إقتحام ( أمريكي ) لمكشاتنا .. والإنسحاب للديرة [الأرشيف]

مشاهدة النسخة كاملة : إقتحام ( أمريكي ) لمكشاتنا .. والإنسحاب للديرة

حفرلوجيا

27/02/2004, 08:44 PM

سلام يالربع
صديق عاد بعد خمس سنوات قطعته عنا بعثة من جهة عمله للدراسة بامريكا .. أقنعنا بعد عيد الأضحى الفائت أن نكشت فيما أطلق عليه ( رحلة صفاء ) تكون خالية من جميع المعدات والأجهزة التي لها علاقة بالكهرباء أو المجال الكهرومغناطيسي( ماعدا الضروري بالسيارة ) .. وكملها أخونا المعروف للشلة بـ( أبو طارق ) بمنع الصحف والكتيبات والكتب يعني ( عزل عن العالم الخارجي ) :(.

اخترنا المكان > روضة ( الوقبى ) وهي واسعة جدا تقع شمال حفر الباطن بـ ( 50 كم ) بإتجاه الحدود السعودية العراقية .. ويميزها وجود تضاريس متنوعة حولها .. وإذا قسم الله عليها بوسم متتابع تجد فيها كل النباتات والأعشاب.. والفقع على حزومها .. كما أن فيها أبار قديمة في أخفض نقطة .. لكن ربيعها هذه السنة ماهنا زود .. وعلى أي حال ..الشلة المتآلفة تغني عن الربيع أحيانا.

لظروف خاصة لم ألتحق بهم إلا بعد 24 ساعة وأقمت ليلة واحدة ( وفارقت ) الرحلة .

في أول جلسة معهم كان النقاش محتدما على خلفية سابقة خلاصتها أن بعض الشلة محاصرين ( راعي أمريكا ) يقولون له ( طبعك متغير ) بعد بعثتك .

صالح .. واحد من الشلة إذا فقدوا كبريت استعانوا به يشب النار من ( حرارة طبعه ) لكنه مايحب يلف ويدور( سيدا ) . ومزعل أبو طارق قال له انت صاير ( تزرق ) علينا بعض الكلام اللي يشطب الدماغ ويكون ( في غير محله ) وتردد عبارات حتى ( توهمنا بالصدق ) ماعليها جمرك .. مثل
( قرأت كتاب بأمريكا يقول ..... )
أو
( توصل باحث في دراسة بأوربا إلى .... ) ...
عاد رح دور البحوث والكتب.. يعني ( حط بالخرج ) من الفقع ( المصلع ) بحزوم ( الوقبى).

وطينها صالح مع أبو طارق كرر عليه ( انك بعد ماكنت طير بر وتوسع الصدر وذرب الكلام .. صاير بعد عودتك ناشف .. وبالكشتة تضيق الصدر لأنك ( تورط ) نفسك بالكلام بكل موضوع وتدعي انك تفهم بكل شي وكلامك مصحوب برفعة خشم.. والشرهة على من طاعك وخلاك تقتحم كشتاتنا بكشتة من هالنوع .. أنت ماتدري اني بسببك فاقد أهم تسلية لي ولكثير من الكشاتة بالبر!! :mad:..

سأل أبو طارق ( أي تسلية ؟) :cool:

--------------------- (( يتبع ))-----------

كشات

27/02/2004, 09:14 PM

بسم الله الرحمن الرحيم
السلام عليكم ورحمة الله وبركاته

نحتريك يابعدي وسعدي

عجل علينا
لو انك طايحن بطبعن بايخ هاليومين
صايرن تقسم مواضيعك على اجزاء
وش عندك يا طه يس حسين رمضان (افهمه على ماتبي);)
تبي (تجسم) مواضيعك ماعندنا مانع جسمه بس عطنا حقنا قبل
يعني لا تبربس بالسالفه من نصفه وتقول -يتبع- تبعك جني مايدل دربه
ابو سليمان
<<<<<<<< صالح الثاني وقبسته اسرع بعد

الله يوسع صديرك
يانا ضحكت على
صالح .. واحد من الشلة إذا فقدوا كبريت استعانوا به يشب النار من ( حرارة طبعه ) لكنه مايحب يلف ويدور( سيدا ) .

انا بنتظر وش عقب -يتبع- لو اني ناكسن من البر ومنهدٍّ حيلي لكن ياحيل الله تعلقت بالسالفه

المربد

27/02/2004, 09:34 PM

لا يجي الصبح الا وهي مكملة يا بو سليمان الله يرضى عليك،
من جيت من الصمان وانا ادورعلى سالفتك هالسبوع.

عجل علينا الله يخليك

الجوني

27/02/2004, 10:12 PM

Originally posted by كشات
بسم الله الرحمن الرحيم
السلام عليكم ورحمة الله وبركاته

نحتريك يابعدي وسعدي

عجل علينا
لو انك طايحن بطبعن بايخ هاليومين
صايرن تقسم مواضيعك على اجزاء
وش عندك يا طه يس حسين رمضان (افهمه على ماتبي);)
تبي (تجسم) مواضيعك ماعندنا مانع جسمه بس عطنا حقنا قبل
يعني لا تبربس بالسالفه من نصفه وتقول -يتبع- تبعك جني مايدل دربه
ابو سليمان
<<<<<<<< صالح الثاني وقبسته اسرع بعد

الله يوسع صديرك
يانا ضحكت على.

انا بنتظر وش عقب -يتبع- لو اني ناكسن من البر ومنهدٍّ حيلي لكن ياحيل الله تعلقت بالسالفه

حفرلوجيا

27/02/2004, 10:29 PM

هلا أخوي كشات سليم (الحصه) والنيات ( افهمها على ماتبي :p ) . ياصالح النار ..
لكن خذ مادامك و الغالي اخوي المربد والغالي الجوني ... جايين من البر ... هذا إذا انتم فاضين لسوالف اخوكم يالمنهدين ;)... ألو .. ألو .. المربد ان كنت ( صاحي ) وتسمعني >>> أجب :D

------------------------------ (((( نواصل الجزء الأخير ))))-------------

قال صالح أنا متعود أتسلى مع الكشاتة بالليل على جهاز اللاسلكي ( بقناة الألغاز والشعر) .. فيها تطلع علوم جديدة .. وكلام نقوة عن العذف منسوق ( أحلى يالقاضي ) .. وأنت حرمتنا!!

رد راعي أمريكا : اترك الألغاز والشعر والأمور ( المغبرة ) هذي كشتة مايعرف لها ( اللي مايفهمون ) .. ونحن فيما يشبه النقاهة وكشتتنا علاج بالطاقة .

سألت بسرعة محاولا إيقاف زحف حرارة صالح المتوقعة بسبب كلمة : ( اللي مايفهمون ) : يابو طارق وش علاقة الطاقة والعلاج بها بما نفعله الآن ؟! .. أجاب : هناك بعض الباحثين في غرب أوربا ذكروا ....

قاطعه صالح يقول ( آخ ياراسي بدأ يطقطق يبي يتشطب ) :p..

ولكن أبو طارق استمر يشرح ( شيء ) غير مفهوم ويقول : انك تقدر تحط كفك جنب صابرك وتقرب وتبعد مع دوران الكف بحركات متموجة بعدها تحط كفوفك على أعلى راسك وعلى أثر ذلك تحس بدفء راسك يتبعه انتعاش وإحساس آخر بالنشاط الزائد .. :looney:

قاطعه صالح : تقصد ان مركز النشاط هو طباقة رأسك.. يعني واحدنا يصير مثل الخروف يدور غيره يتناطح معه ( لابارك الله بالطاقة اللي تبي تقلبنا خرفان بسببك يالأمريكي ):mad:..

وتأكد لي أن ابو طارق بقليل من الفهلوة وكثير من الخثرقة ( يهرف بما لايعرف ) مما اضطرني للقول : كلامك غير مقنع ! رد مباشرة : ( الإنسان عدو مايجهل ) .. وعند هذا الحد طابت نفسي ولا رديت لانه مابقى إلا يقول يـا(جاهل).:eek:

لكن صالح ماتركه جاء بإندفاع : ياحسافة طبعك الأول يابو طارق نسيت اننا في بر وكشتة لازم نوسع صدورنا ونراعي خواطرنا مع بعض .. أشوف صاير تنغز بكلامك وتجيب علوم مايصدقها اقلنا تعليما ..

إلا أن راعي أمريكا استمر بـ(........) وقال : بمناسبة التعليم ترى ( التعليم ) هناك .. ماهو عندكم ومثلكم ..
في هذه اللحظة تدخل من الشلة من يعمل مدير مدرسة وقال : ماودك تخلي كل أمريكي ورى ظهرك طول كشتتنا .. وترى بالكشتات اللي يمكنك ضيعت علومها بأمريكا .. ودك اننا نحاول ندور مايوالفنا على بعض ونكون شلة منسجمة ومتناغمة ...

رد أبو طارق : بمناسبة التناغم .. للأسف حنا إيقاعنا بطيء ودائما متأخرين عن ( غيرنا) ..

قاطعتهم : لحظة.. مادام العملية فيها ( ايقاع ) .. تذكرت انني مرتكب مخالفة وهي أن معي ( رادو صغير) .. لذااااااا ..
سأعاقب نفسي وأنسحب من كشتتكم للديرة :mad:.. ومع السلامة :burnout2:
وسلامتكم.

سيف السيف1

27/02/2004, 11:25 PM

الطبيب

28/02/2004, 07:31 AM

ولا تعبتوا جميعا انت واخوياك

يا اخي كسر خاطري خويكم هذا ( راعي امريكا ) والله يا انتكم تويليتوه ( تولجتوه ) يا اخي يمكن الرجال يبي يوصل لشيء معين لكن خانه التعبير

وطاح بناس اللهم يا كافي ( من صالح الحريقه ) الى ابو سليمان ( لا تعليق )

اجل يقول الطاقه تكون بقمة الراس ( هههههههه ) هذي الكلمه بالذات جلست اضحك عليها لدرجة ان ابي ارفع عليك قضيه تعويظ لان الظاهر ان ( سري انشلع )

والا الكلمه الثانيه ( وصفك لصالح )
(( صالح .. واحد من الشلة إذا فقدوا كبريت استعانوا به يشب النار من ( حرارة طبعه )...))

===============
يا كثر اللي بوقتنا انمسخوا ثقافيا وعقليا وانبهروا بما يسمى بـ ( الحظاره الغربيه ) اوالامريكيه واللتي لا تعدو كونها حريه لحد الانفلات بلا روابط ولا وازع ديني او اخلاقي او حتى انساني

وهؤلاء لا يعرفون ان الحريه عباره عن اقسى انواع المسؤوليه
فالحريه من وجهة نظري الخاصه (( ان تكون تستطيع ان تفعل ما تريد ولكن - بحدود الشريعه الاسلاميه - ثم العرف اللذي لا يخالف الشرع ))

وكذلك قتلنا من يهرفون بما لا يعرفون من (( مدعي الثقافه ))
فلمجرد انه درس في امريكا او اخذ دورات في اوربا ولو لمدة اسبوع واحد فقط تجده ينجرف خلف تيار ما يسمى - جدلا - بالحظاره

ونحن كمسلمين اولى بالحضاره والتقدم واحترام الآخرين منهم

واذكر مقوله لاحد المسلمين الغربيين واللذي اسلم عن اقتناع تام بالاسلام عندما زار الدول الاسلاميه

(( في الغرب وجدت اسلاما بلا مسلمين وفي الدول الاسلاميه وجدت مسلمين بلا اسلام ))

فلم لا نطبق الصالح من اي حضاره - ويوافق شريعتنا - ولم لا نكون قدوات للغرب بالدين والتعامل والاخلاق الحميده

ولنا في رسول الله اسوة حسنه

==================

اخوي ابو سليمان

وفقك الله لما يحب ويرضى وجعل ما تخط اناملك على صفحات المنتدى في ميزان حسناتك

موضوع بكل صراحه يستحق القرائه اكثر من مره

وفقك الله والى الامام

واذكرك (( الوصول الى القمه سهل ولكن المحافظه عليها صعب )) وانا والله يهمني ان تحافظ على هذا المستوى الراقي من الكتابه

وتقبل تحياتي

اخوك اللي اكبر من الصغير

الطبيب

المربد

28/02/2004, 08:26 AM

سلمك الله يا بو سليمان،، ومشكور على سرعة تكملة الموضوع.
واشوى انه يقول (هناك ، وبامريكا) عسى ما يقول "عندنا وعندكم"

راعي الطويلة

28/02/2004, 08:53 AM

العزيز

حفرلوجيا

الله يسمح خاطرك ويوسع صدرك .......... بصراحة مواضيعك ما تنمل حتى ولو فيها (((يتبع))) عاد ندري تدلل وتغلي وحنا حاضرين نصبر وننتظر جديدكم على أحر من الجمر .......

بس لي طلب صغيرون ...

لو تكرمت علينا أنت وباقي الربع اللي كشتوا مع راعي امريكا ..... لا تدلونه على المنتدى .. تكفون ..

اخوك

راعي الطويلة

القماري

28/02/2004, 10:10 AM

مشكور يابو سليمان على الدبلجة والحبكة،
بس ترى خويكم العربميكي (في كلامه بعض الصحة ولو أنه مو في محله - كشته وبر) ، وبعض من الشباب الله يهديهم من يغبوا كم سنه برا الديرة يجيون بعدها مثل الغراب (إلي حاول يقلد مشي الحمامة ، ولا هو عرف كيف تمشي ونسى مشيته بعد) وتلقاه كلمه عربي وكلمتين أنجيلزي أو هندي ( حسب التخصص) ، لكن هذا مايمنع أنه إستفاد من التكنلوجيا ومن اللغة بعد.
بس مرة ثانية إذا ودك بمرافقته (شوف لك مطعم خمس نجوم بدل البر):D

حد السيف

28/02/2004, 10:54 PM

السلام عليكم ورحمة الله وبركاته
الغالي كاتبنا المحبوب
حفر لوجيا
الحمد لله على السلامة
عسى ماشر وجعل المانع خير ان شاء الله ماخويت ربعك من البداية عسى ماهب (............) محلوفن عليك:mad: وبة نواقص لازم تكملها والا(.............:confused: )
واكثر الكشاتة يروح وقتهم هدر ولا يستفاد من طاقتهم وانت حبيت توصل شي وشي كبير بس شف وشهو:what: وبعدين ليش الرادو من الممنوعات اكيد تسمعبة شي والله العالم انة:what:
وفركة الي الديرة وما تبية يصادر عليك

محبك اخيك
حد السيف

المترو

01/03/2004, 02:17 AM

بصراحه بديت اشك بعد ما قرأت كشتتكم مع راعي امريكا لا اكون انت واحد من الشباب اللي معنا بالكشته وانا ما دري
لانه يبدو ان الامرمتشابه لانه معنا بالترابيع والشوكي قبل اسبوعين واحد من الشباب من اهل امريكا وتوه جاي بس الحق يقال قمة بالاخلاق والتعامل ولا هو راعي فلسفه وقليلا ما يذكر امريكا الا اذا واحد نشبه وسأله عن موضوع وعلى العكس يمدح البر ويفضل ربيعنا على غابات امريكا وطبيعتها يقول ان هناك من كثرها مالها طعم وماصخه وزكرتي وان كان ينتقد بعض التصرفات العوجا من البعض بس مقبول منه الانتقاد لانه على حق وهو بصراحه دكتور بحق وحقيقي لكن بما اني كنت امير الرحله لا يوجد ما يعكر الرحله واذا فيه واحد وده بالنقاشات العمياء بصلاحياتي كاميرأوقف الكلام واغير الموضوع بس ربعي راقين شوي لدرجة ان فيه واحد من اهل الشرقيه ما يعرف البر والا عمره نام بالبر وصباح اول يوم يقول معكو خبز صامولي نسوي سندوتشات للفطور والا نروح للديره نجيب فطور بس احسن ما فيه ما يقول لا ابدا لانه اذا زعل الامير ما فيه نومه بالخيمه جزاء له لسوء سلوكه وعدم طاعة الامير شفتوا اني دكتاتوري بالبر طبعا مع راعين الخنبقه وتخريب الكشته

وهالاسبوع كشت للصمان مع بعض الربع وصرت امير للمره الثانيه للرحله (وبصراحه اكره ان اكون امير بالرحله بس كل الللي معي يصرون على بحجة اني ادل الاماكن الزينه ما يدرون ان البركه بالقارمن عسى اجد عندك يا ابو سليمان ولاخوه الاعضاء حل اني مااكون امير بالكشتات ابي وصفه منكم

وسلامتكم الرحال2003

مراكي الذيب

01/03/2004, 10:25 PM

السلام عليكم ورحمة الله وبركاته

الله يعطيك العافيه اخوي حفرلوجيا دائما تتحفنا بقصصك المفيده .

وبعدين خويكم هذا جاي من امريكا يحق له ياخي , عقب امريكا جايبينه لحفر الباطن لا!!! وماهوربيع بالحيل!!!!! جاه شدعضلي ,,, خلوه ياخذ راحته ويعبر عن شعوره (الراي والراي الأخر) حشى الجزيره:D

مشكور يابوسليمان :good:

حفرلوجيا

03/03/2004, 10:16 AM

أخوي أبو فارس : خل كشات ينفعك .. مادامكم متفقين إن طبعي بايخ .. شكرا:mad: (تراها طالعة بالغصب ).

أخوي الطبيب : شكرا ولاندمت .. نعم للاسف هناك من مسخوا ثقافيا .. واللي يغثك تطيح بواحد منهم بكشتة .. وأنت تدور الوناسة فيها..
بس خل عنك أثاري الإشراف يخلي الواحد ( راكد ) وعميق .. تصدق عاد طرى علي لو عضو تجيه ( طفاقة وعجلة ) يمسكونه الإشراف وتصير ردوده ( راكدة .. وشبه موضوع مستقل ) :good:..
لايروح فكرك بعيد ( اركد ):p

أما ( اللقمة ) اللي تقول عليه .. الحمد لله ماهنا ( جوع ) .. والأمور بالتساهيل مع ربعي بمكشات .

أخوي المربد : شكرا .. ماهي بعيدة بعضهم يقول ( حنا وأنتم ) .. الله يخلف.

أخوي راعي الطويله : شكرا وهذا تدليل من النوع الطويل :) .. اما عن طلبك .. فـ ما ( ...... ) إلا هو.

أخوي أبو أحمد ( القماري ) : شكرا .. ومادامك ( عميق ) فإسمح لي أوضح :

هناك بعض الأخوان الذين كان تعليمهم ( غير محلي ) .. يمكن تعلم وفقا لمناهج تعليم غير مسبوقة أو على الأقل تسبق مناهج تعليمنا .. لكن المتخصص في هذه الحالة ليس من الضرورة أن يكون ( فاهما ) بكل شيء .. ولا هناك داعي للإنسلاخ عن ( تقاليد أدب الحوار والصحبة ) خاصة في الرحلات والكشتات ( وهذا موضوعنا ) .. وأنت قلت (مو في محله ) .. هاه أثرنا متفقين ..:good:
بس بشأن إقتراحك الخمسةالنجوم.. أخشى يورينا هناك نجوم الظهر.:p

اخوي حد السيف : شكرا أقول ماودك ( نبلش ) بالملصق التوعوي اللي تبي تسعدنا فيه بدل ( علامات الإستفهام ) اللي أنت حاطها ;).. أقول الفركة ( منها) أحسن .. تكفى .:(

أخوي الرحال 2003 : شكرا ..أحسن يا( الأمير ) :p.. و رفيقكم هذا ( مختلف ) المعدن .. وهذا اللي يحرص عليه ياغالي .

أخوي مراكي الذيب : شكرا .. بمناسبة شعار ( الرأي والرأي الآخر ) ياخوي اللي يغثك ببعضهم تطبيقه على فئة غير الأخرى .. هذا الشعار تشبع ظلما وبهتانا ..
بس كنت سألتك وين ذيبك اللي كان ( يهرول ) بتوقيعك .. ماجاوبت :p.

* رمش العين *

03/03/2004, 11:19 AM

اخوي ابو سليمان تسلم يمينك على كل ما خطيته في الموضوع الرائع واسمح لي احط هالرابط لموضوع ذو علاقة خذوه ( بس ترى ما لوه علاقه بامريكا والي جايين منها )
http://www.mekshat.com/vb/forumdisplay.php?s=&forumid=73&daysprune=30&sortorder=&sortfield=lastpost&perpage=25&pagenumber=2

وعنوان الموضوع : هام جداً ((( قبل ما تدق سلف وتتوجه للبران ))) هام جداً
تقبل تحياتي يا شويبنا يا خالي ابو سليمان

حفرلوجيا

05/03/2004, 08:36 PM

أخوي رمش العين : شكرا .. اطلعت على موضوعك الرائع .. لكني أشك أن صاحبنا ( الخواجة ) ينفع معه أمثال السويدان في ( دعوة للنجاح ) .. هذا يدعوك للفشل.

وترى الرابط اللي ذكرته فيه بعض العطب .. وإلى أن يأتي ( طبيب ) يعالج العطيب .. موضوعك هذا هو رابطه
http://www.mekshat.com/vb/showthread.php?s=&threadid=15550&perpage=15&pagenumber=1

----- وبعدين رمش العين لايجرح .. منين جبت شويبنا غربل الله عدوك :mad: