قصة خط سفر + أستفسار عن تصليح زجاج السياره

[غالي]

السلام عليكم ورحمة الله وبركاته

ابخش بالموضوع على طول:

امس راجع من الشرقيه للرياض معي البورش المهم مثبت السرعه على 129 ومرات 125 وهالسرعه باعتقادي يتغاضون عنها.

الزبده

الطريق الي رايحين عكس يعني رايحين للشرقيه وانا رايح الرياض عادتن يكبسون بالانوار عندما يشووفون رادار وينبهونا نهدي

فا انا شفتهم يكبسون وحطيت السرعه على 118 تقريبا الى 117 قبله بما يقارب 6- 8 كيلو

يوم مريت جنب الرادار وتعديته بكم كيلو الا تفتيش موقفين عالم

يوم جاء دوري الي واقف بالشارع قال امش قام خويه الي بالسياره زعق هذا هذا وقفه !!!!!!!!!!

انا وقفت لاني مطالعه قبل خويه مايوقفني قلت انا مسرع؟؟؟؟؟؟؟؟

قال ايه انت!!!

قلت اخوي تأكد وابتسم

قال خويه الي بالشارع بالحرف الواحد ورب البيت (( يارجال ترا راس مالها مخالفه!!!!!!!!!! )) :confused:

تبي تسرقني عيني عينك؟؟؟؟؟؟؟؟؟؟؟؟؟؟؟؟؟

اقسم بالله ناس ماتستحي

قلت له دامها مخالفه لا راحت ولا جت تظلمني؟؟؟؟؟؟؟؟؟؟؟؟

قال يارجال وقف وراك زحمه لاتعطلهم

قلت خايف اعطلهم ولا فكرت انك معطلني؟؟؟؟؟:mad:

المهم مازلت ابتسم وماسك اعصابي

والله ثم والله ان خويه الي بالسياره الي قايل وقفه قال لالالالالالالالا مو اهو طلعت السياره الي وراه البيضاء !!!!!!!!!:eek:

وكان ماشي 154

ورب البيت ياجماعه هذا الي صاير


على هالقد سهل نظلم العالم؟؟؟؟؟؟؟

على هالقد ما نعرف نستخدم التكنلوجيا؟؟؟؟؟؟؟

على هالقد يا أمن الطرق تبي تخلص دفترك وبس علشان تمشي وتاخذ دراهم؟؟؟؟؟؟؟؟


والله مشكله ياعالم

ـــــــــــــــــــــــــــــــــــــــــــــــ

الاستفسار لاهنتوا

عندي القزازه الاماميه جايتها بالطرف حصاة صغيره جدا جدا

ويوم اسافر كان هواء قوي وتفاجات ان الكسر الصغير كبر وطلع خط بحدود شبر ممكن مع ضغط الهواء

فا حبيت اسأل الله لايهينكم كان احد مجرب او يعرف محل ممتاز في شمال الرياض أو بأي مكان ويعطي ضمان لا يخرب علي أكثر

ولكم مني الدعاء والله يوفقنا وياكم جميعا

:good:

[عاشق الفكسار]

والله يالغالي رح للصناعية عند اشارة العنوز
عند حقين الزجاج شف لك محل يضبطها لك وعليها ضمان
انا سويتها عند طبيب الزجاج ما ادري يمكن فيه ازين منه

[غالي]

الله يجزاك خير اخوي عاشق الفكسار

بيض الله وجهك ماقصرت وياليت تقولي اسعارهم بحدود كم

لاني عمري مارحت حقين القزاز ولا اعرف اسعارهم ابد

بس أبي لما اروح لهم اكون فاهم

وتسلم

[شمالات نجد]

فعلاً حقين الزجاج (زجاج السيارات) يزينونها لك

سبق وصلحت عندهم صدع في الزجاج الأمامي وعالجوه وأخذت وقت ما يقارب 3 ساعات مابين إضاءة بنفسجيه ومواد والحمد لله من أروع ما يكون.

بالنسبة للسعر ليس بالكثير ولكن بما أن السيارة بورش يمكن يتحايلون عليك أنت حط في بالك مبلغ 200 لا تزيد عنه.

وكذلك خذ لفه عليهم وسعر بنفسك

وعشان تكتشف السعر المناسب قل بستفسر عن السعر وأجيك بعد يومين ليطمع فيك ويعطيك بسعر ممتاز خوفاً من أن تجد غيره خلال هذه اليومين :)

بالنسبة لمخالفة السرعة أحمد ربك ترا ما شفت شي

أنا موقفيني الساعه 1 في الليل ومعي العائلة يقول عطني اثباتك يوم عطيته الأوراق قال الرخصة منتهيه وقف على جنب!!

يا أخي حتى لو أني إرهابي المفروض يستحي على وجهه ولا يوقفني ومعي عائلة في تالي الليل ولا سرعه ولا حزام أمان طيب ليش توقفني!!

وسع صدرك واركب سدرك :)

الله يوفقك

سلام

[إعصار]

يارجال .. خلها على ربك ..


الله ينتقم من الظالم .. والقصص واجد .. بس وسع صدرك وانا اخوك .. حنا سعودين ..

القزازة يمديك تصلحها .. بس بشرط ..

ماجاها ماء .. ولاتكون المدة طويلة .. يعني انقز لهم في اقربي فرصة ..

تلقاهم عند اشارة السالم في الصناعية القديمة ..

فيه واحد ممتاز .. وانت جاي من طريق الخرج متجه للصناعية .. يجيك قبل الاشارة على اليمين .. الي يشتغل فلبيني ..


والله يسهل أمرك ..

[ابوسعودد]

قبل شهر كنت مسير على الرياض وكان عندي كسرين في القزازه الاماميه المهم سويتها عند طبيب الزجاج او مدري دكتور الزجاج على طريق خريص قبل معارض السيارات ب 200 ريال وعطاني ضمان عليها وقالي واحد من الشباب من اهل الرياض لو رحت للصناعيه كان لقيت ارخص من كذا .......

[SuLTaN.M]

خلها على الله


قبل اسبوعين رحت للنعيريه وانا راجع وقفتي تفتيش ابو حدريه

وعطاني مخالفه تركيب دبة صوت وموتري عليه هدرز سكت وقلت الحمد لله على كل حال

واحد من العيال جا بعدي بدقايق مر قدامه موتر قطري عليه هدرز حق التفتيش اللي جوا قال للي موقفني خله يروح التفت عليه اللي موقفني وقال له لييه من الجماعه بعد؟؟<< بعد يعني مو اول واحد يمشونه

وانا مخالفه بـ150 وانا طالب وتزيد على حسب النظام الجديد اذا ما سددت على طول


حسبي الله عليهم كلهم


بغيت ارجع بس مسكوني العيال وقالوا اقصر الشر
ناوي ارجع واللي فيها فيها من الغبنه موب من المخالفه


لكن اجر اجر


القزازه عند طبيب الزجاج ولا دكتور الزجاج<< حول السالم اللي في الصناعيه القديمه
^^
عدلت عنده مره وان شاء الله انه ما تمدد

[ناصر العدواني]

أهم شئ حبيبي مثل ما تفضل الأخوان
لا تطول يدخل مويه أو غبار بالكسر ماعاد يتصلح
وثاني شئ سعر قبل لا تتوهق
شف كذا محل وخذ الارخص واللي يعطيك ضمان
وثالث شئ عادي بالنسبه للمخالفان
أنا من الباحه ولا عمري رحت للشرقيه
طلع لي مخالفة سرعه في الدمام
عادي عادي
لا وأزيدك من الشعر خيمه
موقفني واحد مره في تفتيش وأنا مركب ستيشن 3 أمتار
المهم وش تتوقع يقول




يقول ليه مركب كفر عريض هذا تغيير معالم السياره
بس أنا كنت فاضي يومها ورحت شكيته للضابط
ولا عطوني مخالفه
المشكله هي عدم وجود قانون صريح و واضح
مافيه قانون مطبوع يقدر يطلع عليه المواطن ويعرف وين الله حاطه فيه
وكل عسكري يقول شئ غير خويه
أذكر مره من المرات
موقفني وأنا معي فورد
والفورد زي ماتعرفون بالكثير 173 ويفصل
مسكني قال أنت ماشي 180
حلها ياصاحبي
قلت تاخذها في ذمتك
قال إيه أجل أنا كذاب أخذها بذمتي
قلت عادي اكتبها وبيني وبينك الله لو انها بمليون
فلا تزعل ولا تكدر خاطرك
لأن هذا العسكري مصيره يسافر ويروح ويجي ويلاقي منهو ألقف منه
ويطلع له براسه نخلتين

[غالي]

الله يجزاكم خير وبيض الله وجيهكم جميعا

توني واصل من حقين الزجاج

رحت الصناعيه عند محل اسمه طبيب الزجاج

وصلحها لي ب120 ريال رغم اني ماكاسرته بشده

وعلى كلامه لو سياره غيرها كان ارخص لكن يمكن القزاز عندي مدبل والله اعلم من كلام الرجال

طبعا حتى الآن النتائج لم تظهر بالشكل الكامل لان حاط فيها غراء ولزقة مثل الشطرطون شفاف

يقول لاتفكه الا بعد يومين والغراء (حكه لين يروح او خله مع الوقت بيروح والغسيل)

وسألته لو تأخر الواحد ولا صلحه هل يتصلح او لا؟

قال يتصلح لكن مو مثل لو جبته على طول علشان مايدخله مويه وغبار

ومشكورين ولا قصرتوا والله يوفق يارب :)

[ensaaan]

ماشاء الله افادوك الإخوان

لكن بالنسبه للقسايم
واحد من الربع
شغال في المرور
وطلب من مديره
اذن يومين عشان يروح لأهله يزورهم

المهم المدير عطاه دفتر قال خلصه
ولك هاليومين واكثر

قالي صاحبي حرام يعني كيف بخصله
اعطي اللي يستاهل واللي مايستاهل عشان اقدر اروح للأهل

والله حاله حسبي الله على كل ظالم

تحياتي للجميع

[abood-454]

انا مصلح قزازه كابرس اس اس 2007 منشعره بقدر شبر ب 80 ريال وعليها ضمان سنه
ومحله بصناعيه القديمه قبل محل السالم على اليمين يعني اذا جاتك الاشاره تلقاه على اليمين قبل الاشاره ب 10 امتار ويجيك محل السالم بالزاويه على اليمين بعد الاشاره

[ابوريناد1979]

بالنسبه لموضوع القسيمه : وسسسع صدرك انا بعد صار لي موقف معهم بتفتيش الدائري الشمالي ، كان معي المدام وبنتي الصغيره وقتها معي كوريلا ووقفني العسكري وقال اثباتك واصفط على جنب ، صفطت وجيته لقيته يكتب قسيمه قلت عسى ماشر
قال انت تمشي 175 :eek:
قلت ياكبرها عند الله 175 وبالدائري الشمالي بها القعنوبه وعيالي معي بعد والله الجريه
وانا ماتعديت 120 وحتى لو بسرع شوي منيب مسرع لاني عارف محلهم هالدلوخ لهم 3 سنين ماغيروه
المهم اكلمه واحلف له وكأني اكلم جدار سحب الرخصه وقال راجعنا بالمرور بكره لأنك المفروض مشرفنا بالباص لكن معك عايله ، يبوني اراجعهم بالمرور عشان يذبحون لي ذبيحه بالناصريه خخخخخ وواسطات لين جبت الرخصه وسلامتكم وحسبي الله ونعم الوكيل.