للعوائل فقط .....للعزاب فقط .... وش راااااااايكم ؟؟؟

[كشاته]

السلام عليكم ورحمة الله وبركاته

حيا الله الربع والشاص :D

الحمد لله فهذي السنة مشهود لها بالربيع وهذا من فضل ربي

ومن خلال( تدويجي ) في هالبران

في الحقيقة ما حلالي من البر إلا الصماااان


تدرون ليش ؟؟؟


لآني عزاااااااااابي

ندخل في الموضوع :


أتوقع أن كثير من العوائل وأيضاً العزاب ( المحترمين شرواكم )

يضيق صدره حينما يخرج لبعض الرياض أو الشعبان ولا يكون هناك تنظيم معين من ناحية كون هذا المكان مخصص للعزاب أو العوائل

في المجمعة على سبيل المثال متعارف لدى سكانها أن شعيب المزيرعة على طريق شقراء متعارف على أنه للعزاب فقط ، ولذلك من يأتي بعائلته فسيكون محط الأنظار .
لكن روضة حطابة متعارف لديهم على أنها للعوائل ...فنادرا ما ترى عزوبيا ً ( لذلك ريحة الطبخ هناك دايم زينة مهنا شي محترق ;)

المهم :

ألا يمكن أن نحدد بعض المنتزهات لتكون مرتعا للعوائل

ونحدد بعض المنتزهات لتكون خاصة بالعزاب البؤساء أمثالي

وقصدي من ذلك أنه في الحقيقة وانا عزوبي لا أرتاح إذا اكان على يمينك عائلة وقدامك عائلة ويسارك شغالة تلحق بزر :confused:

وهلم جرا

لذلكم في الحقيقة أنا وكم واحد من الشباب ما أرتحنا إلا في الصمااان لا عوائل ولا غيره


ألا يمكن أنحدد بعض المنتزهات القريبة من الرياض لتكون خاصة بالعوائل إذا كان مسألة ترشيح

فأنا ودي ما يتركون لي إلا :

شعيب محارق
وروضة الخفس

والباقي أبد حلالهم وش راااااااايكم ؟؟؟

[أبو تركي القطامي]

السلام عليكم ورحمة الله وبركاته
حتي بالبر عوائل وعزاب الله يهديك يالكشاته
العوائل أنا أخوك بالديره والمزارع ومنتزهات المدن و حول الديره ولا يبعدون بعد ,,,,,,,,,,,, وخل البر للكشاته مثلك وشرواك ويقول المثل البر بريره والهم بالديره والمكان الذي فيه عوائل دور غيره الله موسعها
ومشكورأخوك القطامي

[ابو ايمن]

صحيح اخوي

أنا عوائل .. . :) قصدي متأهل يعني عندي رخصة محلات العوائل . <--- والله مشكلة صاروا مثل البطاقة ماتدخل إلا فيهم .

المهم :

رغم هذا أنا أعارض تحديد الأماكن في البر للعزاب وأخرى للعوائل .

وإذا حدد فماراح الشباب يلقون محلات . لأنه بصراحة دائما نلاحظ أن الأماكن الممتازة والحلوة تخصص للعوائل .
وبإمكانك تشوف هذا الشي حاصل في الحدائق العامة . فما يخص الشباب ( غبرة ولا زرع ولا هم يحزنون ) اما الخاص بالعوائل . الله يرحم الشباب بس .

لأن البر وسيع والحمد لله . وإذا كان في متنزه أو حديقة فهذا لابأس بتحديدها .

أما في البر أخي فهو في الأصل للشبات الذين يتضايقون ويضايقون إذا كانوا في المتنزهات أو الحدائق . وبإمكان راع العائلة إذا خرج للبر يختار مكان في نظري أن يكون بعيد عن الخطوط والطرق وهذا أهم شيء .

تحياتـــي وتقديري لك .

[محاذر]

السلام عليكم ورحمة الله وبركاته

الظاهر ان بعض الشباب الله يهديه يبي كل شيء له ليش نخصص ونتعب انفسنا السعه لابارك الله بالظيق

البر واسع والاماكن الزينه واجد وودك ان الرجال يبعد لان العوائل دايم يحبون القرب :D

كشاته هذي وجهة نظر اخوك ;)

والله يسلم الشاص ماعليه خلاف بعيد الدار يطويها :good:

اسلم وسلم

[كشاته]

أبوهناالقطامي
شكل عندك رخصة قيادة في الأماكن الوعرة ...قصدي في أماكن العوائل


لكن المشكلة

إذا ضاق البر بالعوائل وين يرحووووووون العزاااااااب

رح للتنهات أو خريم أو محارق

بل حتى الشوكي

وحجزي محل

على العموم ممتن لك على ردك



ابو ايمن : صدقت أن العزاااااااب مالهم إلا الأماكن ....







محاذر : يخوك

رحنا عن الرياض قرابة 270 كيلو وأزعجونا العوائل

حتى في لينة عوائل

شكرا لك

[بركان]

ابعد تسلم!!!!
وان كنت تبحث عن الهدوء والراحة والاستمتاع بجمال الصحراء وخاصة في الليل فادخل في النفود وتعمق
فلن تجد عزابا ولا عوائل.!!!! وشغل لك شريط من ما تحب ان تسمع , مثل السامري وابتعد عن السياره واسمعه من بعيد وانت في عالي الطعس. ياااااااااااااااه

تحياتي.

[كشاته]

بركان


حياك الباري

وأكلك الحباري


وزوجك الحواري ((((حارة أم سليم )))


أخوي تراني منيب راعي سامري ولا حوطي

لكن الواحد يبي يامر النجوم

ويبعد عن الديار

وينسى الإزعاج

شكرا على مرور