استفسار عن ورشتين في عنيزة

[بروق A]

السلام عليكم ورحمه الله وبركاته

حيا الله هالنشاما

اخواني الافاضل لدي استفسار عن ورشتين لتصليح السيارات بعنيزه
وقد استشرت بعض الاخوة عن تصليح ضربات السياره واخبروني عنهما

وحبيت استفسر اي احسن ورشه لرش بويه للسيارات واضمن ولا تتغير مع الوقت وتكون كانها اصليه

والورشتين :
ورشة ابو فهد
ورشة الضمان

المكان صناعيه عنيزة

ارجو من تعامل معهم اخباري اي احسن ورشه واضمن
حيث ان عندي سيارة هايلوكس 2006 لون ابيض تحتاج لتعديل لون الباب فقط
وانا لست من سكان عنيزة
فلا تبخلوا علي بأستشارتكم وخبرتكم
وجزاكم الله كل خير

[alsarem]

ورشة ابو فهد انا ماشتغلت عندهم لكن شفت شغلهم دمار :no2:
لكن ورشة الضمان فأنا اشهد لهم بالشغل الزين لأني اشتغلت عندهم :good:

[أبونورة777]

صراحة .. أسمع عن ورشة أبوفهد ان شغله تمام ( فيه واحد من الشباب جرب شغلهم يمدحهم حتى ان الشريطية ما طلعو السمكرة .. على كلامه ) وكم واحد أعرفه يمدح هالورشة صراحة

أما ورشة الضمان .. صراحة أول مرة أسمع فيها

بالتوفيق

[مدمن فتك]

طيب خذ العلم مني انا مجرب كل الورشتين
الورشتين باتفاق افضل ورشتين على مستوى عنيزة
التفصيل:
1- ورشة ابو فهد:السمكرة شغله ممتاز والبويه جيد جدا والاسعار غاليه..
2_ ورشة الضمان السمكرة ممتاز والبويه ممتاز والاسعار ممتاز ..
تبي رايي رح للضمان وتوكل على الله ترا شغله خيالي ماشاء الله وخل راسم يشوف موترك تراه ريسهم واذا قال فعل ..وماترا مكروه

[ريان 0007]

السلام عليكم ورحمة الله وبركاتة
بروق A يالبي

من واقع تجربه شخصيه للورشتين طلعت بالنتائج التاليه

1 / ورشة ابو فهد إذا سيارتك تحتاج تعديل بدون رش بويه أوسمكره
رايح يعطيك نتيجه حلوه ماتتوقعه والسمكره والبويه جيده
لكن اسعاره غااااليه شوي
2 / ورشة الضمان السمكرة والبويه افضل من الوكاله واسعارهم معقوله
لكن عيبهم عندهم زحمه شوي وتتأخر السياره؛ وانا افضل الضمان.
وممكن احد من الشباب عنده رأي ثاني ويفيدك

تحياتي محبكم / ريان 0007

[أبونورة777]

ما شاء الله .. طيب يا شباب .. وين ورشة الضمان بالضبط ؟ وما فيه أرقام لهم ؟

أفيدونا مشكورين

[بروق A]

الله يعطيكم العافيه

انا مريت الضمان اليوم .. وشافو الموتر وعاينوه

وقالو بيكلفك 1200 ريال رش بوية باب ورفرف بس

مادري هل هالسعر زين ولا غالي ؟

علماً بأنه قال لي نضمنه لك ضمان 4 سنوات

انتظر ردودكم

[بروق A]

ما شاء الله .. طيب يا شباب .. وين ورشة الضمان بالضبط ؟ وما فيه أرقام لهم ؟

أفيدونا مشكورين

ابو نوره .. الورشه مكانه بصناعية عنيزه

وصفه : وانت داخل من بريده من عند طريق جامعة القصيم " مبنى جامعة الامام " .. ابتل من بعد الكبري وتتجيك كم اشاره .. تعدهن .. لين توصل اشارة دوار الساعه .. اذا وصلته رح يسار .. و ابتل .. تتجيك اشاره .. ابتل معه .. تتجيك اشاره ثانيه بس تراه توديك يسار .. انت امسك المسار اليمين لأنه مفتوح للي بيطولون قدام .. همن عقبه تتجيك زي الاشاره اللي قبله بالضبط .. طول معه .. همن عقبه تجيك اشاره عاديه .. رح يمين من عند الاشاره .. وامش شوي بيجيك مديور .. اتركه وامش بشوي بيجيك مديور ثاني .. در معه وامش شوي .. وتشوف الورشه على يمينك .. اسمه الضمان

و مااعندي لهم ارقام مع الاسف

[الكونترولCONTROL]

تعاملت مع ورشة أبو فهد في سمكرة صدمة Gxr2003 خلفية لكزس صدمة مع الشنطة و ميلان كامل للخلفية
شغلهم جيد جدا و لا يصل للممتاز
لكن عموما : (( مرضي إلى حد ما ))

[مدمن فتك]

اخوي بروق الضمان اسم على مسمى توكل على الله بس ودخل موترك

[راس عيطا]

السلام عيكم..............
اذا تبغا الشغل المظبوط وخاصه التعديل دون سمكره لاتتعدا ابو فهد ::اسعره نار بس يستاهل::
واذا ع البويه والسمكره الشباب بيفيدونك
تقبل مروري

[أبن مصاول]

موضوع يراد منه تطبيل لورشة ضد اخرى أرجو ان ينتبه المراقبون ...

[مكشات عنيزة]

لا يقربك ابو فهد

مالك الا الضمان والا الحســون ( الدولية ) وبس !

[بروق A]

موضوع يراد منه تطبيل لورشة ضد اخرى أرجو ان ينتبه المراقبون ...

مهب صحيح

واذا ماعندك إفاده على الاستفسار ..

منتب ملزوم بالرد ! :D

والمراد من الموضوع مهب كسر لسوق احد الورشتين ..

[بروق A]

مشكورين على الإفاده .. ماقصرتو

[أبونورة777]

ابن مصاول .. شكل عندك ورشة وزعلت علشان ما دخلت ضمن المنافسة !!!!


وسع صدرك يالغالي .. الموضوع للفائدة .. وش تطبيل وما تطبيل ؟؟


ألف شكر لصاحب الموضوع والإخوان الكرام .. فعلاً استفدت منكم كنت مفكر ورشة أبوفهد أفضل ورشة بعنيزة أو بالقصيم بشكل عام
لكن صارت معلومات قديمة .. ويبدو أن ورشة الضمان صارت هي الأفضل .. على ذمة الشباب


الله يوفق الجميع لكل خير


وشكر خاص للأخ بروق .. ما قصرت يالغالي

[عنيزة]

على حسب علمي ان الحسون افضل ورشه

من زمان عنهم لكن اذكر شغلهم ممتاز جداً

[مدمن فتك]

اخوي عنيزة كلامك سليم الحسون افضل ورشه بعنيزة قديما لكن الان غير عماله
ومن تجربه الضمان الاول
وابو فهد ثانيا

[بروق A]

جزاكم الله خير وماقصرتو

[aljde40]

الله يعينك

[رزيم الرعد]

بصراحه أنا ماتعاملت معهم..

بس يمدحون أبو فهد..

[najm]

يالطيب انا لي خبرة كبيررررة في ورش السمكرة لاني دائماً اجيب سيارات واضبطهم

وجربت اغلبهم


الضمان أفضل من ابو فهد

وفيه حالياً ورشة معطيهم موتر يرشونه بالكامل والصراحة شغلهم مهوب طبيعي ماتوقعتهم ورخيص مرررره

رش لي جيب باترول بوية فرن بالكامل مع احراق البوية السابقة 2500 ريال مع الضمان لمدة طويلة

اسم الورشة المميز

[بروق A]

مشكورين يالنشاما .. ماقصرتو

[الكشات]

انا ما جربت الورشتين لاكن مجرب الحسون وهي(الدولية) وشغلهم جدا ممتاز ونصيحه لك قبل ماتتفق مع اي ورشه رح شييك على شغلهم بالورشه وقارن واختر الافضل
ملاحظه : الدولية يوجد له عدة فروع بصناعية عنيزة.
اتمنى ان اكون افدتك

[بروق A]

مشكور اخوي

بس الحسون شغله شين من تالي .. مب مثل منول يعني

[مدمن فتك]

للحق الحسون من زمان مامثله ابد اما الان شغله تغير ..
ابو فهد سمكرته زينه والبويه يعني حليوة واسعاره صلخ شوي..
الضمان سمكره ممتازه وبويته وكاله واسعاره حلوة ..