محتاج شوركم يالنشاما

[الحــ سعود ــربي]

السلام عليكم ورحمة الله وبركاته

اولآ اهنئكم بنزول هذا الغيث ونسأل الله ان ينفع به بلاد المسلمين

اخواني الكرام ..

اخوكم يبيله سياره جديده ودراهمه قليله حول الـ 130 الف

ومافيه سيارات دفع رباعي بهذه القيمه ماعدا اليوكن والباث فاندر

ولذلك ارغب في شوركم هل اخذ يوكن ام باث فاندر

ايهم افضل وايهم اقوي بالطعوس وماهي افضل المواصفات

طبعآ اقصد اليوكن الدبل العادي ,,

افديوني جزاكم الله خير الجزاء

[باوزير]

اصبر اشوي و جمع بعد عشرة الآف و خذ نيسان باترول سفاري من الوكالة 140 الف

[عاشق السيل]

وعليكم السلام ورحمة الله وبركاته ،،

أخوي ناهض عندي لك نصيحتين خذ وحدة منهن :

1 ـ إذا كنت ملزم على الجديدة وأنت محتار بين هالسيارتين فالقرار يتحدد بكثرة العائلة عندك فإذا كنت أنت وزوجتك ومعك طفلين فالباث مناسب جدا لأنه أصغر وأخف من اليوكن ،، أما إذا كانوا أطفالك ثلاثة فأكثر فأنصحك باليوكن لأنه أوسع وأكبر ويكفيك سنين قدام ،،،

2 ـ إذا ممكن تشتري سيارة مستعملة فأنصحك ومن قلبي تاخذ سوبر سفاري من 2005 إلى 2007 تلقاه نظيف جدا وبهذي الأسعار تراه أفضلك بكثييييييييييييييييييييييييييييييير من الباث واليوكن ،،

وعسى الله يختار لك الخيرة الموفقة وتقبل مروري يالغالي ....

[راعي طويلات]

وعليكم السلام ورحمه الله وبركاته
أنا رايي من راي الاخوان ودراهمك بتجيب لك سوبر سفاري 2007 نظيف بالحيل
واذا انت تبي جديد زد فلوسك شوي وخذ سفاري 2

[القاصي1]

اخوي
معك 130 وتشتري مستعمل ؟
ليه
اشتر سياره جديده تمرنها انت بنفسك ولا قد احد لف بطارتها الا انت.
من وجه نظري
اذا كنته راعي بر ومناقز كل خميس وجمعه
فالباث مناسب لك.
واذا كنته حنين والثمامه يوم الخميس العصر وعلى خفيف
فاليوكن احسن.. وشكلها اكشخ من الباث .


وفيه البرادو خيار اخر لراعي البر


تحياتي لك والله يوفقك
ولا تنس الاتستخارة

[ريان 0007]

السلام عليكم ورحمة الله وبركاته

الله اقوى يالربع قبل فتره كنتو تقولون فلوسي قليلة 130 الف
الله يرحمنى برحمتة

وانا انصحك اخوي
ان كانك ماتطلع البر الامرتين بالسنه انصحك باليوكون بدون نقاش
وان كانك راعي طلعات عليك بالباترل سفاري 2 بدون نقاش

تحياتي.....:)

[لا يكثر]

زودها شوي وخذ لك اقل نوع من انواع الاندكروزر او شي اخو الجديد

سياره لك وللزمن لا باترول لا نيسان لا جي ام سي ولا مرسيدس
بر وديره وخطوط وصيانه وكشخه وسعره ان مازاد ما نقص
ابد اخو العقار

[الحــ سعود ــربي]

الله يرضى عليكم ولايهينكم

انا راعي بر وجربت السفاري والصراحه موتر

لكن ودي بموتر جديد مثل ماتفضل الاخ القاصي حرام احطها بمستعمل

خصوصآ ان بعضها دين .. العائله ماعندي عائله 3 اشخاص بس

بعدين ياجماعه لي اسبوعين افر المعارض مالقيت سفاري ماعدا موديلات قديمه

وانا ودي بموتر جديد يخدمني كم سنه قدام ...

شكرآ لكم جميعآ

[أبوالعز2]

شف 130وش تجيب لك من موتر جديد ومستعمل
وأحياناً يكون المستعمل أحسن من الجديد .
مثلاً جكس موديل 2006 وأحرص على مواصفات قطر (نصيحة من أخ لخوه ) أحسن من الباثفندر ، وكلاُ له وجهة نظر .
ومثلاً آخر لو معك 90.000ألف ريال تشتري هايلكس 2009 وكاله أو تشتري جكس موديل 2001أو 2002 نظيف جداً .
سيارات الوكاله اليوم ماينحرص عليها ولا تستحق أن يدفع بها هالمبلغ.

[اورنس الشمري]

130 ألف قليله الله يصلحك ههههههههههه

عموماً الله يرزقك وإن كنت ودي إنك تزيدهن وتاخذ لك من الجيوب الوكالة

عائلي وحق بر وكشخه , وزايده وذافته ..

والله يهنيك..

[الحــ سعود ــربي]

شف 130وش تجيب لك من موتر جديد ومستعمل
وأحياناً يكون المستعمل أحسن من الجديد .
مثلاً جكس موديل 2006 وأحرص على مواصفات قطر (نصيحة من أخ لخوه ) أحسن من الباثفندر ، وكلاُ له وجهة نظر .
ومثلاً آخر لو معك 90.000ألف ريال تشتري هايلكس 2009 وكاله أو تشتري جكس موديل 2001أو 2002 نظيف جداً .
سيارات الوكاله اليوم ماينحرص عليها ولا تستحق أن يدفع بها هالمبلغ.


هلا اخوي ابو العز

ودي بالتويوتا لكن ناااااااااار لقيت 2006 يقول مسيوم ب 148 هذا ارخص واحد لقيته

فيه موديل 2005 فل كامل ماشي 130 الف ب 125 الف اللون اسود

شكرآ لك

[الحــ سعود ــربي]

130 ألف قليله الله يصلحك ههههههههههه

عموماً الله يرزقك وإن كنت ودي إنك تزيدهن وتاخذ لك من الجيوب الوكالة

عائلي وحق بر وكشخه , وزايده وذافته ..

والله يهنيك..

هلا بالشمري

اي والله قليله ياخوي الجيب صار اغلى من العماره

كل الجيوب اللي تكلم عنها من الـ 170 وفوق وانا ماعندي ياخوي

تحياتي لك

[شبل قحطان]

يا اخوي يا الناهض حط لك فوق 130 كم من قرش واشتر لك جيب سفاري وانا والله جربت السفاري من نت مره ولا هب مو ديل واحد موديلات ولقيت افضل شي فيهم شكل 2008 وانا اشوف السفاري الوكاله الفل كامل تخشيبه وحركات حللو من داخل من برا بس شوي دلوع بس انصحك اذا كنت راعي اماكن وعره وتطعيس وكل يوم خميس وجمعه بالطعوس وراعي قنص انصحك بالسفاري السلق من وكالته 2008

[ولد العويني]

FJ cruiser 2009

[الحــ سعود ــربي]

شكرآ لكم جميعآ

الله لايهينكم ..

[طبعي شمالي]

خذ يوكون مدبل 2008 وكاااااااااااله

او زيدها 10 الاف وطق سفاري وكاله

[راعي النياسين]

والله يااخوي لو تسمع كلامي وتدبر لك 10 الاف وتطق لك سفاري 2 2009 زي الحلاوه

اجلده كم سنه وبعه تلقا ماطاح فيه الا الا20 الف

انا معي سفاري 2008 اسوود والله كلمة رووعه قليله في حقه وانت اذا الله وفقك انشاء الله وشريته تبي تذكر كلامي

وتقول الحمد لله اني خذيت سفاري

قوة 4800 + فخامه + هيبه + عائلي مريح جدا

والله يوفقك سوا خذيت سفاري ولا باث ولا يوكون

ولا تنسى الاستخاره

[إعصار]

برادو ..

6سلندر ..

بنفس القيمة واصبر من اليوكن والباثفندر ..

وقطع الغيار رخيصة .. ولافيه عيوب تذكر ..

نصيحة من قلب ...

:)

[arrow]

خذ برادو 2009 vx1 جديد وكالة توماتيك 6 سرندل لك وللزمن ومريح 124000



وفقك الله .....

[الفتى سندباد]

اسمعها مني نصيحة
لا تشتري بـ 130 ألف ريال سيارة مستخدمة مهما كلف الأمر

والسيارة انصحك بالباثفايندر Se1 2009 وبلا تردد
والله يكتب لك الصالح

[عطر الحكي]

خذ السفاري ذا وقته ترى

[عطر الحكي]

خذ السفاري وتوكل على الله