الفزعة ياهل الخبرة في الباثفندر .. لمبة القير ولعت مرة اخرى * صور*

[الساهر2003]

السلام عليكم ورحمة الله وبركاته

كيف الحال اخواني اعضاء منتديات مكشات ..

انا سبق وطرحت موضوع وجود لمبة في الطبلون ولعت وطفت لحالها من ثاني يوم وهذا رابط الموضوع :

http://www.mekshat.com/vb/showthread.php?t=126228 (http://www.mekshat.com/vb/showthread.php?t=126228)

وبصراحه اشكر كل من مر وادلى بدلوة ..

لكن حبيت اوضح ان المرة الاولى اللمبة طفت لحالها .. ومن ذاك اليوم الا يوم امس والامور تمام .. وبعدها ولعت والى الان وهي والعة والمشكلة انها اثرت على القير بحيث مايغير الا نمرتين وبعدها يعلق ما عاد يغير

وهذي صور اللمبة :

http://www.mekshat.com/pix/upload02/images88/mk43249_abcd0014.jpg

وهذي اقرب للمبة :

http://www.mekshat.com/pix/upload02/images88/mk43249_abcd0012.jpg

بصراحة مريت اكثر من ورشه كمبيوتر ولا عرفوا لها بالضبط فحصو الموتر وقالوا فيه مشكلة بالنظام حق القير << ميزة ان القير ان شاء الله سليم

ومريت الوكالة بعد صلاة العصر وانا وياهم شد وربط وقال في الاخير لازم تحجز موعد << الظاهر صار مستشفي الجامعي وانا مادريت ..

على ولطول طلعت السيارة ورحت بها للورش المتخصصة بالكمبيوتر وكل ادلى بدلوة اللي يقول حساس واللي يقول يمكن الكهرب فية مشكلة وخذ وخل ..

الزبدة اذا فية احد مرت علية المشكلة يفيدني لاني بصراحه ضايق صدري بالحيل وراحم الموتر من الحنحنة في الدايري ماسك خط التريلات ..

وان شاء الله اذا حصل فرصة باكر امر الوكاله اللي في خريص مرة اخرى واحاول معهم يشوفون وش الحل ..

اسف على الاطالة لكن والله من حر ما اؤنس وحرام موتر يوقفة حاجة مثل هذي ولا احد يدري وش هي ...!!!

[الساهر2003]

ابشركم ولله الحمد تم الانتهاء من المشكلة اليوم بعد مرور الوكالة اللي على طريق خريص بس مو اللي على اليمين اللي قبل المعارض .. لا هالمرة اللي على اليسار وانت متجه شرق ..


صح انهم في اول الامر بغوا يلهطون مني 300 ريال قيمة فحص كمبيوتر وزايد 850 ريال يقول المصري لازم نفحص الموتر كامل عشان نضمن الشغل << طبعا هذي ماخشت مزاجي ابد.. فقلت انت ماعليك من الموتر اهم شي هاللمبة تطفي , قال خلاص دخل الموتر وخل الكهربائي يشيك عليه بصراحه عندهم فلبيني ذيب اول ماشبك الجهاز ( الكمبيوتر ) وقدم ورجع وطف وشغل .. ماطلع بنتيجه .. فقال معناها ان الزر اللي تحت الطارة معلق على كلام اخوي Y A S S E R في موضوعي الاول :



تدري ان هذه اللمبه تقدر تطفيها انت ؟!





انزل تحت الدركسون وشف في النص ضغاط لها يمكن معلق او شي جرب وشف





وبالفعل تم ضغط الزر ورجع الموتر مثل اول واحسن ولله الحمد ..



بعدها بصراحه الفلبيني راح معي للمحاسب وقال الموتر سليم ومافيه شي وخل الرجال يمشي .. ولله الحمد سلمنا من الخساير ..


طبعا انا بعد هذا كله ويوم رجعت البيت نزلت تحت ادوووور الزر مالقيت تحت الا الزر هذا فوق دعاسة الفرامل يسار جنب الفيش اللي يشبكوون فية جهاز الكمبيوتر :


http://www.mekshat.com/pix/upload02/images88/mk43249_abcd0013.jpg


اسف على الاطاله لكن والله من قهر فيني له يومين وفي الاخير طلع بسيط ولله الحمد ..


اتمنى اني افدت المنتدي اللي نتعلم منه كل يوم شي جديد ولو بشي بسيط ..

[المرتاع]

يعطيك العافيه على المعلومات المفيده

[Dr.PRO]

الحمد لله انحلت مشكلتك ,,


بس انا عندي مشكلة بالضبط مثلك ,

ما ادري هي مشكلة ولا كذا خلقة

اذا مسكت خط امشي 170 وابغى اجيب 180 لازم اضغط الزر ولازم اعلق عليه يعني مشكلة فالي يعرف كيف اخلي الزر معلق يقول لي ,,

ولاهنتم

[خلفهم]

هلا أبو موسى ..,

والله يا انا رحمتك وأنت تكتب معاناتك بالرد الأول , وكذا فجأه تحولت المعاناة إلى فرح , أهنيك , والله يصبر الموتر عليك :) ,,

[الساهر2003]

يعطيك العافيه على المعلومات المفيده

الله يعافيك ومشكور على المرور .. واهم شي الاستفادة والله يحييك

[الساهر2003]

الحمد لله انحلت مشكلتك ,,


بس انا عندي مشكلة بالضبط مثلك ,

ما ادري هي مشكلة ولا كذا خلقة

اذا مسكت خط امشي 170 وابغى اجيب 180 لازم اضغط الزر ولازم اعلق عليه يعني مشكلة فالي يعرف كيف اخلي الزر معلق يقول لي ,,

ولاهنتم

الله يسلمك والحمد لله على السلامة

وبالنسبة لمشكلتك وانا اخوووك والله مالي بخص بها .. وترى الـ 170 طيبة بالحيل

والله يعيينك على مددها

[الساهر2003]

هلا أبو موسى ..,

والله يا انا رحمتك وأنت تكتب معاناتك بالرد الأول , وكذا فجأه تحولت المعاناة إلى فرح , أهنيك , والله يصبر الموتر عليك :) ,,

هلا والله ومرحبا بالذيب .. المعاناة والله وانا ماسك الدايري امشي 30 مع التريلات لي يومين .. واخرتها زر اضغطة وخلصت ..

والله يحييك

[جول قميري]

جزاك الله الف خير على المعلومة اخوي الساهر وعساه سلامة دايمة لك وللمبروك قل امين

[ربع 91]

الحمدالله على سلامت موترك

[الساهر2003]

جزاك الله الف خير على المعلومة اخوي الساهر وعساه سلامة دايمة لك وللمبروك قل امين

الله يحييك ويجزاك الله خير على هالدعوة ويسلمك

[الساهر2003]

الحمدالله على سلامت موترك

الله يسلمك يالذيب ويعافيك وهلا بك

[ابوقاسم]

مشكور اخوي الساهر على مشاركتنا المعلومة
والف مبروك على ايجاد الحل وبدون اي خسائر تذكر
بس سؤال ماله داعي اتمنى الجواب عليه
ها الزر في القير التماتك والقي العادي او بس للتماتك
تحياتي

[الساهر2003]

مشكور اخوي الساهر على مشاركتنا المعلومة
والف مبروك على ايجاد الحل وبدون اي خسائر تذكر
بس سؤال ماله داعي اتمنى الجواب عليه
ها الزر في القير التماتك والقي العادي او بس للتماتك
تحياتي

الله يسلمك ويبارك فيك ..

وبالنسبة للقير العايدي ماعندي خلفية عنه