مشكلة في مكينة الباث فيندر

[سلطا ن]

السلام عليكم
ياشباب انا مشكلتي راح احكيها من اول إلى النهايه
شريت سياره من الكويت الي هي باث فيندر وماشالله السياره من اروع ما يكون رجعت عليها خط ولا لاحظت عليها اي شي ودخلت عليها البر وطعست فيها ماشالله من اروع مايكون يوم كملت السياره اسبوع او اكثر شوي وانا امشي انفقعت المكينه علماً ان الزيت كويس وماء الراديتر زين وكل شي اوكيه وطلعت انواع المسامير من تحت السياره والبساتم لدرجة ان السياره الي وراي تكسر قزازها وتمخش الكبوت حقها وبعد السالفه الطويله وش رايكم وش الافضل المكينه اليابانيه او المكينه السعوديه حقت شد البلد موديل السياره 2003 وقوة الماكينه 3500
السعوديه تقريباً11000 بالتشليح
والياباني 8000 مركبه وعليها ضمان شهر
وش رايكم من ناحية القطع مستقبلاً هل هي نفس القطع ولا
ونأسف على الاطاله
ونستودعكم الله

[أبو فهد11]

هذه مشكله في جميع شيارات الباث فيندر

وهذه مسامير الثلاجه طاحت في البستم وخبط الموتر عليك

الله يكون في عونك وييسر امرك

لكن بالنسبة لأنواع المكائن مالي والله خبر

وإن شاء الله الشباب يفيدونك

[سلطا ن]

هلا ابوفهد11
شكرك لمرورك وتعليقك
مسامير الثلاجه فاكها ملغيها نهائياً
يوم طلعت المعيار حق الزيت بعد التكسير حصلته متعفط

[الدين النصيحة]

وعليكم السلام

شكله عين والعين حق.

[AZOO9Z]

و عليكم السلام

الله أعلم مثل ما قال أخوي الدين النصيحة :عين و العين حق

و بالنسبة لليابانية ما أدري وشي ما أعرفها بس الأضمن حقة الوكالة

و الله ييسر أمورك و أول ما تشتري مكينة نصيحة أقر عليها وبالتوفيق .

[abo_7md]

السلام عليكم والله يعووضك خييييييييير ..


انا انصح بتوضيب مكينتك احسن واذا ما قدرت ركب مكينه وارد السعوديه واااابعد عن الياباني لانها حظوظ اما انها تكون شي خيالي ولا موضبه اي كلام والخيار لك ..


والله يوفقك .....

[خلفهم]

معوض خير إن شاء الله ,,

لكن ما أنصحك بالياباني ,, بعدين ليش السعودي بـ 11000 أمس جالس مع أحد الورش يقول بـ 8 راكبه جاهزه ( الظاهر إني فهمتها كذا وأتوقع إنها صحيحه) الورشه بالرياض ,,

[سلطا ن]

نشكركم على مروركم جميعاً
وماقصرتوا ياشباب

ياخلفهم وين موقع الورشه اارسلي رقم الجوال انا في الرياض

[ابولورانس]

اخوي سلطان

تصدق اني اليوم با الدوام اسولف مع واحد من الشباب ويقولي انه شرا باثفيندر من الكويت

وصاااارت له نفس حكايتك وركب له من التشليح مكينه ب14بس يقوووول نضيفه

السؤال هنا هالحين انت وها الرجال سياراتكم من الكويت وكلهن طقن مكاينهن

لايصيرن بس مغشوشات ولا شئ

ترا كل شئ جائز

وعلى الفكره الرجال ترا يقول اخذ المكينه من تشليح العجلان با القصيم

تحياتي

[سلطا ن]

والله ماادري بس يوم اجيبها من الكويت فاحصها كمبيوتر وما حصلة فيها شي
وماشالله نظيفه 100%
نقول الحمدالله على كل حال
ومشكورين على مروركم

[خلفهم]

أبوي سلطان وصلك الرقم ,,

[سلطا ن]

الله يعطيك الف عاااافيه

[ابودعسان]

الله والعالم انه عين والله يعوضك
اذكر واحد من الشباب كان معه كامري جديده يقول جلست عند ناس مشهورين بالعين
وكنت توي مطلع الموتر وبكم شريته وش هاللون الغريب ومن هالسوالف يقول نغزني قلبي ومشيت من عندهم
مسك الخط وبعد 10 دقايق طلع البستم من عند الكارتير
بس كانت على الضمان

الله يكفينا وياكم شر العين

[عاشق البسمه]

الله يعوضك خير وشف لك سعودي من التشليح على نظرك أزين لك

[النوفي 3535]

اخوي العزيز
السعودي افضل لان الياباني يختلف بالقطع وشي ثاني مسامير البوابة ياناس والله مهم ركبة
هو الي مايضر بالماكينة
وش ثاني انتبه من الشكمان احتمال يسوي المشكلة
لانه عيب ثاني للباثفيندر

[ابراهيم2008]

عين ما صلت على النبي
لا حول ولا قوة الا بالله

[HaLaTeK]

اخوي سلطان ارجو اضافتي ماسنجر انا حصلي نفس مشكلتك وهذا ايميلي واعلمك شتسوي halatek-@hotmail.com