نسوان بالبر .. هذا كلامهن عن الكشتات!

[حفرلوجيا]

سلام يالربع
في إستطلاع نشرته جريدة الجزيرة لمراسلتها بعنيزة فوزية النعيم كان موضوعه ( راي النساء المتنزهات في البر .. ومالذي يرغبهن بالبر أو يشدهن حيث الترحال نهاية الإسبوع للصحراء ) ..
بعض النساء أتين بكلام ( حلو ) .. معه قد تسأل هل هذا ( طفرة البر ) هذه السنة ؟ أم أن الصحراء بدأت تجذب نساء المدن ؟ أو هو غيرة وإتجاه لمواكبة ( من فتن الأزواج ) .. او ... أو
أو أن العملية قد تكون فذلكة ( فبركة صحفية ) لإستقراء مايجول بأذهان النساء حيال الصحراء والكشتات ..
إليكم مقتطفات مما جاء ( على لسان ) بعضهن في إستطلاع الجريدة :

لولوة بنت عثمان: انني أجد في جلسة المخيم حول النار متعة لا اجدها في المدينة طوال العام.:good:

نورة بنت عبدالله: إن مشاغل الحياة أرغمتنا على عدم القدرة على صلة الرحم وزيارة الأقارب، والحقيقة ان الذي نعجز عنه في المدينة رغم تقارب المساكن نحققه في هذا المخيم.:(

أمل العبدالله: انني أحب طلعة البر بالذات لأن ليس فيها قيود بل حرية مطلقة، نستطيع ان نمشي في الفضاء دون مضايقات، ويمكننا أن نقود السيارة والدراجات النارية حول المخيم ونستمتع بالأجواء الجميلة والمناظر الرائعة.:mad:

هدى الحسين: نرغب أن نعيش حياة البدو بما فيها من مشقة وتعب .:p


موضي العلي: اقضي في المخيم أجمل أوقاتي التي استمتع بها واحب ان ابذل مجهودا كبيرا حتى اشعر بحياة البدو وحياة الأجداد التي ليست فيها راحة، ولكنها حياة سعيدة قبل أن تفسدها المدنية والتكنولوجيا. :good:

سعاد العبد الرحمن: الحياة البادية مذاق جميل ورائع، ولكن للأسف أنا دائماً اضطر للعودة في المساء إلى المنزل لانني أخاف البر في الليل، وأيضا نسمع عن تسكع الشباب بين المخيمات ليلاً، الأمر الذي يجعلني حذرة جداً وأخاف على ابنائي . :good::good:


نوال العيسى: المخيمات هذا العام مختلفة تماما، ففيها أنشطة كثيرة وخدمات تقدم للمتنزهين وإمكانيات هائلة . :rolleyes::rolleyes:

الإستطلاع تجده على عنوان :

خلال إجازات نهاية الأسبوع وفي أجواء ربيعية
أطفال ونساء يهجرون المدن ويتجهون إلى الصحراء
النساء: في البر نبحث عن التغيير بعيداً عن صخب الحضارة ورفاهيتها (http://www.al-jazirah.com.sa/620393/th2d.htm)
وسلامتكم

[ابو ايمن]

تسلم اخوي حفر لوجيا ..

الحقيقة انهم معذورين في كلامهم .

ياليت يكون فيه فرص أكبر للعيش في البر والمعاناة التي عاناها اجدادنا . .

تحياتـــي وشكرا لك .

[صقر]

اخوي حفرلوجيا مشكور على هالمقال

اجل بعد الربيع نتوقع زيادة في عدد اعضاء مكشات من الجنس الناعم وربما صار لدينا خيمة جديدة بعنوان (هموم المكشاتيات) :D

قد تكون مستحيلة أو بعيدة حاليا ولكن عش رجبا ترى عجبا.

بارك الله فيك...

[راع الكحيلة]

أحداهن
:D :D ((نرغب أن نعيش حياة البدو بما فيها من مشقة وتعب )):D :D

أتمنى أن يعيدوا المقابلة مع أول هبة سموم ولفحة لواهيب ...وعبير الكوووح:p

[مراكي الذيب]

السلام عليكم ورحمة الله وبركاته


والله ماشاء الله عليك ياخوي حفرلوجيا حتى الجنس الناعم اعطيتهم حقهم , لاكن لايهمونك مثل ماقال اخوي راعي كحيله لاهب السموم طلعت علومهم .

ودك تطلعهم بالكنه اللي البعيريدور حذيان من الرمضى , وبعدين تسألهم هذا اذا هم حيين!!!

[خشم الحصان]

الغالي ابو سليمان
سلمه الله من كل مكروه
السلام عليكم
اخوي هالمره ودي ازنطك انت يومك كل يوم نقز في وجيهنا بشي جديد مره يفرح ومره يضيق الصدر
الحين وش درا الحريم عن مكشات الا من لعلعك في هالمنتدي وصفك لهالبر لين دخل في روسن الطلعه
الي البر معاد فيه حريم مثل قبل الي تصر وتحلب وتخض والي تحطب والي تذبح والي تصلخ الي شفتها منول تقول عن عشرة رجاجيل الحين من زينهن وهن في البيت الي جابت لك طوفرية القهوه ولها ملينه من القهوه من رفالتهن تقول قضبها كهرب مغير ترجرج وتنافض تعال ناقش كلامهن بركاده.
1- تقول اني اجد المتعه حول النار في المخيم ركز مخيم يعني لو ترقاء في السطح وتشب نار اريح لها ليش لئن المخيم مثل البيت كلش موجود حتي دقة عبد الغني شربة يعني الخدمات الاندنوسيات وانت رايح بالله هذي كشته تسميها وزود علي الغنج في الممشي تخيل الي طاحت بارض كلها قطب اقول لاتشمة الناس فينا خلنا مستورين الله يرحم اميمك بالجنه.
2-خذ نقدي الحين مازارت الاقارب في المدينه تبي تزور في البر يعني تخيل وين راح هالعقيل مانيب اقول خل اقليب وغطاه.
3- هذا وهو توه بلح اجل وش بسوي اذا صلح من هالحين قيود وش دعوا الي بسمعهم يقول طاقين عليهم شينكو وخافسين بدريل خفيس علشان يتهايقون معه ولا نبي نسوق تخيل مغرزه او طايحه في طين ولا دباب صحروي و مرتك من السرعه كنها مقابلتك يعني وششش وهالذيابه جالسه بدربيلها ترقب اي وحده تطيح وهي بعيده عن اهلها ونتمشي في الفضاء الله وكبر يامركبة ابولو 11 الحين مابزينكم في الارض نبزاكم في الفضاء
اقول الركاده زينه يابو سليمان
4- ايه هين حياة البدو حياة البدو ماتبي كعب عالي و اصبع تقول مخالب طير من طول الاضافر وثياب مصرصره ومشقشقه مع الجنوب تقول ستاره مهجوجه الله يكافينا الشر
5-الاجداد الله يرحمهم برحمته راحو ماتبي راحه متي يقومن من النوم علشان يعيشن حياة الاجداد والحياة خربتها المدنيه لا والله الي مخربها الشخري الي الساعه وحده وانت رايح اما حفر لوجيا صحيح هو الي مخرب...اثرها تقول تكنالوجيا
6-ندري ان البر له حياة خاصه وجميله بس يبي صبر
7- وين هالخدمات قالو صفو صفين قالو كلبونا اثنين مغير محافضتين او ثلاث او اربع بس وين الباقي نايمين
هم يبون شاليهات . مهوب بر الي حنا خابرينه.
اقول ابو سليمان الله يغفرلك لو كل من جا ونجر مضل في الوادي شجر
الا ابنشدك الحين يدينهم مليانه شطرطونات جروح وهن يهذن بصل ان كانن يهذن اجل اذا امشقن من البرد او يحطبآ وش بيصيرن صنفره اقول فكنا الله يرحم والديك
اخوك
خشم الحصان
:mad: :mad:

[البراوي]

مشكور ويعطيك العافية

بس اكيد هذا كلامهن

موضوع مفيد وجدا قيم

الله يسلمك

البراوي

[عاشقة البر]

والله موضوع روووعه

والحريم عندهن حق بصراحه



اقول

خشم الحصان

وش بك على الجنس اللطيف ؟؟ :(


تحياتي

[عاشقة البر]

خشم الحصان


تراني رجعت كلامك مره ثانيه

بصراحه

عندك حق في مجمل كلامك

لكن

اصابع ايديك ماهي مثل بعض

انا عن نفسي بدويه حتى الثماله رغم شهادتي الجامعيه

لكن لو تشوفني بالبر تقول هذي ما عمرها عاشت بالمدينه

وترا اختلاف الرأي لا يفسد للود قضيه وانا اختك :)

تحياتي

[tabrak]

موضوع رائع وإستطلاع يستحق منا كل إحترام لأنه يوضح وجهة نظر فئه من الناس حول موضوع معين
اخي خشم الحصان ذكرت الأخت عاشقة البر في ردها الأخير أنه عندك حق في مجمل كلامك وان اصابع يدك
ماهي مثل بعض وهذا كلام جميل ولكن سؤالي أوجه لك هل ماذكرت ينطبق على الرجال ام لا ؟


تحياتي / ابو فهد

[راعي الطويلة]

الغالي

حفرلوجيا

وأنا أخوك لو ما أمي حببتني بالبر كان تلقاني بشارع التحلية ...

خل النسوان يتعلمن على علوم البر ويرمن بالسلاح ويسوقن السيارات ويحببون عيالنا في هالشي اللي ما بقى لنا غيره واذا ما أنت مصدق تعال شوف مخططات الأستراحات وشلون صايرة ...

سلمت يداك على كل ما تخطه أناملك ..

يأخي تراك مبدع (( من وين تجيب هالمواضيع السنعه )) ....... ؟؟؟

تعيش وتكتب غيرها ...;)

أخوك


راعي الطويلة

[عبدالعزيز الدباسي]

بما ان الشباب لهم ميولات متعددة ،،، مثل ما انت تحب البر والطلعات وملاحق القميري ، اكيد ان بعض زملائك ينقدون عليك ولا عمرهم تعدوا الاستراحات

واكيد ان ذولا فاقدين النعمة والاحساس اللي انت تعيشها وتعايشها .

اقول بما انه فيه شباب من هالنوعيات ،،، اكيد فيه بنات حلال يحبن البر و ودهن يطلعن كل اسبوع ويحبن التمشي بالفياض والشعبان ، ويحبن الجمعة مع الاقارب والاصدقاء .

وما فيه شى يمنع ان النساء يطلعن للبر ، ويعشقن الصحراء ، ويستمتعن بما حباه الله من جمال الطبيعة وصفاء الجو .

والحياة مختلفة الحين عن منول حتى مع طلعات الشباب تلقى الاحتياجات اختلفت والاغراض تطورت ، وما يمنع ان النساء يطلعن لمخيمات متكاملة وفيها من الرفاهية ما يكفي لراحتها ، المهم هو الخروج عن صخب الديرة وعوار الراس وهموم العمل ،، والتجديد في الروتين اليومي للعائلة .

[عريدان]

السلام عليكم ورحمة الله وبركاته
يإبن الحلال من ذا اللي يقول خلهن يرمون بالسلاح ومأدري أيش "كمان".
أولاً الله يحي الجميع والبر بر رب العالمين ما هو وقف لأحد.
ثانياً الدعوى ما هيب شينه ليتهم يصملون على حب البر و"المزيون" بس على ما قالو الاخوان إضمنها ربيع ومحل صيف وشتاء.
ثالثاً تكفى لا يرمون على الأقل هالحين لين الفشق بيصيرسعره نار وتلقى بعضه بتطريز وشك وبعضه على تفته جاكار وما إلى ذلك لا وفي محلات مثل صحاري وإلا الاندلس. همن فكنا إلى قالت أبي فشق شوزن من دابن هامز.