بصراحة جداً . . .

[منتعش]

بصراحة جداً . . .

الحمد لله وكفى ، والصلاة والسلام على الحبيب المصطفى ، أما بعد :
إخواني الأحبة :
كثير منا – إلا ما شاء الله - إذا أراد السفر ... أو طلعة بر ... أو كشته ... أو مخيم ... أو ..
يقوم بالاتصال على من يحب وعلى من يأنس بهم .
وترى الفرحة ظاهرةً عليه وفي تصرفاته ... ومن الفرحة تشوفه شقردي يجمع العزبة والعفش ويربط ويحمل ويهيجن و ....
وفي الطلعة ترى ساعة الصدر والسواليف والضحك والطبخ وعلوم الرجال ، وكل واحد يتمنى لو الإجازة تتطول .

ولكن يا شباب وبصراحة جداً ...

لو طلبت منه أمه أو زوجته أو أخته الذهاب معه أو السفر لترى العجب العجاب
( بصراحة وبدون مجاملة ترى الرجل متغير تغيراً جذرياً ) .
أين ساعة الصدر ؟
أين السواليف ؟
أين الضحكات والابتسامات ؟
تراه جالس وكأنه على نار يتمنى الذهاب والعودة . أليس هذا تناقض ؟!
بل وأحياناً تتمنى الزوجة لو أنها صديقك لما تراه من ترحيب وضحكات وحسن المعاملة لصديقك .
أين نحن من هدي النبي صلى الله عليه وسلم مع أزواجه :
ألم يقل الرسول صلى الله عليه وسلم : ( خيركم خيركم لأهله وأنا خيركم لأهلي )
الم يسابق عائشة رضي الله عنها ؟
الم يمازح زوجاتها ويداعبهم ؟
الم يكن في خدمة أهله ؟
قالوا لعائشة رضي الله عنها ، كيف كان صلى الله عليه وسلم إذا دخل عليكنّ .. قالت : ( كان يدخل ضحَاكاً بسّاماً ) برغم المشاكل التي تطوف بأمته والحوادث المستقرة على رأسه ، ولو وضعت على كثير من البشر لما استطاعوا حملها .
وفي الختام : آمل مراجعة أنفسنا وتقصيرنا في حق أهلينا .

[بركان]

رافق رفيق رفقتـه تفـرق بفـرق
عن رفقة اللي رفقته مثل فرقاه

[ابو شكاع]

ياسلام عليك

بارك الله فيك

طرح ممتاااااااااااااز وجميل

طيب وانا اخوك ......... ما تلاحظ مثلا ان بعض الحريم تقوم بنفس الدور

يعني اذا كانت مع شلتها تكون انواع الإنبساط والفلة والأناسة ........ وغير هذا تكون انواع التزين والتشيك ....... يعني بعض الأحيان المره اذا جات تروح لسهرة مع خوياتها تتمنى انها تكون معك ذيك الليلة ولاتروح لاحد ...لأنها تكون تغيرت تغيير جذري

ومن بكره ترجع لك الشوشة والقميص اللي مدري وش لون قايل :)

اما الأم فأنا معك .............. ومعك بعد في موضوع الزوجة والأخ بعد ....... لكن انا كنت اقصد ان العملية مزدوجة وموجوده هنا وهنا

وطبعا هذا مهوب تعميم ............ لا فيه حريم قمة في هالأمور مع رجالهن .......

عموما انا معك في وجة نظرك

وللاهل طبعا حق عليك كما لزملائك

وهلابك

ولاهنت

[الضاري]

السلام عليكم ورحمه الله وبركاته

أشكرك أخي العزيز الشريف على طرحك لهذا الموضوع الصريح..

أولا – الرسول صلى الله عليه وسلم قدوتنا ولكن لايمكن أن نكون مثلة أبدا فهو متميز عن بقيه الخلق بحسن معاملته.

ثانيا – لايمنع أنك تاخذ أهلك لطلعة لمدة يوم ويكون النوم في المنزل .. وذلك لأنك صعب أنك تأمن على أهلك في البر.

ثالثا – أغلب العائلات يكون معهم أطفال وهم معرضون للمخاطر والأمراض بحكم جهلهم للكثير من الأمور مما يفسد ويعكر عليك الطلعة .


أخي ابوشكاع .. أضحك الله سنك

(((((((( ومن بكره ترجع لك الشوشة والقميص اللي مدري وش لون قايل ))))))


عندما قرأت ردك تذكرت سالفة لواحد من الشباب رأيته يأخذ أهلة من قصر الأفراح في أحدى مناسبات الزواج في أجازة الصيف قلت له :- زرنا بالأستراحه الليلة ..
قال : (( وهو شكله باين أنه مستعجل )) يارجال بعدين أبروح أمكن تالي المكياج قبل مايروح.. :D :D :D

[عبدالله العمير]

تسلم والله على الموضوع الهام

الي بالصميم حقيقة

واتمنى ان نقوم بة ان شالله لان التقصير حاصل

ولي اضافة

اذا اردت انا اكشت فهذي بمزاجي وبرغبتي وهوايتي

لذالك تلقان الحجاج منفل يالا العلبات

والكشرة من الاذن للاذن بس قضبون الطارة

لكن اذا جت روحة للاهل انت مانتب راغب بالحيل

او مانتب متحمس او خابرن وش وراه من مشاوير او امور

ماهي من اختصاصك او مانتب مستهوية من قبل

فأكيد راح تصير اقل حماس وقرامة وكشرة

حتى لو انة كشتة مغصوب علية او روحة مالك مزاج به

ماراح تنبسط

يعني كل كلامي الواجد يعني

اذا كنت ماستهويت الروحة راح تتغلق ايا كان الخوي

صديق او أهل

[((( الحر)))]

اخوي الشريف بارك الله فيك وكلام بالصميم .... والله يعينا على انفسنا والشيطان...!!!

اخوي بركان بردك بيت مترادف جزل المعاني ياليت تورد القصيده كاملة ولمن هذه القصيده...!!!

تحياتي.................ابومحمد...!!!

[منتعش]

الأخ الحبيب / بركان أسعده الله
شكراً على هذه المشاركة وعلى حرف ( ق )



الأخ / ابو شكاع سلمه الله
ألم تعلم أن المرأة خلقت من ضلع أعوج .
ويا أخوي ابو شكاع : لا تقابل الإساء بالإساء ولكن قابلها بالإحسان .
وإذا أحببت من الزوجة التجمل وحسن المنظر والتعطر لك ، فأنهن يردن ذلك أيضاً منك والشعور متبادل من الطرفين ، ألم يكن الرسول صلى الله عليه وسلم عند دخوله إلى البيت يستاك أي يستعمل السواك .


الأخ / الضاري المحترم
إذا كان الرسول صلى الله عليه وسلم قدوتنا فحري بنا أن نقتدي به ، ونحاول أن نسيرعلى أثره .
ويا محب : لا بد أن نتحمل الأطفال والصبر على أذاهم والحلم معهم وتعليمهم وتعويدهم على الخدمة ومعرفة الأشياء التي في الرحلة .
وعلينا أن نختار الأماكن التي تناسب العوائل .


الأخ / الأزرق حفظه الله
ما قصرت . وآمل أن تكون رحلة أو طلعة الأهل مثل طلعة الشباب .


الأخ / الحر رعاه الله
تسلم لي يا بعد حيي

[الباهي]

تسلم اخي العزيز على موضوعك

بالفعل تحصل هذي الامور وانا مع راي اخي العازمي

اخوك
الباهي

[محمد العبدالسلام]

انا اوافق اخي ابو شكاع في ما قال واشكر لك اخي مشاركتك ولي إضافة بالنسبة للاصحاب لهم حال والاهل لهم حال فمثلا انت تبي تطلع رحلة قنص كلها تعب وتكاليف معقوله بتروح بمعك زوجتك واهلك !!
لكن لما تبي تطلع كشته ووقتك كله يروح بالاكل فطور ثم بعده قهوه و شاهي وصحون مليانه من انواع الحلى وما ادري ايش ثم غدا وبعده صحون بعد تحتار وش تاكل والعصر بعد شاهي وفصفص وبالليل العشا وبعده سهره فاظن ان الروحه مع الاهل تكون وناسه وسلامتكم

نجـ أبن ـد

[محاذر]

السلام عليكم ورحمة الله وبركاته

الشريف اشكرك على الطرح الرائع للموضوع والردود الاروع :good:

كلامك انا لا آخذه بقاعدة التعميم لاني شخصيا" اعرف ناس مايحب يطلع الا مع اهله بس وتلقاه فلة احجاج ............ الخ

واذا طلع مع طيور شلوى تلقاه ظايق صدره يعني هذا عكس الاول اللي انت تحدثت عنه

يبقى النوع الثالث واللي يعرف كيف يقيس الامور ويوازنها الاهل لهم حق والربع لهم حق وهكذا تسير الامور

بس عندي ملاحظه /

ترى فيه امور تصلح للشباب من ضحك ومقالب و.................. الخ ماتصلح مع الاهل يعني مع الهل لازم

يكون فيه تقيد بحكم العادات والتقاليد :rolleyes:

اتمنى ان تكون فهمت ما اقصد

اسلم وسلّم

[أبو نشمي]

ما أجمله من موضوع لك كل التقدير والإحترام يا أبوشرف..

وإنما هذا يدل على تمسككم بجدكم أسوتكم عليه الصلاة والسلام...

وليس هذا بغريب عليكم أهل بيت محمد صلى الله عليه وسلم , بوركت اخي

وبوركت هذه الصراحه , أسأل الله ان يجعلها في ميزان حسناتك ونسأل الله

شفاعة جدكم عليه الصلاة والسلام يوم تبيض وجوه وتسود وجوه ,


بارك الله في الجميع .

[دكتور شبعان]

السلام عليكم ورحمة الله وبركاته

جزاك الله خير على طرح هذا الموضوع الحساس

نسأل الله الكريم ان يرقق قلوبنا مع اهالينا

[منتعش]

أخي الباهي / سلمه الله
أقدر شعورك الطيب المتبادل .



الأخ أين نجد/ المحترم
أوفقك يا أخي بأن طلعات القنص والطلعات الطويلة جداً لا تتناسب مع الأهل لعدم قدرتهم على التحمل .



الأخ محاذر / سدده الله
صدقت فهناك أشخاص كما قلت ، ولكنهم قلة .
ومن منا لا يحب أن يطبق قول الرسول صلى الله عليه وسلم : خيركم خيركم لأهلة وأنا خيركم لأهلي .
ويا أخوي على الشخص أن يكون لبيب ويوزن الموازين .
وعلى فكرة يا أخوي ( لا تفهم من كلامي بأني لا أوأيد طلعات الشباب ، لا بل أطلع ووسع صدرك معهم ولكن لا تنسى الأهل ولو بطلعة واحدة )



الأخ أبو نشمي أسعده الله
تراك كبرت راسي وأحسنت الظن .
أسأل الله أن أكون عند حسن ظنكم ، والله أسأل أن ينفع بالموضوع .



الأخ دكتور شبعان وفقه الله
أقدر لك شعورك الطيب .
وأسأل الله أن يرقق قوبنا لأهلينا وأحبابنا .

[مشغول]

هلا وغلا ومرحبتين كبار

يا سلام عليك يالشريف موضوع في غاية الأهمية

وتشكر عليه .. والله يعينا على الأهل وطلعاتهم ..

وكلام ابو نشمي في محله :)

[منتعش]

الأخ العزيز والغالي / مشغول حفظه الله ورعاه وسدد خطاه
الله يجزاك خير على العبارات الطيبة ، وصدقت يا أخي الله يعينا على طلعات الأهل .
ترى مشتاقين إلى مواضيعك المميزة .

[المرقاب]

السلام عليكم ورحمة الله وبركاته
موضوع جيد وفي الحقيقه أدخال السرور على الناس والأهل خاصه امر مطلوب, والله يجزاك خير اخي الشريف والجميع.


طيب الي اهله ما يحبون البر وش يسوي. :confused:

[عبدالعزيز الدباسي]

بارك الله فيك اخوي الشريف ، ويعطيك العافية على هذا التذكير الجميل ، بالاهتمام بالاهل وخصوصا الام
الله يرزقنا واياكم البر بوالدينا ، والاحسان لأهالينا

[منتعش]

الأخ / المرقاب حفظه الله
الله يعطيك العافية على العبارات التشجيعية .
والي أهله ما يحبون البر يعوضهم برحلة أو سفرة داخلية ترفيهية .




الأخ / شقردي أسعده الله
الله يسلمك ، والله يعينا على حقوق أهلينا .

[خشم الحصان]

الاخ الغالي
الشريف
السلام عليكم
شف اخيي كلامك اوله زين الله يغفرلك ويرفع من قدرك محناب مختلفين عليه الاختلف بعد كلمة(لو طلبت منه
امه او زوجته او اخته) هذي الي مختلفين عليه والغبره بتثور منه بتقولي ليش انا اقولك.
1-الحين حطيت الحره فينا يالرجاجيل كننا عيال مطلقه كلن يصوعهم من صوب مره حكمت والدليل يومك تقول
(( بصراحة وبدون مجاملة ترى الرجل متغير تغيراً جذرياً ))
اين سعة الصدر اين السولف اين
:D :p مهيب هاذي اسئلتك خلنا نبدا من بداية الرحله.
ياشباب تري بكره بعد الدوام(الاربعاء)تراء بنتغداء في التنهات زين كل واحد يولم عغشه وعدته يردون طيب يابابا زين لاتنسون يردون ان شاء الله يايبه ثم تلتفة الي الزوجه ولاها لهيه اما ترضع او غاديه الخشه خبز شريك او شابور سمسم من قشام الحب اقول يالغاليه تري باكر نبي كل العفش زاهب يعني ولميه ثم ترد عليك
الله مير يسلمك يابو ....... مع صياح الديك ولا كلش زاهب الله كبر (كنها فدائي او فلاح بتقوم مع صياح الديك)
واذا جيت من الدوام يعني الساعه 11 مستاذن الي البيت ولك مبسوط يعني في مخيلتك ان كل شي والم ولك تنصدم
او كنك واحد عثر في درجه ولا في ظلماء ومتدري وش بيردعك الحبيبه مابعد قامت من النوم او انها توفيك في الدرجة البيت كنها مسكها الكهرب او مثور فيها الغاز هه ورك ماولمتي العفش ويه قلت ابا نسهل شوي عقب ماقومت البزران للمدرسه كان تخذني نومه هذا او صدمه.وتبي صدورنا تستاسع اخيي
2- ثم يبداء الصياح والنياح اذا جو الذريه الله يصلحم وين كنادري يمه شفها فوق الدلوب يامال الجالد
وين سيارتي ومنهو الي ماخذ جيبي ويه نسيت اعلمك ماخذه ولد اخوي ثم ووووووووووو كنه جهاز انذار يبه امي معطيتن ولد خالي سيارتي اشترلي وحده ثم تجي ثاير ورك تعطينه السياره ترد ويه نشب في امه الا يبي السياره ذاك اليوم كان اقول خذوها والثاني وين سيكلي يمه شفه ورا السور منطول ثم يجيك منطلق تقول صابونة مسك طايحه منك في البانيم وانت تروش وووووووووووو بندق وش فيك سيكلي مبنشر راكب عليه اخوي الدب وفقع استكه مربي علي راعي السياكل نغير .
والبنت يمه وين العابي وعريسي شفيهن تحت بيت الدرجه جعلك المخباط ثم تجي الله يصلحا ووووووووووو
وشفيك يابنيتي الجرذي ماكلن عريسي مهيب مشكله نشتريلك.
هذولا البزران الله يصلحم وحنا في البيت.
2- جمعنا عفش الرحله بعد معنات وكم هوشه وكلن في جهه يصيح وينشق حيل الله اقوي اركبو طيب يايبه
صكو الباب البيت.
في السياره وخر عن دريشتي الا وخر انت هذي دريشتي مهوب انا صح يبه مهيب دريشتي انا الا ونبوك دريشك
ووووووووووووو وشفيك ونبوك ايه منتاب تحبني تحب اخوي ادامني بنت يابنيتي احبكم كلكم اجل ورك تقوله
هذي دريشك انت خلاص.مهيب مشكله هذي دريشك انتي ووووووووووو وشفيك ياولدي دزتني اختي وخذت درشتي ثم تدق فرمل وتلتفت اقول اهجدو جعلكم الج...اليتم الي مايدوره احد انثبرو يامال ........ وخذ زعاق وصياح ثم تلتفة يم الحبيبه يبنت الاجويد هجدي البزران وعقليهم ترد وش تبيني اسويبهم هذني مقبلتهم 24 ساعه .
3-وصلنا البر
نزلو العفش ياشباب ثم وخر عن هالعفش صحن ملاس زمزمتين كيسين رز بخاري + دجاجه ثم تغدينا وشربنا هاك للبينه او السفن البويرد ثم تقلبة هاك العيون تقول عداد طرمبة بنزين ثم تسدحو كلن في جهه تقول بعارين مصدمه علي جال خط واذا صحو وتجمعتو وكلن قام يلعب وانت ويا الغاليه جالسين تسولفون عاد وش
هالسوليف نقاش علمي ابد هذي اعرست وهذي طلقة وهذي حنق عليها رجلها واوه منكم يالرجاجيل كل ماطق عود عود حنقتو علينا يابنت الاجويد تركم ظالمينا ترد ابد ابد بسم الله علي منكم وشوي صاح الولد وووووووووو وشفيك غزتني شوكه وراء ملابست كنادرك .فيها طين ووووووووووووو ولا البنت جايك تصيح
وشفيك جاني شي اسود ورقاء علي عروستي ولا قمت لقيته قبون ثم تحلو الجلسه وتبداء السوليف مره اخري
ولاك غافل عن الصغير ثم تزعق الصغيره يمه يمه يمه وشفيك اخيي الصغير ياكل ترب ثم تطمر الام وتجيبه مع قبصه وخبطه انثبر فيذا ثم تقول لها يبنت الحلال خليه يلعب مهوب ضاره الترب هذانا منول ناكله ولا ضرنا
ايه مضركم ..... هذي عقولكم يابسه وسبه هالتراب الي ماكلينه منول مهيب مشكله يالله نسولف والا اقولك قومي نتمشي رجليه في البر الزين اي والله انك صاز كوه نتمشي وشوي ولا احد العيال وراك يبه وين بترحون ابد ونا بوك بتمشي ويا امك اجل ابروح معكم والبنت كذالك ثم خالينا العده بلحالها .
4-ثم تلتفة علي ام العيال وتقول لها وش رايك نتسابق مع انك تضن انه من الصعب عليهن ذالك والسبه من الرسوبات الاكليه الوضحه عليهن من الزويد الجسميه ثم تلتفة عليك وتقول .....منتاب صاحي ادري عنك تبيني ازلق او اعثر وتعور وتعرس علي هذا الي انت دوره....... ولا من متا ونت خبرنا نركض يالحريم يابنت الحلال رياضه يالله انا طلبك تكفين واذا وافقة قالت خلك قدامي وانا وراك .....ليش مهوب هذا سباق.... قالت ادري فيك
تبي تطنز علي ........ ثم تسابقنا وبعد فتره توها تاصل الغاليه وانت جالس لك عشر دقايق ثم خذ فحيح ونونه
واذا اضلم الجو يالله ياشباب جمعو العفش يالله اركبو نبي نمشي.
ورجعنا الي البيت خذ تنقيل عيال نايمين و وعفش نصفه ناسينه في البر
واذا جاء وقت النوم خذ ونونه و تشكي اييه ايه ايه وشفيك تونونين موطي رجلي تعورني وعظامي رح لم الصيدليه او البقاله جبلي فقس ابمرخ رجلي كودها تهجد طيب
وفي اليوم الثاني تلقي الغداء ماصلح ورك الله يهديك ماصلحتي الغداء .....قالت والله يالبارح ماجني النوم صالت علي رجولي ومر في كبدي وصل حلقي
ثم تبي ياخيي الشريف نراجع انفسنا اضن ياخيي ماقصرنا عليهم بشي بس هم مودهم يتقلمون معنا
هذا فيض من غيض الله يغفرلك ويرفع من قدرك اخيي
اخوك
خشم الحصان

[منتعش]

أخي المحب / خشم الحصان أسعده الله
يقول الرسول صلى الله عليه وسلم لأحد أصحابه : ( ان فيك لخصلتان يحبهما الله ورسوله الحلم والأناة )
أين حلمك وصبرك على الأهل والأولاد ، تبي تصير أبو ببلاش .
وطلعه ما فيه اللعاب ومسابقات وأفكار وحلق ذكر وجوائز ماتصير طلعة حلووووه . عليك أن تشغلهم بما ينفعهم .
وعليك الاستعداد لها مثل ما تستعد لطلعة الشباب .
واصبر وتحمل أذى الأطفال ، كما تتحمل وتجامل شخص طلع معكم وهو ( بثر أو نشبه أو غثيث ) .
وأخيراً : اللهم أرزقنا الحلم والأناة ، اللهم هبلنا من أزواجنا وذرياتنا قرة أعين .

[المرقاب]

السلام عليكم ورحمة الله وبركاته
الله يوسع صدرك بالعافيه يا خشم الحصان,تصدق كأني قاعد اشوف مسلسل.
بس بيني وبينك بعض الشباب اليوم ما هوب بعيدين عن.....اذا واعدته 10 جاك11 والثاني عقبه بساعه وعلى هالحاله الى العصر واذامشيتو بدا المسلسل تراى يبيلنا حطب رز الخ , عاد مافيه كلام وقف اشتر ثم رتب العفش من جديد لأنك حول المغرب ولا عاد يمديك تشوفلك مكانن زين وهكذا.............الشاهد انه مع هالحوسه تستانس.
فالواحد لابد انه يحط في باله انه طالع طلعه فيها وناسه وتأمل وتغير جو سواءً كانك مع الشله او مع الأهل.
ولآ وش رايك اخوي الشريف.

[منتعش]

الأخ الحبيب / المرقاب حفظه الله ورعاه
الله يبيض وجهك .

[المنتظر]

السلام عليكم ورحمه الله وبركاته

بصراحه موضوعك........................:good:

وجزاك الله الف خير والله يعطيك على قد نيتك


وتقبل تحياتي....................

[منتعش]

الأخ / المنتظر أسعده الله
أشكرك على الكلمات الطيبة والله يحفظك ويرعاك .

[Rahhal_xp]

تسلم يمينك أخوي الشريف على الموضوع الهام والشيق في نفس الوقت..

[منتعش]

الأخ الحبيب / ganderone حفظه الله
الله يسلمك ويحرسك ومرحباً بك .