هبت رياح الصيف وتغير الجو ..... وصار لازم نركب مظلة للموتر .. وش رايكم؟

[ابو شكاع]

السلام عليكم جميعا ......

ياجماعة ما تقولون انه جانا هالحين الصيف .......... او هو على الأبواب ....

ومشكلتي انا اني سكنت في بيت يفتح جهة الشمال ......

يعني الشمس الرنانة بالصيف تلعب بالموتر ...

وابيكم تعطوني فكرة عن انوع المظلات ........... اذكر قريت عن نوع ممتاز كشكل ... وخفيف ومتين ويجي بالوان

وممكن تركبه على جدار واحد بس .... وهذا اللي انا ابي لان ما عندي الا جدار واحد بس وبقية الجدران بعيده ..

المهم هذا نوع يركب من جهه وحده ولا يحتاج الى عمدان في نهايته ... يعني يكون معلق على الجدار الواحد هذا ... وهو نوع حديد خفيف تقريبا والمظلة هذي تجي بالوان واشكال كثيرة

اليوم رحت بسأل عنه في عنيزة ... لاني اذكر له وكيل هناك ... وما لقيت المحل ... ضيعته وانشغلت مع واحد من الزملاء هناك لحد ما اذن العشاء

تكفون عطونا من اللي تعرفون .... واذا فيه رابط فلا تبخلون علينا

لاني سويت بحث وما لقيت


انتظركم

لاهنتوا

اخوكم ابو صالح

[متاخر]

ابو صالح عرفت النوع الي تقصد

وتحصله بعنيزه عند دهانات الشرق
ومحلهم طال عمرك طريق الزلفي قبل توصل الصناعيه على يدك اليمين

وببريده وكيلهم السنيدي عند معرضهم الى بطريق عنيزه بعد عبداللطيف جميل

[Bader-M]

انا اذكره انه ممنوع تركيب المظلات
ولكن لتاكد
اتصل على البلدية قبل
عشان ما تخسر على الفاضي
......
تقبل تحياتي

[ابو شكاع]

الله يجزاك الجنة يا متأخر

لا والله منتب متأخر............... الا في اول الركب ....... واول الناس

انا ابسأل مره ثانيه

شكرا لك ولاهنت

[ابو شكاع]

هلا وغلا بمشرفنا طاير بالعجة

على فكره اليوم الجو عجاج يعني انتبه الله يستر ههههههههههههههه

المظلة الله يغفر لوالديك تبي تكون بوسط البيت لان فيه حوش كافي وكبير

تسلم ولاهنت

واحتري الباقين ....

[aboabdullah20]

انتبه اجل خل ابواب الحوش مقفلة ترى الدركتر يدور وما فيه جحرالا وادخلوه ترى حقين البلدية ماعندك احد بس هم ليش تركب مضلة .ممممممممممممممنوع هههههههه

[صالح ناجي]

ياجماعة اذتنا البلدية خلوا شغلهم الأساسي وراحوا وراء هالمظلات شوي ويهدون البيوت حقنا الظاهر عندهم شياول يبون يشغلونها.

[aboabdullah20]

الظاهر انهم هم اصحاب ورش الحدادة للمظلات اذا وقف سوقهم هدوا مضلات الناس بالشتاء واذا جاء الصيف بداء الناس يركبون وياغافل لك الله

[ابو دانة]

بسم الله الرحمن الرحيم
تصدق اخوي ابو شكاع ولا يهونون الربع ان البلديه هدو المظله تبعي وهي في ارضي دون اي انذار ولو بخاخ على الأقل يحذرونا علماً بان المواقف كبيرة تاخذ اربع سيارات على الأقل نستفيد من حديدها تعرفون الحديد غالي اليومين هاذي، تدرون خلوها مرميه في الأرض وشوهوا الأرض صحيح يبغوني اشيلها ايه هين والله ما اشيلها، عل العموم فيه مظله قريت عنها مدري وين فيه تركب على الجدار الخارجي وتفتح وتسكر برموت كنترول اسأل عنها وعلمني الله يجزاكم خير وشكراً ابودانة

[مخايل البروق]

السلام عليكم ورحمة الله وبركاته
القهر ان الي طلع هالقرار تلقى عنه عشر مضلات لاويقلون تشوه الذوق العام
عقب ماتكلف الناس الالاف اقول يحض ابو الفغن باهالقرار تلقى الواحد صار مليونير من تجميع هالحديد
حسبنا الله ونعم الوكيل
انت ماشأ الله عندك بيت بس الي ساكن في شقه دور ثاني وش يسوي

[Y&Y_4X4]

مرحبا بالجميع

اقسم بالله يأخوان ان هذا القهر بعينة يعني معك موتر دافعن به اكثر من 100 الف ريال وتخلي الشمس تاكلة ..

هذولا مايخافون الله حسبي الله عليهم .

اذا كان عذرهم تشوية المنظر او المظهرالعام ( والا هالسنة ) على ما يزعمون عندي فكرة .

يجمعون مهندسين الفلس الي عندهم و يقررون هم شكل ومواصفات معينة للمظلات الي يرون انها ما تسيئ للشكل العام عساهم للعمى :mad:

وويقفون اهدار الاموال العامة والخاصة ويخافون الله بالضعيفين الي ذابحتهم الاقصاد من ورا هالسيارات.

وعلى فكرة ترى المسؤل عن اتخاذ قرارات الازالة معه سيارة الحكومة يعني جلد ماهوب جلدك جره على الشوك ماهمته الشمس ولا هيب هامته .....

ويوجد افكار كثيرة وحلوة وجميلة جدا للمظلات الفردية والجماعية للساكنين بعماير وبأشكال هندسية مرة حلوة ومن شأنها بعد انها تحسن من المظهر العام ..

بس مشكلتنا التطور عندنا يبطي بالحيل .......

[بن نويشر]

هؤلاء الناس والذين يسمون بالبلدية هم بالأحرى ( بلا وأذيه) علينا (لا حول ولا قوة إلا بالله) ..

تصدقون يالربع .. قاعد أبني لي بيت ، وماد سلك من الجيران القريبين (جزاهم الله خير) من عدادهم خط 220 فولت ، وحاط السلك في وسط ماصورة وحاط عليه شوي سمنت عن السيارات وصاير مثل المطب الصغير ، وكل شوي جاين هالبلدية وشابين علي .. شل المطب وراجعنا ، شل المخلفات وراجعنا وإلا ؟؟؟؟ وكذا على هالحال . الحاصل .. المخلفات أكيد بأشيلها بس خلوني أخلص نهائياً ، أما بالنسبة للسلك تبون أخليه عاري ويمكن يمر أحد من هالمارة وإحتمال بعد يتعرى السلك من كثر مرور السيارات عليه ويمسكه الكهرب ويفطس علي ! من المسؤول وقتها ؟؟..

[ابو شكاع]

هلابكم

ياشباب الله يحفظكم .......... الظاهر اننا لفينا وخلينا صلب الموضوع وصارت الدعوا دق على البلديات:)

انا معكم في انه قهر اللي يصير ........ خصوصا اللي حصل لاخوي ابو دانة

يابو دانه انا اول مرة اسمع عن اللي تقول هذي ........ ولكن ان لقيت خبر مالك هم ....

ممكن انت تقصد اللي تستخدم للبقالات على الشمس ؟ وهذي يستخدم لها عصا واذا برامت العصا تفتح ...... واذا عكسته تنطوي

عموما ان لقيت خير ما لك هم ابعلمك

سألت اليوم عن نوع الصراحة ممتاز .............. ولكن المتر ب 150 وب 135 حسب نوع الشراع

وهو نوع تكون فيه المظلة من ماصورتين ........ تطلع الماصورة من الأرض وبعدين تجي بحركة التواء على فوق .. يعني تكون بشكل المغناطيس اللي يكون بمعامل المدارس . وبعدين يركب عليها من فوق شراع

الشراع الأصلي اللي هو كوري تكلف المظلة معه 155 او هو 150 للمتر .... وفيه نوع قماش ثاني استرالي تكلف المظلة معه 135 او هو 130 ريال للمتر .. ويوم جيت احسب اموري واثاري تبي تكلف مبلغ مهوب بسيط

ال 5 في 4 تبي تكلف من الشراع الكوري 3000 اذا حسبنا ان المتر ب 150

ومن الشراع الأسترالي بتكلف 2600 اذا حسبنا ان المتر ب 130

يعني غالية جدا

وانا مثلكم ياشباب ............ موتري موديل 2002 وسعره 120 الف ريال ... والسنة اللي طافت تأثر من الشمس ولا ودي بعد يتكرر هالأمر

اخوي مخايل البرق طيب ليش ما تفكر بمظلات جماعية .......... ترى توفر مبالغ

اليوم قال لي واحد من الشباب انه اذا بغيت تركب مظلة عادية يعني حديد وشينكو ففيه طريقة توفر من السعر ........ قل للحداد انا اجيب لك كل الحديد اللي تبي .... وانت بس لك شغل اليد ........

بهالطريقة جلسنا نحسب انا وخويي التكلفة فصارت

المظلة ال 4 في 5 المعلقة على جدار واحد وطولها 5 متر وعرضها 4 متر .... بتكلف 900 ريال هذا بحساب ان الحداد بياخذ 10 ريال على شغل اليد

اما اذا صار كل شي من عنده فهو بياخذ 55 ريال على المتر ... يعني بتكلف 1100 ريال

يعني بتوفر بالطريقة الأولة 200 ريال


شكرا لكم مداخلاتكم وانتظر المزيد من مداخلات الأخوان

[ابو شكاع]

ياشباب ابشركم <<<< اصلا ما احد جاب خبرك ههههههههههههههه

اقول لكم اني رحت للمحل اللي قال لي عليه اخوي متأخر واتفقت معهم

وركبوا الخميس هذا الحديد

والأسبوع الجاي(الخميس) القماش

وانتظروا موضوع مستقل عنها بالصور

تسلمووووووووووون

ولاهنتوااااااااااااااااااااااا