المساعد الشخصي الرقمي

مشاهدة النسخة كاملة : سيارتي الديزل ماتمشي الا 110؟؟؟


المري
19/04/2004, 08:44 PM
السلام عليكم

كيف حال الاخوان.. عساكم بصحة وعافية..


اخواني الاعزاء عندي مشكلة في سيارتي وهي Deer ديزل موديل 2004 توني شاريها

وكل شي زين فيها بس فيها شي وهي انها سرعتها ماتتجاوز 110 كلم..

فما السبب؟؟ هل هي مربوطة من وكالتها...؟؟؟

وكيف اعرف هل هي مربوطه على سرعة 110 ام لا؟؟

في انتظار اجابتكم.

اخوكم / المري
بـــدر
19/04/2004, 10:07 PM
السلام عليكم ورحمة الله وبركاته
كيف حالك يالمري، ودي اعرف قبل ما ادلي برآي كم سعه المحرك وهل مزود بشاحن نفاث (Turbo) ولا محرك عادي؟
ونشالله اقدر افيدك
المري
19/04/2004, 11:42 PM
سعة المحرك اربع بستم

والمحرك محرك عادي لا تيربو ولاشي..


وسلامتك يابدر وفي انتظارك ..


اخوك / المري
مهيلان
20/04/2004, 12:15 AM
اخوي المري السلام عليكم

ان كان سيارتك مثل الهايلكس
فعندك في طرمبة الديزل مسمار مشمع بالرصاص

وهو اللي مثبت الدعسه على 110
لكن اقترح عليك انك تدوس على الابنص والسياره واقفه وفاضيه

فاذا وصل الضغط للاحمر فمعناه ان السياره اعطتك كل ما عندها وهذي قدرتها


والسلام
أيمن
20/04/2004, 12:46 AM
بالفعل راي الحبيب مهيلان صائب ويعطيك الخبر الأكيد ..

تحيتي
المري
20/04/2004, 03:21 AM
تسلم اخوي مهيلان وسوف أجرب وأرد عليك..

**********

مرحبا اخوي أيمن

وماقصرت يالغالي..


اخوكم / المري
ابو شكاع
20/04/2004, 05:58 PM
عندك بدر ......................... ولاهوب قصور بمهيلان

ترا بدر ما شاء الله عليه ذيب

والجميع بهم خير

بس بدر ما يعطي من روحه .........مهوب يدخل مكشات واجد والا هو انسان فاهم ماشاء الله عليه
المري
20/04/2004, 06:58 PM
تسلم اخواني جميعا وماقصرت

وخاصة الاخ مهيلان فعلا رحت لسيارتي اليوم الصباح وشغلتها ضغط على البنص

ويوم ناظرت فاذا الضغط واقف على الثلاثة ادس البنس قال: ابد مااطوف هالثلاثه


المهم يوم وصلت البيت اليوم وانا اخبر الوالد قلت : الربع في مكشات قالوا كذا

وكذا والعلم اكيد السيارة مربوطة ويقولون في الطربه مسمار مضروب برصاص


قال: افتح الكبوت ويوم فتحنا كبوت السيارة وناظرنا في طربة الديزل شفنا المسمار

ابو رصاصة, المهم كسرنا الرصاصة وحاولنا نفتح عليه اشوي ماهوب راضي

وبكرة ان شاء الله بروح به للكراج وان شاء الله اخليهم يفتحون عليه اشوي..


في النهاية قال لي الوالد : ماهم بسيطين ربعك في مكشات (( والله يالربع لاتقولون

اني اقول الكلمة مدحة في المنتدى والله هذا كلامي والدي وهو مايعرف المنتدى))

بس ان اخبره بكل مايصير من اعلوم الحياء واعلوم المراجل ..


تسلمون جميعا وماقصرت

وشكر خااااص لأخي مهيلان وتراك كاسبن معروف يالنشمي..


اخوكم / المري
بـــدر
21/04/2004, 02:11 AM
السلام عليكم ورحمة الله وبركاته
وكيف حالكم يا اخوان،،،
أخوي المري مساك الله بالخير واسف على التاخير لاني مسافر وتوي ارجع.
يا المري انا يوم سالتك عن سعة المحرك اقصد سعة المحرك من ناحية الحجم مثال(2400cc) ، وانت رديت (بعدد السلندرات) بس ماهو مشكله
وسالتك عن التيربو بس عشان اعرف وش نوع المحرك واقدر ارد على قدر السوال ، لان اغلب مشاكل السرعة من التيربو احينا يقفل ويصير ما تتعدى السرعه 120 كلم وهذا قد صارت معي شخصياً.
بالنسبه لحل:light: مشكل السرعه في سيارتك زي ما تفضلو الاخوان فيه مسمار يكون مبرشم موزون من الصانع نفسه ، يعني يفضل انك ما تغير فيه شي
وهو مو عشان يحدد السرعه زي ما يتوقعون الاخوان
هو صمم عشان ما يكب وقود الديزل اكثر من حاجة المحرك يعني محرك اربعـة سلندر قوته الحصانية ما تتعدى
(90) حصان فقط ، لاكن لو فكيت المسمار هذا راح ينزل وقود اكثر من الحاجه وراح يطلع دخان اسود إشاره ان فيه ووقود غير محترق وراح تزيد السرعه بس ترى على حساب طاقة المحرك يعني تجهده وتقلل من عمره الافتراضي
انا من رائي الشخصي انك تفك قدر( 7 ملم) يعني حاجه بسيطه لا ترخيه مره
وعلى فكره لو كان موترك مزود بتيربو :good: راح تشوف سرعه ما تتوقعه من محرك ديزل
والله اعلم.

وهذا صور المسمار مبين بس مبرشم ما انفك شد بلد. :good:
http://www.mekshat.com/pix/upload/images5/mk439_msm1.jpg

وهذا صور طـرمبة الديزل
http://www.mekshat.com/pix/upload/images5/mk439_pump1.jpg
-------------------------------------------------------------------------------------------------------------
أخوي ابو شكاع وش ها المدح والله ;) والله احرجتني ، مشكور ومن طيب اصلك
المري
21/04/2004, 07:37 PM
بيض الله وجهك اخوي بدر وماقصرت يالغالي..

والله كان لي نية اشيل المسمار مرة وحده بس بعد كلام بأحاول ارخيه اشوي بس..

تسلم اخوي بدر وماقصرت يالغالي...


اخوك / المري
اسيزو 4x4
22/04/2004, 01:36 PM
السلام عليكم

معروف ان سيارة الديزل ما تمشي الا 120

لاكن اذا كانت تيربو تمشي اكثر

انا الاسيزو الى معي يمشي الى160 والحمدلله لا نة تيربو ديزل 2800

فانا اتوقع علشان التيربو غير متوفر تكون السيار غير سريعة

وتقبلوا تحياتي.....!!
المري
22/04/2004, 06:59 PM
مرحبا اخوي سيزو وحياك الله يالغالي..

وتسلم على المداخلة ..

ابشرك وابشر باقي الربع اني السيارة الان تجيب 140 بالراحة لاني اليوم الضحى

ازحت المسمار اللي في الطربة اشوي والحمد لله على كل حال..


تسلمون جميعا وجزاكم الله عني كل الخير..


اخوكم ومحبكم في الله / المري
الوانيت1
25/10/2010, 07:53 AM
مرحبا اخوي سيزو وحياك الله يالغالي..

وتسلم على المداخلة ..

ابشرك وابشر باقي الربع اني السيارة الان تجيب 140 بالراحة لاني اليوم الضحى

ازحت المسمار اللي في الطربة اشوي والحمد لله على كل حال..


تسلمون جميعا وجزاكم الله عني كل الخير..


اخوكم ومحبكم في الله / المري



الله يبشرك بالخير
الحمد لله انحلت المشكلة
وجزالله الاخوان خير
ابوعقل
25/10/2010, 08:27 AM
الله يبشرك بالخير
الحمد لله انحلت المشكلة
وجزالله الاخوان خير


22/04/2004, 06:59 PM

تاريخ اخر مشاركه في الموضوع :D :D
alimuhammed
25/10/2010, 08:39 AM
22/04/2004, 06:59 PM





تاريخ اخر مشاركه في الموضوع :D :D


اكيد الرجال باحث في قوقل عن المشكلة و لما قرأ التفاصيل رد و ما شاف التاريخ

و هذي تصير معي بل و اجاوب على اسئلة الاعضاء و لا ادري ان التاريخ قديم

و لكن اخير صرت اشوف التاريخ قبل ما ارد

=================
تلقى السيارة اليوم غير موجودة