يا اهل مكشات ابي رايكم في رفع الباث

[.أبوعبدالرحمن]

بسم الله الرحمن الرحيم


السلام عليكم ورحمة الله وبركاته



اخواني الغالين


ابي شوركم في رفع الباث حقي لاني لاحظت ذا اليومين انه قام يحك الكفر من قدام

اذا لفيت الطارة ومن اول ما يحك الا شيء بسيط والان صار يحك بشكل واضح

علما اني مغير الكفرات وحاط حقت البرادو واتوقع ان الحك هذا من نزول السيارة من قدام

ورحت يم ميزان المجد وقالي عادي ارفع السيارة من قدام وورا 2.5 سم بكعكات المنيوم لكن

المشكلة تكلفتها غالية شوي لانه يقول بـ 700 ريال والسيارة لازم تقعد يوم كامل وهذا الشيء صعب

علي وان رحت يم اليايات قالي سعرها تكلف فوق الاف ريال بدون تركيب


علما ارى ان ارتفاع السيارة بالكعكات 2.5 سم عالي شوي وانا ابي 1 سم او 1.5 سم بس

وقالي لا لان الكعكات راح تطيح ولازم يكون من 2.5 سم واعلى







فـ وش رايكم يا اهل مكشات؟؟؟؟؟؟

[ابن صقيه]

ركب كعكات ..

3.5 سم ، للكفرات الامامية .
5.0 سم للكفرات الخلفية .

والتكلفة ما تتجاوز 700 ريال ..


هذا أفضل حل من وجهة نظري ..

[سلطا ن]

السلام عليكم
انا مركب كعكات 2سم قدام 4سم ورا
والحمدالله كل شي سليم وكلفتني 400ريال بالصناعيه القديمه وخذتلها نص يوم تركيب مع التفصيل من الساعه 4العصر الى الساعه 9 اليل

[شروكي ربع]

شف ميزان المجد خله يمينك و تعد اللفة اللي بعدهـ تلقى محل شكامين ويايات متخصص رفع المواتر ..

اسم الفني مبارك , وتراه غويلي شوي بس ماراح يكلفك 500 ريال ..

واما انك تروح خلف ميزان المجد بالضبط في واحد هندي ماادري وش اسمه بس سعره أرخص من مبارك ونفس الشغل ..

خذ أسعار مبارك ورح يم الهندي ..

وان كنت تبي أزين من ذا وذا خل ميزان المجد على يسارك وانت بالشارع اللي عليه محل المهيدب للمسامير وابتل و تعد حقين السست الين يجيك حرف ( T ) تلقى عاليمين محل أضن اسمه العيسى ..


هذولين شغلتهم ذي و أكثر من عامل يشتغل بموترك و تخلص بسرعه و اسعارهم زينه مره و شغلهم سريع ومتقن ..

أنت مر على مبارك ثم الهندي ثم العيسى و صلح عند من يطمئن له قلبك ويرتاح له جيبك ..

[أبو فهد11]

أخوي أبو عبد الرحمن

ركب نفس مقاس كفرات الوكاله وما راح يحك ومقاسها 245 /65 إذا ما كنت غلطان

وأنصك ترفع الموتر من ورا فقط بيايات الرمايه ( الاستراليه ) وركب عليها 1 سم كعكه

ولا تقرب المقدمه لأنها حساسه ويتأثر الرفارف من الرفع او تركيب ياي الرمايه أو مساعدها لأنها قاسيه

واتمنى لك التوفيق

[عاير القارات]

السلام عليكم

انا مركب نفسك كفرات برادو من سنتين تقريبا

بس رافع الباث من قدام 3 سم كعكة المنيوم عادية ومن ورا يايات الرماية

والله ممتازة ولا تفوتك وانا مرتاح حيل

وازيدك شلتهم قبل 3 شهور قالولي يصير الموتر قاسي

ورجعتهم قبل العيد اللي فات عشان بطلع للصمان والله على يايات الرماية والكعكات احسن وارسى

ولاني شايلهم ابد لأنهم احسن ويعطي شكل افضل تحس الموتر مسموت تقل شراع صباحي

وتحياتي لكم

[أبوعُمر]

يايات استرالي في الخلف لا يكلف سوى 600 مع التركيب .

أما الأمام أنا لم أجرب لكن صاحب ورشة خبرة مشهورة يقول الأمام حساس و لا يحتاج فتركته .

أما الكعكات مع التركيب لا تكلف سوى 100 إلى 150

[صياد مبتدئ]

السلام عليكم و رحمة الله و بركاته

أخي العزيز انا عندي نفس موترك اللي في التوقيع حتى اللون نفسه، و ظهرت عندي نفس المشكلة و لكن الحك لا يحدث إلا عندما أرجع ريفرس مع لف العجل إلى اليمين أثناء الرجوع. و ظهرت هذ المشكلة عندي بعد أن غيرت الكفرات الأربع بكفرات كومهو قياس 265/56 R17
عندما اشتريت هذه الكفرات قال لي البائع أنها أعرض من الكفرات الأصلية و هذا ما شجعني لشرائها، و لعل هذا هو سبب المشكلة. هذه صورة للكفر الجديد لاحظ مع انه جسم السيارة بعيد عن الكفر إلا أنه عند الرجوع إلى الوراء مع لف العجل يحدث الحك

http://www.mekshat.com/pix/upload02/images92/mk41224_28122008524.jpg


فلعل أفضل شيء تفعله هو تركيب كفارت مطابقة للقياس الأصلي و تجرب هل تختفي المشكلة أم لا، و بعدها تقرر

[.أبوعبدالرحمن]

الله يعطيكم العافية


وان شاء الله بروح لمبارك والهندي

واللي يقول ركب كفر الوكالة صادق هو ازين لكن المشكلة شكل الموتر وممشى الموتر افضل من كفر الوكالة

[بلاتين]

ركب يايات اولد مان احسن من مخاطر الكعكات فيه واحد من الشباب مركب يايات امامي وخلفي وممتازه ولا تطلع اصوات .
اما بالباترول تطلع اصوات وتسبب مشاكل