أهل الشمال ( رفحاء )

[عاشق الفـــــــيّ]

صبحكم الله بالخير

انا انشاء الله غدا ذاهب لرفحاء ابي من اهل الديره او احد كد خيم فيها يعطيني احداثيات

فياض او مكان يصلح لتخيم ويلية تكون الاحداثيات لاماكن بعد رفحاء

واكون شاكركم

[الشقردي]

اذا انت من أهل الرياض أنصحك لا تتعدى تمير وما جاورها خصه شعيب الشوكي
وترى الصمان زين بالحيل

[عاشق الفـــــــيّ]

حياك الله اخوي شقردي

وانت صاج الصمان ماينعاف ولاكن مهو على كيفي انا معي شيبان يبون رفحاء

توني جاي منها ( رفحاء ) قبل امس اعس لهم ولاكن جاني فيها عجاج ماخلاني

لااعس ولااتفقع وهليحن انا اسألكم عشان انزل على طول من الخط للفيضه

او المكان الذي يصلح لتخيم تخبر الشيبان يبقولون تراك طولت علينا وانت

تدورلك منزال ورجلينا تعقلة من الموتر :D

تقبل تحياتي،،،،

[الشقردي]

وانت جاي من لينة متجة للرفحاء بعد لينة بشوي حول 10 كيلو تلقى لوحة خضراء صغيرة على اليسار مكتوب عليها على ما أذكر (مشروع مياه الملك فهد أو المغيسيلة - ناسي وشي بالضبط) وتلقى على اليمين طلح وسدر بعيدة من الخط بس تشوفها هذي يقولون مليانة ماء ولا رحت لها.
المهم تلف من الخط يسار وتمشي من 3 الى 6 كيلو هناك فيضة اظن اسمها ام العصافير
ارضيتها ليّنة وربيعها حلو.

-وعلى نفس الخط السريع تلقى برج جوال على اليمين ومقابل على اليسار صندقة بيع عسل وراها فيضة
-وعلى نفس الخط تجيك زبالا (هجرة) وراها فيضة مليانة ماء

واذا انتم معزمين للرفحاء فيه فيضة يقال لها ((نقذه)) هي مكشات عوائل رفحاء قريبة من رفحاء بالحيل والوصف كالتالي:
وانت طالع من رفحاء متجه لعرعر تمشي حول 10 الى 20 كيلو بعد شبك كتيبة الحرس مباشرة تجيك محطة بنزين وعندها نقطة تفتيش أفرق يمين مع المزفلت (هذا يقال له خط الشريمي) تمشى الى ان تجيك نزله وتشوف خطوط الجلد تشق يمين لفيضة نقذة ورديفتها
ولا هي بعيدة عن الخط حول 3-5 كيلو.

أما ان بغيت الفقع فهي بنواظر ووصفها كالتالي وانت طالع من رفحاء متجه لعرعر تمشي حول 5 كيلو الا ان تجيك أول فتحة من خط البيب ادخل معها وخل البيب وراك وابعد بس الله يعين الشياب اللي معك بيتكسرون.

وعلى كل الاحوال تأكد و انشد عن المحلات هناك باللاسلكي تراه مفيد جدا خص اذا وصلت رفحاء خلك على موجة الصيد حقتهم على ؟؟؟ , 144 واسأل عن البحري يفيدك.



ملاحظة : كل مشاهداتي قبل عيد الاضحى 1424 وكان الربيع على أوله ويبشر بخير واتوقع انه اللحين أزود الا ان كان موجة البرد أثرت عليه

[برقان]

نصيحه لااااااااااااااااااااااااااا تروح انكانك تبي فقع رح اما انك تبي ربيع نرا هالسنه الربيع نجد وحولها اما الشمال جاه مطر لكن ما هنا ربييييييييييييع انا بنفسي رايح قبل العيد ما لقيت مثل ربيع العام




نصيحة اخو 1600 كم قويه شوي ولا تلقا شييييييييييي!!!!!!

[ابو خالد 2006]

انا تقريبا مستقر في رفحاء وما طلعت منها الا اليوم الاربعاء ( زيارة للاهل )

يعني علوم الربيع كلها عندي . رفحاء ما فيها ربيع يسوى المشوار

ما فيه غير الزعبية أو فيضة مجطل ( قريبة من الهباس ) ربيع بصراحة يسوى المشوار

واذا كنت تبي تروح مشوار الى العويقيله 140 كم عن رفحاء باتجاه عرعر هناك فيضة اسمها الخشنة جميلة

وعلى ما سمعت ان قيصومة فيحان يمدحون الربيع فيها وبصراحه انا ما شفتها لكن كل الفياض اللي ذكرت شفتها انا بعيني

على العموم اذا تبي الفقع الله يعين شيبانك على دوخة الراس يبي يتعبون وماهب لاقين شي يسوى

وبيني وبينك البدو ما خلو شي حارثين الارض , وهذا رزقهم الله يرزقهم

وأي معلومة تبيها من رفحاء ( إحداثيات أو فياض أو فقع ) ابشر من عيني ذي >> قبل ذي <<<

وسلام سلام

[ابو طلحة]

عاشق حبحر
السلام عليكم ورحمة الله وبركاتة
ارجو ان ترسل لي احداثيت ( العويقيلة ) ( والخشــــنة ) ( وزهوة ) وذلك بأسرع وقت ممكن ولك جزيل الشكر والتقدير

اخو ك / ابو طلحة

والسلام عليكم ورحمة الله وبركاتة