خيام بالأرقام .. مثبته بشيبان

[حفرلوجيا]

سلام يالربع
طلب مني زميل إحداثيات وصور من منتدى مكشات .. قلت الأمر بسيط .. تعال نعطيك فكرة عن المنتدى وكيفية التسجيل والإستفادة من خدماته الكثيرة.
بدأت أشرح وأسترسل مع الطقطقة بالماوس .. وأنا وهو مبحلقين بالشاشة .. وأشرح : والمنتدى فيه ( خيام كثيرة ) ولاتقول ( مالها داعي الكثرة ) لأن كل خيمة متخصصة في جانب معين .. شف نموذج خيمة ( ..... ) فيها مواضيع متنوعة عن ( ...... ) و..
وقاطعني : أشوف موضوعات مكتوب قبل العنوان كلمة ( ثابت ) وش علاقتها بكلمة ثابت عند العسكريين ؟
سالته : علمنا أول وش يقصدون العسكر بالكلمة ؟
رد : لو صرخ الضابط وأعطى أمر ( ثابت ) فكأنه يقول للعسكريين مسموح لكم تتنفسون وبس .. ولكن العسكر اللي أمرهم يثبتون مثل الجدار أو العمود ..
وكان ردي والحوار بيننا على النحو التالي :
- لاادري كيف أجيبك لكن إذا رأيت كلمة ثابت عند موضوع بأحد خيام ( أقسام ) منتدى مكشات فهذا يعني أن إدارة المنتدى أو ( المشرف ) قدروا أهمية الموضوع أو رأى المشرف أن يستمر معلقا في الأعلى حتى لايدحدر ولكي يضمن استمرار اطلاع الأعضاء أو الزوار عليه.
= يعني تقصد المشرف ( يربط جلنط ) على هذه ( الثوابت ) .
- أقول لك ثابت ماهي ( ثوابت ) !
= لاتتفلسف أنا أجمعها واقول هذه ( المثبتات ) ...
- قاطعته كيف تجمعها ( مثبتات ).
= رد بزعل : انت عندك أسئلة ( مثبطات ) على وزن ( مثبتات ) ..
- وش تقصد ؟
= استمر غاضب : ماأقصد شي بس هالبلاوي اللي فوق هي إعلانات أو تعليمات أو وش هي ؟
- إلى حد ما .. هي مواضيع أكثرها كتبها في وقت مضى أعضاء ومشرفون .. بعدها تم التثبيت .
= قديمة يعني .. نقدر نوصفها بأنها شيبان مثبته عليها الخيام ؟! إلا أسألك اللي كتبوها شيبان ؟ !
- هم مشرفون وأعضاء .. ماأحد قالك شيبان .
= آخر سؤال : كم نسبة المواضيع المثبتة للأعضاء والمثبته للمشرفين ؟
- تعال نعدها ( الآن ) .. إجمالي المواضيع المثبتة بكل الخيام ( 45 ) , منها ( 36 ) مثبتة كتبها مشرفون , و ( 9 ) كتبها أعضاء .. يعني النسبة 80% مقابل 20% .
= يعني نفهم ان أكثر الشيبان عند المشرفين .. يعني الشباب عند الأعضاء ..
في هذه اللحظة ( رن ) جواله .. ورد وهو يغادر المكان .. وقلت : تعال أوضح لك .. رد : بعدين .. طيب تعال أعطيك الصور والإحداثيات .. رد : اطبعها وأرسلها لي . :eek:.. المسألة تحتاج لإعادة نظر !.. كيف أرسلها لك و( هي عندك ) :looney:
وسلامتكم

[مشغول]

مراحب اخوي ابو سليمان

انت ليش تحفر على قبرك .
شف وانا اخوك اليد اللي ما تقواها صافحها :p

ولو ان كلامك صحيح :(

[السمح]

أخوي حفرلوجيا موضوع في الصميم حقيقة

وموضوع التثبيت من عدمه حساس جداً ، ولا أعتقد أنك تقصد الإعلانات التي يجب أن يطلع عليها زوار وأعضاء المنتدى فهذه بمثابة التعاميم الله لا يعيدها :D ولعل من الضروري تثبيتها بناء على طلبات من إدارة المنتدى للمشرف المختص .

أما ما يخص المواضيع المميزة في الخيام فهي نعم ثابتة ، ويضاف إليها كل ما يرى المشرف أنه أهل للتثبيت باستمرار ، ولا يضير ثبات بعض المواضيع المميزة لفترة طويلة فمثل هذه المواضيع - إذا اتفقنا أنها مميزة - تختصر الوقت والجهد للزائر الجديد الذي يبحث عن مواضيع في اختصاص محدد بدلاً من تقليب صفحات المنتدى ، وكأننا نقول له تفضل هذه المواضيع التي نعتقد أنها تفيدك أولاً ولك حرية التجول في الخيمة للبحث عن زيادة .

ولن أغفل نقطة أن الأكثرية للمشرفين فهي حقيقة واضحة ولا تحتاج إلى كبير جهد من أجل اكتشافها ، ولكنها جميعاً تعتبر مميزة ، وأكثرها صارت من هذه النوعية قبل أن يتحول العضو إلى مشرف ، فهل نلوي الحقيقة ونقول : لا طالما أصبحت مشرفاً فالمواضيع التي كتبتها سابقاً تتحول إلى مواضيع عادية ؟

أشكر لك حرصك الدائم على اظهار المنتدى بصورة مشرقة ومحاولاتك الدؤوبة من أجل رفعته .


أخي العزيز مشغول :
مشكور على مشاركاتك المميزة وخاصة فيما يتعلق بمسابقة الصور ، وثق يا أخي أننا معك على الخط ، فأنت لا تجدف لوحدك وإنما الجميع معك ، ولعل الأيام القادمة تحمل لك كل الأخبار السارة إن شاء الله .

وأختلف معك في كون حفرولوجيا يحفر قبره بيده ، ولكنه يحفر اسمه في صفحات المنتدى بماء الذهب ، ومثل هذا الموضوع الذي بين أيدينا خير شاهد على ذلك .

أحلى تحية

[كشات]

بسم الله الرحمن الرحيم
السلام عليكم ورحمة الله وبركاته

ياخي يابو سليمان
انت دايم تدق على الوتد الحساس

وش صيدك يعني
تبي الاعضاء تثبت مواضيعهم والمشرفين لا
وش ذنب المشرف لو كان بالاساس عضو
وشافوه سعلو على الشيون
والا شقردي مع الكل
والاسمح على الاعضاء
والا
والا
والا
ياكثرهم عجزت اعدهم :D

والمهم
ان اللي اختاره ولد العبودي مشرف
والا رشحوه اكثر من مشرف من كثرة مواضيعه المميزه والمفيده واللي تصب بمحور هالمنتدى

المسيكين ماله ذنب
وش ذبه انه انسان منتاز ومحترم ويقدر الناس ويفيد بالدرجه الاولى منتداه

يعني وش تبيهم يسوون
وش رايك نسوي معهم مقابلات صحفيه وننشدهم عن اسباب اشرافهم وعلاقتهم مع بعض
وهل فيها
فيتامين :eek:
waaaaoooooow

انهي الرد ابرك لي

ابو سليمان
سلامك تراي ماقلت شي
ابحل به لحالك
اجل ذا موضوع تكتبه
ياهمالالي بس
:D

[المربد]

الله يسلمك يا بو سليمان ، والتقصير مننا يا لاعضاء وليس من المشرفين وما اظن ان احد منا (غيرك) يكتب مواضيع مميزة ما حصل انها ثبتت.

[حفرلوجيا]

الاخوان مشغول , كشات , المربد : أشكركم على تعليقكم وإهتمامكم بالموضوع , وعلى ماأبديتموه تجاه اخوكم .

( قائد ) المنتدى أخونا السمح : شكرا , أحيانا يكون عندي ( شخصيا ) قناعة معينة تجاه موضوع محدد مطروح بالمنتدى , والمشكلة بعض الأحيان إذا قرأت ردودك .. شوي و ( أخمع ) بعد مايفتر راسي , عندك ( الله لايضرك ) قدرة على التأثير غير المباشر و( بهيادة ) .. لكن خل أعلمك برفيقنا اللي رجع مرة ثانية .. ودار بيني وبينه حوار أنقله بتجرد على النحو التالي :

- قلت له : طلبت صور وإحداثيات وادعيت ان جاك مكالمة ومشيت .. وش عندك ؟

= كنت أكلم فني ديكور وأثاث يسوي شغله مهمة للبيت .

- ماشاء الله كاثرة قروشك أو إنك فسقان أو تحت تأثير الضغوط الداخلية ؟!

= لا .. السالفة ومافيها بالبيت طلبوا مني تغيير الأثاث .. وكنت مطنش .. لكن قبل أيام هداني تفكيري لـ فني ديكور قلت تعال ضبط الشغل بأقل تكلفة .. نصحني ( أنجد ) طقم الكنب من جديد .. وأستبعد بعض قطع أثاث مسوية زحمة مالها داعي .. وأضيف قطع أخرى وأعيد ترتيب الموجود بطريقة أكثر أناقة .. وأعطي لمسات أخر للمجلس العربي تناسب ( الفترة ) أو اللي يسمونها ( إهتمامات الناس ) .. وفعلا طلع ( المجلس ) يوسع الصدر و( ذوق ) وأعجب به زواري اللي خبرك كثيرين .. وشفت إن العملية كانت ( فقط ) تحتاج مني ( شوي وقت ) وبدون خساير .. لا ويقول ( فني الديكور ) ترى راح أزورك كل ثلاثة أشهر ولو حبيت كل شهر إذا حسيت إن زوارك كثروا الجيات .. وأعيد لك ترتيب قطع الأثاث وتبي تلاحظ ان كل زيارة يطلع لك المجلس أكثر أناقة وإشراقا ..

وهنا رن جوال صاحبنا و( أقفى ) ويقول أرسل لي الصور والإحداثيات ..

- إيه هين .. مادام تقول مجلسك أخذ شوي وقت وبس .. خذ لك شوي وقت مع منتدى مكشات ويطلع لك اللي تبي.;):good:

[السمح]

هين يابوسليمان الاقناع من عندك غير شكل ، والتأثير بالرواقة أنت منبعه :p

أما ملاحظتك في ردك الأخير فنعم أتفق معك ، وهذا اللي بيصير إن شاء الله خلال الفترة القليلة القادمة .

فقط تفرج وشف النتايج ياعيوني .

أحلى تحية

[خشم الحصان]

اخوي ابو سليمان
السلام عليكم
اثرك منتاب سهل الله يانة خطير امنول احسبك تسبح واثرك تغوص اعقب يالسمكه المقال الاول نحسبها قصه
وثرها رزحه والمثل يقول لاتامن الشيبان يانبهان وحنا كنا نضن ان حنا نبهين ونعرف وش قصدك بس كلمك:good: وفي محله وعقيلك:light: الله يحفضك من كل عين وكل حاسد وضن و الله اعلم انك مرش.. الي منصب يبون الفكه منك يكثرما تضهر الفقع الي تحت الارض اجل العموم ثابة في دورة صاعقه واثاث مجلس
يبله شوي تحريك وتغيير ويطلع المجلس احلي من كذا حلوه اخمع ترزز لين شلونك معهم للبر انا قايله
الذيب مايهرول عبث وش انت ناوي انت شايفنا في دول افريقيا او هيتي اقول لايدرون عنك CIA حلوه الضغوط الداخليه وتبدل بعض القطع القديمه بس كلمة( ترى راح أزورك كل ثلاثة أشهر ولو حبيت كل شهر إذا حسيت إن زوارك كثروا الجيات .. وأعيد لك ترتيب قطع الأثاث وتبي تلاحظ ان كل زيارة يطلع لك المجلس أكثر أناقة وإشراقا) .
عموم اخوي ابو سليمان اسل الله رب العرش العضيم ورب السموات و الارضين ان يحفضك من كل شر
امين امين امين
وعلي هالمنوال تره يجدد الدم ويحرك البركه ويشين النقعه اذا كانة راكده
اخوك
خشم الحصان
ملاحضه
متي تنتهي من الافعال السبعه
طلب مني ,مروني ,لزمو علي ,الخ الخ اقول ان ..... متبي فراش او قهوجي
ياحبيل قليبك يابو سليمان

[الطبيب]

اولا:-
اشكرك اخوي حفرلوجيا على هذا الموضوع المهم و (( الحساس )) حسب ما استشفيت من اكثر من عضو!!!

ثانيا:-
الشكر موصول لكل من وقف معك وايدك بالرأي واضاف افكاره على موضوعك

ثالثا:-
الشكر لاخي السمح لتواصله مع الموضوع ورده اولا باولا عند سماع (( صافرات الانذار المبكر )) مما يدل على حرصه على منتدى مكشات وخيامه وخوفه على (( الشيبان لا يجيهم برد ))

رابعا:-
اكثر من يعجبني طريقته من الاعضاء من طرح لمواضيع مهمه وتقارير كامله مفصله وقوة وتمكن في انتقاء كلمات الموضوع (( وحتى الاسماء العلميه )) اثنين
الاول (( صحفي مكشات )) حفرلوجيا
الثاني (( فارس مكشات الاول )) راع الكحيله

ولكن ( راع الكحيله ) تفوق على ( حفرلوجيا ) بشيء واحد وهو انه ترك ( التواضع ) على جنب وقيم المواضيع ( المهمه ) والتي تعب في تجميع مادتها واخرجها بشكل محترف ووضعها في توقيعه الخاص اذ انه من السهل الوصول لمواضيعه المتميزه عن طريق توقيعه
ولم ينتظر هل تثبت هذه المواضيع ام لا (( والعاقل خصيم نفسه ))
وحسب وجهة نظري انه بهذه الطريقه فان ( راع الكحيله ) قد فرض تميزه فرضا واثبت وجوده ويستحق والله الاشاده به (( والله من وراء القصد ))
ولا انكر انني من اكثر المتابعين لمواضيع اعضاء معيينين منهم ( راع الكحيله ) وابو سليمان ( حفرلوجيا ) وعده من الاعضاء المتميزين

وان جهازي الخاص يغص بهذه المواضيع فقد حفظتها في مجلد واستمتع بقرائتها من وقت لآخر


الحديث ذو شجون ولكن حتى لا يتشعب الموضوع اكتفي بهذا القدر

وتقبلوا تحياتي القلبيه

اخووووكم جميعا

الطبيب >> عضو مبدئه (( آخر العلاج الكي ))

[حفرلوجيا]

أخوي الريس السمح .. شكرا .. وعلى الفرجة الآن مبسوطين .. أجل بعدين نتفرج ونصير ( طايرين ) ..

قول وفعل وان شاء الله يتحقق اللي يرفع المنتدى .. وثقتنا بهمتك ونظرتك ( فوق ) .

أخوي خشم الحصان : شكرا .. :D:D تقول :


ملاحضه
متي تنتهي من الافعال السبعه
طلب مني ,مروني ,لزمو علي ,الخ الخ اقول ان ..... متبي فراش او قهوجي
ترى اللي جاك اليوم يكفي وإلا كان وريتك .. راجع موضوعك المشراق (http://www.mekshat.com/vb/showthread.php?threadid=16486) :p:p

اخوي الطبيب : شكرا .. أما السمح ( اعلن صافرات الإنذار المبكر .. من خوفه على الشيبان لايبردون ) :D
أقول :
والمكشاتيين كلهم وراه كذلك .. نبي نجيب لهم بطانيات أسبانية جديدة تدفيهم مالنا غناة عن الشيبان .
وأشكر لك اطرائك ياغالي.