عندي مشكله في قير الفتك ...... [الأرشيف]

مشاهدة النسخة كاملة : عندي مشكله في قير الفتك ......

راع الطويلات

15/02/2009, 06:01 PM

السلام وعليكم ورحمة الله وبركاته ياخواني جمعيا وبعد :
لدي الموتر الله يخليه لي باترول فتك 2004 محافظ عليه مثل عيني لكن اليوم الصبح بعد خروجي للدوام الصباح عشقت القير و مشيت ( تماتيك ) و لاحظت الموتر مايبدل شاد بالنمره الاوله و اقف و اطفي السياره و ارجع و اشغالها و ترجع الامور كما كانت ياترا ماهو السبب و ما الحل ؟ جزى الله من شارك في حل هذه المشكله كل خير و جميع الاعضاء .

بدوي جنوبي

15/02/2009, 08:24 PM

عليكم السلام ورحمة الله وبركاته

يقولون السيارة اذا دلعتها:heart: قامت تطلب :redcar:
كثير ،، واذا دقيت خشمها تسلك معك
وما تخرب ،، لكن مو سواقه هبال :no2:

المهم الحاله اللي حصلت غريبه يمكن القير
لخبط عند التغيير (ما لقيت تفسير غيرها)
وبعد ما طفيت وشغلت اكيد انعادت البرمجة للسيارة والقير خاصة

والله اعلم :D

تحياتي

البيطار

15/02/2009, 08:28 PM

حركة معهودة من الفتك لا يضيق صدرك
و التعليق يكون بالثالث
و العلاج بس بدون تعجب طف السيارة و أقلب المفتاح و توكل على الله
^^^
الزين مايكمل و هذا اللي أعرفه مع انعدام الخبرة

خزامى الغاط

15/02/2009, 08:28 PM

راعي الطويلات جرب امغطه دعسه وحده وراح يغير معك غصب

ويرجع مثل ماكان

تقديري

القناص

15/02/2009, 09:11 PM

في بعض الاحيان

ودون ادنى مسؤلية

اذا كانت البطارية قديمه أو ضعيفه (يعني أقل من 90 أمبير) تأثر على البرمجه بشكل عام،، وقد تؤثر على توقيت تغيير نمر الجير

انصحك بتشخيص المشكله عند الوكيل على الاقل،، قبل الفك والربط

ما تشوف شر

سيارتك ما فيها الا العافيه

:)

ابن عكاش

15/02/2009, 09:21 PM

مدام الموتر رجع زي اول الحمدلله وترى السيارات تجيها خمات قد تكون من سبب وقد تكون من غير سبب
انا كان معي هايلكس 2002 احيانا وانا واقف ينتفض الموتر تقل مفصول احد اسلاك البواجي ادعس ينتفض شوي واخليه ثم يرجع طبيعي ولا فكرت ادور السبب لأن مثل هالأ شياء تخسرك وهي مافيها مضره وكلن يفتيك وهو من جنبها
تقبل مروري اخوك ابوصقر

راع الطويلات

15/02/2009, 10:06 PM

الله يبيض و جه كل من رد على استفساري يوم تسود وجوه .

بردوق صندقان

15/02/2009, 11:10 PM

اخوي اهم شي لايقربك الوكيل (: ترا ماعندهم سالفه ولك تجربتي
عندي فتك 2002 سوبر وصار مشكله بالقير نفس اللي عندك بس يعلق بالثالث ولا ينفع دعس على الموترولاشي وتشتغل لمبة بالطبلون وقتها بعدين اطفي واشغل مره اواكثر ويظبط المهم عجزت من الوكاله ابي حل يقولون يكلفك اكثر من 3000 ولاهواكيد اخرتها صلحته بالقصيم عند ورشه اسمها الشيبان فيها واحد فلته سعودي لاكن دوامه على كيفه وكلفني 600 ريال وازيدك اعطاني ضمان سنتين لو رجعت المشكله بعدين انتبه تغير الزيت على كلام الوكاله مايتغير ونوعيه مخصوصه ماتحصله الا عندهم وقيمة السبعه لتر حول700 ريال ناسي بالظبط لأني غيرته عند ورشه وبغا يجيب العيد ويركب زيت احمر حق الامريكي وانتظرت الوكاله يومين حتى وفروه لي
(السالفه ومافيها برمجه للقير وتغيير او تعديل قطعه داخليه)

راع الطويلات

15/02/2009, 11:15 PM

اخوي بردوق شاكر مرورك و مع اسفي للك لي تجربة مريرة مع الشيبان في باترول سابق 2002 كاد ان يخسرني 7000 ريال لكن ستر ربك . اكرر شكري للك

Black VTC

16/02/2009, 12:26 AM

مشكلتك بسيطة جداً جداً جداً ... راح تكلفك 65 ريال و مشوار لاقرب قطع غيار عند الوكيل

افتح الكبوت ...

افتح علبة الاكتاوتات على يسار الماكينة ( يمينك وانت فاتح(ن)الكبوت ) ..

شف الاكتاوتات ذات اللون الازرق وعددهن ثلاث ... جنب بعض هن في البداية يم جهة السواق ..

اول واحد بدله بجديد وراح يروح التعليق ان شاء الله ..

اذا انت منت فاضي هاليومين تروح للوكالة شف الثاني يعمل نفس الاول بدلهن مع بعض لان الثاني خاص بانوار الريوس على ما اعتقد فما هن مهمات والاول مسئول عن كهرباء حساسات القير عشان كذا هو الاهم ...

بدلهن وادع لي ولمن اخبرني بحل المشكلة في هذا المنتدى الكبير ...

راع الطويلات

17/02/2009, 12:43 AM

الله يوفقك اخوي لما تحب و يرضا و يحقق لي و للك كل امنياتك . ( احسن انك وضعت يدك على الجرح ) مع احترامي لباقي الاخوان .

ردااااد

17/02/2009, 08:18 AM

معليه هذا امر بسيط صايره واياي كذا مره اشلع اصباع البطاريه مدة ساعتين وركبهم ثاني مره وانشاء يبدل ثاني مره وياك تقبل مروري

ابوريما99

17/02/2009, 08:25 AM

مقلع الرمث

17/02/2009, 08:27 AM

ياراعي الطويلات انصحك انك باااسرع وقت تغير زيت القير وبسررررعه لانك شكلك من زمان ماغيرته او تحصله ناقص ولا دريت عنه لذالك الحق على قيررررك والسلام عليكم

سوبر VTC

17/02/2009, 08:53 AM

و عليكم السلام و رحمة الله
حياك اخوي
الاخوان ما قصروا
خصوصا ان المشكلة غالبا ما تكون من الكتاوتات اللي بالرفرف
و لا تعدا الكهربائي ابو ابراهيم العثيم
عموما
مشكلتك هذه مشابه نوعا ما
لكن يختلف المكان
الجمس و اليوكون م2007 و م2008
ايضا الشيروكي التماتيك
ايضا باترول تماتيك م98
اليوكن يتم تغيير منظم القير (كمبيوتر) غالبا تكون يسار القير او بورد
و تسمى (ترانس ميشن كنترول)
بمعنى كنترول التحكم بالقير
و موجودة باليوكن م2007 و طالع و هو عيب مصنعي
نفس المشكلة موجودة بالباترول تماما + احيانا ينظف الحساس حق النمرة و يكون بداخل خارطة القير او ما يسمى بالمخ
الشيروكي
يتم تنظيف حساس النمرة خصوصا الاول و الرابع
و هما اساس المشكلة له
و احيانا يتم استبدال المنظم

الزيت ليس له دخل الا اذا كان الزيت حرقان جدا
بمعنى ان الموتر ماشي مليون كيلو :d
هذا اذا الله كتب لنا عمر

تحياتي لك

سوبر VTC

17/02/2009, 08:56 AM

اضافة
ترا احد ربعي معه فتك تماتيك م2003
دخل الماء على القير و خبط و كلفه 7000الاف ريال
و صلحه عند ورشة العثمان بتشاليح بريدة
و حط اديتر خارجي للقير
لذلك احتياطا
عاير ماء الاديتر لا يكون به زيت
ايضا
اي موتر اذا دخل بشعيب و دخل الماء بالكارونة مثلا
يكون الماء تحت و زيت الكارونة اعلى الماء بحكم ان الماء اثقل
فتفك الصرة الى ان يخرج الماء من الكارونة
انا قربت لك الصورة اذا كان بالامكان تفك صرة القير
اذا كان له صرة
و تشوف هل يطلع ماء او زيت
لانه يحتمل ان ان به نسبة ماء
لان الماء يدخل من خلال سيلة او وجه مبرد القير اللي بداخل طبات اديتر الماء

العذر و السموحه اوجعت راسك بكثر القرر :d

VTC

17/02/2009, 09:24 AM

السلام عليكم ورحمة الله وبركاته

بنسبة للمشكلة عندك يبدو ان الحل عند اخوي عاشق من 2007 على هذا الرابط
http://www.mekshat.com/vb/showthread.php?t=82233

وبنسبة لكلام اخوي سوبر فتك اقول اخوي مسألة ان المويه تدخل في كوارين وقير الباترول من السيل صعبه جدا الى اذا غرق الموتر تقريبا على حد القزاز لأن جميع فتحات تهوية الكوارين مرفوعه بليات الى حول البدي وبنسبه للقير والدبل مرفوع بليات في احد الرفاف
بعكس الاندكروزر دايم تدخل الموية في الكوارين والقير بسبب ان التهوية فوق الكوارين والقير على طول بدون اي تغطيه جيدة

وبنسبة وضع اديتر خارجي للقير فكرة ممتازه.

وبنسبة ان المويه اثقل من الزيت كلام صحيح بس مع سرعات عاليه ودوران الزيت بسرعه مع حراره يختلط الزيت بالماء وينتج عنه زبد ابيض واكبر دليل عليه اذا اختلط الماء بالزيت في المكينة اذا فرغت الزيت تجد عليه زباد ابيض ولا تجد مويه صافيه واضحة الى اذا على طول فرغته قبل ان يختلط

فلذالك يصعب جدا فصل الماء عن الزيت بعد الاختلاط واسلم طريقه هي التغيير

سوبر VTC

17/02/2009, 11:50 AM

حياك اخوي فتك

وبنسبة لكلام اخوي سوبر فتك اقول اخوي مسألة ان المويه تدخل في كوارين وقير الباترول من السيل صعبه جدا

انا ضربت المثال من اجل تقريب و توضيح الصورة فقط و لم اقل ان كوارين الباترول يدخله الماء :)

وبنسبة وضع اديتر خارجي للقير فكرة ممتازه

العثمان يضع ادتر خارجي و يكلف من 600 الى 700ريال

وبنسبة ان المويه اثقل من الزيت كلام صحيح

تاكيد لكلامك
عندنا القيرات حقات رشاشات المزرعة (المحاور)
اذا فكينا الصرة خرج الماء اولا

اذا اختلط الماء بالزيت في المكينة اذا فرغت الزيت تجد عليه زباد ابيض ولا تجد مويه صافيه واضحة الى اذا على طول فرغته قبل ان يختلط

للفائدة
اذا بغيت تعرف ان راس موترك هل هو سليم ام لا
او هل هو منشعر ام لا
اجلد الموتر بمشوار مثلا 10 كيلو
بحيث انك مرة تدوس و مرة توقف فجاة بحيث ان المكينة تحتمي
ثم
افتح غطاء زيت المكينة
اذا حصلت حليب او زبد بياض
على نفس الغطاء
فاعرف ان الراس منشعر او يوجد سبب اخر
تحياتي لك

راع الطويلات

17/02/2009, 02:02 PM

اشكر جميع الاخوة وبيض الله و جيهكم و ماقصرتو اخوي سوبر فتك يعني رايك اروح للعثيم علما ان الموتر ماشي 115 كم

راع الطويلات

17/02/2009, 04:40 PM

للرفـــــــــــــــــــــع