من يفيدني عن درب مبيحيص من جهة القاعية

[صدى الحادي]

بسم الله الرحمن الرحيم

السلام عليكم ورحمة الله وبركاته ,,

يالله أن تحييهم ..


بداية ،،

كشتنا حنا وبعض الربع شرواكم إلى مناطق سدير وتمشينا في بعض فياضها ..

ومرينا الزلفي والسبلة .. وكانت السبلة نصفها مبعل والنصف الثاني ربيع ما يملا العين .. من العجاج وكثرة المخيمات والناس ..

وبصراحة أفضل ما مرينا هو أم عواقيل وأم سدرة والزلعاء وأم عشر اللي بعد الأرطاوية وقبل القاعية جنوب عنهما ..

وبخصوص أم عشر كلها بابنوج وفيها قرقاص شوي ,, بصراحة روعة مرة مرة اللي بيلحق عليها بكرة قبل الدوام وانتهاء الإجازة ..

المهم قلنا بنكملها للصمان وطرقنا مبيحيص ,, تقريبا 25 كم إلين حدتنا النفود .. وكان معنا هايلكس دفرنس (( ما قصر معنا طرقنا به كل درب الله يسلم الشيخ محمد ومن يقرأ )).. فهونا لأننا ما نعرف الدرب وش تاليه ,, خاصة وأنه بقي 85 كم على الصمان يم دحل أبو الهول ونمر على حومة النقيان نقا المطوع ونقا محرقة ..
فاحترنا هل الخط تمشي فيه الونيتات اللي لها دفرنس واحد ولا يحتاج الدرب دبل ..

ورجعنا وخلينا الصمان ..

فحتى لا نقع في هذا الإشكال مرة ثانية .. قلت بأستفسر عن درب مبيحيص من جهة القاعة موجه شرق للصمان من عند الدهنا هل تمشي فيه الهايلكسات الدفرنس ولا لا ؟؟


وياليت من يفيدنا ..

واللي معه صورة للدرب في وسط الدهنا يوريناها الله لا يهينه ..

والسلام عليكم ورحمة لله وبركاته ..

أبو علي

[زايد بن بدران]

ابوعلي مساك الله بالخير
انا وانا اخوك عندي الاحداثيات المبيحيص من القاعيه الي الصمان
لاكن اذكر اننا مشينا معه مره وحده وكانت وقت مطر
واتوقع الدقرنس الواحد بيمشي اذا كان الموتر مرتفع شوي ومنسم
وعلى فكره اكثر شي تمشي معه الوايتات

[ربيعان]

وعليكم السلام ورحمة الله وبركاته..

هلا فيك اخوي صدى الحادي والله يحييك 000

ياطويل العمر اليوم الاربعاء صباحا مسكنا درب المبيحيص من جهة الصمان وتحديدا من فيضة خبزة لاتبعد سوى 5كيلو جنوب طريق المبيحيص المهم سلكنا الطريق واتجاهنا الى الغرب والطريق هو عبارة عن مسارات عديدة وليس مسار واحد محددفمشينا الى ان وصلنا الى الدهناء وكنا مترددين بين ان ندخل الدهناء الى ان نصل القاعية او نباري النفود الى ام رقيبة والازفلت فاوقفنا راعي جيب وسالناه عن درب المبيحيص الذي يقطع النفود الى القاعية هل هو مطروق وسهل ام صعب وغرازات ؟؟؟
علما بان الموتر اللي معنا جيب باترول ديزل 97 فاجاب بان الطريق فيه صعوبة نوعا ما وبعض المناطق غراز فقلنا اجل نباري الدهناء الى ان نصل الى ام رقيبة والازفلت (نمشي على المضمون :p )

وان احتجت شي كلمني على الخاص وشكرا

ابو محمد

[صدى الحادي]

الأخ : زايد بن بدران
مساك الله بالنو روالرضا والعافية والسرور ..
حنا مشينا فيه من القاعية إلى الدهنا حوالي 25 كم .. ويوم شفنا الدهنا هوننا .. ووقتكم كان مطر فأتوقع أنه بيكون سهل عليكم لجل أن الرمال بتكون شادة شوي .. وحنا معنا هايلكس دفرنس مرفوع رفعة ما شاء الله والكفرات جي تي ,, يعني ما ترده الدهنا بإذن الله .. بس كنا متخوفين من الرباضات والتغريزات الغير متوقعة .. لكن خيرة إننا ما رحنا ,, لأن الخيرة في ما كتبه الله ..
مشكور على تنويرك للموضوع ,, ومرورك أعطى الموضوع جو آخر .. يا هلا بك والله ..

الأخ : ربيعان
يا هلا والله بك يا أبو محمد وبأهل الغاط جميع ,, والله أن في قلبي حب لديرتكم .. حب عجيب .. بس ما كتب الله نمرها هالعطلة ..
بس ما شاء الله معكم جيب المفروض قطعتوه ,, الدفرنسين نعمة والله .. ولو كان ديزل .. بس أنتم أعرف بموتركم .. ويا ليتكم طارقينه لجل تمرون حومة النقيان وذيك المناطق زينة بالحيل ..
وأجل حنا مناك وأنتم مناك .. كلن يبي منطقة الثاني .. بيننا وبينكم هالدهنا :) ..
لعل الخيرة في اللي سويتوه .. لأن الخيرة فيما اختاره الله ..
الله يجزاك خير ما تقصر وأنا أخييك ..نورت الموضوع بحضورك ..

الله يجزاكم خير على مروركم .. وتشريفكم الموضوع ..

[torrjom]

السلام عليكم ورحمة الله وبركاته

جواب مختر بدون مقدمات

الى شفت النقيان قدامك فى اي مكان اعرف انك داخل على رمال متحركه
يعني يلزمك الخبره يعني لازم تعرف مطلاعك قبل مدخالك
حتي الجيوب تغرز فى بعض الاماكن يعني حاول اتجنب النقيان لوتبعد عن دربك المقصود وبعد ماتلقا درب سالك ادخل وخل النقيان على جنب
(زي قولت وين اذنك يالحبشي ) بعدين امسك الوجهه الصحيحه
والله يستر عليك

[ضحية بيشة]

انصحك تروح من جهة ام رقيبه خطوط زينه وسهاله اما مقطاع النفود انا كان عندي في اكس ار ومن كثر مارحت قطوع تعب الموتر مرررررره لان النفود اقشر شوي

[الشاب]

الله يسلمك ومن يسمع حنا سلكنا طريق اتوقع انه افضل للصمان طريق رحلتي هذا الاسبوع
بريده . الزلفي . القاعية . الخفيسات. الشحمه .ام ارجوم . التنهات.ثم طريق الصمان الرفيعة.قبل الرفيعة دخلنا يسار الى الفياض الي تتمنى الا ترجع منها وافضلها خبزه والظلما
لولا ان الحلال بدء يقضي عليها

[ضفنان]

اخي الكريم ابو علي مساء الخير
بالنسبه لنفود الدهنا اللي غرب الصمان ليست صعبه على السيارات الدفرنس واحد اذا كان السواق عنده الخبره الكافيه في سواقه النفود بس عليك بالتنسيم المناسب علشان تريح نفسك من الغراز وتقطع النفود براحه وانا جربت ذلك كم مره والحمد لله بدون اي مشاكل وكذلك الآن بعض الربع معنا معهم هايلكسات ويقطعون النفود معنا وراء الجيوب بدون تغريز وفي مكاشيتنا دائما للدهنا معنا جيوب ويكون مع بعض اخويانا هايلكسات ولا يعانون ابدا من صعوبه الدهنا بالعكس الدهنا تعتبر سهله جدا عند اماكن اخرى مثل نفود الحماده بالمجمعه ونفود صعافيق والثويرات
وخاصه في الشتاء بعد الامطار