سفاري 2001 هبل فيني!!!!!

[تطعيس2009]

السلام عليكم ورحمة الله
كيفكم اخواني الأفاضل...
انشاء الله انكم مستانسين....
الزبده..
عندي سوبر سفاري موديل 2001 فيه مشكلة تنقيص مويه
دورنا على اماكن تهريب أنا والميكانيكي مالقينا ولا شي مع العلم ان الراديتر والغطاء وطرمبة المويه كلهم جديده
وزيت المكينه ماعليه اي اثر مويه!!!! طبعا القربه اعبيها كل يومين ..
والله احترت ياشباب ننتظر منكم الردود
وانا متابع الموضوع واذا انحلت المشكله بعلمكم علشان يستفيدون اصحاب النياسين

تحياتي وتقديري

[مشاغب شوي]

اتوقع اخوي عندك خرطوش فيه فتحه او شق صغير مره

يصير يبخر ماء ومايترك اي اثر .. شيك على الخراطيش كامله

والله يكون بعونك

[ابو هشام]

ما راح تشوفه مع الزيت

بس أكيد بي خش عن طريق الثلاجه للراس وينخلط مع الزيت

[جيبي جايزلي]

شيك اخوى على الخرطوش الى داخل للطبلون من المكينه وفيه خرطوش تحت الثلاجه ركز على الامرين وباالتوفيق

[نعتزبخدمتكم]

السلام عليكم ورحمه الله وبركاته

اخوي
مكشاتي


لنتبه لراديتر من جه المراوح ترا النيسان هذي مشكلته الدائمه اتوقع يكون ان المراوح ضاربه الراديتر افحص وشف اتمنا اكون خدمتك

[القصاف]

السلام عليكم ورحمة الله وبركاته
انا سيارتي باترول موديل 2000 وحصلت معي مشكلة مثلك ما اعرف الماء وين يروح خر فجأة الحرارة مرتفعه الشي هذا حصل معي بالصيف الماضي رحت للصناعية الى شباب روعه لهم خبره كبيره بالرديترات طبعا الماء الضايع ما اشوفه ما ادري وين راح بحسب خبرتهم اكتشفو الرديتر حق المكيف الحار يهرب من الداخل يكون داخل الطبلون فكانت هذه المشكله وياليت اخوي تكشف عن هذا الرديتر يمكن تنحل مشكلتك
وشكرا

[حمد808]

تاكد من قربة الماء

[طلو الشمري]

يمكن يااخي الغلاف منشق

[المميـز]

قد حصل معي تهريب

وماخليت ميكانيكي مامريته

وبالاخير طحت لي بمحل راديترات بالرس كبيــر

وفيه هندي ماشاء الله عليه لقاء مكان التهريب على طول

وهو لي جاي وارء المكينه من تحت

مكان اللي بالضبط

ماخذ لفه على عيار زيت المكينه

للمعلوميه سيارتي فتك

ولكن انا قلت لك هذا الكلام على شان تشيك على كل الليات

ولاتدور تهريب لونه أخضــــر

دور أثار باللون الأحمـــــــــــر

وعلمنا وش يصير معك ...

[الثويرات]

انا اتوقع انه من مواصير الحار الي في الغماره

ياليت ترفع الفرشه الي تحت الرجلين حقت الراكب وتشوف

[تطعيس2009]

الله يعطيكم الف عافيه قروم مكشات كفيتم ووفيتم
والعضو جيبي جايزلي ماأقدر اقولك الا بيض الله وجهك اطلعت على ردك وشيكت على السياره وفعلا طلع كلامك صحيح من راديتر المكيف الحار الي تحت الدرج ولاحظت المويه تحت الدعاسه
وطريقة الحل قالي تبدل راديتر المكيف الحار او تلغيه وانا صراحه الغيته لأني مااحتاجه ولاعمري استخدمت المكيف الحار
وتكلفة الأصلاح 35 ريال فقط

مشاغب شوي
الله يعطيك العافيه ماقصرت وكثر الله من امثالك
أبو هشام
ماقصرت اخي العزيز وشكرا على المشاركه
جيبي جايزلي
الله يعطيك الف عافيه والفضل يعود لك في حل هذي المشكله الف شكر وبيض الله وجهك
نعتز بخدمتكم
كلامك على متمه ولكن الراديتر الي عندي اخو الجديد والمشكله انحلت والحمدلله شكرا لك وبيض الله وجهك
القصاف
فعلا نفس مشكلتك بيض الله وجهك وشكرا لك
حمد808
القربه سليمه وكنت شاك فيها اول شكرا لك على المشاركه
طلو الشمري
والله مافهمت الغلاف الي تقصده على كل حال شكرا لك وماقصرت
المميز
ماقصرت اخوي المميز الف شكر لك وجمل الله حالك
الثويرات
كلام سليم وهذا الي صار لقيت المويه تحت الدعاسه لاهنت وبيض الله وجهك

الله يعطيكم الف عافيه كفيتو ووفيتو
شكرا لكم جميعا