دعوة للنقاش : هل تؤيدون صيانة السيارة في الوكالة ام لا ؟؟؟؟

[ابو شقط]

السلااااام عليكم جميعا اخواني :

وش رايكم : هل تؤيدون الصيانة الدورية للسيارة الجديدة في الوكالة ام لا ؟؟؟؟؟؟؟؟

نبي خبراتكم وتجاربكم ، وانا عن نفسي وديت اليوكون 2008 مرة وحدة عند 1000 كم

فقط ، وبعدها ماطبيت عليهم :j:j:j والسلام عليكم

[سطام vip]

والله من كثر المشاكل الي نسمعها من الوكالات

صراحه الواحد يسوي صيانه برا احسن

بس المشكله في الضمان والا الواحد ما وده يطب عليهم ابد

للمعلوميه اغلب الوكالات للاسف صاروا ما يعرفون مشاكل سياراتهم

يعني مثلهم مثل اي ورشه خارجيه

هذا ما عندي وباختصار

وتقبل مروري والرد

دمت بخير

[أبو دعث]

اخي الكريم/ابو شقط ولا يهونون الاعضاء والزوار اغلب الوكالات يحددون الصيانه بلفلاتروالزيوت
لاوحسوبه عليك بعد الخمسة الاف واذاكنت ممن يلتزمون بالصياته ومواعيدها /مجرب/
تحياتي

[أبو دعث]

تصحيح/محسوبهعليك يعني تدفع قيمته

[مروووق]

انا عن نفسي اشتريت صني وكالة عام 2003. و الى يومك والحمدالله ماشاء الله تبارك الله مامريتهم ولا ادري عنهم. غير زيت و فلتر برا مع ورش نظيفة و خلاص

والحمدالله قبل 6 شهور عتقت الصني وشريت تريل بليزر 2008 وماشاء الله تبارك الله ما طبيت التوكيلات بعدها. غير زيت مع ورشه نضيف والفلتر أغيره مع كل 3 مرات مره. علشان ما تتآكل السنه حقته.

الوكالة ياما سمعت سوالف يسرقون لك الدينمو ولا الكمبرسر ولا شي ماتدري عنه وتبداء المعاناه بعد شهرين ولا ثلاثه. اتقي شرهم وافتك. وهذا نصيحه شخص قالها لي يشتغل وسطهم

والحمدالله دام السيارة جديدة ماعتقد راح تطلع لك فيها مشاكل الا بعد 4 ولا 5 سنوات. هذيك الفترة راح يكون الضمان خلص من زمان

لان اذا حسبتها ، لما توصل السيارة 60 ولا 100 الف ( حسب الضمان ) راح تكون مرت 4 ولا 5 سنوات. وهذا هو وقت الصيانه الفعلي. و في نظري الشخصي حرام ادفع على كل زيارة 500 ولا 600 ريال وانا عارف بس راح يغيرون لي زيت ،،، ولا تدري هل هو اصلي ولا زيت طبخ !!! لانهم مايخلونك تدخل الورشه

هذا رأيي وادري الكثير يعارضوني :)

[لن أمل من العطاء]

لا شك ان الشخص اذا يعرف باساسيات السيارة والاعطال وكيفة اصلاحها فذلك افضل من الوكالة

السبب الوحيد الي يجعلك ذهب للوكالة هو الضمان فقط
وصيانة الوكالة مثل تويوتا هي تغيير الزيت والفلتر لديهم كل 5000 كم ويقولون 5000 عليك و5000 علينا نصب في نصب

[بلاتين]

على حسب السياره اذا كان تيوتا معليش سوي صيانه متقطعه الى 60 الف
حتى تستفيد من الضمان .

اما غير التيوتا سوي الصيانه برا احسن لك لان كل الوكلات تتاخر وغاليه على غير سنع يدخلون السياره غير زيت فلتر تشحيم كلها شغل بنشري يسويها .

اذا صار عندك مشكله ولا شي يغير كامل القطع جديده وهي تقدر تصلها بربع القيمه .

[escape_man]

مكسيما 99 قعدت معي 7 سنوات ولا عمره ميكنيكي حط يده عليها

كل شغلي بالوكالة .. خويي معه نفس الموتر وصيانته خارج الوكالة

وبعنا الموترين وكانت الاولى شبه جديدة الي هي موتري والثانية فيها

اعطال مو بسيطة ..

الان معي باث 2005 وكل 40000 بالوكالة

ماني بصف الوكالة لاني اعتبرهم ناس استغلاليين ولاقدمو خدمة لشعبهم مقابل صمت الحكومة عنهم

لكن اقول ان زيارة الوكالة فيها فايدتين :

صيانة وقائية ( الوقاية خير من العلاج ) احيانا يخبرونك انه فيه سير هريان او ثقالته فيها تآكل او عكس يهرب وخلافه ..

ثانيا .. ماعندنا ورش صاحية وانا عندي قاعدة تخصهم .. المسمار الي يفكه ابو هنود ولا بنقا .. والله مايرجع لسابقه لو تطير ..

هذول يديهم نجسة الله لايربح من اقترح جيبتهم لهالديرة

[AbuAli444]

السلام عليكم ورحمة الله وبركاته

أنا طلقت صيانة الوكالة بالثلاث ... ( توكيلات الجزيرة ( فورد )) ...

طبعاً بحسب تجربتي الشخصية معهم ...

قلة خبرة ونصب ... عيني عينك ... وما عمري دخلت السيارة للصيانة الدورية إلا سببولي مشكلة ... ويوم أروح لأي ورشة أكتشف أنهم ما عملوا للسيارة شي !!!!! وكل ما أقول لهم عن شي بالسيارة يقولون من المصنع ...

ومرة مشكلة صوت غريب بالسيارة ماعرفوا لها ... كل ما جاء فني قال ما أدري ... طلعت منهم ورحت للبيت وفتحت كبوت السيارة وشغلتها ... وقعدت ألاحق الصوت لين لقيت المشكلة ... مسمار صغير جوا المكينة لأحد المراوح ما ربط زين ... وهو اللي مسبب الإزعاج ... !!!!! ومن هالمشكلة إستنتجت إن الوكالة ما يبغون يشتغلووووووون ... يعني يبغون يغيرون زيت وبس ...

حسبي الله عليهم ونعم الوكيل ...

[رجل كريم]

افضل الصيانة خارج الوكالة لاكثر من سبب ..

[الفاضي020]

ولله انا انصح انك اتروح للوكاله للـ 5000 و الـ 10000 بعدين انس الوكالة

[غالي]

أخوي

سياره عن سياره تفرق

فيه سيارات كثير خراباتها وفيه سيارات ماشاء الله مثل الاند الربع والشاص مثلا ليس به تقنيه والقير والمكينه نفس المكاين من سنين

هذي السيارات لو اطلعها ممكن ممكن مااروح الوكاله

اما باقي السيارات ياخوي وخصوصا هالعشر السنوات الاخيره

مافيه سياره مااشتكى منها واحد
ياعيب تصنيعي او خبط عليه القير في 30الف كم او 40الف كم او صوت طقه بالدفرنس

ساعتها لاقدر الله لو خرب عليك ورحت لورشه برا غير الوكاله وقالولك تكلف مايقارب 18 الف

والله ان تطق يد على يد من الحسافه

وتقول ليتني دفعت للوكاله 400 ريال او اقل في الصيانه الدوريه والي ماتتعدى مايقارب 3000 ريال جميعها
ويصلحون هالمصيبه الي ب18 الف


انا انصح اي اخو لي يطلع سياره من الوكاله

لايترك الصيانه الدوريه نصيحه

ممكن يطلع لك خراب فادح يكلف حتى 40 الف او 60 الف ريال ((كمبيوتر او غيره في السيارات الفخمه))
هذي نصيحتي

خصوصا انت اخوي صاحب الموضوع

اليوكون يبيله صيانه خصوصا ان خبرتهم فيه قليله للورش الي برا

زياده على ذلك

صناعة سيارتك مامر عليها سنتين بالشكل الجديد

يعني ممكن يطلع لك عيب تصنيعي

ذيك الساعه لاقدر الله تطقك الحسوفه

الله يستر علينا وعليك يارب

[القناص]

السلام عليكم

على الاقل ودها للوكالة كل 20-40-60الف وهكذا
خصوصا اذا ما بغيت اعطال مفاجئة ووجع راس.

لان القطع لها عمر افتراضي يجب تغييرها عنده
هذا بالاضافة الى التحديثات اللي تجي من المصنع وتسوى للسيارات احيانا بدون ما يخطر العميل لانها جزء من الضمان..

فاذا صرت راعي سفر وبر فانصحك بالصيانة الدورية الوقائية.
لان درهم وقاية خير من قنطار علاج.

مثلا قير الباترول التماتيك ب 22الف ريال جديد وزيته خاص ما يباع الا في وكالات نيسان.. ويجي بعض الشباب ويغيرونه بزيوت جير عادية.. مما يسبب ضعف وتعطل القير التبترونيك..

وصيانة الوكالة فقط تعاير وتزيد زيت القير ولا يغير الا في حالة التوظيب.. وهذا الشي ما عرفته الا من مهندس الوكالة.

والله خير حافظ

[برادو]

السلام عليكم

شدني الموضوع لأهميته.

أغلب الناس تسوي تشييك على سياراتها بالوكاله كل 5000 كيلو من زود الحرص ولا الومهم السياره بفلوس ماطلعت الا من تعب ويبون يحافظون عليها. وجهة نظري ان السياره ماتبي صيانه الا كل 40000 كيلو والدليل كتلوج السياره اللي فيه كل شي عن السياره ومواعيد تغيير القطع وبناء على هذا الضمان ما ينلغي الا اذا ماسويت الصيانه الرئيسيه كل 40000 كيلو وحيث أن أغلب الوكالات ضمانها 60000 كيلو يعني انت منت مارهم الا مره وحده بعد ال 1000 كيلو.

الصيانه مصدر دخل قوي جدا للوكاله لذلك هم يشددون على نقطة إلغاء الضمان ويمسكون الناس بها كل 5000 كيلو ويمصعون الناس بما لا يقل عن 500 ريال مقابل أشياء ما تكلف 120 ريال.

[قلم آخر]

ما يلزم صاحب السيارة بالوكالة إلا إستمرار الضمان وإلا الفنيين عندهم نفس الفنينين اللي برى
عندي في السيارة فكو الفحمات الأمامية وسو لها صنفرة واشوفها قبل الصنفرة احسن
أما اللي وراء فكسروها عند الفك وغيرتها على حسابي بعد أن استنفذت السبل في تغييرها على حسابهم
ومن يومها ما طيبت وكالتهم :mad:

آآآسف على الإطالة

[ابوريناد1979]

لاتروح للوكالة الا التشييك حق 1000 كيلو بس... عشانه بلاش بعد ولو أنه بفلوس مارحت لهم .
لأنك لوتجمع الفلوس اللي تدفعها للوكاله بالصيانات الدورية ، راح تصلح موترك لو خرب بعدين وزياده
وبالنسبه للصيانه الدورية انا اسويها بنفسي وهي مكتوبه بكتالوج السياره للي يبي يتأكد

[samfj40]

يالربع للمعلوميه اي وكاله ملزمه باصلاح السياره بالمجان في حالة وجود خلل مصنعي ومن يقراكتالوج السياره الجديده يجد ان المصنع وضع ارقام تليفونات وايميلات وفاكس قسم خدمة العملاء لتلقي اي شكوى.لذلك من لديه خبره بالصيانه الخفيفه للسياره لايحتاج الى تضييع فلوسه واهدار وقته بالذهاب للوكاله مالم يكون الخلل كبير لانه للاءسف عمال ومهندسين معظم وكالات السيارات عندنا من نوعيه قليلة المعرفه ويخربون اكثر مما يصلحون لافرق بينهم وبين عمال ورش محطات البنزين.هناك بعض الورش المعروفه تحت ملكية وادارة سعوديين تستاهل من يروح لهم ويعرض عليهم مشكلة سيارته اما البقيه فهم يتعلمون ويسرقون من السيارات ويخربون.ماحك جلدك مثل ظفرك فتول انت جميع امرك. وفق الله الجميع.

[ابو شقط]

:):):):):)السلام عليكم : مشكورين اخواني على مروركم وتفاعلكم مع الموضوع ، وعسى الجميع يستفيد من هالموضوع وشكرا لكم

[Ababidoo]

لي تجربتين متباعدتين زمنياً مع وكالة تويوتا ووكالة نيسان ... وقد تعلمت من التجربتين أن ذهابي بالسيارة للوكالة يعتبر خطاء بل جريمة بحق سيارتي.....

[محمد بن سعيد]

الافضل الصيانة في الوكالة لماذا ؟
لأن الوكالة إذا قعدت عنهم 20000 الف ما جيتهم وحصلت لك مشكلة في السيارة قالو أنت لك ثلاثة تشيكات ما جيت هذا اللي يرد به عليك الموظف يعني ما أدري وش اقول لكن خلها على ربك والله ان هالسيارات شقى