من عنده خبره بالطراريد ( أبغى أستشيركم في واحد )

[الصياد الكبير]

بسم الله الرحمن الرحيم

السلام عليكم ورحمة الله وبركاته

شمسوين أنشاءلله بخير

خلني أدش في السالفه

أخوي يبغى يأخذ له طراد مستعمل بحاله جيده نفس هذا النوع 17 قدم يبغاه لل حداق وقط الغزول (شباك الصيد)

الطراد مع تيدر( بألف ريال) بياخذ الطراد من صديق له

بدون مكينه

يقولون المكينه اللى تصلح حق هذا الطراد 150 حصان ؟

وش رايكم فيه يخذه أحسن ولا يدورله أحسن من هذا

http://www.haddag.com/boat%20pic/7.jpg

http://www.haddag.com/boat%20pic/6.jpg

واللى عنده خبره فيهم لايبخل علينا


والسلام عليكم ورحمه الله وبركاته

[غواص الخليج]

نصيحتي خليه يأخذ الطراد و اذا يبي اعطيه رقم رجال بالبحرين يجيبله مكينة مستعمله اخت الجديدة يجي و يركبها عنده بالسعودية و الطراد هاذا برأي تصلحة مكينة من 85 حصان الي 150 حصان:good:

[Dr_daase]

بسم الله الرحمن الرحيم

السلام عليكم ورحمة الله وبركاته

اخي الكريم نصيحتي لك انة يتأكد من ان الطراد ليس بة عيب مصنعي خلية يسئل صاحبة عن سبب البيع البعض يكون امين ويقول الحقيقة و البعض مخادع فخلية يسئل صاحب الطراد عن مديل الطراد ومصنعة و بلد الصنع ومن ثم يسئل اهل الخبرة بالطرادات ارجو لك التوفيق

ولا تنسانا دز هامور بس
:D :D

[gulfhunter]

بسم الله الرحمن الرحيم

أخوي الصياد الكبير... المفروض ناخذ منك النصايح موا العكس.......

الطراد ممتاز لكن مايصلح لك.....

غواص الخليج الطراد يحتاج مكينه كبيره من 115 الى 150حصان

بالنسبه للحداق متعب جداُ يمكن واحد الي يقدر يحدق في الطراد.. لا ومتعب نفسه........

أما بالنسبه للغزوال ..لاتعب نفسك مايصلح....

اذا معزم على طراد ..... تبيه للحداق والغزوال ...... عليك بالهامور..... راح يعجبك .... وزنه خفيف ... أفضل في الموج.....

واذا محتاج مساعده ... موجدين في الخدمه...

[الملثم]

حيا الله الصياد الكبير

وينك مابينت من زمان الله يسامحك :)

شف هذا الطراد صناعة امريكية وهو جيد فيبره قوي( لكن حق الغزول السطحة أحسن ) هذا حق تمشي ويصلح حق حداق بس يرضخ في الموج بعدين ماهوب رقاي يعني يلحم على السيف وثقيل ماتقدر تنزله إلا من منزل يعني انسى تنزله من السيف يمكن يصلح حق حداق سيلين لأنهم بيسمحون بالطراريد قريب وإذا أسمحوا أبشر والله بالصيد شرط أن ثلاجة جاركم السابع مايمرعليها أسبوع بدون لا تطرش لهم سمك .

أما سعره تراه أرخيص إذا كان الفيبر صاحي ترى التيدر بس إذا كان غلفنايز يسوى له ألف وأكثر إذا كان مستعمل وصاحي

أخاف شاريه رفيق أخوك من الخفر لأنهم بيعوا مثل هاذي الطراريد ب200 و 300

عموما خل ياخذه أخوك وأنا باخذه منه إذا ما كان مال الخفر 1500 بعد المعاينة إذا ناسب العرض الله ليهينك أطلع على الرسايل الخاصة

[الصياد الكبير]

السلام عليكم ورحمة الله وبركاته

والله ماتوقعت هالتفاعل



أخويDr_daase الطراد اللى أنشالله بياخذه بياخذه من واحد يعرفه زين وهذا مايستعمل الطراد من زمان على ما أظن
وعلى قولك خله يتأكد أن الطراد ليس بة عيب مصنعي .... كيف يعني عيب مصنعى ؟
وباخليه يسأل أنشالله عن الموديل والنوع الخ ,,,, ومشكور أخوي وماتقصر




وعلى كلامك يا جولف هنتر, وين أنا دجه في الطراريد والبحر ماتشوفني أسألكم عنهم !!
أما عن المكينه أنشالله بتنحل المشكله ماعليكم !! :D ومشكور يا صياد الخليج


الملثم : ياخي شاسوي مشغول ،،، لاتصدق

وماظن بيبيعه لك ;) ;) :D :D !!

ومشكور على المعلومات القيمه

:D :D

وين العمده بوراشد ؟

[gulfhunter]

السلام عليكم ورحمة الله وبركاته

على فكره الطراد مسكت لكن المشكله انه مايصلح للصيد ...... أو الغزوال .......

[Dr_daase]

اخي الصياد الكبير

السلام عليكم ورحمة الله وبركاته

ما اعنية بالعيب المصنعي هو ان بعض قولب الصب بها عيب بالتصميم و يجنح ال قارب على جنب ( إذا اسرعت بة وقابلتك موجة ممكن تشوف نفسك في الماء و القارب في جهة اخرى في لمح البصر) و المشكلة الأخرى انة لايمكن اصلاحة وهذى المشكلة حدثت لي عندما عزمت شراء قارب من انتاج الدوسري في الخبر و كان نضيف و سعرة مغري جداً فعندما سئلت أول شيئ قيل لي سعرة رخيص وش المشكلة فبعد التحري وتدسيم شارب الهندي في محل الدوسري اتضح لي انة به عيب في القالب الذي صنع بة ولكم جزيل الشكر

[الملثم]

الأخ الكريم Dr_daase وفقه الله

مثل ماقلت وهنا يقولون : يصبو وبعضهم يقولون يشوح بس ترى للمعلومة هذا تقدر تعرفه بنظرة واحدة أسفل الطراد ، وعلى فكرة يتصلح .

إذا شفت البيص ( وسط الطراد من تحت ) مثل رقم 7 في زاويه كثيره الأنفراج إلى نصف الطراد أو أكثر من نصف الطراد ثم أنتهى الأنفراج واصبح البيص مستقيم فهذا هو اللي وصى عليه الطبيب يعني ممكن يشوح ويقطك في البحر وصارت حق واحد من الربع في 17 قدم رافكو

إذا شفت البيص أكثر من متوسط الأنفراج إلى أكثر من نصف الطراد ثم صار البيص مستقيم أو شبه مستقيم
هذا ما يشوح لاكن مشكلته يرضخ لأن آخر الطراد يكفخ الموج مثل لو ضربت الموج بوجه كفك وأحيانا حجم المكينة تخلي الطراد يرضخ ، وإذا كنت مركب مكينتين أحيانا بعدهم عن بعض إذا كان غير مناسب يأثر على سرعة ورضخة الطراد ( رضخة الطراد ممكن التخلص منها ) المهم .

إذاشفت البيص أكثر من متوسط الأنفراج إلى أكثر من نصف الطراد ثم صار البيص منفرج فهذا إن شاء الله ما يشووووووووح ولايرضخ مثل ما تضرب البحر بعرض كفك .

تبقى عندك مشكله الراش الماء الداخل من البحر واحد من الأخوان مدح الهامور أقول الهامور القديم حجم23 القديم يدخل الراش من راس الطراد لين السواق سنتر سبحان الله شي عجيب ويرضخ رضخ الله المستعان ومشكله الراش تنحل وممكن من النظرة تعرف الطراد يدخل راش ولا لا .

فيه مشكله خطيرة جدا تلقاها في الطراد دبي كرفت 31 قدم إذا كاسرت الموج ( يعني وجه لوجه ) الطراد يدم
يعني يحول وجه الطراد في البحر شكله يبي يغوص هذه أخطر وأعوص مشكله

أنا من رأيي نجعل مشاركة مزايا وعيوب الطراد اللتي ممكن تتعرف عليها بمجرد النظر ( وتبقى تجربه الطراد هي الحكم ) بعدين لكل استخدام شي أنا مشكلتي ما أعرف على الفوتوشب ولا رسمت الملاحظات السابقة .

هذا الطراد اللي حاطة أخونا الصياد الكبير يرضخ بسبب ثقله وتنحل مشكله الرضخ

أنصحك يالصياد الكبير إذا خذته ركب له مكينة 115 أو 140 حصان ولا ترضى بغير الياماها 4 سلندر واقتصاديه وبتمشيه ولا أنت بتحس في الرضخة وخلك من 150 -- 6 سلنر تصرف أكثر وبتخليه يرضخ أكثر

تحياتي للجميع وإذا أحد عنده تعقيب يتفضل

[Bo Rashed]

السلام عليكم ورحمة الله وبركاته
اخوي الصياد الكبير

بصراحه ما انصحك بمثل هالطراد والسبب الرضخ في الموج وحتى اذا سمرت او قطيت السن بتلقاه يهتز واجد ويميل
والمكان اللي متوفر لك ضيق وما راح تقدر تحدق على راحتك او تقط غزول
لكن بالمقارنه بالسعر فهو رخيص ويستاهل اكثر لكن لا تنسى قيمة المكينة اللي لازم تاخذها وانا انصحك انك ما تكبر حجم المكينة لانها كل ما كبرت كل ما زادت صرفية البنزين.
وانصح بطراريد صبة الروضان من الكويت من احسن انواع الطراريد

وفقكم الله
تحياتي

[gulfhunter]

السلام عليكم ورحمة الله وبركاته

اخوي الصياد الكبير انصحك بطراد الظاعن ... البحرين... مقارنه مع الروضان من الكويت ......

الظاعن أفضل .( لتجربه شخصيه).... عليك ب 24 الظاعن والله مافي أحسن منه ...... صبه جديده لا ومجربين الطراد....

وأتمنى لك التوفيق...