حل لمشكلة الجمس

[ابومحمد808]

السلام عليكم
اخواني انا اول مشاركة لي واجو منكم المساعدة

انا عندي جمس 2002 بكب امريكي كنت كاشت وكنت مشغل الدبل على الخفيف وبعد مارجعت من البر جيت ابطفي الدبل علق
وإلى الان معلق الدبل وقهر يجماعه العيد جاي وابكشت

الفزززززززززززعه

[alfajeralb3ee]

جرب تفصل فيوز الدبل يمكن يمشي الحال

[كاتم الشكوى]

بسيطة وأنا أخوك
عشق الريوس وأدعس على البانزين عدة مرات والسيارة تمشي بالريوس حتى تسمع تقريبا
طقة وهي صوت الدبل عندما يفصل
وخذها قاعدة
الأمريكي لازم وضروري تسوي هالحركة حتى يتم فصل الدبل بصورة صحيحة وسليمة ِ

[escape_man]

وتأكد ايضا انه العطل مو التماس باللمبة فقط

اعكف الطارة وامش وتاكد ان الدبل فعلا شغال ولا انها اللمبة ملتمية فقط

[ابومحمد808]

اخوي متاكد بان الدبل مافصل اللمبات كلها طافيه الا إذا شبكت الثقيل تولع اللمبه الو الدفع الرباعي


اخواني الدبل ازرار

[ابوسعودد]

اعتقد لو تفصل سلك البطاريه

[ابومحمد808]

فاصل البطارية ولا نفع نفس المشكلة

[العملاق النائم]

ابو محمد
هل يشبك على الثقيل اذا ضغطة عليه!

[ابومحمد808]

لا مايشبك الثقيل

[العملاق النائم]

ماودي اقولك ان الدينمو الي يغير نمرات الدبل من خفيف وثقيل و واتوا و يفصله! ....(خربان :(
لكنه شغلك خفيفة ... رح لاتشليح خذلك هالدينمو وركبه ...ترى شغلك ما تاكل ولا ساعتين اما السعر والله ما ادري.

[بنزرت]

سلام
خل السياره طافيه والمفتاح برا السوتش
ثم حط اصبعك على زر H2 وخلك ضاغط عليه ثم ادخل المفتاح وادر السوتش لحد مايولع اللمبات دون ان تشغل السيار وانتظر وانت ضاغط راح تنحل معك المشكله مباشره

[بنزرت]

على فكره اذا كانت اللمبات كلها طافيه فمعناه ان فيه لمبه حمرا والعه وهي لمبه النيوترال
وهذا معناه ان ماعندك مشكله
بعد ماتطفي وتشغل عده مرات راح تنحل المشكله
لكن خلها قاعده
لاتشبك او تفصل الدبل سوار الكبير او الصغير الا وانت واقف والقير على الوضع N

[دهران]

بسم الله الرحمن الرحيم

الأخ الغالي / ابومحمد808

الدبل زين ولا هو معلق ولا شي بس عساك ما مشيت عليه كثير وهو معشق (( واحد بيحسفك :j ))

شف يا طويل العمر رح لموترك وشغله وعشق (( دي )) وأمش لك شوي ..... بعدين يا طويل العمر وقف ..... حرك القير من (( دي )) إلى (( إن )) ...... إربط الجلنط ...... إفصل الدبل والقير فاضي يعني إضغط على (( H2 )) على ما أعتقد ..... رايح يعشق الدبل عندك ويضرب ضربة مسموعة وقوية شوي تؤكد لك إن الدبل تم فصله ...
أتمنى أن تنجح هذه الطريقة .

وعلمنا تكفى بأسرع وقت .

[لن أمل من العطاء]

اذا تم ادارة المفتاح على وضع التشغيل

واشتغلت جميع اللمبات بما فيها اللمبه الحمراء

فانه لا يوجد عندك اي مشكله باي دينمو ولاشيء

لانه عند بداية التشغيل تقوم السيارة بفحص نظام الدفع الرباعي والايه بي اس وحساسات المكينه كلهت واي عطل يظهر عند الفحص تبقى اللمبه المعنيه شغاله

[ابومحمد808]

اخوي السيارة اضغط h2 وبعدين يطلع صوت مرتين يكرر الصوت بعدين يروح الصوت بس الدبل معشق وسويت كل الي تقولون ولا نفع ودي ياجماعه اكشت تكفون

[ابومحمد808]

الصوت طبعا بالعمود حق الدبل

[yfd]

طيب اكشت والدبل معشق.. لازم تطفيه وتغرز ههههههههههههههههههه...
افحص كمبيوتر بــ100ريال وتعرف البلى وتزينه وتريح عمرك ..
ومن عيوب الدبل الازرار هذا العيب ..

[ابومحمد808]

الله يعطيكم العافية اخواني
ابشركم انحلت المشكلة والحل = بعد الكشف بالكمبيوتر طلع الخراب دنمو الدبل
وصلحته والحمد لله انحلت المشكلة
وسعر الدنمو لوحده 1950
والشكر للجميع