المساعد الشخصي الرقمي

مشاهدة النسخة كاملة : خرب دبل اليوكون ولا حول ولا قوة الا بالله



فارس034
07/11/2008, 07:06 PM
السلام عليكم

ابي شوركم يا شباب

امس الخميس في طعوس الثمامة حطيت الدبل الخفيف عشان ارقى طعس بسيارتي يوكون 2007

علما بأني مجرب الدبل في طعوس جامدة ولا كان فيه اي مشاكل والحمد لله

المهم يوم حطيت الدبل سمعت صوت غريب خفت وفصلته وقلت ادخل بدون دبل وبعدها رجعت البيت

وجربت الدبل مرة ثانية وكان الصوت هالمرة اقوى في الدبل الخفيف(hi )وما كان فيه صوت في الدبل

الثقيل(low) وقفت السيارة وقلت استشير اهل الرأي من خبراء المنتدى واللي تعرضوا لهذا الموقف

السؤال هل المشكلة كبيرة والا بسيطة؟ وهل هي في القير والا الدبل بس؟

السيارة 2007 وماشية 74000 هل مازالت مشمولة بالضمان؟

هل الافضل اوديها الوكالة والا ورشة؟

اخوكم ابو فيصل
7/11/2008

محب المسفهل
07/11/2008, 07:09 PM
الله يكون بعونك ، يله يا أهل الخبرة هذا وقتكم

فارس034
07/11/2008, 07:15 PM
تسلم اخوي محب المسفهل وان شا الله ألقى الجواب من أهل الخبرة الليلة

الهاوي2008
07/11/2008, 07:53 PM
وعليكم السلام ورحمة الله وبركاته

ننتظر اهل الخبرة وان شاءالله الامر يكون ابسط مما يكون

الصقلاوي
07/11/2008, 08:00 PM
حياك الله اخوي فارس انا انصحك تمر على ورشة تابعة لولد الجميح
موقعها بالصناعية القديمة ويفحصون السيارة لك بالكمبيوتر وان شاء الله
علته خفيفة وماتراى مكروه ,,,,,,اخوك الصقلاوي

القاصي1
07/11/2008, 08:13 PM
ان شاء الله تكون المشكله بسيطه

واذا كانت السيارة على الضمان
ريح بالك ورح بها الى الوكاله
وعسى ان تكون مش من الجميح

الربذي
07/11/2008, 08:21 PM
وعليكم السلام


هذا وقته


عاد ماجاء الا بوقت البر والمطر يالله لك الحمد والشكر والثنا انت اهل الجود سبحانك
اخي ماهي غريبه على اليوكن خراب دبله
دائم اسمع عاها
لقيت واحد بالمعرض واقف يبيعه قال ان دبله خربان والقطعه توصل بعد اسوع ودافع قيمتها وكل شي

لقيت ثاني وسالته عن الدبل وعلى طول قال بصراحه خربان دبله

وثالث
ليش دبل اليوكن 00000000000000000000000000000

فارس034
07/11/2008, 08:49 PM
اخواني الهاوي والصقلاوي والقاصي والربذي مشكورين على الردود وبالنسبة للضمان ما أدري والله هو باقي والا انتهى لكن السيارة بنظام التأجير المنتهي بالتمليك وموديلها 2007 وماشية 74000 واللي اعرفه ان الضمان الى 60000 كيلو بس

اخوي الصقلاوي ممكن تلفون الورشة او عنوانهم الله يثيبك

صدقت اخوي الربذس والله انه توقيت سيء جدااااا لكن قدر الله وانا سمعت عن مشاكل الدبل في اليوكون بس ما كنت مصدق لين صارت لي فالله المستعان وحسبي الله عليهم اللي يدرون ان فيه خلل مصنعي ولا طلبوا السيارات لتصليحها ينتظرونا لين تخرب سياراتنا وممكن يقول لك انتهى الضمان وادفع مبلغ وقدره اخخخخخخخخ بس

برق4
07/11/2008, 08:57 PM
والله يعوض عليك ويكون هالصوت شغله بسيطه

فارس034
07/11/2008, 09:01 PM
مشكور اخوي برق 4 ان شا الله انها بسيطه بس الصوت يخوف صوت طحن واحتكاك ماهي طقه وبس

Magellan
07/11/2008, 09:48 PM
هلا أخوي هل يظهر لك رسالة يجب إصلاح الدفع الرباعي
إذا كان لا فما أعتقد فيه مشكلة جوهرية
والدبل شبكه بعض الأحيان لازم يطلع صوت ، قد يكون ما إنت متعود عليه
وبعض الأخوان يقول فيه مشاكل في الدبل وتلقاه ماجرب السيارة ويبي يخوفك ويوسوس فيك ،إنتبه لايدخل في قلبك الوسواس ،معك موتر ممتاز والكل يشهد له
حاول غنكتشبكه في الزفلت الحين وجرب شوي قدام وورى
وطف الموتر ثم إشبكه ولعله يروح الصوت

لن أمل من العطاء
07/11/2008, 11:06 PM
انصحك نصيحة لوجه الله

ومثل ما قال اخوي ماجلان اذا لم تطلع رسالة معلومات نفيد بوجوب اصلاح الدفع الرباعي فسيارتك ما منها خوف ولا عليها اية مشكلة وبسم الله عليك وعليها وماشاء الله تبارك الله

نصيحتي لك لا تلعب في شيء واذا تريد الاطمئنان عليك بالوكالة دامه على الضمان وليه تخسر نفسك بس اول جربه في الصحراء

اخوك

لن امل من العطاء

عاشق الموطن
07/11/2008, 11:50 PM
ملتشوف باس سيارتك اخوي وان شاء الله العطل بسيط قد يكون من الرمال او الماء والوحل احيانا ..........عموما عليك بتجربتها كما تفضلوا الاخوان وحتى تطمئن ودها الوكاله

فارس034
08/11/2008, 12:14 AM
شكرا اخوي ماجلان ما فيه اي رساله تطلع وبالنسبة للصوت ما يطلع لما اشبك الدبل بس لما احرك السيارة صوت طحن او احتكاك والموتر اكثر مشيه في الرمال وانا عارف الدبل واستخدامه لاني ما شريت الموتر الا للبر اولا وللسفر ثانيا

فارس034
08/11/2008, 12:20 AM
اخي لم امل العطاء شكرا على النصيحة بس الظاهر ان الضمان انتهى لانها ماشيه 74 الف شكلي بأطلع الحين اجربها كنت خايف اجربها يزيد الطين بلة بس انكم شجعتوني

Magellan
08/11/2008, 12:20 AM
شكرا اخوي ماجلان ما فيه اي رساله تطلع وبالنسبة للصوت ما يطلع لما اشبك الدبل بس لما احرك السيارة صوت طحن او احتكاك والموتر اكثر مشيه في الرمال وانا عارف الدبل واستخدامه لاني ما شريت الموتر الا للبر اولا وللسفر ثانيا


أسمع وانا أخوك تشبك الدبل وأنت واقف لازم تسمع صوت
هذا قانون فيزيائي قديم:D
إقرأ الكتالوج اللي موجود بالسيارة
يقول التحويل للوضع الدفع بأربع عجلات على 4hi لابد وأن تكون السيارة تمشي (أقل من 80 كلم) ومن ثم رفع القدم عن دواسة البنزين وتعشيق الدبل على 4hi، غير كذا وأنت واقف بيطلع معك صوت
الدبل الثقيل تضع القير على N ثم تعشق على 4LO وتمشي وتحط القير على 2 ولاتمشي أكثر من 40 كلم وتكون بوضع مستقيم أفضل
لو ماإتبعت وقريت الكاتلوج راح يخرب معك الدبل حتى ولو كان معك شاص

فارس034
08/11/2008, 12:44 AM
أسمع وانا أخوك تشبك الدبل وأنت واقف لازم تسمع صوت
هذا قانون فيزيائي قديم:D
إقرأ الكتالوج اللي موجود بالسيارة
يقول التحويل للوضع الدفع بأربع عجلات على 4hi لابد وأن تكون السيارة تمشي (أقل من 80 كلم) ومن ثم رفع القدم عن دواسة البنزين وتعشيق الدبل على 4hi، غير كذا وأنت واقف بيطلع معك صوت
الدبل الثقيل تضع القير على N ثم تعشق على 4LO وتمشي وتحط القير على 2 ولاتمشي أكثر من 40 كلم وتكون بوضع مستقيم أفضل
لو ماإتبعت وقريت الكاتلوج راح يخرب معك الدبل حتى ولو كان معك شاص


مشكور اخوي ماجلان على التوضيح بس تراني خابر الدبل واستخدامه زين ودايما ارجع لكتالوج السيارة حتى في الامور البسيطة ب الصوت زي ما قلت لك ماهو وقت التغيير الصوت لما يتحرك الموتر وهو صوت احتكاك حديد قوي ماهو صوت طقة الدبل المعروفة وللأسف توني جربت زي ما نصحوني الشباب وصار الصوت في الدبل الخفيف والثقيل بعد الله يستر لا يصير في القير بعد لاني سمت ناس فرط عندهم القير

الفلوجة
08/11/2008, 02:03 AM
اقطع الشك باليقين
اذهب للوكالة وريح بالك
السيارات الجديدة أكثرها الكترونية - كمبيوتر- ما يعرف أسرارها إلا وكيلها
توكل على الله واذهب بها إلى الطبيب (المهندس)
ما تشوف أنت ولا سيارتك شر
وإن شاء الله الأمر بسيط


ولا تنس تخبرنا عما حصل
لعل غيرك يستفيد ويعتبر

طارق الحربي
08/11/2008, 03:02 AM
عادي جدا صوت الاحتكاك

مرقاب
08/11/2008, 03:36 AM
اخوي فارس تطمن الامر انشالله بسيط شيك على الصلبان اللي بين الدفرنس وعامود الكردان يكون يحتاج تغيير لانه له عمر افتراضي وجرب وقف الموتر وادعس بقوه خفيفه للامام او وعشق الريوس يطلع صوت طحن حديد مثل ماقلت فهذا غالبا يكون من الصلبان

hisham202
08/11/2008, 03:49 AM
معلومه مهمه..

زيت الدبل والكوارين (جمع كارونه) خفيف..لزوجته 90

يعني يتبخر بسرعه..وسبق وحصلت في جمس 2001 اني لقيت الكارونه الخلفيه والدبل فااااضيات من الزيت..
هالكلام بعد ما مشى الموتر 140 الف ..
على طريقك افحص مستوى الزيت في الدبل والدفرنسات :)

والله الموفق

مخطط 2008
08/11/2008, 06:33 AM
دبل بسيارة امريكي مهو دبل
اعتقد والله اعلم دينمو الدبل او الحساس الي في وسط الدبل
واحد من الربع صلحة عند ورشة بالصناعية القديمة (الجابري) وضبط ب 900 ريال وكان الحساس

شقران نجد
08/11/2008, 06:40 AM
جربها ثاني مره وانا اخوك لو تشغل الدبل على المزفلت قدام باب بيتك وبهدوء وروقان وتركيز ومعاك كاس شاهي وتتأكد هل يوجد صوت ولا لا .....

لن أمل من العطاء
08/11/2008, 09:03 AM
السيارة ماشية 74 الف كم صحيح
وانت تقول اعتقد ان الضمان انتهى

يعني انت لا تعلم كم الضمان ( هذي ملاحظة تحسب عليك اخوي)
بما انت لا تعلم كم الضمان فمن الطبيعي انك لم تذهب للصيانة الاقليل جدا اولم تذهب (هذذه الملاحظة الثانية)

حتى ولو لا قدر الله انتهى الضمان او فقدته لعدم الانتظام في جدول الصيانة ما زلت انصحك بالذهاب للوكالة والفحص عندهم مع ان تختار الاصلاح عندهم او بورشة خارجية ومضمونه


اخوك

لن امل من العطاء

salih100
08/11/2008, 09:39 AM
نصيحه لوجه الله رح الوكاله وريح مخك لان سيارتك الكترونيه بحته وكل شي بحساس ,,, واذا انتها الضمان ياخي ادفع للوكاله ازود من الي بتدفعه للورشه فوقها اضمن الشغل وشيك ع الزيوت . نصييييييييييييييييييييييحه خذها وادع على من ظلمك.

الناموس
08/11/2008, 09:59 AM
مع احترامي لآراء اخواني حتى لو السياره تحت الضمان والله ان الوكاله داجه ..وماوراها الا التعطيل والخساير ..اسئل عن الورش اللي مخبوره من الناس الثقات ورحلهم وعسى ان يكون خير ان شاء الله..

لن أمل من العطاء
08/11/2008, 10:26 AM
مع احترامي لآراء اخواني حتى لو السياره تحت الضمان والله ان الوكاله داجه ..وماوراها الا التعطيل والخساير ..اسئل عن الورش اللي مخبوره من الناس الثقات ورحلهم وعسى ان يكون خير ان شاء الله..


رفع الله قدرك اخي

انا اعلم والكل يعلم ان كل الوكالات عندنا داجه ولا يعرفون شيء الا من هدى الله وقليل ماهم

ثانيا اذا طلع عند اخونا هذا عطل في الدبل لا قدر الله وسيتوجب تصليحه دفع 7 الاف ريال فهل يدفع 7 الاف لورشة او يتم اصلاحة عن طريق الضمان

مشكلتنا اننا لا نعرف كيف نطالب بحقوقنا وكيف تكون حجتنا قوية

عندي هايلوكس غمارة صندوق طويل 2006 بنظام التقسيط وليس التاجير
وكالة عبداللطيف جميل قد غيروا نصف السيارة نظام التكييف كامل مرتين والدفرنس الخلفي والجيربوكس كامل والان ماشية السيارة 86 الف كم ورافع عليهم دعوى بالغرفة التجارية ومضرب عن التسديد الى ان يتم الاصلاح مع ان السيارة هايوكس فما بالك لو كانت جمس او صالون بقيمة 200 الف

طبعا اذا وقفت السيارة عند باب الوكالة كل الموظفين يهربون ولا يريدون استلام السيارة
وقبل اسبوع اعطوني دي في دي وقال لي مدير الصيانه في صيانة 90 اف ان شاء الله تعطيك تلفزيون 42 بوصه توشيبا ال سي دي هدية (ليكسبوا رضا العميل ولكي لا يتم فضحهم على الملأ في الفرع )
السيارة قيمتها 60 الف اقساط والتلفزيون قيمته تقريبا 14 الف وقد يزيد

ولكن الصراحة السيارة بها اعطال كثيره جدا لسوء تخزين السيارات عندهم

احترامي وحبي لك اخي

فارس034
08/11/2008, 11:55 AM
صبحكم الله بالخير جميعا اولا مشكوريييين على الفزعة وبصراحة تفاعلكم هو اللي خفف علي المشكلة
ثانيا كلمت الوكالة وقالو ان الضمان انتهى حتى لو ما كملت سنتين لأن السيارة مشت اكثر من 60 الف كيلو واذا ابي ادخل السيارة عندهم لازم موعد واقرب موعد بعد عيد الأضحى والان صار مالي الا الله ثم الورش اللي يعرف ورشة شغلها زين وعندهم خبرة في دبل الامريكي فلا يبخل علي برقمهم او عنوانهم وجعلها الله في موازين اعمالكم اتمنى ان المشكله ماهي في الدبل زي ما قال بعض الاخوان
ابو فيصل

الناموس
08/11/2008, 12:30 PM
رفع الله قدرك اخي

انا اعلم والكل يعلم ان كل الوكالات عندنا داجه ولا يعرفون شيء الا من هدى الله وقليل ماهم

ثانيا اذا طلع عند اخونا هذا عطل في الدبل لا قدر الله وسيتوجب تصليحه دفع 7 الاف ريال فهل يدفع 7 الاف لورشة او يتم اصلاحة عن طريق الضمان

مشكلتنا اننا لا نعرف كيف نطالب بحقوقنا وكيف تكون حجتنا قوية

عندي هايلوكس غمارة صندوق طويل 2006 بنظام التقسيط وليس التاجير
وكالة عبداللطيف جميل قد غيروا نصف السيارة نظام التكييف كامل مرتين والدفرنس الخلفي والجيربوكس كامل والان ماشية السيارة 86 الف كم ورافع عليهم دعوى بالغرفة التجارية ومضرب عن التسديد الى ان يتم الاصلاح مع ان السيارة هايوكس فما بالك لو كانت جمس او صالون بقيمة 200 الف

طبعا اذا وقفت السيارة عند باب الوكالة كل الموظفين يهربون ولا يريدون استلام السيارة
وقبل اسبوع اعطوني دي في دي وقال لي مدير الصيانه في صيانة 90 اف ان شاء الله تعطيك تلفزيون 42 بوصه توشيبا ال سي دي هدية (ليكسبوا رضا العميل ولكي لا يتم فضحهم على الملأ في الفرع )
السيارة قيمتها 60 الف اقساط والتلفزيون قيمته تقريبا 14 الف وقد يزيد

ولكن الصراحة السيارة بها اعطال كثيره جدا لسوء تخزين السيارات عندهم

احترامي وحبي لك اخي



اخوي لن امل العطاء اشكرك على التعقيب ....

ومنهم اعضاء ومدراءالغرف التجاريه :D :D :D

اسمحلي مع كل التقدير والأحترام لشخصط الكريم ...والله لو يبون يضيعونك في الطوشه ليضوعونك ويدخلونك شوارع مظلمه ...ولا تطلع بأي نتيجه سوى التعطيل عن عملك ورفة ضغطك ... لسبب بسيط جدا ..مافيه قانون يحكم هذه التعاملات ..ولا فيه حماية مستهلك ..ولا ولا ...

عموما هذي اللي تتكلم عنها تويوتا وحليلها ...عند الجميح ...خذ هذي السالفه ..

احد المعارف احترق عليه الطبلون تماما (ولع نار) وهي واقفه عند البيت وش السبب ما احد يدري ...نسيت اقول ..السياره جمس 2006 وكاله ..وكانت ما مضى عليها يمكن سنه ..والرجال مايروح عليها الا مشاوير بسيطه .....

المهم طبعا السياره تحت الضمان ..يوم وداها على سطحه .. وشرحلهم الموضوع ودار الكلام ويحاولون يتملصون من السالف .... قالو نفحص ونشوف ...قام واحد من كبار المهندسين سحب الولاعه(حقت السجاير) وناظر فيها شوي وشمها ولقا فيها ريحة طيب عود ...قال اهههههههههههههههاااا لقينا المشكله السبب هو استخدامك السيء للولاعه .. ورفضوا يستلمون السياره ....

وعلى قولتك ان الواحد لازم ياخذ حقه الرجال ما خلى ولا مكان الين حتى وصل الى المدير الأقليمي في دبي ..

والى يومك السياره عند باب الوكاله ...محللك سر ...

حسبنا الله ونعم الوكيل .

ملاحظه انا سيارتي يوكن 2004 من الوكاله ..ولله الحمد والمنه ما طبت الوكاله ..ورفضت اوديها التشييكات حقتهم اللي يقولون علشان الضمان وقلت ضمانكم بلوه واشربوا مويته .. والله لا يحوجنا لهم .الورش ماليه الديره ..

وتحياتي

الناموس
08/11/2008, 12:34 PM
صبحكم الله بالخير جميعا اولا مشكوريييين على الفزعة وبصراحة تفاعلكم هو اللي خفف علي المشكلة
ثانيا كلمت الوكالة وقالو ان الضمان انتهى حتى لو ما كملت سنتين لأن السيارة مشت اكثر من 60 الف كيلو واذا ابي ادخل السيارة عندهم لازم موعد واقرب موعد بعد عيد الأضحى والان صار مالي الا الله ثم الورش اللي يعرف ورشة شغلها زين وعندهم خبرة في دبل الامريكي فلا يبخل علي برقمهم او عنوانهم وجعلها الله في موازين اعمالكم اتمنى ان المشكله ماهي في الدبل زي ما قال بعض الاخوان
ابو فيصل


الله يوفقك ويسهل امرك وان شاء ان الأمر سهل وبسيط ....وياليت تطمنا وش يصير معك ..

المميـز
08/11/2008, 01:25 PM
اخوي لن امل العطاء اشكرك على التعقيب ....

ومنهم اعضاء ومدراءالغرف التجاريه :D :D :D

اسمحلي مع كل التقدير والأحترام لشخصط الكريم ...والله لو يبون يضيعونك في الطوشه ليضوعونك ويدخلونك شوارع مظلمه ...ولا تطلع بأي نتيجه سوى التعطيل عن عملك ورفة ضغطك ... لسبب بسيط جدا ..مافيه قانون يحكم هذه التعاملات ..ولا فيه حماية مستهلك ..ولا ولا ...

عموما هذي اللي تتكلم عنها تويوتا وحليلها ...عند الجميح ...خذ هذي السالفه ..

احد المعارف احترق عليه الطبلون تماما (ولع نار) وهي واقفه عند البيت وش السبب ما احد يدري ...نسيت اقول ..السياره جمس 2006 وكاله ..وكانت ما مضى عليها يمكن سنه ..والرجال مايروح عليها الا مشاوير بسيطه .....

المهم طبعا السياره تحت الضمان ..يوم وداها على سطحه .. وشرحلهم الموضوع ودار الكلام ويحاولون يتملصون من السالف .... قالو نفحص ونشوف ...قام واحد من كبار المهندسين سحب الولاعه(حقت السجاير) وناظر فيها شوي وشمها ولقا فيها ريحة طيب عود ...قال اهههههههههههههههاااا لقينا المشكله السبب هو استخدامك السيء للولاعه .. ورفضوا يستلمون السياره ....

وعلى قولتك ان الواحد لازم ياخذ حقه الرجال ما خلى ولا مكان الين حتى وصل الى المدير الأقليمي في دبي ..

والى يومك السياره عند باب الوكاله ...محللك سر ...

حسبنا الله ونعم الوكيل .

ملاحظه انا سيارتي يوكن 2004 من الوكاله ..ولله الحمد والمنه ما طبت الوكاله ..ورفضت اوديها التشييكات حقتهم اللي يقولون علشان الضمان وقلت ضمانكم بلوه واشربوا مويته .. والله لا يحوجنا لهم .الورش ماليه الديره ..

وتحياتي



على طاري سالفتك ذكرت سالفة واحد معه يوكن


واحد من الشباب معه يوكن 2006 وكان يركب على الولاعه كنووود

واحتمى السلك حق الولاعه وصار يطلع دخان من الطبلون من جميع الجهات

وقف الرجال على طول ويبي يطفي السياره عيت تطفي

المفتاح يدور بس السياره تشتغل

نزل وفصل البطاريه

المهم فتح علبة الفيوزات وشاف الفيوز منحرق

واتجه للقصيم عند الكهربائي ابو ابراهيم العثيم وفحص على الموتر

وقال لازم تغير سلك الولاعه من الطبلون الى الظفيره

وقال ان الموديلات الجديده كلها سيئه جدا وخاصه التسليك صار ضعيف جدا

ويقصد بالموديلات الجديده من 2003 وفووووق الى عامنا الحالي

اما موديلات 2002 وتحت مافيها مشاكل كهربائيه والله يستر على المسلمين اجمعين

==================================

بالنسبة للصوت الموجود بالدبل

اذا انت تسمعه تحت بالنص معناته والله اعلم جنزيل الدبل

فارس034
08/11/2008, 02:37 PM
بالنسبة للصوت اخوي المميز اسمعة من قدام تحت المكينة

امبارك
08/11/2008, 02:57 PM
أنصحك من واقع خبرتي مع سيارتي.. تمر على ورشة الجابري.. في الصناعية اللي غرب الفيصيلية "الغالة".. قبل ورشة الجميح اللي يذكرون.. في ورشة الجابري راح يفحصون الموتر ويعلمونك بالمشكلة إن شاء الله.

وإذا كان هناك عطل لا سمح الله.. فقد يكون بالحساس اللي يشغل الدبل.. وهذا سعره حوالي 300 ريال وفق أسعار 2005م.. أو تكون المشكلة بموتور الدبل.. هذا سعر فوق 3000 ريال وفق اسعار 2007م.. لكن جبته من أمريكا 1200 ريال بدون شحن.

عموما التشخيص نصف العلاج.. وقطع الغيار تكون رخيصة لدى الوكالة.. في نهاية السنة الميلادية (قبل الجرد).. ولا تنسى تنخى جي أم دبي تراهم ما يقصرووون.. لا قام الوكيل يلف ويدور.

ايضا.. لا تنسى تشيك على أزرار الدبل.. قد تكون المشكلة منهن.. ولحل مشاكل الأزرار وتعطل الأمبيرات ولمبات الطبلون.. أسئل عن المهندس حمدي اليماني حول ورشة الجابري من جنوب.

عسى أمرنا وأمرك إلى خير

star4000
08/11/2008, 03:23 PM
يعطيكم العافيه جميعا

فارس034
08/11/2008, 03:35 PM
أنصحك من واقع خبرتي مع سيارتي.. تمر على ورشة الجابري.. في الصناعية اللي غرب الفيصيلية "الغالة".. قبل ورشة الجميح اللي يذكرون.. في ورشة الجابري راح يفحصون الموتر ويعلمونك بالمشكلة إن شاء الله.



وإذا كان هناك عطل لا سمح الله.. فقد يكون بالحساس اللي يشغل الدبل.. وهذا سعره حوالي 300 ريال وفق أسعار 2005م.. أو تكون المشكلة بموتور الدبل.. هذا سعر فوق 3000 ريال وفق اسعار 2007م.. لكن جبته من أمريكا 1200 ريال بدون شحن.


عموما التشخيص نصف العلاج.. وقطع الغيار تكون رخيصة لدى الوكالة.. في نهاية السنة الميلادية (قبل الجرد).. ولا تنسى تنخى جي أم دبي تراهم ما يقصرووون.. لا قام الوكيل يلف ويدور.


ايضا.. لا تنسى تشيك على أزرار الدبل.. قد تكون المشكلة منهن.. ولحل مشاكل الأزرار وتعطل الأمبيرات ولمبات الطبلون.. أسئل عن المهندس حمدي اليماني حول ورشة الجابري من جنوب.



عسى أمرنا وأمرك إلى خير

مشكور على هالمعلومات وان شا الله بتفيدني فيه واحد من الشباب قابلته على الغدا اليوم قال لي انه كان عنده يوكون وصار معه نفس المشكلة وسببها من التراب او الوحل وحلها غسيل السيارة بستم على كلامه انا بصراحة تفاءلت وودي استأذن من الدوام وأروح اغسل الموتر (دوامنا الى خمس ونص يعني الخروج بعد المغرب) بجرب واعلمكم ان شا الله

ابوشجاع911
08/11/2008, 03:59 PM
اخوي فارس عسى الله يبارك لك في موترك وان شاء الله تكون المشكله بسيطة

انا دخلت الموضوع وقرات كل الردود وانا اقول عساه مابعد سوا شي في الموتر وان شاء الله اني لحقت

اول نصيحة/ لاتستعجل بالذهاب لاي ورشة ولا حتى الوكالة حتى وانصحك تتابع هذا الموضوع وتجمع المزيد من الاراء
ثاني نصيحة/ وهي الاهم انصحك اخي الكريم ان تاخذ السيارة الان فورا الى مغسلة بستم وتخليه يغسلها بستم غسيل مضبوط وانصحك عند رفع السيارة بالدخول تحتها وتفحص الدبل والعكوس الامامية والعمود الامامي وصليباته وخصوصا من فوق فقد يكون هناك حجر صغير محشور فوق العمود ويسبب هذا الصوت عند تشغيل الدبل وهذه حدثت معي في لانكروزر جديد فاكه انا من الوكالة ولثقتي في السيارة وانها لن تخرب بهذه السرعة فقط اوقفتها على حفرة فوجدت ان هناك حصاة صغيرة فوق العمود ويالها طلعتها بعد جهد جهيد

وانا الان معي يوكن 2007 ماشي فوق 100.000 كلم ولا شفت منه الا الزين وانصحك بان تكون ثقتك بسيارتك عالية فسيارتك سليمة 100% اذا كانت على يدك من الوكالة ولا يمكن اطلاقا ان يحدث لها عطل من هذا النوع بدون سبب خصوصا انك محافظ عليها كما يبدوا من كلامك

وفقك الله وونتظر معك النتيجة

وبل الغمام...
08/11/2008, 04:02 PM
أن انشاءالله تبشرنا

و يكون حلها غسيل السيارة

ابوشجاع911
08/11/2008, 04:04 PM
وسببها من التراب او الوحل وحلها غسيل السيارة بستم على كلامه انا بصراحة تفاءلت وودي استأذن من الدوام وأروح اغسل الموتر بجرب واعلمكم ان شا الله[/quote]

هذا العلم وانا اقول انه من الوحل والتراب ومثل ماذكرت في ردي السابق قبل ان اطلع على هذا الرد

ولكن بما انك لن تخرج الا بعد المغرب فانصحك لاتغسل السيارة بالليل لانك لن ترى شيء
بالنهار افضل حتى لو تفحصتها فوق حفرة بدون تغسيل فانا متاكد بانك ستجد جسم صلب يحك بالعمود او باي شي متحرك
وهذه علامتها انك سترى مكان الاحتكاك ظاهر على العمود او على العكوس مثلا

تحياتي لك

alamri111
08/11/2008, 08:31 PM
السلام عليكم ورحمة الله

خذ راي اخوك 00إذاكنت شاريه كاش وباقي الظمان ساري المفعول فرح حطه عندهم بالوكاله ولا تطلع إلا دراهمك معك لويجبون لك الأنتربول لأنه بيقعد علة في كبدك كل يوم مدخله ورشه

واذا كان بنظام التأجير فحطه عندهم ويا دار ما دخلك شر
وتـــــراني جــــــاد في كلامي

فارس034
08/11/2008, 08:35 PM
مساكم الله بالخير
عرفت المشكلة
بعد صلاة العصر غسلت السيارة بستم ولكن ما زال الصوت مستمرا وديتها ورشة قريبة عشان اشيك زيوت القير والدبل وكانت المفاجأة
لقيت مسمار كبير طالع من داخل الدفرنس الأمامي والظاهر انه سرب كل الزيت اللي في الدفرنس لان حوله فراغ ولا فيه تسريب مما يدل ان مابقى زيت وش الشور؟ هل هي مشكلة كبيرة والا ممكن تصليحها من غير تغيير الدفرنس؟ الغريبة ان ما ظهرت رسالة تدل على ان فيه شي عطلان في السيارة
يقول المهندس الفلبيني ان داخل الدفرنس فيه مسامير واكيد هذا احدها وللأسف ما عندهم الامكانيات يصلحونها لأن ورشتهم صغيرة وش الرأي؟؟

ناوي نيه
08/11/2008, 10:03 PM
مساكم الله بالخير
عرفت المشكلة
بعد صلاة العصر غسلت السيارة بستم ولكن ما زال الصوت مستمرا وديتها ورشة قريبة عشان اشيك زيوت القير والدبل وكانت المفاجأة
لقيت مسمار كبير طالع من داخل الدفرنس الأمامي والظاهر انه سرب كل الزيت اللي في الدفرنس لان حوله فراغ ولا فيه تسريب مما يدل ان مابقى زيت وش الشور؟ هل هي مشكلة كبيرة والا ممكن تصليحها من غير تغيير الدفرنس؟ الغريبة ان ما ظهرت رسالة تدل على ان فيه شي عطلان في السيارة
يقول المهندس الفلبيني ان داخل الدفرنس فيه مسامير واكيد هذا احدها وللأسف ما عندهم الامكانيات يصلحونها لأن ورشتهم صغيرة وش الرأي؟؟
يعني افهم من كلامك ان المسمار الي طالع طيب
هل المسمار طالع من مكانه ولا مكسورر...؟
ياليت توضح اكثر

راعي العمانيه
08/11/2008, 10:22 PM
السلام عليكم
انا عندي تاهو الفين وثلاثه الى شغلت الدبر لازم يلع صوت طق بس مافيه مشكله تلقاه شغال

فارس034
08/11/2008, 10:53 PM
يعني افهم من كلامك ان المسمار الي طالع طيب
هل المسمار طالع من مكانه ولا مكسورر...؟
ياليت توضح اكثر

المسمار شكله من المسامير اللي داخل الدفرنس لكن بقدرة قادر شق الدفرنس شق وطلع راس المسمار(الجزء العريض) عالق داخل الدفرنس وباقي المسمار برا الدفرنس (شق الدفرنس وطلع) اشلون ما ادري

Magellan
08/11/2008, 11:00 PM
المسمار شكله من المسامير اللي داخل الدفرنس لكن بقدرة قادر شق الدفرنس شق وطلع راس المسمار(الجزء العريض) عالق داخل الدفرنس وباقي المسمار برا الدفرنس (شق الدفرنس وطلع) اشلون ما ادري
يمكن تقصد إبرة معايرة الزيت
أنت الحين عبه زيت مقاس 90 وناظر النتايج

فارس034
08/11/2008, 11:02 PM
انا صورت المسمار والدفرنس عشان اوريكم بس ما عرفت وشلون ارفق الصورة

الحــ سعود ــربي
08/11/2008, 11:05 PM
افكر اشتري يوكن

والله خوفتووني ههههههههههههه

فارس034
08/11/2008, 11:23 PM
http://www.mekshat.com/pix/upload02/images86/mk44894_20081108(002).jpg[/img]

فارس034
08/11/2008, 11:25 PM
http://www.mekshat.com/pix/upload02/images86/mk44894_20081108(002).jpg (http://www.mekshat.com/pix/upload02/images86/mk44894_20081108(002).jpg)

ديزب
08/11/2008, 11:36 PM
تبي نصيحتي .....
رح لوكالة السيارة والله يعينك ...

&أبوخالد&
08/11/2008, 11:40 PM
الله يعينك وييسر امرك

فارس034
08/11/2008, 11:41 PM
http://www.mekshat.com/pix/upload02/images86/mk44894_111.jpg (http://www.mekshat.com/pix/upload02/images86/mk44894_111.jpg)

شبح الموت
09/11/2008, 01:42 AM
http://www.mekshat.com/pix/upload02/images86/mk44894_20081108(002).jpg

للتوضيح ياخوي فارس بدون رابط والله يعنيك ويسهل امورك

فارس034
09/11/2008, 05:14 PM
احد عنده فكرة عن ورشة ماي كار اللي على طريق العروبة ناوي ادخل السيارة عندهم

سليمان911
09/11/2008, 06:12 PM
الله يعينك ياخوي ونصيحتي لك لاتدخله الا الوكااله

مسفر الاكلبي
09/11/2008, 06:33 PM
الله يعينك يا فارس

ودامك اكتشفت المشكله راح نصف المشكله

انت وده عند ورشه زينه وما يحتاج وكاله دام الدعوى دفرنس

وفقك الله وطمنا وش صار معك

ولد الأجاويد
09/11/2008, 09:22 PM
الله يكون بعونك
وأنا أعاني من نفس المشكلة
إذا دخلت الطعوس
وشغلت الدبل يطلع عندي صوت حنة أو ونة مثل صوت الرمان بلي اللي بالكفر إذا خرب
بس والله إني أمشي عليه وأدعس بالطعوس
ولا فيه شيء
ومع ذلك أنا متخوف من الصوت

عندي تاهو أمريكي 2002

الله يجزاكم خير لو تشوفولنا حل نبي ورشة زينة تعرف تفحص الدبلات ومشاكلها

ابراهيم
11/11/2008, 05:38 AM
اذا كان الجرم مكسور معناته تغيير دفرنس امامي اريح لك دور مستعمل تشليح . ترى الدفرنس الامامي صغير اتوقع سعره مب غالي .

طبعا قبل هذا كله دق جي ام دبي واشك الوكيل وكبر السالفه شويتين ان شاء الله تطلع منهم بشيء

تحياتي

فارس034
11/11/2008, 08:36 AM
اذا كان الجرم مكسور معناته تغيير دفرنس امامي اريح لك دور مستعمل تشليح . ترى الدفرنس الامامي صغير اتوقع سعره مب غالي .

طبعا قبل هذا كله دق جي ام دبي واشك الوكيل وكبر السالفه شويتين ان شاء الله تطلع منهم بشيء

تحياتي
ايه الجرم مكسور ولازم تغيير الدفرنس الأمامي بس ما أدري في حدود كم سعره جديد وكم تشليح

بالنسبه لجي ام دبي ارسلت لهم ايميل امس بالتفاصيل وان شا الله يردون

السيارة واقفه في ورشة ماي كار اللي على طريق العروبة وفي انتظار التسعيرة ( الله يستر)

فارس034
11/11/2008, 11:58 AM
للأسف الشديد ردت علي المصرية اللي في دبي وقالت لي انهم اسفين مش حنئدر نخدم حضرتك لأنك مش عامل الصيانة عند الوكيل

سعر الدفرنس جديد 16500
مستعمل 8900
شغل اليد في ماي كار 1400
الرصيد لا يسمح ابدنننن

وش الراي يا اهل الراي

عاشق الموج
11/11/2008, 01:26 PM
واحد من الشباب اخترب عنده الدفرنش الامامي

يطلع صوت المهم وداه ورشة وقاله يكلفك تصليح 6000 ريال ويمكن يضبط معك ويمكن لا

الرجال شال روحه وراح لتشاليح الرياض وركب دفرنش من التشليح مع التركيب كلفه 3000 ريال وضمان شهر

والحمدلله الان السيارة تمام واخذ لها اكثر من 6 شهور ولا في اي مشاكل

ونوع السيارة جمس يوكون مديل 2004

انت شف خذ لك جوله في التشاليح

اما بصراحه الاسعار اللي انت تقولها تجيب لك سيارة ثانية

لا تتسرع ترا اليوكون قطع غيارة متوفره في التشاليح

Magellan
11/11/2008, 01:37 PM
حمدالله أحد يودي سيارته لماي كار ويسأل عن أسعاره
إذا تصليح رفرف لأحد سيارات الناس المرفهة تصل ل 20 الف ريال تبيهم كم يسوون دفرنس
وأنا أنصحك إنك ماتستعجل وترفق على نفسك شوي
والمسئلة تحتاج لتروي وتدوير بين الورش
رح لم البيان الجديد في حي الملك فهد وشف وش يقول
ورح لم شالنجر بالصناعيه القديمة وخله يوصف لك ورشة سوري متخصص بالدبل للأمريكي
والصناعية القديمة بشارع الجمعيه وأنت متجه غرب قبل نهاية الشارع على يمينك ويسراك ورش متخصصه أمريكي وقبلهن فيه ورش حقت دفرنسات
ويمكن مايحتاج تغيير ويكفي لحام بارد
أو الخلل مايكون من هالمسمار يمكنه شد بلد وأنت متوهم أو أو أو ...الخ

فارس034
11/11/2008, 02:58 PM
واحد من الشباب اخترب عنده الدفرنش الامامي

يطلع صوت المهم وداه ورشة وقاله يكلفك تصليح 6000 ريال ويمكن يضبط معك ويمكن لا

الرجال شال روحه وراح لتشاليح الرياض وركب دفرنش من التشليح مع التركيب كلفه 3000 ريال وضمان شهر

والحمدلله الان السيارة تمام واخذ لها اكثر من 6 شهور ولا في اي مشاكل

ونوع السيارة جمس يوكون مديل 2004

انت شف خذ لك جوله في التشاليح

اما بصراحه الاسعار اللي انت تقولها تجيب لك سيارة ثانية

لا تتسرع ترا اليوكون قطع غيارة متوفره في التشاليح


بيض الله وجهك وما قصرت وان شالله اليوم ابدأ البحث في التشاليح بس ما ادري يركب دفرنس الموديلات القديمة والا لازم 2007

فارس034
11/11/2008, 03:07 PM
حمدالله أحد يودي سيارته لماي كار ويسأل عن أسعاره
إذا تصليح رفرف لأحد سيارات الناس المرفهة تصل ل 20 الف ريال تبيهم كم يسوون دفرنس
وأنا أنصحك إنك ماتستعجل وترفق على نفسك شوي
والمسئلة تحتاج لتروي وتدوير بين الورش
رح لم البيان الجديد في حي الملك فهد وشف وش يقول
ورح لم شالنجر بالصناعيه القديمة وخله يوصف لك ورشة سوري متخصص بالدبل للأمريكي
والصناعية القديمة بشارع الجمعيه وأنت متجه غرب قبل نهاية الشارع على يمينك ويسراك ورش متخصصه أمريكي وقبلهن فيه ورش حقت دفرنسات
ويمكن مايحتاج تغيير ويكفي لحام بارد
أو الخلل مايكون من هالمسمار يمكنه شد بلد وأنت متوهم أو أو أو ...الخ

مشكور على الرد بس هالورشة ارحم من الوكالة وشغلهم مشهود له بالاضافة انهم قريبين مني بحكم عملي في مستشفى العيون والمشكله ماهي في شغل اليد المشكلة في سعر القطعة

وبالنسبة للدفرنس فالاكيد انه لازم يتغير لأنه من الخارج مكسور ومن الداخل انفرط واذا صلحته احتمال كبير يخرب مرة ثانية

Magellan
11/11/2008, 04:08 PM
مشكور على الرد بس هالورشة ارحم من الوكالة وشغلهم مشهود له بالاضافة انهم قريبين مني بحكم عملي في مستشفى العيون والمشكله ماهي في شغل اليد المشكلة في سعر القطعة

وبالنسبة للدفرنس فالاكيد انه لازم يتغير لأنه من الخارج مكسور ومن الداخل انفرط واذا صلحته احتمال كبير يخرب مرة ثانية
عندك ورشة جامعة الملك سعود بمدخلها قريبة منك وتخصصها أمريكي والبيان الجديد في حي الملك فهد
أرخص وأزين
المهم لاتستعجل واترك عنك خربطة ماي كار وإلا دار العربة وورش البهرجة
ولاتقنع بكلام واحد ،وهالورش يندر تلقى الصادق 10% والباقي نصابين
فإحذر تسلم عقلك لأي واحد،ومن المفضل لما تجي عنده تسوي نفسك مانت داري وش السالفة وخله يطلع العلة بنفسه
ماتقوله الدفرنس خربان ،تقوله شغلت الدبل وسمعت صوت ولا أدري من وين
وإذا حللك المشكلة فاصله بالسعر وإتركه ودور غيره يمكن تروح لغيره يعطيك علة غيرها أخف أو ترجع للي قبل

السنع كله
11/11/2008, 04:09 PM
ترى الصناعية القديمة عندهم خبره اكثر مثل الشميسي واسعارهم اقل وممكن يرهمون لك المنكسر وممكن ترجع الآلاف الى المئآت فلا تستعجل والله يسهل امرك ويعينك على مشكلة سياراتك والحمدلله انها ليست صعبة واذا عرف السبب بطل العجب

الجماجمي
11/11/2008, 11:42 PM
دعواتي الخالصة بأن تكون المشكلة سهلة ولا يلحقك من وراءها خسائر ولا قلق بال

ابوشجاع911
14/11/2008, 10:35 PM
مشكور على الرد بس هالورشة ارحم من الوكالة وشغلهم مشهود له بالاضافة انهم قريبين مني بحكم عملي في مستشفى العيون والمشكله ماهي في شغل اليد المشكلة في سعر القطعة

وبالنسبة للدفرنس فالاكيد انه لازم يتغير لأنه من الخارج مكسور ومن الداخل انفرط واذا صلحته احتمال كبير يخرب مرة ثانية

كنت احتري ردك هذا لاني بصراحه استغربت كلامك الاول يوم تقول المسمار شق الدفرنس وطلع لاني بصراحة استغربتها وقلت لعله يقصد (كسر) الدفرنس لان كلمت شق لي تحفظ عليها :) فهي تستخدم للاشياء اللينه ولكن عندما استخدمت الكلمة الصحيحة كسر تاكدت من الوضع ونقول ان شاء الله معوض خير اخوي وفي الحديد ولا في الارواح
والمفيد
ماتحته خط اعلاه هو الحل واويدك واشد على يدك بشده اذهب للتشاليح وابحث عن 2007 او 2008 فقط واشتر دفرنس كامل واشترط الضمان وانا اخوك وانتبه لشغله مهمة جدا وهي ان بعض ضعاف النفوس قد يركبون دفرنس قديم على سيارة جديدة 2007 او 2008 وهي في التشليح والدفرنس اصلا حق موديل قديم فكن على حذر
والله يوفقك ويعوضك بخير

ماجلان2009
14/11/2008, 11:50 PM
الله يجبر مصيبتك

فارس034
17/11/2008, 10:44 AM
مشكورين يا شباب المنتدى ما قصرتوا بالمشورة والنصائح الله يبيض وجيهكم ويجزاكم الخير
خصوصا اخوي لن أمل العطاء لأنه فعلا على اسمه معطاء اتصل علي واعطاني معلومات مفيدة عن خبرة ودراية وفوق هذا كله عرض علي يبحث لي عن القطعة ويرسلها لي علما انه مافيه بينا سابق معرفة ولكن هذا من طيب اصله وكرمه
على العموم انا باعلمكم على ايش انتهت سالفة الدبل
حسب نصيحة الاخوان طلعت السيارة من ورشة ماي كار بعد ما اخذو 150 ريال حق التقرير على قولتهم ووديتها ورشة الجامعة عشان اتأكد ان المشكلة مالها حل الا تغيير الدفرنس وفعلا أكد لي الفلبيني انه ما يتصلح ولازم يتغير رحت لتشليح الحاير ولقيت نفس السيارة ونفس الموديل وشريت الدفرنس ب 4500 ريال علما ان ورشة ماي كار قالوا لي لقينا تشليح ب8900 ريال ولما سألتهم عن اسم ورشة التشليح ما اعطوني الاسم المهم ركبته ب 600 ريال (التركيب عند ماي كار 1400 ريال) جربته امس بالليل ولا لاحظت شي والحمد لله

المهمري
17/11/2008, 12:58 PM
دبل بسيارة امريكي مهو دبل
اعتقد والله اعلم دينمو الدبل او الحساس الي في وسط الدبل
واحد من الربع صلحة عند ورشة بالصناعية القديمة (الجابري) وضبط ب 900 ريال وكان الحساس
اعوذ بالله الحساس اصلاحه ب900 والله النهابه ياصالح الجابري الله يعين

ssmy
17/11/2008, 02:00 PM
يا صاحب اليوكن كثير ما يخرب الحساس و يروحون الناس للوكاله وادفع 10000 ريال يالله دافع البلاء أو الورش الحرامية و أنا عندي نفس المشكلة و غيرت الحساسات وكنه طالع من الوكالة بس ياأخي موتري أقدم من موترك و يمكن تلقى الحسساسات في التشليح و اشترط أنه يركبه و إذا ما صلح الخراب يرجعه وما دام موترك تحت الضمان وشوله معذب عمرك أنطله على الوكالة بس يبيلهم ملاحق الله يعينك

Magellan
17/11/2008, 02:06 PM
أبارك لك أخوي فارس
على تصليحه
ولكن ماقلت لي 4500 برجيع دفرنسك وإلا لا
لأني أشوف السعر غويلي
وتأكد من الضمان ولازم تجربه زين
وورشة الجامعه نعم الإختيار بس شكلك من اللي ما يحب المشاوير:p
حتى التشليح الظاهر تشليح أم الحمام أو العروبة يعني ماوصلت للحاير ولاالصناعيه القديمه;)

فارس034
18/11/2008, 10:11 AM
أبارك لك أخوي فارس
على تصليحه
ولكن ماقلت لي 4500 برجيع دفرنسك وإلا لا
لأني أشوف السعر غويلي
وتأكد من الضمان ولازم تجربه زين
وورشة الجامعه نعم الإختيار بس شكلك من اللي ما يحب المشاوير:p
حتى التشليح الظاهر تشليح أم الحمام أو العروبة يعني ماوصلت للحاير ولاالصناعيه القديمه;)

الله يبارك فيك وبالنسبة للدفرنس هذا سعره بدون رجيع لأن الدفرنس الأول جرمه مكسور ومن جوه منفرط يعني ما ينفع رجيع وترى هذا من تشليح الحاير (تشليح ابو سلمان)وضمانه عشرة ايام بس لقيت غيره بس هذا افضل سعر وبالنسبه للمشاوير ما اظن احد يحبها خصوصا مشاوير الرياض

امس جربته في طعوس الثمامة ولا سمعت اصوات غريبه بالعكس حسيت الدبل اقوى من أول مع اني ما نسمت الكفرات

سيف الظفير
18/11/2008, 11:25 AM
الله يكون بالعون ياالغالي


ولكن الوكيل ما يصلح شئ خرب بسوء استخداااااااام

وراجع كتاب الوكيل او الوكيل نفسه


وضمان السيارة ثلاث سنوات او 60.000 كيلو


ايهما اولاً

awacs_sa
18/02/2009, 06:36 AM
صباح الخيرات
ياشين هالرساله خخخخ
انا عندي يوكن 2006 وكاله على يدي
طلعا الضمان خلص
ويوم مانتهى الضمان بدت تطلع لي رساله ( يجب إصلاح الدفع 4 عجلات) اذا طلعت هالرساله طبعا الدبل مايشتغل لو تدفع له دراهم
اذا طفيت السياره وشغلتها يرجع الدبل مثل ماكان طبعه بدون اصوات
بعد يوم او يومين تطلع هالرساله
او بعد ماطلع من البر
انا ماعطيتها اهميه مادام الدبل شغال
بس لازم تطفي السياره وتشغلها على شان يرجع طبيعي
اعتقد انه شغلة كمبيوتر مو شغلة ميكانيكيه
ونصيحتي لك وده الوكاله دامه على الضمان

تحياتي

user100
18/02/2009, 10:06 AM
صباح الخيرات
ياشين هالرساله خخخخ
انا عندي يوكن 2006 وكاله على يدي
طلعا الضمان خلص
ويوم مانتهى الضمان بدت تطلع لي رساله ( يجب إصلاح الدفع 4 عجلات) اذا طلعت هالرساله طبعا الدبل مايشتغل لو تدفع له دراهم
اذا طفيت السياره وشغلتها يرجع الدبل مثل ماكان طبعه بدون اصوات
بعد يوم او يومين تطلع هالرساله
او بعد ماطلع من البر
انا ماعطيتها اهميه مادام الدبل شغال
بس لازم تطفي السياره وتشغلها على شان يرجع طبيعي
اعتقد انه شغلة كمبيوتر مو شغلة ميكانيكيه
ونصيحتي لك وده الوكاله دامه على الضمان

تحياتي


شغلت كهرباء الله يعطيك العافية

كانت تطلع عندي باليوكن وبعد فحص الكمبيوتر طلع كهرباء بنفس ازرار الدبل

راعي الطيب
18/02/2009, 02:57 PM
صباح الخيرات
ياشين هالرساله خخخخ
انا عندي يوكن 2006 وكاله على يدي
طلعا الضمان خلص
ويوم مانتهى الضمان بدت تطلع لي رساله ( يجب إصلاح الدفع 4 عجلات) اذا طلعت هالرساله طبعا الدبل مايشتغل لو تدفع له دراهم
اذا طفيت السياره وشغلتها يرجع الدبل مثل ماكان طبعه بدون اصوات
بعد يوم او يومين تطلع هالرساله
او بعد ماطلع من البر
انا ماعطيتها اهميه مادام الدبل شغال
بس لازم تطفي السياره وتشغلها على شان يرجع طبيعي
اعتقد انه شغلة كمبيوتر مو شغلة ميكانيكيه
ونصيحتي لك وده الوكاله دامه على الضمان

تحياتي
سبحان الله نفس الشي صار معي بالضبط بس طلعت الرسالة مره واحده وطفيت السيارة ورجعت شغلتها والحمدلله ماعاد طلعت
طبعاً سيارتي يوكن 2006 على يدي من الوكاله