/05/2009, 04:41 PM

صقر ا لفز عة

29/08/2009, 10:35 AM

بــــسـم ا لله

جــز آ ك ا لله خـيـر ///
:good: :good: :good:

مـعـلـو مـآ ت قيمة .......
بـــــرجــــــــــســـــتـون وبــــــــس
:good:

برجـــــــــــســـتـون ."""

:good:

صــــقـر ا لفــز عـة
صــــقـر ا لفــز عـة
:) صــــقـر ا لفــز عـة:)

ابن هادي502

30/05/2010, 01:02 PM

يا اخوان السلام عليكم

يا اخوان انا نصيحتي كفرات دنلوب جيده في الطعوس وفي الزفلت مركبها لي سنتين على الباث ولا اروع من كذا هذا من واقع تجربة

7044

09/06/2010, 01:07 AM

يا جماعه البجستون قاسي وغالي وركزوا على غالي
الدنلوب ما يجي نفس مقاس الوكاله للمعلموميه الكفر كبير على السياره ويحك بالرفرف
والميشلان الجيد منقطع عن السوق والموجود صيني ومهب جيد
واليوكاهما ما يجي نفس مقاس الوكاله
انا بالنسبة لي ركبت ما كسس نفس مقاس الوكاله والصراحه شي مهب طبيعي رخيص وممتاز

وانا اتكلم على الباثفندر المقاسا موجوده بالدرج حق الرديف لزقه بيضاء لازن تكون نفس المقاس او قرررريب مرررره

اتمنى اني افدتكم