بدات الازمة تعطي ثمارها نزول السيارات المستعملة

[الربذي]

السلام عليكم

يوم الخميس رحت لمعرض حائل لقيت سيارة يحرج عليها ماعندها احد وبمعنى البيع شبه صفر
يعني خذ عندك
جي اكس ابيض تكييف مركزي ونظيف يحرج عليه ب55 الف فقط ولااحد راضي يشتري مدري هل هذا سعره
بيع جيب 2005 شاص ب65 نظيف جدا هل هذا سعره
مجرد سالفه حبيت اخبركم اياها
احد المعارف من شهر وهو كل يوم ينزل للمعرض يبي يبيع يوكن 2004 ولااحد راضي يشتريه منه

[سكري القصيم]

تعال لبريده شف اسعار السيارات

لي اسبوعين ادور جيب عجزت القى

وانت تقول ب 55 ابعطيك 5 الاف ودلني عليه

[السنع كله]

الاسعار في نزول ولاشك وهو نزول نوعي واصبر يكون شاملا ونسال الله ان يبعد عنا الغلا والوبا والزنا والزلازل والمحن وسوء الفتن والكساد والفاساد ونساله ان يغيث البلاد ويصلح العباد

[GOLDEN SNIPER]

فيه نزول خفيف .. و يكون معدوم في بعض المناطق

بس اصبر شهرين ثلاث شهور الجايات بتنزل نزول قوي جدا حتى سيارات الوكالات

إن شاء الله .. والله يرزق المسلمين

[مقلع الرمث]

ههههههههه حوض 2006 مصدوم من الخلف ومعدل صندوقه يقولي يسام 94 الف وانت تقولي ب65

هذا ياحبيبي كانه نظيف يجيب التسعين هواء

[فاقدخوي]

الضاهر اكثر اللي ردو عليك شريطيه

اكيد الموضوع ههذا ينكبهم


موفق يالذيب وان شاء الله تشوفها ب20000الف ماهو55000لانه حقها لها عشر سنين

[ابو نوره 2006]

ببريدة شاص 2004 يقول يسام 95 ......... قبل يومين

[حكيم المدينة]

وخذ عندك
جيب ربع لاندكروزر معروض بـ110 موديل 2006
ويمكن ينباع بسرعه

[الضويان]

يالربع والله ماشفنا النزول اللى شفتوه السياراة نار نار
صحيح فيه برود في شراء السياراة والسعرماحصل فيه انا خايف من الطلوع ونا ماشريت سياره
كليوم محظرفي المعارض بدون فايد حتى الشباب كليوم ملقيت سيار انا لا لا جننتوني يالربع
وخذ من انواع التعليق علي

[نسا نيس]

الله يبشرك بالخير ما نرضى للناس خساااره
لكن نقول اللهم انا نعوذ بك من الغلا
اللهم ارخص الاسعار يارب

[هواوي]

الله يبشرك بالخير

[سليمان911]

الله يسمع منك ياخي انهلكنا والله

[ثورة الشك]

لاتنسى ترى فيه زباين مجنن يدفعون

ويطيح على سمعه ياكافي

[الكونترولCONTROL]

كل شيء نزل سعره ,,, لكن المشكلة في أن أكثر التجار :


1- اذا ارتفعت أسعار السلع 10% رفعها 30% بل أحيانا بدون أن ترتفع يرفعون !!
2- اذا انخفض سعر السلع 20 % خفض فقط 4% و ماطل فيها !!!


مثل المناشير طالعة تاكل و نازلة تاكل نعوذ بالله من نفس لا تشبع
و الله يعطيك العافية على الاهتمام

[سليمان911]

النزول لاحظته في موقع بيع السيارات الامريكيه الاسعار مخسوووفه في بعض السيارات
ومدري ليه للحين مانزلت الاسعار عندنا

[الفتكي]

السلام عليكم
يا إخوان انا اسمع ان السيارات بتنزل اكثر من عشر سنوات ولا نزلت لاكن هل بتكون السيارات الجديده مثل مثل سعرها سابقا ام
مثلا الجيب ال vxr م97 فل كامل كان 145000 ريال والان هل بيكون الجديد بيكون 2009م بقيمة 145000ريال ما أعتقد لاكن اتمنى أن يكون ان شاء الله الكلام صحيح يارب. وأسأل العلي القدير ان يبعد عنا الغلا ويغيث البلادوالعباد امين.

[سيف الظفير]

ببريدة شاص 2004 يقول يسام 95 ......... قبل يومين



المعذرة هذا نـــــ .............



في الرياض شاص ابيض موديل 2007 نظيف جداً مع شايب ممشاه بحدود 33.000


حادة بـ 95.000 بمعارض الرياض

[سيف الظفير]

السلام عليكم
يا إخوان انا اسمع ان السيارات بتنزل اكثر من عشر سنوات ولا نزلت لاكن هل بتكون السيارات الجديده مثل مثل سعرها سابقا ام
مثلا الجيب ال vxr م97 فل كامل كان 145000 ريال والان هل بيكون الجديد بيكون 2009م بقيمة 145000ريال ما أعتقد لاكن اتمنى أن يكون ان شاء الله الكلام صحيح يارب. وأسأل العلي القدير ان يبعد عنا الغلا ويغيث البلادوالعباد امين.



يالذيب الفكســـــــار الجديد 2009 فل الفل انا شايفه قدم عيني على 301.000 ريال


واذا الدفع كاش خفض لك 1000 ريال وصار 300.000


صار على غفله رنج

[سيف الظفير]

يا اخوي اليوكن موديل 2003 بأمريكا وصل سعره 30.000 ريال

[mushari-saud]

أنا أدور شاص لقيت شاص 2001 م يسام 84 ألف وانت تقول 2005 بـ65 وينه تكفى!!!

[ابو حمد 24]

سمعت لا حظ سمعت بجدة جت اليوكونات المستعملة بأسعار زهيده يبي يبيعون بأي طريقة بالعربي يبون كاش الجماعة متدهورين خاصة Gmc
لكل شيء إذا ماتم نقصان
فلا يغر بطيب العيش إنسان
هي الأمور كما شاهدتها دول
من سره زمن ساءته أزمان

[ملك الباترول]

اخوي سيف الظفير

بامريكاء ب30 ابي اثنيني على ايدك

وياليتك ترسل اميلك على الخاص

[كبسولة2]

صاااااااادق يا أخي الكريم

الشاص 2009 كان قبل الأزمة بــ 125 الف

والآن بــ 113 الف ريال في مكة

واليوكن 2003 بــ 43 الف ريال وقبل الأزمة بــ 52 الف

وبعد الحج تشوف النزوووووول صح

[رماح حايل]

الله يبشـــــــرك بالخير

[الربذي]

صاااااااادق يا أخي الكريم

الشاص 2009 كان قبل الأزمة بــ 125 الف

والآن بــ 113 الف ريال في مكة

واليوكن 2003 بــ 43 الف ريال وقبل الأزمة بــ 52 الف

وبعد الحج تشوف النزوووووول صح

الله يبيض وجهك يالسنافي مصار معي الا انت بعدي والله ولايهون الكوكبه الي شاركوا واثروا الموضوع
اخواني هذا حصل يوم الخميس الماضي بحائل قد يكون الي لقيت صيدات ويمكن بعد راعينهن ماهو بايعين الا صاحب الشاص ابيض سالت عنه قالو بيع ب65 الف ريال موديله 2004 بعد التاكد وليس 2005 لكن مايفرق موديل الاهم النظافه حتى راعيه شايب فاكه من الوكاله وسالت شايب كم السيارة ماشية قال ياوليدي والله مدري
مااعرف اقراء اهم شي انها تمشي 0يارب تحفظ كبار السن اهل الفطره اهل المعروف اهل النيه الصادقه اهل الفزعه اهل حسن الجيره وخصوصا الي تارك لحيته على السنه مااقصد بعض الشياب الي يروعونك ماتدري هم رجال ولا عجز 0وزقارته بيده الثانيه في فمه 0

شطحنا يالله سترك 0
احييك اخوي وجاري رماح حائل0000000000000

[شاقي القميري]

فيه برود بالبيع :cool: فقط وإلا الأسعار زي ماهي أنا معي نيسان باترول 99 صالون سيم مني 45

[راعي الخرازه]

والله ياجماعه اعتقد سوق السيارات عندنا هنا في السعوديه يختلف عن باقس اسواق الدنيا كلها
ويعتمد السوق عندنا على نوع السيارة بالدرجه الاولى قبل النظافه والجوده
وكذلك يعتمد على الاشاعه
يعني معليش هايلكس 2005 قبل سنه او سنتين تسام بـ90000 هذا هو الهبال بام عينه لكن سمعة السياره
والكلام عن الموديل الجديد بدون تجربه هو السبب في رفع السعر
اتوقع يكون هناك نزول لكن نوع عن نوع مثلا الامريكي راح ينزل نزول واااضح
الاوربي كذلك
لكن الياباني النزول على حسب الشركات يعني تويوتا ونيسان النزول سيكون طفيف
غيرها بيكون واضح النزول فيها
وسلامتكم ....

[راكان المطيري]

انا متفائل ان عقب عيد الضحيه بتنزل الأسعار

[رجل كريم]

مشكور اخوي الربذي على الموضوع الجميل والمهم في وقت واحد ..


احنا الان نشهد بداية تذبذب في اسعار السيارات لان الازمة في بداية تأثيرها علينا وما خفي اعظم وطبيعي ان المناطق الممطورة مثل القصيم وحواليها ترتفع فيها اسعار السيارات وخاصة الجيوب لان هذا وقتها , لكن الارتفاع هذا وقتي والله اعلم , والمعروف ان الوكالات تسوي عروض اذا سياراتها ما بيعت ولا كيف تدخل رواتب موظفينها وكيف تدخل ربح اذا ماباعت ,يعني يا اخوان تظنون الوكلاء بيجلسون يتفرجون وبضاعتهم تتكدس في المستودعات ,! بالعربي الفصيح دعوها لهم وراح تشوفون نتايج النزول مبهرة ..

للجميع خالص تحياتي ..

[بو خليفه]

النزول فعلي يا شباب اليوكون يقولون وصل 110 ألف والددسن جير اوتوماتيك دفع خلفي سيصبح 60 ألف بعد ماكان 75 ألف
وانا اقول الله يبارك ويزيد في النزول حتى ذوى الدخل المحدود يستطيع يشتري سيارة

[ابوعقل]

ان شاء الله

انها تبي تنزل زود

[بو خليفه]

سيف الظفير
عجبتني اصبح رانج سعره

الياباني النزول فيه طفيف بسبب ارتفاع سعر الين بالنسبة للدولار والريال

[ابونجم 1]

الله يسمع منك ويبشرك بالخير انت ومن يقرا

[قرناس صلا]

صاااااااادق يا أخي الكريم

الشاص 2009 كان قبل الأزمة بــ 125 الف

والآن بــ 113 الف ريال في مكة

واليوكن 2003 بــ 43 الف ريال وقبل الأزمة بــ 52 الف

وبعد الحج تشوف النزوووووول صح


:good:
الخير قدام

امسكو الكاش

والصبر زين

[الرررحال]

اولا السلام عليكم,,,,

انا اللي اشوفة إن السيارات مانزلت ,,وهذا الكلام اللي اقولة من خلال ماشاهدته في المعارض خلال اليومين اللي راحو..
بالعكس السيارات وبالاخص الجيوب ماسكه سعرها ويمكن ارتفعت زود,,,

[alfajeralb3ee]

ياجماعه الحقيقه انا اخوي توه جاي من دبي اليوم ( الاربعاء ) ويقول اسعارهم نار ولا فيه اي علامه بنزول للأسعار خصوصاً الامريكي المستعمل ...
وخذ عندك الاسعار
يوكن 2004 لون احمر ناري مع ذهبي ماشي 10000 خليجي ___ مصدوم من ورى بـ 66 الف درهم .
يوكن دينالي 2003 _________ 56 الف درهم
يوكن فل كامل 2004_______________ 69 الف درهم.
كامري امريكي 2003 __________________ 37 الف درهم .
الاسعار من غير الجمارك

[بو خليفه]

دائماً الشريطية يقولون السيارات لاتنزل حتى يصرفوها بأغلى الأسعار
ودائم يعيبون في الموديل الجديد حتى يتخلصو من القديم

[كبسولة2]

راح ننتظر 6 شهور سنة سنتين

ما ورانا شئ مواترنا تحت رجلينا ورواتبنا ماشيه يالله لك الحمد وفي بيوتنا وياربي لا تغير علينا

لكن وكلاء السيارات إذا قاطعناهم من يصرف لهم رواتبهم ومشترواتهم

وإذا شفناهم مصملين على أسعارهم ولا راح ينزلون تخفيضات بـ 50 %

نشتري من الخليج ولا من أمريكا البدائل كثيييييرة نحمد الله

[يزن2000]

والله ياخوك اليوم انا رحت لبلبيد بالمدينه وسعر التاهو الجديد عنده 204 الاف .. معقوله هالاسعار غرييييييييبه

[بو خليفه]

يزن كأن السعر مبالغ ليكون ستشتري جيب أوروبي وأنت لا تدري

[يزن2000]

يزن كأن السعر مبالغ ليكون ستشتري جيب أوروبي وأنت لا تدري



اشكرك اخوي ابو خليفه .. صدقني مرتين وانا اكرر له السعر 104 الاف والا 204 الاف قاااااااال انت ماتسمع 204 الاف ..

[الحــ سعود ــربي]

والله ياخوك اليوم انا رحت لبلبيد بالمدينه وسعر التاهو الجديد عنده 204 الاف .. معقوله هالاسعار غرييييييييبه




مستحيل هذا الكلام الا اذا كنت تقصد اليوكن الدنالي ...

اما التاهو القصير 140 الدبل وبدون دبل 130 الف

انا لي اكثر من اسبوعين كل يوم وانا بالمعارض

العرض كثير مره وفيه نزول لكن بسيط ....

[كبسولة2]

http://www.alwatan.com.sa/news/images/newsimages/2981/caricature/2711.eco.p15.n15.jpg

[بو خليفه]

كبسولة 2
جداً هذه الصورة رائعة

[كبسولة2]

http://up.graaam.com/up1/pic4/a87a390c6f.jpg

[بو خليفه]

كبسولة ذبحتنا وتبشرنا في نفس الوقت


انا منتظر الحلم عشرين هل هذه السنة سيتحقق الحلم

http://www.gulfup.com/files/jpg/3P500637.jpg (http://www.gulfup.com/)

[a.الخثلان]

حصلت يوكون أكس أل موديل 2008 وقف السوم على 90 ألف ماشي فقط 8000 الآف

وحصلت نفسه في صدمه يسام بي 85 ألف

وحصلت 2002 أو 2001 حجم 8100 يحده بي 50 ألف ماشي 44 ألف فقط سعودي باسم راعيه وكاله

=============

وحصلت شريطيه ماسكين جيوبهم على أسعار قبل شهرين يكشون الذبان كل واحد ملتوي وجهه متى يبيع

[كبسولة2]

النزول حصل بالفعل لكن نطمح للمزيد

[امدور اخطوط]

اصلا السيارات المفروض تنزل من زمان
رسايل الجوال قبل مدة كلها دعايات لشراء من قبل الشركات جتني على جوالي عدة رسايل تريدني ان اشتري منهم

يا الله ياكريم انك ترخص السيارات والاراضي

[YUKON_GMC]

السيارات اللي يحرج عليها ولاهي سيارات شريطيه رخيصه ... بس هل معناته ان راعيها يبي يبيع بنفس القيمه .!!. الجواب لا ..!!


يعني اللي لقيته يحرج عليه ب 55 اكيد راعيها ماهو بايعه دون 80 بس هذا حراج !!

لكن في اسواق القصيم بريده والرياض والدمام والمدن الكبير الحراج للخرده فقط والسيارات تسام سوم في برحه كبيره فيها مئآت السيارت طوابير ماتشوف اخرها

[سيف الظفير]

يالغالي واحد من الربع شاري جيب جكسار بـ 185.000 وباعة بـ 197.000 وكرف ابو من صنعه بالبر

[شيحاوي]

ناظروا تاريخ المشاركه يااخوان الكلام عام 2008 :)

[مواسي الطعوس]

يالغالي واحد من الربع شاري جيب جكسار بـ 185.000 وباعة بـ 197.000 وكرف ابو من صنعه بالبر
**************************************

مانكذبك ....لكن قل له رح اشتر مثله جديد ....ارتفع شوي من هنا وطارررر الجديد ...يعني ماهنا فائده .

**لكن انا اتوقع يصير فيه تخفيضات ((كبيره على التويوتا ))في رمضان .....لسد الفراغ الكبير بين ((جنرال موتورز))وتويوتا ....لان تويوتا في 2011م رايح تكون في المركز الثاني او الثالث ...وهي رايح تقلل الفارق بهذه التخفيضات .

[القحطانى1]

طاااااارت الاسعار

[ددسن 2008]

يا اخواان الموضوع له ثلااااااااااااااااااث سنواااااااااااااااات ..

الموضوع قدييييييييييييييييييييم

وما فيه شي ينزل سعره ..!!!!!

الا في حالة وحده انهم يقللون من جودة السلعه

[البعية]

السلام عليكم ورحمة الله وبركاته
فيه شاص 2006 سعودي سلق في محافظة المخواة مبيوع 105000

[يوسف عبدالله]

ضيعت وقتي بالموضوع .. على بالي جديد

وين المشرفين عن رفع مثل هذه المواضيع المرفوعه من عام 2008

[الوسمي44]

وخذ عندك
جيب ربع لاندكروزر معروض بـ110 موديل 2006
ويمكن ينباع بسرعه موب كنها غاليه شوي

[التعـ King ـديل]

الله يسمع منك وترخص المواتر ابي بطل الدورب بس سعره غالي

[محطم عنيد]

أه يامعارضنا معارض بريدة وين وزارة التجارة ولا مراقبين ولا أي شي مابي اقول واوضح

بس المووووووووووووواتر بأقيام طايرات

شف الناس ضعيفة الدخل تلقاها بالتسعين للحين ملينا نبي نركب وكاله

يالله إن تخسف بأسعار السيارتا ياحق ياكريم من دون خسارة للمؤمنين والناس اللي عندها ضمير

[محطم عنيد]

هههههههههههه الموضوع قديم يالله لاتعمينا

بس من الحرة جيت اركض هههههههههه

[YUKON_GMC]

موضوع قديم .. من عام 2008 - يغلق ويعطى صاحب الرد 49 كرت احمر لرفعه مواضيع قديمه << مشرف على غفله

[ماجد الشمال 1]

يفولون ان المرور خلاص يبون يشطبون
السيارات الي عمرها اكثرمن عشر
اعوام يعني من 1991 وتحت شطب
حتى تشليح مرح يشتريها
يعني 2005بعد كم سنة الى الكب

[فيصل التميمي]

الان السوق مبالغ فية من ناحية الاسعار اسعار مبالغ فيها
ان شاء الله تنخفض الاسعار وترجع الاسعار المعقولة
اسئل الله ان يبعد عنا الغلا والوباء والزنا والزلازل والمحن يارب العالمين
وان يصلح التجار ويكفينا شرهم