ما ادري هو نصب والا احتيال والا ايش؟؟؟((شيء يضيق الخلق والخاطر))

[abdulrahmanfd]

السلام عليكم ورحمة الله وبركاته

كيف حالكم ، شيء والله يحز بالخاطر ، على هالصبحية قلت ادخل اكثر من موقع واشوف احدث اعلانات السيارات ونتابع العلوم الطيبة وحقيقة الوضع أصبح يخوف وبقوة ، تدرون ليش؟ أنا أقول لكم السبب! ، الأسعـــار المبالغ فيها هنا في مكشات بالذات لقيت العجب العجاب واسمحوا لي ابتكلم عن هالشيء وتحديدا في قسم الاعلانات واحد عارض موتر دون تحديد موديله دون الـ90 يعني له تقريباً 19 أو تقريباً 20 سنة وسعر مشتراه ذيك الأيام كان نقول 50 ألف وإلا بلاش 60ألف أو ياجماعه ولا يهمكم 70ألف وعارضه الآن ويقول مسيوم من واحد من الشباب خارج المنتدى بـ 30ألف له حول 20 سنة وتقول مسيوم بـ30ألف ايه سلم لي على خويك وقل له الطحيحي والله :D ، لا ويقول انا حطيت عليها هاك الحسبة فلا تبخسون هذا دليل على ان موترك مخيس ومخلل يرحم والديك احرقه احسن لك يا شيخ والله لو ايش ما اصدقك يعني كبيرة جداً وش خليت لموديلات 2000 و 2001 او اقول موديلات 2009 حتى وش خليت لها ، يا ناس يا عالم استحوا على وجيهكم وخافوا الله ترا المنتدى فيه رجال وكثير منهم فاهم الدعوة ووالله الدعوة ما فيها بزران ولا لعب عيال غير كذا ترانا نعرف السوق زين مترناه وشفنا فيه الزين والشين الصالح والطالح وهالكلام مو بيوم ولا شهر ولا سنة الا سنين وبنين ، والله الوضع مزري في قسم الاعلانات و عجيب مواتر تكرمون (قمايم) وبالأسعار هذه يا جماعة خافوا الله واعطوا الشيء حقه ولا تصيرون مثل الشريطية ، وانا من هنا افكر اقترح على اللي بدء حملة مقاطعة جديدة بعنوان "هي خايسة وخلوها تخيس" للسيارات المستعملة فقط.
يا جماعة الخير يمكن كثير منكم يوافقني باللي ذكرت ويمكن اكثر يرفض الكلام ويعتب علي لكن الدعوة الحين واضحة وضوح الشمس واللي ما يصدق مستعد احدد له اعلانات كثيرة.
أخيراً صحيح نقول انه ما يجوز نبخس السلعة لكن بالمقابل ما يجوز تاخذ..@@
والا لكم رأي آخر.
المهم اعذرونا على الاطالة وبارك الله بالجميع.
اخوكم

[ابومحيميد]

صحيح كلامك اخوي لكن ..

أي شخص يقدر يحط سومته من عنده ويقول فلان وعلان سامه بالقيمة هاذي

يعني تعاملات الأنترنت خذ وخل والذمة ما حولك احد

ولاتظن ان الموتر بيسوى مثل ماقال لكن اكثرهم شريطيه يدورون ضحايا

[EFI-4500]

الله المستعان

وما خفي كان اعظم

والله انك جبتها بالصميييييم

ولو اني مشرف كان ثبت الموضوع <<< ربي عارفك *_^

[ابو ساره 999]

أقسم بالله انه شي يبط الكبد تقول بعض هالناس موتره ذهب اتمنى ومن كل قلبي انه يكون هناك رقابة على هالمواضيع ومشرفنا الغالي يحذف الإعلانات المبالغ فيها لانه اسم مكشات اهم من هالسخافات وانا معك قسم بالله ان اكثر المعروض كسر والله ماتجزم تروح عليه للخرج واذا قاللك شي قال موتري نظيف وين نظيف معه وهو ماشي فوق ال 400 الف يقولك حدث العاقل بما لايعقل فان صدقك فلا عقل له ياجماعة الخير ابضرب مثال وقيسو عليه انتم وهو له علاقة بكلام اخوي الغالي كاتب الموضوع بسعر لاند كروزر موديل 2001 ثمانيه سرندل فل ماشي 80 الف ميل امريكي طبعا سعره بامريكا 53 الف ريال بدون الشحن والجمرك وهاذي تقريبا تكلف 8500 يعني يطلع المجموع 61500 هاذا انا اسميه معقول بس الي صاير عندنا اذا جا الواحد يبيع موتر كنه بيعطيك معه صك محل ذهب يابشر خافو الله بالناس ترى الشعب جالس يعاني من وراى هالي مايستحون شكرا لك اخوي لانك جبت الموضوع بالصميم وبالثمنيات وبكل شي والي يبغى يتاكد من كلامي يدخل موقع ebay وموقع carmax ويشوف الاسعار المعقوله والنظافة وكل شي على عينك ياتاجر تقبل مرور اخوك ابو اريج واسف على الإطاله

[_MAJID_]

اغلب الأعلانات قرنبع x قرنبع

[GMC79]

صادق صادق وانا معك

[شرق الصمان]

كلامك صحيح
لكن ليس على كل حال
فالموتر اللي تقصده انت
واعتقد انه الباترول يمكن
يوصل سعرة إلى هذا
السعر واكثر إذا كان
نظيف ومتعوب عليه

[abdulrahmanfd]

ابو محيميد
EFI-4500
ابو اريج
_MAJID_
GMC79
شرق الصمان
اشكركم وكل من شرف الموضوع بالزيارة ، ويا افاضل انا ما حددت سيارة بحد ذاتها ولا حددت فئة بعينها والوضع ما وقف على نيسان او تويوتا او جمس او غيرهـ ، دليل كلامي قسم بيع السيارات هذاه قدامكم تصفحوا فيه وشوفوا الاعلانات سيارات حديثة او قديمة ، الناس تبالغ بقوة وبصراحة غطوا على الوكالات بالمبالغة وبرفع الأسعار وتدبيلها ، والآن موجود حملة وهي خلوها تصدي سببها مثل ما تعرفون ارتفاع الأسعار المبالغ فيه الحين الناس تركت الجديد وراحت للمستعمل والنتيجة شوفوا كيف ارتفاع ومبالغة ناهيك عن الغش يكون احيانا وارد ، ما اقول الا يا زين معارض الامارات والا المعارض الامريكية كل شيء معقول ورخيص والسعر يناسب الحالة والموديل والمواقع قدامكم وموجوده مثل ما ذكر ابو اريج
وبارك الله فيكم
اخوكم

[طرطوس79]

الجديد كله غش وأسعار مبالغ فيها


والقديم أرخص ويمشي الحال خخخخخخخخخخخخخخخخخخخخخ (( دابلين تسبده أهل الوكالات ))

[طرطوس79]

ما اقول الا الله يعين



اللهم ابعد عنا الغلا والوبا والزنا والزلازل والمحن وسوء الفتن ما ظهر منها وما بطن

[B.A]

كلامك صحيح 100% ولكن اذا كان الموتر المعروض قديم جدا ونظيف اعتقد ان يستاهل اغلى من قيمته مثلاً عندك الجمس من 78 الي 88 النظيف يجيب اكثر من قيمته يوم كان وكاله ..... الوالد ذكر لي مرة انه اشترى جمس 79 طرطوس 454 وكاله بمبلغ 32 الف ريال والان اسعار النظيف وهو مستعمل تاصل 30 الف ريال بالراحه ويمكن تزود ... سبق وان عرض جمس 87 نظيف جدا للبيع وتم بيعه بمبلغ 55 الف ريال اغلى من مشتراه وليش لان له شعبيه وعشاق

[ابن المهوس]

السيارات فيها تلاعب من الوردين وكذلك الشريطيه
الله المستعان

[كموص]

الخردة ---- خردة ----حتى ---- لو ---حطوا --- علية ---- وردة

[ابوعقل]

السلام عليكم

والله كلام صحيح

واللي يزيد الطين بله

يقولك مخزن وهو ماشي فوق 100,000

الله يعين

[بـلـيـهـان 1]

اخالف كلامك

بليهان

[الربذي]

هههههههههههههههههههههههههههههههههه
ياكثرهم بعضهم يقول مسيوم ب60مثلا وبد فتره قصيره يحده ب60لاواحيانا يطرح الفين وثلاثه زواحيانا خمسه مره وحده طيب ليش مابعته علىالي سامه بستين

واحد هنا بالمنتدى منزل في اكس ار ابيض 98 واصف الموتر من الى وقال انه بالمكان الفلاني لان اخوي وكذا المهم يقول مسيوم ب64 وحاده ب65 واحد ثاني يدخل ويقول انه لقى جيب نفس موديله يسام ب70 وماهو بايع
الغريبه انه بعد كم رد قال يسام ب70 وبالمنتدى الاخر هو نفسه الكاتب يقول للبيع ومازلت حاده ب65الف
يعني البعض يكذب ليش ماادري .......................................

[abdulrahmanfd]

حياكم الله بداية مشكورين يا شباب على الردود الطيبة مسألة السومات هذه عجيبة اذكر اني وبصراحة ادور لي موتر زين وحصلت باحد الاعلانات هنا سيارة وجذبت الانتباه واتصلت على راعيها وعاينتها سالته عن السوم قال لي 70 وسالته عن الحد قال 75 قلت له الله يرزقنا واياك اتصلت عليه بعد كم يوم اسال عن الموتر قال راح سالته بكم ما تكلم بالبداية وبعد الحاح عليه قال 70 هنا وضحت اللعبة كثير من الناس يقول للمعلومية مسيوم الموتر بكذا يجي واحد يقول غديك تبيع الموتر علي بنفس السومة عاد ما يصدق خبر خوينا الا يقول تم تم اساليب الغش والاحتيال كثيرة واسال الله ان يبعدنا عنها وعن اصحابها.

اما مسألة المواتر القديــمة واسعارها المبالغ فيها فوالله كثير من الناس ينضحك عليها بهالمواتر وفيه واحد عرفته يجيب من هالخرد والرجيع ويصلح ويجدد ويبيع بمبالغ فلكية واقول بسلامته لانه لاقي مخفات اجل جموس موديلات قديمة اقيامها 30 وعليها انا ابغى اعرف وش الزين فيها الجموس الجديدة اقوى واجمل وافضل من كل النواحي.

والله يصلح الحال

[راعي الهدد 77]

والله انك صادق

واشكرك على صراحتك واللي سويته وتكلمت في موضوع زي كذا وجرائتك بالكلام قليل اللي يسوونه

واشكرك مره اخرى اخوي اللي وعيت الناس .. وتسلم
ارجو انك تتقبل مروري

اخوكـــ(راعي الهدد 77)ــــــ..

[المعمري]

الخردة ---- خردة ----حتى ---- لو ---حطوا --- علية ---- وردة




والله انك صادق;)

[عبدالله9999]

كل واحد دراهمه معه والحديد قدامه والي يبي يشتري يشتري والي ما يبي لايقعد يهرج على الفاضي وبعض الناس ما عندها الاالسوالف كم سيم وما سيم وش حدك والله يرزقك. (واحب اقول هذا سوقنا) اجل باترول موديل 93 ربع مرشوش كامل وملعون ابو جده واحد من العيال ماخذه بحدود 30.000ريال على ايش ولا بس علشانه سلقه ولونه ابيض والمشكلة تلقاه شريطي طالع عليه ببلاش وما خذه ورشه ووقف الموتر ويصفطه بهاك القيمة.

تصدقون مرة كنت بمعارض الشفاء ابي ابيع سيارتي والله على ما اقول شهيد المهم كنت موقف في الساحة وجنبي شاص 2006 المهم الموتر كامل والكامل وجهه سبحانه سيم منه 90الف والى كل شوي يجون ناس كم سيم ووش حدك والي يحاول يعذرب المهم الاه مل راعي السيارة وجاه واحد وقالي اسمع هذا من شكله ماعنده سالفة قاله كم سيم والله قاله 60الف سأله البدي جايه شىء قال لا وش المواصفات قال بريمي قاله طيب ما يجي 55الف وانا الي ما قدرت امسك نفسي من الضحك ثمن راح وقال الله يرزقك انحرج يوم شافني اضحك
والله انه ما قصدي شىء لكن بعض الناس ما ادري بيسوي نفسه فاهم ولا يبي يقنع نفسه ان يعرف يشتري وانا متأكد انه هذاك اليوم لو قاله بعتك انحاش وانا متأكد انه ما يعرف قيمته بس سواليف ولا راح يتوقع انه رخيص

والسموحه منكم

[abdulrahmanfd]

كل واحد دراهمه معه والحديد قدامه والي يبي يشتري يشتري والي ما يبي لايقعد يهرج على الفاضي وبعض الناس ما عندها الاالسوالف كم سيم وما سيم وش حدك والله يرزقك.

المسألة ماهي مسألة حديد اودراهم معي او مع غيري المسألة فيها ذمة وغير كذا ما بها هرج ولا كلام فاضي الحق حق وفوق كل اعتبار ، والساكت عن الحق شيطان أخرس ، وكثير من الناس هنا او خارج النت تكذب و تغش و تحتال بعرض السلعة علشان زيادة القرش وهذا تدليس وان اختلطن هالصفات بالقرش صار حرام ، تعلمنا من صغرتنا قول " من غشنا فليس منا " ويننا عن هالكلام الحين.
ومبدأ "هذا سوقنا" لا وانا اخوك الأساس ان كل شيء وله قيمته ولا احد يعطي الشيء فوق حقه او ينقص من حقه ولو جزء بسيط سواءً بايع او مشتري والموقف اللي حصل مع راعي الشاص بصراحة 2006 والحين 2009 وعقب رمضان موديلات 2010 بتنزل على خير يعني مازال الرجال مغليه حيل والظاهر علشان الموسم وعموما هذا بذمته وبينه وبين رب العباد.

اخوكم

[الساهر1]

والله انا اكثر من مره قلت السوم والبيع والشراء على المتصفح

وبالصوره هذا كلام فاضي ولاصدق من يسوم بهالطريقه

حتى انني قبل ايام كنت ابحث عن سياره اشتريها وبطت كبدي سومات

المنتدى

[باترول 82]

الخردة ---- خردة ----حتى ---- لو ---حطوا --- علية ---- وردة
هههههههههههههههههههههه
أضحك الله سنك

[طارق الحربي]

انت وش اللي رافع ضغطك ؟

خله ان شاء الله يقول مسيوم ب 100 !

اعجبك السعر اشتر ما اعجبك لا تشتري

[باترول 82]

حياكم الله بداية مشكورين يا شباب على الردود الطيبة مسألة السومات هذه عجيبة اذكر اني وبصراحة ادور لي موتر زين وحصلت باحد الاعلانات هنا سيارة وجذبت الانتباه واتصلت على راعيها وعاينتها سالته عن السوم قال لي 70 وسالته عن الحد قال 75 قلت له الله يرزقنا واياك اتصلت عليه بعد كم يوم اسال عن الموتر قال راح سالته بكم ما تكلم بالبداية وبعد الحاح عليه قال 70 هنا وضحت اللعبة كثير من الناس يقول للمعلومية مسيوم الموتر بكذا يجي واحد يقول غديك تبيع الموتر علي بنفس السومة عاد ما يصدق خبر خوينا الا يقول تم تم اساليب الغش والاحتيال كثيرة واسال الله ان يبعدنا عنها وعن اصحابها.
أخي الغالي كلامك سليم وان شاء الله ماعليه خلاف

اما مسألة المواتر القديــمة واسعارها المبالغ فيها فوالله كثير من الناس ينضحك عليها بهالمواتر وفيه واحد عرفته يجيب من هالخرد والرجيع ويصلح ويجدد ويبيع بمبالغ فلكية واقول بسلامته لانه لاقي مخفات اجل جموس موديلات قديمة اقيامها 30 وعليها انا ابغى اعرف وش الزين فيها الجموس الجديدة اقوى واجمل وافضل من كل النواحي.

والله يصلح الحال
اما موضوع المواتر القديمه شكلك مالك فيه خبره خله لأهله:no2: الله يحفظك كل سياره ولها عشاق
ارجو انك تاخذ كلامي بصدر رحب
ولك تحياتي

[صقر أمه 506]

انا لاحظت العروض في قسم البيع اندبلت 10 مرات بعد المقاطعه
واللبيب بالاشارة يفهم ..!!

[صقر أمه 506]

اما موضوع المواتر القديمه شكلك مالك فيه خبره خله لأهله:no2: الله يحفظك كل سياره ولها عشاق
ارجو انك تاخذ كلامي بصدر رحب
ولك تحياتي

ياناس لاتطلعون عن الموضوع الاساسي
حنا نتكلم بشكل عاااام - وهذي حالات خاصة - عن ارتفااع المستعمل وليس المشكلة في الارتفااع فقط
المشكلة اللعب بالسومات والتلفيق والغش يقول مسيوم خارج المنتدى بكذا ويعطيك سعر خياال
العالم الي..........؟ لجأت الى هذا المنتدى بهذي الطريقة
انتم مافهمتو مقصد اخوي عبدالرحمن


خلوها تصدي قديمها وجديدها

[kwa_198]

يبن الحلال كل هذا يهون ولا الي يعلنون عن الباث كنه معلن عن بنوراما اجل 2005 يقول حادة 65الف يستهبل علينا ولا مدري عنه

[abdulrahmanfd]

اما موضوع المواتر القديمه شكلك مالك فيه خبره خله لأهله:no2: الله يحفظك كل سياره ولها عشاق
ارجو انك تاخذ كلامي بصدر رحب
ولك تحياتي

نصيحة بجمل ونترك الشيء لاهله لكن نحكم العقل قبل ذلك والله المستعان نعم كل سيارة لها محبيها لكن الحب قطع قلوب البعارين............. والله يجزاك خير وانا اخوك

[abdulrahmanfd]

خلوها تصدي قديمها وجديدها

بارك الله فيك والظاهر هذا اللي بيحصل خلوها تصدي قديمها وجديدها

[abdulrahmanfd]

انا لاحظت العروض في قسم البيع اندبلت 10 مرات بعد المقاطعه
واللبيب بالاشارة يفهم ..!!



يعني الواحد هنا بين نارين الاولى الوكلاء وغلاء اسعار السيارات الجديدة والثانية الشريطية والاسعار الفلكية للمستعملة.
احس ان حملة "خلوها تصدي" فيها إنَّ!!!

والله المستعان :D

[الجماح البحري]

اشهد ب الله انك سنايدي وكلامك صحيح

[أشهب اللال]

وأنا أيضا أخالفك الرأي
ياخي اذا ماأعجبك السعر لاتشتري فلوسك في جيبك وسياراتهم عندهم
ماأحد غصبك تشتري منهم
مايشتري الا واحد راضي وراغب في السلعة
وبعدين إذا الواحد اشترى بغالي تبيه يبيع بخسارة خلنا بالعقل
اسف على التطويل وهذي وجهة نظري وأرجو تقبل مروري

[محمد بن سعيد]

يا رجال لاقي في المعارض جيب سفاري موديل 97 ماشي 290 الف الموتر بصراحة نظيف جداً لكن لا يستاهل مبلغه اللي هو 55000 الف ريال واعتقد انها قيمة 2001

[abdulrahmanfd]

يا رجال لاقي في المعارض جيب سفاري موديل 97 ماشي 290 الف الموتر بصراحة نظيف جداً لكن لا يستاهل مبلغه اللي هو 55000 الف ريال واعتقد انها قيمة 2001

اقول وانا اخوك 55الف قيمة فتك 2002 نظيف او 2003 بالامارات او قطر تصدق حصلت بمنتدى إماراتي إعلان عن فتك موديل 2004 ماشي 140 لؤلؤي وعلى كلام صاحبه نظيف وللبيع المهم اتصلت على الرجال وضح لي انه سفاري ماهو سوبر سفاري لكن ذكر لي ان الموتر تم بيعه على واحد سعودي :) سألته من باب الفضول بكم بعته قال والله بيعته كانت على 68ألف درهم وما اقول الا الله يبارك لراعيه فما هو رايكم الفترة الماضية يا جماعة بقطر حصلت جيب هدد 2000 اسود نظيف وممشاه حليل وكان راعيه حاده دون 50الف يمين يسار ما صدقنا واتصل عليه واحد من الشباب وبالفعل طلع هذا سعره ولاهنا زل بالكلام وواحد ثاني عارض هدد 2007 ممشاه دون 100الف وفل كامل حده 110 شف مثيله بالسوق عندنا كم يبغى فيه زبدة كلامي سوقنا كله شريطية اللي يبغى يبيع شريطي يبغى الربح القوي واللي يبغى يشتري شريطي يبغى يكسر السعر بقوة وما فيه حل وسط وما اقول الا الوضع عجيب والحكم لك يا اخوان.

والله المستعان

[abdulrahmanfd]

وأنا أيضا أخالفك الرأي
ياخي اذا ماأعجبك السعر لاتشتري فلوسك في جيبك وسياراتهم عندهم
ماأحد غصبك تشتري منهم
مايشتري الا واحد راضي وراغب في السلعة
وبعدين إذا الواحد اشترى بغالي تبيه يبيع بخسارة خلنا بالعقل
اسف على التطويل وهذي وجهة نظري وأرجو تقبل مروري

كلامك وانا اخوك على متمة والسلعة معروضة وباقية والدراهم بالمخباة وانا ما ادور الخسارة لأي واحد ولا ارضى بها لكن المعقول مقبول به وغير ذلك مرفوض ، الامر الآخر وين الذمة يا جماعة وين مخافة الله !!

[بن شمروخ]

شف يالغالي كلامك سليم 100%
لكن ترى في مواتر تستاهل ... طبعا على حسب النظافة وممشاها

لكن القهر اني رحت ادور ددسن للعمال عشان يشتغلون عليه ...لقيت ددسن موديل 90 لاحظ معي ددسن
وليست نظيفة لكنها زوينة تتوقعون بكم يالربع ... بـــ 21000 ليه ليه حرام ياناس ...هو سعره بالوكالة 30 الف جديد....قبل قبل 19 سنة شي يضيق الخلق
لكن لو تروح للكويت ولا الامارات اصلا يمكن ماتلقى بالامارات سيارات بهالموديل هع هع

وشرينا واحد من الكويت نظيف جدا موديل 94 طلعت علينا بعد التحويل بـ 22 الف لان الريال كان نازل

[يازين القنص]

خلوها تصدي قديمها وجديدها

[جول قميري]

اضم صوتي لصوتك اخوي عبدالرحمن

وبعضهم يقول السيارة مخزنة ماشيه 150 الف :confused:

وشلون مخزنة وهي ماشيه كل هالمشي :D

صدق شي غريب!

[black_list]

وأنا أيضا أخالفك الرأي
ياخي اذا ماأعجبك السعر لاتشتري فلوسك في جيبك وسياراتهم عندهم
ماأحد غصبك تشتري منهم
مايشتري الا واحد راضي وراغب في السلعة
وبعدين إذا الواحد اشترى بغالي تبيه يبيع بخسارة خلنا بالعقل
اسف على التطويل وهذي وجهة نظري وأرجو تقبل مروري




معليش يالغالي حنا انعرف ان كل واحد دراهمه بجيبه

لاكن مثلا تجي انت وترفع قيمة موترك وهو مايستاهل القيمه ثمن

يجي واحد مخفه ويشتريه ثمن تقعد تسولفه على الناس والنس ماشاء الله الحين تقل عجز بنقل الحكي

والله فلان باع نوتره ب50 الف والخ .......والخ

المهم بكذا اجي انا وارفع قيمة موتري وتيجي واحد يحد موتره بنفس قيمة موتري والخ....الخ


بعد كم شهر تلقا سوق السياره ارتفع وعيش حياتك مع هالمهازل
\

اجل في موتر امخزنه وماشيه 150 الف او 200الف

مثل الباترول كم كانت اسعاره قبل خمس سنين ......؟

والحين بكم؟:no2:

[Mohammed_S]

كلامك جدا سليم وفي الصميم

شف يا طويل العمر اعلانات السيارات خذ وخل منها ياما تشوف وتسمع سوالف

فوسع صدرك ولا يبط كبدك ولا يضيق خلقك وخاطرك هالناس لها اطباع وما يغيرها الا رب خلقها سبحانه

فلو لقيت موتر مثلا موديل 90 قيمته 40 الف ريال فقل الحمد لله اللي انعمني بعقل وفكر وادع للناس اللي تسوم على هالمواتر خصوصا الدرادع ان الله يزيدهم ويثبتهم

ولا تكدر نفسك ووسع صدرك وخل بالك بحر الا محيط بعد

والله يوفق الجميع