أفضل سيارة دفع رباعي

[برق الليل]

السلام عليكم ورحمة الله وبركاتة

ياشباب أريد التوجيه والنصيحة في شراء سيارة دفع رباعي قليلة المشاكل حسب خبراتكم في السيارات وما رأيكم في الباثفايندر وماهو أفضل مديل موجود حالياً .

والله يعطيم العافية

[* رمش العين *]

وعليكم السلام ورحمة الله وبركاته
بالنسبه للافضل هذا راجع للمبلغ الي ممكن تدفعه ، يعني اذا قريشاتك واجد الله يزيدك ويبارك لك في رزقك عليك بالتايوتا فكس ار او جكس ار ، اما بالنسبه للباث فندر فمن واقع خبرتي الطويله فيه وهو سيارتي الي طلعت به لاماكن كثيره الدهنا الصمان الحفر الشمال وما شفت منه الا كل خير وبياض الوجه وهو موديل 2000 قير تماتيك ( معروض للبيع وفيه صوره له بخيمة البيع والشراء والسبب ابي فكس ار ) ولكن من موديل 2003 تغيرة قوة المكينه وصار انشط وسعرة 2004 ( 95000 ريال ) غالي ، وصرفية البانزين اعبيه بـ 60 ريال يمشيني اكثر من 400 كيلومتر
هذا الي عندي واذا عندك اي استفسار انا بالخدمه وانا اخوك
رمش العين - ابو متعب

[حد السيف]

السلام عليكم ورحمة الله وبركاته
الحبيب
برق الليل
تنشد عن سيارة دفع رباعي
انصحك من واقع تجربة ومعايشة عليك بالفرد الونيت غمارة ونصف ومن موديل 98 وانت طالع وللك حريتة الاختيار بخصوص القير
معي لة اكثر من سنة ولا شفت منة الا العافية وقبلها كان معي وانيت برضة فردغمارة وحدة
وجلس خمس سنوات ولا شفت منة الا العافية اما بخصوص الفرد غمار ونصف مابة مكان مارحت لة ولاشعيب الا مريتة ولا مقناص الا و طيبة خاطري فية ولا نفود الاوحطبة منة والبنزين لا تسائل 75 ريال تقطع بها اكثر من 650 كيلو وبالرمل الى 550 كيلو متر
وفوقها السعة والاجمل بة المنظر وكل مايطري عليك تلقها بة يالله من فضلك
ولا يقارن باي سيارة من وجهة نظري ومركبة مثل الصغيرة على الخط ماشاءالله وغيرها كيثر وسعر المستعمل ماهو غالي
تقبل تحياتي


محبك اخيك
حد السيف

[سبشل]

السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين
حيالله الجميع

الاخ برق الليل
تبي احسن سياره دفع رباعي واحسن ما تحط دريهماتك فيه عليك بالفي اكس ار او الجي اكس ار

كد ومد وشيك ووجه وجاه اما غيره من السيارت بتمشي الحال لكن عليك باللي يوسع صدرك على الطريق او على الوعر بكل اشكاله 000000 قيمته حويره شوي لكن شف الموديل الي يناسبك وبالتوفيق

اخوك سبشل

السلام عليكم

[برق الليل]

الاخ رمش العين && حد السيف && سبشل بيض الله وجيهكم وجزاكم عني خير الجزاء وفيتوا وكفيتوا وما قصرتوا وشاكر على الردود الجميلة والواضحة جدأ

[أبو حنان]

شف اخوي فية فرق الباثفندر حلو وخاصة لاجا اسود اتقطع وروح عدام

لاكن كلنا عارفين النيسان وعيوبة:
1_ صرف بنزين
2_ سرعة خرابة
3_ ارتفاع اسعار قطع الغيار وعدم توفرها
4_ عدم وجود الصيانة الممتازة والضمان الجيد

فية طبعا اكثر من كذا بس هذولي المهما عندك زي البدي ياكافي تقل منديل

وانا اقول اركب تايوتا ولا تقول

هذارايي والسلام ختام اتمنى اني قدرة اخدمك بائي طريقة اخوي

[sad2006]

وش رايكم بالشروكي والاكسبلورا ماهي افضل

[راعي الفزعه]

:D
الشروكي والاكسبلورار ابعد عنها لان خرابها كثير وتهريب الزيوت اكثر وخاصة الشروكي
اما بالنسبة لقطع الغيار فحدث ولا حرج غالي جدا جدا في كلا السيارتين .. والقطع لا تتوفر
الا بالطلبية من امريكا لعنها الله ..
فأنصحك نصيحه دور لك باترول سفاري او لاندكروزر وبس .

والسلام ختام ..........
:D :D

[راعي الحمره]

والله يا خوي انا جربت الباثفايدر موتر مظبوط وسواقته حلوه بس انصحك بالسفاري او بالتيوتا , ومثل ما قلت الباثفايندر ما ينقد عليه .

[جرناس]

فرد
http://www.fordvehicles.com/images/2003/EN/photo/trucks/f15_pgextpop6.jpg
وسلامتكم

[جبل حائل]

بسم الله الرحمن الرحيم
السلام عليكم ورحمة الله وبركاته
اخوي برق الليل
عليك بالشاص التانكيين البيج
عز الله أن المبدعين ابدعوبة
عليك باللي اسمه عكس لونه
عليك باللي يزبنك وقت اللزوم
عليك باللي ما يقول اح

[الضاري]

هلا بـ جبل حائل

أجل ليه تبيعة ؟؟؟؟
( ياملا الدبور ):D :D :D

[الضاري]

أو جايزلك موتر الحجيج..:D :D

على فكرة ... نزلت السلة والا _ لا ؟

[سهيل واحد]

السلام عليكم ورحمة الله وبركاته..

شروكي وبس مع إحترامي للجيوب الاخرى.
عن إذنك يا برق الليل ........ ودي اسئل راعي الفزعه سؤال .. هل إنت مطلع شروكي جديد ومستخدمه وصاينه .

[راعي العليا]

برق الليل شويري عليك بعد السلام عليكم

لاتشري الا الشاص قسم بالله ان اللي صنعه انه كافر بقووووووه

انت اركبه ولاتسوقه الا البر وشف العزم وشف الممشى وشف الوناسه

يكفيك انك اذا مريت على أي واحد قام يناظرك شايب بزر هندي باكستاني حتى مر السوق تلقى الحريم يناظرك

هيبه والله هيبه ومايركبه الا الرجال وعليك بالخليجي ولاتشري الا البيج اذا دراهمك واجد

[شايب الصمان]

برق الليل 0 السلام عليكم ورحمة الله وبركاته عليك اذا الدراهم متوفره ولله الحمد (شبح البدوي) الشاص ويكون خليجي 0:good:

[اسيزو 4x4]

السلام عليكم ورحمة الله وبركاته

النصيحة خذ اسيزو مافي اقوى منة على الرمل

واذا كان ديزل الله اكبر ولا احلى ومعروف الاسيزو كداد

وانا انصحك بواحد وشف اليي فى التوقيع واحكم موتر ولا بلاش:D :D :D

[بن نويشر]

سلامي للجميع وتحية طيبة ،،،

في الحقيقة بعد إطلاعي للموضوع ، أحب بأن أدلو بدلوي عسى أن تعم الفائدة وبالله التوفيق .

من خلال طلعاتي وروحاتي في البران أود أن أوضح التالي:-

أولاً : عليك أختيار السيارة التي ترغب بشرائها هي للشباب ولا لشخصك أو للعائلة .
ثانياً : الجيوب الكبيرة مثل vxr,gxr,السفاري بأنواعه . هاذي يا طويل العمر تهرقل معك مع الزمن ويبلك كل شوي تربيط . أما القوة ما بها شيئ .
ثالثاً : الشاص مسكت وشيخ الجيوب بس تكرم ويكرم السامعين كنك راكب بعير وما يصلح إلا للبران بس . وما يصلح للعوائل وما ياخذ إلا شخصين فقط .
رابعاً : الشروكي بأنواعه (أحنش عنه تكفى) مديري معه واحد ومهبله تهبيل .
خامساً : نصيحتي لك غرفتين وحوش وبس 4x4، سواءكان هايلكس أو داتسون أو أسوزو . وحبذا لو كان ديزل (نم يا حمام) يأخذ خمسة أشخاص بالراحة وعفشك لا تشيل هم . إضافة إلى أن السعر مناسب جداً ومشجع. حتى للعائلة تصلح .

وفي الحقيقة أغلب البران كلها مطانيج ومطابات تكسر الموتر ، والونيتات تتحمل وهي أصلاً مخصصة لمثل هذه الأمكان .

والرآآي لك يا برق الليل ..

وتقبلوا تحياتي ،،

[سبشل]

السلام عليكم
حياك الله يا لسنيدي كلامك صحيح وراعي خبره
حياالله الجميع

[**( تلمي )**]

نصيحتي لك غير هالموترين لا تدور وبس { نصيحه مجرب } ,,,,,,


الأول ولا غيره .....

http://www.up2up.com/uploads/855c984204.jpg (http://www.ojqji.net/web/)


يأتي بالمرتبة الثانية :-

http://www.up2up.com/uploads/189047d3e1.jpg (http://www.ojqji.net/web/)

وتحياتي لك .................

[دسم الشوارب]

سنيدي ! سنايدي
حكيم ماشاءالله

[التجوال]

عليك بالشاص ابو شنب

[محب الشمال]

اذا تبيه للبر فقط ويكون لك انت من غير طبعأً عائلة عليك بالي ما يقول اح
الجيب التويوتا الربع
هذا مهستر ماهو صاحي صراحة ما شاء الله تبارك الله عليه قوي
او الشاص نفسة الشي تقريباً
اما اذا تبي اريح شوي واكشخ منه بشوي بس عليك بالباترول الربع وميزته عن التويوتا الربع انه افضل بالطعوس

اذا طلعاتك قليلة للبر وتكون قريبه ويكون كمان للعائلة وطبعاً حقت جعصة وكشخة وسفريات وخطوط طويلة عليك باحد السيارتين هذين ولا تعداهم ابد ابد ابد مهما شاروا الناس عليك ابد لا ترد عليهم في هالسيارتين


لاندكروزر صالون
او
باترول صالون



وعلى العموم هذا رايي الشخصي
ولا تنسى تستخير
والله يحفظك ويرعاك
والله اعلم

[غضنفر]

كلا يمدح موتره
انا انصحك ما تشري موتر هالسنة
ما فيه لا مطر ولا ربيع
اصبر للصيف القادم لعل المواتر ترخص