قبل امس رحت وكاله كانون وشريت power shot sx10 ls

[التقرير]

السلام عليكم ورحمه الله وبركاته
رحنا كانون واخذنا الكاميرا اعلاه وطلعنا رحله وصورت تقريبا كذا صوره بس الكاميرا مافيها مشكله المشكله فيني يعني لو تشوف الدقه والصور تقول هذي كاميرا امهات 30 ريال
الله يخليكم ساعدوني الي يعرفلها اعداداتها انا ودي اصور وهذي امنيه امنيه امنيه
1_اصور قطرات ماء
2_ اصور القمر
3_ اصور نحله او ذبانه من قريب
4_ اصور طير وهو طاير بس بدون ماتكون الجنحان ترفرف قالي الي بالمحل هذي تسمى خاصيه الغلق السريع
5_ اصور مناظر طبيعيه
بس..... ادري زودتها بس الله لا يهينكم

[هواي داورد]

الله يرزقك باللي تتمناه وتتقنه

لاكن والله إني برحة كمرات وتصوير

[طخيمان]

يالغالي بالنسة لتصوير الطيور والأشياء السريغة هذي تكون بتسريع سرعة الغالق في الكمرة

أما الأجسام الصغيرة والنحل والقطرات فهذي طال عمرك تستخدم فيها خاصية المايكرو ...

أرجوا اني افدتك

[التقرير]

بوستارد & طخيمان بارك الله فيكم ومشكورين على مشاركتكم في موضوعي

[الاسترالي]

احوي لا يضيق صدرك ...الواحد ما يولد عالم
انت الان مبتدئ ...مع الوقت سوف تتحسن وتصبح بارع بالتصوير ...ثق بكلامي .
ونصيحتي لك ....اذا شاهدت شي واعجبك واردت انك تصوره ...فصوره اكثر من صوره ومن عدة جهات وزوايا وجرب جميع انواع الانظمة والتقنيه الموجوده في التصوير مع كل صوره .

تحياتي لك يا غالي ,,,,,,,,,

[جمعان 22]

كلها بتقدر عليها ....:)

تابع الشباب هنا ..هم يعرفون بالامور هذي


بالنسبة للنحل والذبانة صعبة .... الكانون ما يصور غير الفراشات ..الله يعينك :d


لا امزح معك ...هذي يسمونها المايكرو

وتلقاها في الكاميرا على شكل وردة او زهرة

لما تشغل هذه الخاصية وتقرب من الهدف وتعمل زوم ايضا ..... صور وشوف النتيجة

[نسناس ليل]

اذا ما تتعبث وتحوس بالكاميرا صدقني ما راح تعرف .. بس اهم شي تكون عارف الاعدادات المسبقه صدقني فترة بسيطه وتصير محترف ان شاء الله

موفق يارب

[عدنان الفاضل]

ما شاء الله تبارك الله ,
الله يبارك لك فيها , وترزقك الصور الصالحة .. ;)
صديقي التقرير ..

أنصحك تروح لمكتبة العبيكان ,
واشتر كتاب اسمه ..
[ اسرار التصوير الرقمي الجزء الأول ]
الجزء الثاني , لا تشريه توك عليه يا معود .. :)
واشتر معه قلم سبورة , وعط الكتاب اختك , وقله سخمطي على الصور البب زينة .!
الكتاب جداً مفيد , واسلوبه ممتع ..
وبالعكس يرتقي بعلوماتك إلى الممتاز , أو اعلى بشوي .. :)

بكم أخذت الحلوة ما شاء الله ..
وياليت تعطينا انطباعاتك علشان الشباب يستفيدون ..

[التقرير]

الاسترالي & جمعان & عنيد & عدنان
والله عاجز عن الشكر لأخلاقكم العاليه وتشريفكم راح اخذ كلامكم في عين الاعتبار الله يعطيكم العافيه
تسلمووووووووووووون يالغالين عدنان اخذت الحلوه ب 1850 من كانون

[ولدكريم]

كاميرا ممتازة .. الله يبارك لك فيها

لاكن اين موقع وكيل كانون بالرياض ؟؟ وكم سعه الذاكره التي معها ؟؟

[جردان]

التقرير مبروك على الكامرة الجديدة وأي واحد يشتري كانون ماراح يندم ومع الوقت ان شاء الله يبي يضبط كل شي

اخوي ولد كريم ماعليش ابتلقف شوي بالنسبة لوكالة كانون وانت رايح مع طريق خريص باتجاه الغرب يجيك شارع الضباب قبل شارع العليا تطلع معه وتلف يسار باتجاه الجنوب يجيك محلهم بعد 500 متر على اليمين
بس مانصحك بهم اذا تبي رح للبطحاء محل الحارثي شفه بعماير الراجحي ارخص منهم وعندهم ضمان

[العقاب]

مبروك الكمره ,,

انصحك بالقراءه لمده اقل شي اسبوع عن التصوير الفوتو غرافي قبل ما تلمس الكمره تمام
وبعد الاسبوع من الطبيعي ان المعلومات تكون كثيره عليك وراح تلخبط بس المطلوب ان تعرفت على التصوير الفوتو غرافي وبعض المصطلحات وبعد ذلك ابدا بالتصوير الميداني

كيف تتعرف تجد مبتغاك

تجده خللا محرك البحث قوقل اكتب مثلا اساسيات التصوير الفوتوغرافي او فتحة العدسه و سرعة الغالق ....

[**البردعي**]

أول شيء الف مبروك المزيونه وتكسره بالعافيه :D

ثاني شيء كلنا بدينا التصوير من الصفر

لذلك الله لا يهينك تبي تبدأ صح

لازم تقراء الكتلوج وتفصفصه صفحه صفحه

وتطبق كل شيء تقراه

يعني تقراء والكميرا جنبك كل ما قريت معلومه جديده تطبقه

بكذا صدقني الصور عندك راح تتحسن

وبإنتظار امثله على تصويرك;)

[التقرير]

الله يبارك فيكم ويطول اعماركم والله احرجتوني بكرمكم ونصائحكم
عاجز عن الشكر الله لايهينكم
راح اخذ بكلامكم
في امان الله مع الف سلامه

[fahad5598]

انا اشتريتها اليوم من الكترو بسعر 1799 ريال + ميموري 8 جيجا بسعر 99 + شاحن بطارية من سوني بسعر 80
المجموع / 1978 ريال

[التقرير]

الغالي فهد يمكن نزل سعرها انا شريتها من الوكاله كانون نفسها يمكن يرفعون السعر شوي بعدين ياليت تقولي من اي محل شريت 80 قيقا ب 99 ريال والله رخيصه جدا

[fahad5598]

اخوي التقرير آسف على الخطأ اقصد (8 قيقا ) اشتريتها من الكترو

[التقرير]

تسلم يالغالي فهد الله يعطيك العافيه ويخليك اذا عرفت للكميرا لا تنساني تراني غشيم علمني
ومشكور في امان الله

[الاسترالي]

هل هي 10 ميقا بكسل
با الغالي ممكن تقولونا كم ميقا بكسل

[التقرير]

الأسترالي الغالي جدا
الكاميرا 10 ميقا بيكسل والزوم 20 اوبيتيكال زوم والسعر 1850 ريال من وكاله كانون
واي سؤال من العين هذي قبل هذي

[الاسترالي]

الأسترالي الغالي جدا
الكاميرا 10 ميقا بيكسل والزوم 20 اوبيتيكال زوم والسعر 1850 ريال من وكاله كانون
واي سؤال من العين هذي قبل هذي

سعره معقول جدا الله يطعمك خيره ويكفيك شره
بس على فكره ما لقيت عندهم 12 او 13 ميقا بكسل ...لاني صراحه لقيتها بمواقع الانترنت بس سعرها غالي قوه