طلب من غشيم لمحترفي التطعيس/ من وين ارقى الطعس!!!

[بركان]

السلام عليكم ورحمة الله وبركاته


سبق وان كتب الاخ/ جارود موضوعا مميزا عن كيفية صعود الكثبان الرمليه وقد ركز الاخوة المشاركين على
اعداد السياره وكيفية استخدام القير والدبل والسرعة اللازمه وما قصروا شاركوا واوفوا ولكنهم لم يتطرقوا الى امر في غاية الاهميه لاناس مبتدئين امثال اخوكم.

ما قلتوا لي اذا شفت لي طعس معترض كانه جبل وراسه كانه
حد سيف( وينك يا/ حد السيف والا اشغلك الوسام عنا) ولا ادري وش اللي وراه
من وين اطلعه ووين اتجه.!!!؟؟؟؟؟؟

وعلى شان تعرفون ليش سألت اليكم هذه القصة الحقيقيه:

مره من المرات رقيت لي طعس (وكامل العيله معي حتى الخدامه الله يخليها لنا ) مسوي قدامهم محترف طبعا اخوكم غشيم . واتوكل على الله وارقى الطعس ويوم جيت في راسه والى اخونا حد السيف قصدي راس الطعس ويا هو طعس ياخذ العقل طبعا من الخوف وتطقني ام الركب ويبدأ الصراخ والعويل
ومير اخوكم يوقف وتميل السياره بشكل مخيف قلت الله يخلف يا والله اللي رحنا فيها وتفتح كل الابواب في لمح البصر وكاننا في تمرين لمداهمة احد المطلوبين وتهرب كل العائله:burnout2::burnout2: ما عدا اخوكم والخدامه انا ما خرجت على شان احفظ توازن السياره والخدامه المسكينه ما تدري وش السالفه تحسبهم لا حقين لهم جربوع!!! ( ايس فيه بابا _ فيه الموت الحمر !!!!لان السياره في وضع ميلان مخيف.
وباقي السالفه انشاء الله اذا جاوبتوا على استفساري.

يالله يا محترفي التطعيس سمعونا رايكم!! لا هنتوا !!!

[مدلّه الرعيان]

السلام عليكم ورحمة الله وبركاتها

الأخ العزيز / بركان ،،، صبّحك الله بالخير ، شكلك تبي واحد يشرح ويبسط لنا عملية التطعيس ثم نتوهق لنا برأس طعس ، بالنسبة لي ، أنا مانب خبير تطعيس لكن لامني اقبلت على الطعس عضيت طرف شماغي وحطيت رجلي وقلت لعيالي تشهدوا ثمالله لا يوريك مثل ما قلت خذ صراخ و زعاق ولا قمزته تعال شف القش اللي وراء صايرن بين رجلينا ما بين ترمس قهوة وإلا شاهي وإلا حافظة ،،،، تبون الصدق يالإخوان مقامز الطعوس "هبال "لكن الهبال زين بعض المرات خاصة إذا صرت انت و عيالك ولا حوللك احد .تقبلوا تحياتي .

اخوكم / مدلّه الرعيان

[ابو كرييم]

السلام عليكم ورحمة الله وبركاته



اخوي بركان صباح الخير . . .


اخواني اعضاء منتدى مكشات الموقر . . .


ترى مامن علم ولا هنا خبرة لكن شي تعلمته مع الايام واتمنى انه يفي بالغرض اليك اخي
هذة النصائح استلم . . .


اما بالنسبة لمراقى النفود يعتمد اول شي لنوع السيارة وهذا مهم هل هي دفرنسين ولا دفرنس واحد
اذا كانت دفع رباعي هل هي امريكية مثل جمس صحن والا يوكون او غيرها اذا كانت كذا معناته
لازم تكون الارض الي قدام النفود ارض ممهدة يعني ما يكون فيها اي قشعه والقشعة هي "الشجرة الصغيرة" لان السيارات الامريكية يطيح عزمها بسرعة مع المطامر على القشع. . . .

اما اذا كانت السيارة يابانية فما عندك مشكلة الياباني يشد عمره ولا هوب رخو زي الامريكي
يعني ادعس وما عليك خوف يبي يرقى ان شاء الله . . .

وفيه نقطة مهمة وهي لاتقابل النفود لا تجيه مقابل يعني لاتجيه مسطرة لا حاول انك تجي للنفود
شلف يعني بطريقة مائلة كنك طالع مع مخرج 8 على الردئري الشرقي هذا اسهل للسيارة واقل
انه يخف عزمها . . .

واهم شي التنسيم ان شاء الله معك هايلوكس ولا VX-R لازم تنسم انشط واريح للسيارة ولك . . .


اتمنى اني قدرت اوصل المعلومة الي براسي بشكل واضح واتمنى اني استفيد من الاعضاء
الي يبي يشاركوننا بهالموضوع . . .

ولك خالص تحياتي . . . والسلام عليكم ورحمة الله وبركاته

[بركان]

اخوي مدله الرعيان
اخوي ابو كرييم


انا اقصد الطعوس العاليه اللي ما تدري وش وراها من وين اجيها وكيف اعرف وش وراي بعضهن الى طلعت
ما تشوف اللي قدامك كنك تطل بوسط قليب!!!
او يمد الواحد رقبته كانه غرنوق بيطير.!!!

تحياتي

[أبو تركي القطامي]

السلام عليكم ورحمة الله وبركاته
أخوي بركان بعد التحيه
السيف أنا أخوك حاول ماتنزل معه لأن الطعس له منزال وله مطلاع فأذا طلعت معه حول تلف يمين أو يسار
وتنزل أما أذا توهقت وغصب نزلت فحاول أن يكون الموتر معتدل لا يميل وتنزل بشويش أنشالله أكبر سيف ماعليك خطر بإذن الله

[ريع الدياب]

بسم الله الرحمن الرحيم
السلام عليكم ورحمة الله وبركاته

ايش رأيك يابركان ؟؟؟؟؟؟؟؟؟؟؟؟؟؟؟؟؟؟؟؟؟؟

وجهة نظر رسمية من كتاب (( قيادة السيارات فى الصحراء ))

http://www.mekshat.com/pix/upload/images4/mk7300_Desert Driving Book.JPG

http://www.mekshat.com/pix/upload/images4/mk7300_Desert Driving Book-2pages-1.jpg

http://www.mekshat.com/pix/upload/images4/mk7300_Desert Driving Book-2pages-2.jpg

[مغراز]

السلام عليكم ورحمة الله وبركاته
الأخ ريع الدياب كفى ووفى ماشاء الله عليه 000 وأضيف عليها أن يوضع التعشيق رقم(2) والضغط على أبنص البنزين الى الآخر " حسب كُبر الطعس أو صغره" وعلى نفس الدعسه للآخــــــــــرحتى تصل الى قبل راس الموجة بثلاث او أربع أمتار ثم لف لليمين أو اليسار .
ولا تنسى التكبير قبل الصعود والتهليل عند النزول. مع تمنياتى الصادقة بمزيد من التميز لمكشات
والسلام عليكم ورحمة الله وبركاته

[كشاته]

زي ما قالوا الأخوان

أهم شي نسم الكفرات

ثم أطلع الطعس بطريقة قوس حتى تكون قمة القوس على قمة الطعس فيكون نزلة عن يمينك ونزلة عن شمالك

أختر أيهما تود

[جنوبي الغاط]

مشكور وجزاك الله خيرا

[صقر البراري]

ريع الدياب الكتاب هذا بسراحه خيال وين ألقاه

مع التحيات صقر البراري

[القماري]

فهمت من الكلام أن المشكلة وقعت بعدما وصلت لمرحلة (راس الطعس) معناه أنك خبير في صعود (رقي ) الطعوس ولا مخافة عليك منها ( والشباب ماقصروا في طرح المعلومات والمرفقات)
ماذا تفعل بعد أن تصل لنهاية الطعس؟ هل تدعس البنزين أم ترفع رجلك من البنزين؟ عادة يكون الطعس (الكثبان الرملي الكبير) به بطن وظهر والبطن عادة يكون مواجه للجنوب (بسبب الرياح الشمالية) ويكون القص في هذا الإتجاه ، لكن قد يصادف أن يكون الظهر حاد أيضا ( لكن ليس بمثل البطن ) (في حالة الطعس الهلالي)
إذا كانت الرؤية للطعس واضحة وتستطيع أن ترقاه من الخلف وتعرف طبيعته جيدا ( وكنت تحب أن تغامر وترقاه من الأمام حتى تفرح من معك أو تخيفهم ) فأنطلق بعزم قوي مع وضع التعشيق على النمرة الثانية وبعد تنسيم (تقليل ) الهواء 15-10 ، وأنطلق من أحد أطراف الطعس (طبعا هذا تعرفه - الدليل القصة المذكورة) وعند بلوغ راس الطعس أو قبل بلوغه بقليل (واصل الدعس وحاول أن تسير بمحاذاة الراس حتى تخرج بالتدريج للأعلى) ثم أنعطف بهدؤء حتى تصل للمنظقة الآمنه.
وإذا لم تعرف ماذا في الخلف فالنصيحة كما في السابق (فقط أرفع رجلك عن البنزين - عندما تضرب الكفرات الأمامية راس الطعس ودع السيارة تندفع بواسطة القوة الباقية للدفع ) مع مراعاة أن تكون رجلك قريبة من البنزين ومن البريك ، لتفادي المفاجأت ( لا تدعس البريك بقوه في أي حال من الأحوال إلا إذا تيقنت أنك لا تستطيع المواصلة والأفضل أن تنعطف وتنزل بخط مستقيم في حال عدم تمكنك من مواصلة التسلق.
هذا والله أعلم

[ريع الدياب]

بسم الله الرحمن الرحيم
السلام عليكم ورحمة الله وبركاته

أخى العزيز صقر البراري

هذا الكتاب منشور بالعربية والانجليزية
من تأليف أندرو بى هارت (استشارى أعلى لشركة السلامة والخدمات الفنية المكفولة من قبل مجموعة شركات الزامل - ص. ب 9 - الخبر 31952 هاتف 4888-894-03 فاكس 1248-895-03 فى أبريل 1993)
وقام بالترجمة السيد / عوض أحمد الضو
وطبع بمطابع الوفاء ص. ب 101
الجبيل. المملكة العربية السعودية
ولا أذكر كيف حصلت عليه (لا أظن أنه يباع فى المكتبات العامة)
ربما من صديق فى أرامكو أو فى الجبيل

أقترح أن تتصل بشركات الزامل أو مطابع الوفاء وتسألهم

وعلى العموم أنا على أتم استعداد لأرسل لك نسختى بالبريد أذا أرسلت لى عنوانك
انت بس اطلب يا صقر البراري

مع أطيب تحيات أخوك ريع الدياب

[صقر البراري]

ريع الدياب جزاك الله خير أنت مسكتن طرف الخيط أتص على المطبعه واطلبه منهم ومشكور وماقصرت

مع التحيات صقر البراري

[بركان]

اخوي ريع الذياب
اخوي صقر البراري

ماشاء الله عليكم ماخذين راحتكم
اشوفكم قلبتوا موضوعي الى مراسلات بينكم
ما تدرون ان فيه مراسلات على البريد الخاص؟؟؟


لا تستعجلون يا اخوان
اولا يا هلا ومسهلا شرفتونا
والبيت بيتكم
وقد افدتمونا جزاكم الله خيرا
بس لا تنسون اخوكم من نسخه من الكتاب.

[صقر البراري]

بركان آسفين إذا سببتلك إزعاج أنا وريع الذياب


مع التحيات صقر البراري

[الطامي]

الأخ/ بركان
يسعد ايامك والجميع والقايل
بسبب عنوانك الشيق ؟؟؟؟؟؟؟؟؟؟؟؟؟ عدنا والعود احمد
للرد على استفسارك اقترح عليك مرافقة احد المطعسين البدو لان لهم خبره في الرمال وطرق السير عليها ومتى تحتاج السياره الى التبديل للنمر في الرمال وطرق النزول والصعود من الكثبان الرمليه 0


يقول المثل ( عط الخبز خبازه ولو اكل نصفه ) مع احترامي لجميع الهواة وغيرهم 0:good: :good:

[بركان]

اخوي الطامي
هلا وسهلا والله بالغالي
وش رايك تشرب لك فنيجيل مر.!!!


اخوي سبق ان جربت وركبت مع احد الاخوان في نفود صعافيق وياهي رحله ماتنسى ولن تمحى من الذاكره
نزل بنا اخونا فجأة وحنا ما ندري واحنا في جيب شاص نزل بنا مع هوية سحيقه قلت الله يخلف على اهالينا
المهم ان قلوبنا نزلت في وسط خصـ.... من الخوف .
وكل ما مر له من عند نزلة ولو هي بسيطه قمنا انا وخوينا نتحقرص تقول في بطونا ضبان حيه.
وخذ ضحك وخوف لدرجة انك لم تعد تميز بين دموع الفرح ودموع الخوف.!!!!

ولو اللي جرى لي جرى لك كان تحرم تمشي فوق الرمل بعد اليوم.

تحياتي.