إلي خبراء السفر بالسيارة ... الرجاء المساعده

[call9k2shr]

السلام عليكم ورحمة الله وبركاته

أنا ناوي أسفار بالسياره ( لأول مره ) إلى عدة مناطق بالسعودية لمدة أسبوع ...

وأرجو من الشباب الى عنده خبره في السفر بالسياره أفادتي بالمستلزمات

والأغراض المهمه إلى أحطها معى بالسياره .. ؟؟؟ أو الامور الى أعملها قبل

السفر .

( والسياره لاندكروز موديل 99 )

ولكم جزيل الشكر

أرجو أنكم تفيدونى أفادكم الله ..

[عبلاوي]

وعليكم السلام ورحمة الله وبركاته

ان شاء الله الأخوان مايقصرون معك ..
بس ليتك وضحت لهم , وش طبيعة السفر ... هي للمدن بس ,,, والا برية ... لوحدك والا معك عائلة
..هل فعلا أول مرة تسافر , والا لك خبرة ولو قليلة
يعني هل سبق أن جربت السفر والقيادة على الخط والا لا ؟
فصّل للاخوان وهم ان شاء الله مايقصرون !
اللي أقدر أقوله لك التوكل على الله ثم التشييك على السيارة
والكفرات أهم شئ .. الأنوار .. المساحات مهمة جدا هالفترة وخذ أصلي .. ملابس شتوية .. بشت .. فروة ... فراش نوم ..كشاف يدوي .. شاحن الجوال .. العزبة والزهاب .. تحديد خط الاتجاه ومعرفة المسافات ,غير ذلك كثير
الاخوان أصحاب الخبرة ان شاء الله يكملون الباقي

وتسافر وترجع بالسلامة في رعاية الكريم !

[راعي البحري]

حدد خطة السير وحبذا حمل الخريطة إذا ما عندك قارمن
سيدي قرآن ومصحف صغبر
في الشتاء السفر في النهار والصيف السفر في الليل
سيارتك جديدة ماشاء الله فقط وزن الكفرات وغيار الزيت
حقيبة صغيرة تحتوي بنادول للكبار والصغارولزاق جروح وشاش ورباط ضاغط وأشياء اخرى
ثلاجة تحفظ فيها المشروبات
ماء كافي للرحلة
سجادة رحلات حسب العدد
(تمر) مهم جدا جدا
أكل في حافظة أنظف من مطاعم الطريق ساندويتشات أو غيره حسب مزاجك
إن ضاقت السيارة بعفشك ركب هوك خلفي أحسن من الحمل أعلى السيارة
وشكرا

[call9k2shr]

مشكورين يا ( عبلاوي _ راعي البحري ) على الرد

طبيعة الرحله مع العائلة ... وتتضمن عدة مناطق في السعودية ( أبها - الطائف - جده - مكه - المدينه )

[غالي]

الادعيه
كفرات جديده
فحص كهرباء البطاريه
لتشييك على الزيوت (قير-مكينه)
كشف على البواجي
ضغط الهواء بالكفرات المناسب للشتاء والبراد

ولاتنسى ماطور الهواء للكفرات
تأكد من العفريته انها ترفع السياره ((بعض الناس ترفع الياي او غيرها ثم ماتكفي العفريته رفع الموتر)
التشييك على المساحات لانها مواسم امطار
ووضع على وجه السياره الماده المناسبه ((وفيه الكثير ولا لي خبره انا الا بالفيري :) ))
وضع مبلغ من المال مناسب للطريق لاسمح الله
دامك عائله انا انصحك بالتظليل كامل حتى باب السائق والي جنبه لو كانت خفيفه ((بعد الله أمن من الي بنفسه شر+ ممكن للنوم))
لاتنسى الاسعافات الاوليه لو كانت شنطه صغيره ممكن تحصلها بالصيدليات
اذا قدرت تشتري فيوز لنوع سيارتك وتحطها معك احتياط

اسف على الاطاله واتمنى لكم الستر والتوفيق والسعاده
وتروحون وترجعون بالف سلامه بإذن الله

والله الله بعدم السرعه

مو خوف عليك فقط

تذكر ان معك ارواح في رقبتك :)

ولاتسوق اذا حسيت بالنعاس ولاتكابر
موفق

[يوكون2003]

أخوي أولا السلام عليكم ورحمة الله وبركاته
ثانيا من المستلزمات لرحله
غيار زيت السياره قير مكينه
التشييك على السياره كامله
حمل حقيبة أسعافات أوليه
التاكد من أن الكفر السبير في حاله جيده
عدم المخاطره في الطري وسلك أفضل الطرق وأن كانة بعيده
عدم السرعه لان ماوراك شي وأنت تقول رايح تتمشى
إذا كانت العائله أكثر من 10أفراد يفضل أذا كان لك أبن كبير السفر بسيارتين
دعاء السفر
أخذ شرطان أناشيد أو قرأن على حسب ماتسمع علشان ماتنام

[جيبي جايزلي]

السلام عليكم ورحمه الله وبركاته
انا عندي اضافه بسيطه والاخوان ما قصرو كفو ووفو والاضافه فحص سيورالمكينه وخراطيش الماء وبالتوفيق للجميع

[call9k2shr]

مشكورين يا أخوان على الردود ... وماقصرتو

[قلم آخر]

ما شاء الله على الأخوان ما خلو لنا شيء :d

وأكد على أنك تأخذ قسط من الراحة قبل السفر .
عندك فكرة عن حالة الطريق مزدوج أو سيد واحد - هل فيه خدمات محطات مثلا
أشوف سيارك الله يجعلا لك مباركة 99 وأكيد أخذت فكره عن خراباتها فخذ لك العدة اللي تتوقع إنك تحتاجها
إذا مريت على لوحة فيه رقم سطحه لا تتركها إلا وانت مسجلها فقد تحتاجها وتفك لك أزمة كبيرة
خذ لأطفالك ما يسليهم من العاب أو مسابقات وإن تيسر سيديات أفلام كرتون جميلة جداً
ولك : شريط ، مكسرات عند إحساسك بالإرهاق
ولا تتناول من أطعمة المطاعم في المحطات فجربت كما جرب الكثير غير مناسبة اللي في الرياض فكيف بها


يسر الله أمرك وهون عليك مشقة الرحلة وآآآآآسف على الإطاااالة:d

[bewildered]

مرحبا اخوى
ممكن اتكلم شوى لوسمحت
بخصوص التجهزات للسفر
انا براى ان الان الوضع تغير يعنى
بالسابق لما تحتاج تسافر لزم تكمل جميع التجهزات قبل السفر والسبب
لعدم توفر الميتلزمات عند حاجتها
واما فى زمان الحالى الوضع تغير
يعنى لو تمر اصغر بقاله تجد اهم المستلزمات التى قد تحتاجها فى وقت معين
وكلامى هذا لايعنى ان تهمل الاشياء الضروريه بالعكس ولكن
لاتجعل من الامر صعوبه وخصوصا انك تنتقل بطرق معبده اى بين مدن ليس رحله برية
والمهم توكل على الله والامور تتسهل ولاتعقد الامور والتقنية سهلة الامور

اسف على الاطاله ولكن اردة ان اقول مالدى من واقع تجربة
واتمنى لك التوفيق

[زميل الكل]

جزكم الله خير ماقصرتوا لكن انا احب اضيف حاجة خذ مفتاح اسبير للسيارة علشان لو انسرقت السيارة لين معك السبير امزااااااااح .
علشان لو ضاع المفتاح لاقدر الله .
تروحون وتراجعون بسلامة .

[.أبوعبدالرحمن]

1\ كفرات جديدة
2\ مساحات جديدة
3\ الاستبنة تكون جيدة
4\ التشيك على الزيوت بشمل عام ( الفرامل - القير - الدفرنس - المكينة )
5\ ماطور هوا
6\ سير للمكينة
7\ اسلاك اشتراك
8\ شيك على البطارية وخصوصا حنا في فصل الشتاء والبطارية تخرب بسرعة
9\ شنطة صغيرة اسعافات اولية وخصوصا ان معك عايلة
10\ علبة زيت كاملة للمكينة يعني لو نقصت تزيدها
11\ شيك على موية الرديتر
12\ مساحات جديدة
13\ الانوار بشكل عام ( الشمعات الامامية - الاشارات - انور الاسطبات - انوار الفرامل )


وان شاء الله الباقي قالوه الاخوان

والله يمتعك برحلتك ويحفظكم ويرعاكم