بوادر ظهور الفقع بمحافظة الدوادمي يبشر بالخير لهذا اليوم 16-12 من اخوكم مطارد البروق [الأرشيف]

مشاهدة النسخة كاملة : بوادر ظهور الفقع بمحافظة الدوادمي يبشر بالخير لهذا اليوم 16-12 من اخوكم مطارد البروق

مطارد البروق

13/12/2008, 07:59 PM

السلام عليكم ورحمة الله وبركاتة
مساكم الله بالخير جميع ياخواني الاعضاء والضيوف وبارك الله فيكم اينما كنتم جميعا ,,
اليوم قمت برحلة استكشافية لمنابت الفقع القريبة جدا من محافظة الدوادمي وماء شاء الله الربيع يسر العين ويبهج الخاطر مع العلم ان الباذر الى الان وهو يخرج من الارض سبحان الله والارض الى الان والثرى قريب جدا جد تقريبا 5 سم تحت الارض ,, والرقروق منتشر جدا في اماكن منابت الفقع والعرجون بكثرة جداجدا والله لو تبي تملا صندوق صابون في اقل من ساعة لان العرجون عندنا بالدودامي ماعلية اقبال :p والعرض اكثر من الطلب :D :) ;) ,, بس ارض الدوادمي يبيلها وقت علشان تشوف الربيع على اصولة المهم خرجت بعد العصر تقريبا الساعة الرابعة وخرجت لكم باهذة الفقعتين وهي كبر ابو ليمون ابو ازهيرة او اصغر بقليل بس يبيلة تقريبا اسبوعين وتلقونة كبر اليوسف فندي بس لاتستعجلون علية ياهل الدوادمي انا والله مالقط اكثر من هالثنتين ولو بغيت كان جبت لكم كيلو فقع في ظرف ساعة ونصف بس اصبروا علية اسبوعين وبتشوفون اللي يسركم لاتستعجلون علية انا حبيت ابشركم ياهل الدوادمي ببوادر الفقع في محافظة الدوادمي واماكنة كثير جدا وقريبة بعد ,,, وسلامتكم اليكم ثلاث صور لفقع هذا اليوم السبت الموافق 16-12- 1429 واعذرونة على التصوير لانة من جوال ,,
الصورة الاولى
http://up109.arabsh.com/s/cf06ksarm7.jpg (http://up109.arabsh.com/s/cf06ksarm7.jpg)
الصورة الثانية
http://up109.arabsh.com/s/u6f7t3x8xa.jpg (http://up109.arabsh.com/s/u6f7t3x8xa.jpg)
الصورة الاخيرة
الفقع مع ابنيتي الله يحرسها وان شاء الله تتطلع اخير من ابوها في مطاردة البروق مولع جدا في المطر والبر والربيع الله يصلحها
http://up109.arabsh.com/s/xp9woe2150.jpg (http://up109.arabsh.com/s/xp9woe2150.jpg)

وتقبلوا مني اجمل وافضل تحية وتقدير من اخوكم ومحبكم دائما ابونواف

بن معدل

13/12/2008, 08:19 PM

الله يبشرك بالخير

abnbtota

13/12/2008, 08:29 PM

عنبري

13/12/2008, 08:33 PM

مشكووووووور واقصرت
لي 3 ايام احلم بالفقع وانا نايم

مطارد البروق

13/12/2008, 10:13 PM

الله يبشرك بالخير

حبيت والله اشكرك ياخي الغالي على مرورك وبيض الله وجهك

الهمرق

13/12/2008, 10:19 PM

الله يبشرك بالخير ....

ويخليلك هالنشمية ....

وعلى العموم ...
تراها محجوزة ........ هاه وشقلت .......

النوخذة الأحسائي

13/12/2008, 10:20 PM

يالله لك الحمد والشكر .. وتسلم يالدوادماي

ثعل البرد

13/12/2008, 10:44 PM

الله يبشرك بالخير ويجزاك كل خير

ما قصرت يا أبو نواف

عوايدك طال عمرك .. ما تجيب ألا العلوم السنعة التي تشرح البال

والله يخلي لك بنيتك ويسترها ويصلحها

الرس الوهيبي

13/12/2008, 10:48 PM

الله يبشرك بالخير :D

ضحية بيشة

13/12/2008, 10:50 PM

;كل عام وانت بخير يابو نواف والله يبشرك بالخير دوم ...وانا والله دورته قبل يومين

بذبحه واللي حولها وماحصلته والله يجيب الخير...

المعدال

13/12/2008, 10:51 PM

الله يعطيك العافية ما غريبة على ارض الدوادمي مصيف اهل نجد

سحابة بردية

13/12/2008, 10:59 PM

الله يبشرك بالخير ويجزاك كل خير
ما قصرت يا أبونواف

راعي الحزم

13/12/2008, 11:04 PM

هلا والله بابو نواف ابو البشائر والعلوم الغانمة وكل عام وأنت بخير
يمال العافية والله كفو يالذئب
الله يصلحلك بينتك ويخليها لك يارب ويرزقك برها وتربي عيالها على يدينك
وماشاء الله منطقتكم جميلة جدا وسايله سيل غزير الله يطرحبه البركه

روثان

13/12/2008, 11:10 PM

السلام عليكم..

الله يعطيك العافية أخوي مطارد البروق

أن شاء الله الخير يزيد وتشوف الكثير

الله يحفظلك الذرية

الطرفاوي@

13/12/2008, 11:10 PM

الله يبشرك بالخير والله يكثره خلنا نشبع منه

مخايل الخيال

13/12/2008, 11:15 PM

شكرا ابونواف يامل العافيه الله يبشرك بالجنه الله يرزقه برجوع الي تخليه كبر روس البل قول أمين

جواثا

13/12/2008, 11:15 PM

الصورة الاولى

الفقع مع ابنيتي الله يحرصها وان شاء الله تتطلع اخير من ابوها في مطاردة البروق مولع جدا في المطر والبر والربيع الله يصلحها
http://up109.arabsh.com/s/xp9woe2150.jpg (http://up109.arabsh.com/s/xp9woe2150.jpg)

وتقبلوا مني اجمل وافضل تحية وتقدير من اخوكم ومحبكم دائما ابونواف

السلام عليكم

بسم الله ماشاء الله جعل ربي يخلي لك هالمهره المبروكه ويطرح فيها البركه لكم ان شاء الله
انا عندي سؤال اخوي مطارد البروق
معروف انه من العلامات الداله لوجود الفقع شجره الرقروق واعتقد مايختلف عليها اثنين لكن هل العرجون كذلك من الحاجات الداله على ان الارض يوجد فيها فقع

وتقبل تحياتي

ريف النشاما

13/12/2008, 11:20 PM

مشكور أخي مطارد الفقع ككككك

والله يصلح الكتكوته الصغيرة ويخليها لك ويحفظها من كل سوء

بس أشوف حوسه بآخر المشب كككككككك:)

راعي باروود

13/12/2008, 11:25 PM

الله يبشرك بالخير
والله يخلي لك بنيتك
ويسترها ويصلحها

عزوا

13/12/2008, 11:33 PM

الله يبشرك بالخير
ويخليلك بنيك

سرا

13/12/2008, 11:35 PM

تكفى يامطارد البروق مين باالضبط ولانيب معلم احد

مطارد البروق

13/12/2008, 11:55 PM

الله يبشرك بالخير

اخي خير مافعلت واذا حبيت جرب تربي فقع :D !!
( هذا طير ماهو فقع :p !!! )
ابد اعلمك ..
اذا لقيت فقعه وصغيره .. انصحك تذريها .. وخذ لك رشاش الماء كالذي يستخدم للنباتات الصغيرة
مثل هذا
http://www.uvprocess.com/products/Inkhan/Containers/CONTAINR%20G_J001034A_prosafe_spray_bottle_WebPic1 .jpg

واعمل دائره على موضع الفقعه .. بمايقارب 10سم .. ورش الماء خفيف رذاذ ( عذب ) .. كل 3ايام .. بعد شهر حتشوف نتيجه حلوه :good:

هلا والله وغلا باخوي الغالي وشرفني مرورك ومدخلتك الجميلة والحلوة بنفس الوقت ,,, والله ياخوي الفكرة ماهيب شينة ولا تكلف على الواحد وانا كل يوم بهالمنطقة بس اخاف اربية على قولتك :p واسقية ليت تكبر وتنضج صح ويجيك واحد ويلقطها:( :mad: وبعد\ين اقول ياشين الطمع شينها والنتيجة تصير على النحو التالي
مطارد البروق + يسقية كل ثلاثة ايام +لمدة شهر = يلقطها واحد باردة مبردة

برق المدى

14/12/2008, 02:21 AM

علومك غانمه يابو نواف
ليتك تعلمنا وين بالضبط

عازمين على كشته يمكم

الله يعطيك العافيه

خفجاوي 22

14/12/2008, 02:29 AM

بارك الله فيك

وبشرك الله بلخير

التريبي

14/12/2008, 02:37 AM

ما شاء الله تبارك الله

الله يبشرك بالخير

والله يخليلك بنيتك ويستر عليها

الفقع كنه زبيدي ولا لا ...

المغرز

14/12/2008, 06:34 AM

بشرى خير وماقصرت
والله يجيب الخير
بس وين الموقع
بتحديد لووووووسمحت
مشكوووووووووور
على الصوووور الجميله
تحياتي

دوادماوي

14/12/2008, 08:10 AM

بيض الله وجهك يا ابو نواف ..

بس يبيله كم اسبوع ويستاهل من يلقطه ..

شفنا لنا كم وحده حول الدوادمي .. بس تركناها .. لصغر حجمها ..

على العموم ما قصرت يا أبو نواف ..

تحياتي لك ..

سوسة حطب

14/12/2008, 08:13 AM

أبشر بالخير إن شاء الله

عدوان البري

14/12/2008, 08:51 AM

الله يبشرك بالخير
الله يخليها لك انشالله وتشوفها عروس

ماجد 2003

14/12/2008, 09:35 AM

الله يبشرك بالجنه
لاكن اعتقد انه يبي له اكثر من اسبوعين حيث ان اول مطر نزل كان في بدايه شهر ذي القعدة
والفقع كما هو متفق عليه من كبار السن يبيله حوالي التسعين ليله

رحال عمان

14/12/2008, 09:36 AM

أريد أحد يرشدني للفجع عندنا في عمان ...... أظن موجود بكثرة ولكن الإقبال عليه قليل

كلي عشانك

14/12/2008, 09:57 AM

الله يجيب الفقع ويعطيك العافيه

تحياتي,,,

مطارد البروق

14/12/2008, 12:06 PM

السلام عليكم

بسم الله ماشاء الله جعل ربي يخلي لك هالمهره المبروكه ويطرح فيها البركه لكم ان شاء الله
انا عندي سؤال اخوي مطارد البروق
معروف انه من العلامات الداله لوجود الفقع شجره الرقروق واعتقد مايختلف عليها اثنين لكن هل العرجون كذلك من الحاجات الداله على ان الارض يوجد فيها فقع

وتقبل تحياتي

هلا والله وغلا باخوي الغالي جوانا اشكرك ياخي الكريم على مرورك كما اشكرك على دعواتك يالغالي وبيض الله وجهك ,,, بالنسبة لسؤالك هل العرجون يدل على ان الارض فية فقع ,, العرجون ينبت في وقتين ينبت فيهما الوسم والعقارب ,, وليس لة علا قة بظهور الفقع والله اعلم هذا ما اعرفة والبركة في اخوننا الاعضاء اذا كانت لهما اجابة ثانية وسلامتك ياخي الغالي

سيف الجواء

14/12/2008, 12:28 PM

بارك الله فيك

والله يجب المطر اللي يخفيه شوي وتشوف الفقع

ومشكور على هالصور

F A H A D

14/12/2008, 12:35 PM

بارك الله فيك مطارد البروق ... وبيض الله وجهك

فكره اخونا .... abnbtota تستحق الاهتام فكره جديده ....

دغــ أبومحمد ــيم

14/12/2008, 04:44 PM

ماشاء الله
يملى العافيه

القاريء

14/12/2008, 05:04 PM

الله يبشرك بالخير

سلمت يمينك

الطرفيه

14/12/2008, 08:27 PM

مشكور يابو نواف على الصور الي تفتح النفس وقل امين أن شاء تلقاهن مصاليع:d

الطرفيه

14/12/2008, 08:32 PM

الله يبشرك بالخير يابو نواف وأن شاء تلقاههن مصاليع :d

الطرفيه

14/12/2008, 08:45 PM

كتبت ونسيت أذكر اسم الله أن شاء الله تلقاهن مصاليع ودي المشرف يعدل المشاركة بمشاركه واحده :)

abnbtota

14/12/2008, 09:05 PM

هلا والله وغلا باخوي الغالي وشرفني مرورك ومدخلتك الجميلة والحلوة بنفس ,,, والله ياخوي الفكرة ماهيب شينة ولا تكلف على الواحد وانا كل يوم بهالمنطقة بس اخاف اربية على قولتك :p واسقية ليت تكبر وتنضج صح ويجيك واحد ويلقطها:( :mad: وبعد\ين اقول ياشين الطمع شينها والنتيجة تصير على النحو التالي

مطارد البروق + يسقية كل ثلاثة ايام +لمدة شهر = يلقطها واحد باردة مبردة

اضحك الله سنك .. والله مشكلة :D ، لكن وانا اخوك اذا بتربي فقع لازم تبرقعها :p ، اقصد لازم تكون في مكان غير متوقع ويصعب اكتشافها ولذا ذكرت لك لابد ان تذريها وتخفي معالم تشقق التربه بالتوفيق الدنيا تجارب:)

بارك الله فيك مطارد البروق ... وبيض الله وجهك

فكره اخونا .... abnbtota تستحق الاهتمام فكره جديده ....

مشكور اخي بارك الله فيك ، انا جربتها ولها نتائج لابأس فيها لان الاساس الصعوبه في زراعة الفقع ولكن عمليه رعايتها سهلة وكما ذكرتها

الصمان 2

14/12/2008, 09:06 PM

الله يبشرك بالخير

ويصلح لك النية و الذرية .

شعيب مرخ

14/12/2008, 09:49 PM

يعطيك العافية اخوي مطارد بس على حسب ما وصلني من بعض كبار السن ان هذا مو فقع فهو من عرض الفطريات الموجوده في هذا الفصل

تحياتي للجميع

برق المخايل

14/12/2008, 10:01 PM

ماشاء الله لا اله الا الله
مبروك عليكم هالخير والله يحفظ بنتك ويصلحها ويستر عليها امين
وليتكم تصبرون شوي على الفقع
حتى تصير كبر الكف واكبر
وليتك تحط لنا مكان العراجين وين قسم احلم بها واللي حول الرياض صار من صيد امس
الف شكر لك اخوي

ولهان الصمان

14/12/2008, 10:06 PM

بارك الله فيك والله يبشرك بالجنة ويصلح لك ذريتك قل آمين

تفضل الأحداثيات
http://www.joreyat.org/file/pkfv7spxv9zq

ولهان الصمان

مسلهم في سحاب

14/12/2008, 10:09 PM

السلام عليكم
تقبل الله منا ومنكم وكل عام انتم بخير
مشكور على التقرير ، ومواري طيبه لموسم ربيع مميز
بس شكل الفقع غريب شوي اللي بالصورة؟
مدري مسوي له تنظيف؟

تسلم يابو نواف وننتظر جديدك

bndr

14/12/2008, 10:11 PM

ما شاء الله

يمدحون وضاخ ما ادري عندك علم عنها

العتيبي 88

14/12/2008, 10:13 PM

الله يجزاك خير

دغيم1

14/12/2008, 10:25 PM

السلام عليكم ورحمة الله وبركاته
يعطيك العافية أخي الكريم
أبو نواف
وكل عام وانتم بخير
ماشاء الله
مواري خير الله يتبعه بالحيا
والله يصلح لك النية والذرية
سلمت يمينك على الصور
تقبل تحياتي

سوبر152

14/12/2008, 10:39 PM

الله يبشرك بالخير ....

ويخليلك هالنشمية ....

وعلى العموم ...
تراها محجوزة ........ هاه وشقلت .......

أبوعمر السليطي

14/12/2008, 10:42 PM

بسم الله الرحمن الرحيم

الله يعافيك يا ابو نواف
دائما علومك غانمة
وبشرى خير ان شاء الله
والله يخليلك بنتك ويصلحه
بس سؤال بسيط
وين الصورة اللي فوق البيعة:d

تحياتي لك

ابراهيم2008

14/12/2008, 11:58 PM

الله يعطيك الف عافية

العابر سبيل2

15/12/2008, 09:25 AM

شكرا لك من الاعماق على هذا الخبر الذي سرنا جميعا حفظك الله وحفظ لك المحروسة اللي حملت الفقع بيديها الصغيره وتقول شوفوا وش جاب ابــــــوي لنا رعاك اللــــــــــــــــــــــــــــه

alsat3

15/12/2008, 09:27 AM

مشكور أخي مطارد

والله يصلح لك الصغيرة ويخليها لك ويحفظها من كل سوء

لك تقديري

مطارد البروق

15/12/2008, 06:51 PM

السلام عليكم ورحمة الله وبركاتة
اليوم قمت برحلة خفافية او تفريكة من الدوام :p :D ;) سويعة من الزمان والقصد امنا البحث عن الفقع في اماكن اعرفها متفرقة :D وبعد مضي تقريبا ربع ساعة من البحث وجد وحدة تكفي عن شهر امسوية بركان حول نفسها :)والله ياني فرحت يوم شفتها كبيرة جدا
شاهدواالصورة قولوا ماء شاء الله اولاhttp://up109.arabsh.com/s/dozffei00l.jpg (http://up109.arabsh.com/s/dozffei00l.jpg)
صدق لاتصدق ازبيدية وبهالكبر مهوب معقول لية ماهو معقول الله قادر سبحانة
وش رايكم باهذة الغنيمة لهذا اليوم

مطارد البروق

15/12/2008, 06:58 PM

السلام عليكم ورحمة الله وبركاتة

اليوم قمت برحلة خفافية او تفريكة من الدوام :p ;) سويعة من الزمان والقصد امنا البحث عن الفقع في اماكن اعرفها متفرقة :D وبعد مضي تقريبا ربع ساعة من البحث وجد وحدة تكفي عن شهر امسوية بركان حول نفسها والله ياني فرحت يوم شفتها كبيرة جدا
شاهدواالصورة قولوا ماء شاء الله اولاhttp://up109.arabsh.com/s/dozffei00l.jpg (http://up109.arabsh.com/s/dozffei00l.jpg)
صدق لاتصدق ازبيدية وبهالكبر مهوب معقول لية ماهو معقول الله قادر سبحانة

وش رايكم باهذة الغنيمة لهذا اليوم

بس للاسف يافرحة ماتمت :( :mad: طلع عرجون حسبي الله ونعم الوكيل ومعليش ياخوان على هذة الشطحة شطحة ومقلب اكلتة اليوم وقلت لازم تشاركونني المقلب :p :D :) ;)

النهرالعذوب

15/12/2008, 07:52 PM

هلا اخوي
علمنا وين لقيتها فيه بالضبط
نروح ندوره
لاني انا من اهالي الشعراء القريبه منكم
واتمني اني التقط ولو واحده
يعطيك العافيه

abumashal

15/12/2008, 08:14 PM

الله يبشرك با الخير
علومك دايم طيبه

هاوي بر12

15/12/2008, 08:24 PM

بارك الله فيكم..؛؛؛؛؛