أبشتري كميرة ديجتال .. ماهي المواصفات اللي أسأل عنها؟؟

[الضاري]

السلام عليكم ورحمه الله وبركاته

ياشباب بصراحه أخوكم بلشان ... اليوم رحت لمحل كوداك للتصوير ..وأبي اشتري كميرة ديجتال ..

لكن المشكله ما أدري ويش أختار وبصراحه أكثر ..أبي المواصفات المفضله والمطلوبه للكميرات الديجتال..

قام الهندي اللي بالمحل يشرح لي نصف ساعة .. وأبشركم أني ما فهمت ولا كلمه من اللي قال لأن أغلب

كلامه ماهو عربي..

آخرتها طلعت من المحل قلت ما يعلمن بالصحيح الا راعين الفزعه بالمنتدى.

الوكاد أبي الفزعة... بالشرح أوبوضع روابط لمواضيع أجد فيها الفائدة.

ولكم تحياتي.. والله يعطيكم العافية مقدما.

[عليان الليل]

حياك الله ونحن تحت
الخدمة ... بس اول شي
حدد قريشاتك يعني كم راح تدفع بالكمرة
نعلمك وش المواصفات او الكمرات الزينة.
تخياتي..

[صقر]

السلام عليكم

حسب معلوماتي المتواضعة اليك نصيحتي:

أولا : الكمرات اللي تبي تشتريها لا تتعدى / كانون/ نايكون/ سوني/ كوداك.

مقياس الدقة بالميقا بكسل يعني كل ما زاد الميقابكسل عندك صارت الكمرة تعطي صورة صافية أكثر. واللي موجود عادة بالسوق من 3م الى 4م الى 5م . (للهواة).

فيه كمرات تجي 4ميغابيكسل وغير مشهورة أو أنها غير الأسماء التي ذكرت لك لكن صورتها ما تجي أحسن من كمرة كانون 2ميغا. وأنا هنا أشدد على اختيار كمرة عريقة في التصوير مثل الاسماء اللي ذكرت لك.

هذا ما عندي ... وننتظر اضافات المحترفين.

[الضاري]

السلام عليكم ورحمه الله وبركاته

تسلمون والله ياراعين الفزعة..

أخي الغالي عليان الليل
الله لايهينك وتسلم يالغالي..

وكلامك صحيح..نسيت أحدد السعر
الميزانيه/ حوالي سبع ميه ريال..

هاة عساها تكفي ..آخاف ماتجيب الا شاحن الكميرة..:D

أخي الغالي صقر

وعليكم السلام ورحمه الله وبركاته

الله لايهينك ومشكور على تزويدنا بهذة المعلومات

والله يعطيك العافية.


وبأنتظار أضافات المحترفين..

[عليان الليل]

ماش وانا خوك قروشك ماتجيب
شي فيه مواصفات زينه ...
لازم تصبر الى ما تتيسر امورك
وتشري شي زين الا ان كانك تبي شي
يمشي الحال.. لانك يمكن تتحسف بعدين..
تحياتي..

[ابو شكاع]

اجل قروشك سبع مية ؟


اسمع وخل عنك عليان تعال اعلمك :)

فيه سوني 3.2 ميقا الظاهر انها ب 850 ريال او ب 800

ترا منيب متأكد من السعر اذا منيب واهم انه هذا سعرها وممكن يكون اكثر

يعني ممكن تكون ب1400 :p

عاد تصدق اني احترت وانا جاد .......

اذكر اتصل علي واحد وقال انه لاقي سوني هاللي قلت لك بهالسعر ............... اذا منيب واهم

وترى عليان اببخص من بهالأمور يعني يعلمك هو سعرها حول هذا او لا .......

ولا تعدى كلام صقر ............... فعلا لا تاخذ الا ماركة معروفة ,,,,,,,,, انا معي سامسونج 2 ميقا ... ب 700 ريال من دبي

لكن ناوي ان شاء الله ان ما حجيت هالسنة اني اطق لي بقروش الحملة كاميرة محترمة :D

هلابك ولاهنت

[مهيلان]

اخوي الضاري
سلام عليكم

يقول راعي المثل مد رجليك على قد لحافك

بما ان قريشاتك 700
فانصحك بهذه الكمره


ممتازه جدا وعليها ضمان

والقائمه فيها عربي

ومن اسره عريقه


وابوها واخوانها اجاويد

http://www.mekshat.com/pix/upload/images5/mk4024_sony_dscp32.gif

Sony DSC-P32


3.14 million effective pixels
3.34 million sensor photo detectors
33 mm fixed lens
Announced 24-Feb-03


السعر : سبعمئة ريال .. يعني ما يحتاج يدورون صرف يرجعون لك الباقي ( وهذي بحد ذاتها ميزه )


سلام عليكم

[الضاري]

السلام عليكم ورحمه الله وبركاته

أخي العزيز / عليان الليل..

يارجال لاتظن أني محترف تصوير..كميرة تحميض وتخب بعد..:D

أهم حاجة أنه تصور بوضوح وتكون الصور واضحه ماهي مثل التحميض تطلع صور الصيد غير واضحة ..

أخي العزيز / أبوشكاع

الله لايهينك وعساك تحج وتطق كميرة جديدة أنشاءالله.

[الضاري]

وعليك السلام ورحمه الله وبركاته

ياهلا والله بمهيلان

ياسلام

هل جربت الكميرة ؟؟

طيب السعر شامل الشريحه أو بدون الشريحه.

وياليت وما عليك أمر لو ترجم لي الأسطر اللي تحت الصورة..

تسلم يالغالي والله لايهينك.

[أبو تركي القطامي]

أخوي ضاري
فيه كاميرا اسمها creative pc-cam880 ومديل pd1160
صراحه رائعه من ناحية نوعية الصوره والوضوح
وفيها زوم وتعطيك عدة مقاسات للصوره مثل
الهاي 17 صوره مقاس 1536×2048
الميديم 29 صوره مقاس 1200×1600
اللو 112 صوره مقاس 600×800
غير ذلك فيها فيديو 140 ثانيه
وهي سهله في استخدامها وتنزيل الصور منها الي الكمبيوتر ومقاطع الفيديو
وصناعتها صينيه
والصور في أكثر مشاركاتي التقطت بها
وسعرها 500 ريال

[الضاري]

الله لايهينك وياعلك تسلم يابوهنا..

بصراحة المواصفات اللي ذكرتها مغريه ومناسبة وخصوصا السعر..

أما الفديو فصراحه حركه..

لكن هل تركب فيها شريحه لتحميل صور أكثر أو مقاطع فديو اضافية؟؟

السؤال الثاني/ هل فيها شاشة خلفية ترى بوضوح ما تريد أن تصورة؟؟

طلب الله لايهينك.. أذا تستطيع أن تنزل لها صورة أو تضع رابط لموقعها في الأنترنت.

أخيرا ..الله يعطيك ألف عافيه على هالفزعة.. وتقبل تحياتي.

أخوك / الضاري

[مهيلان]

اخوي الضاري

كما قيل لك من قبل دور كمره مشهوره في مجال التصوير

فالسوني لا يشق لها غبار في مجال التصوير والدجتل عموما

والمكتوب تحت
فهو البكسل 3.20 ميقا بكسل وهو رقم ممتاز حاليا
العدسه 33 ممتازه ايضا

من المميزات تصوير فيديو

وشاشه خلفيه كالعاده

ومزايا لا تحصر لجميع للتصوير في جميع الضروف

والاوقات

واهم من ذلك القائمه عربي يعني انك ستتمتع بجميع المزايا بسهوله

ولا يخفاك ان الكثير ممن يستخدم الكمرات يخفى عليه الكثير من مميزاتها بسبب ضعف اللغه لديهم وعدم معرفة ما تحويه الكمره من مواصفات


الكمره ما فيها كلام بالنسبه لفئتها وانصحك بها

علما ان كرت الذاكره يجي مجاني معها


( انصحك بالابتعاد عن الكمره الكريتف واسال مجرب )


سلام عليكم

[الضاري]

هلا بأخوي مهيلان

الله لايهينك..شكلي أتعبتك معي.

ومشكور على النصيحة..والله يكتب اللي فية الخير.

مدام أنك تنصح بالأبتعاد عن الكريتف..لأنك مجربها ..شورك وهداية الله.

لكن كتبت في ردك الأول 3.14 ميقا
وفي ردك الثاني 3.20 ميقا

فأي المقياسين صحيح؟؟
هل لها موقع في الأنترنت.. يشرح مواصفاتها؟؟

مشكورررر وتقبل تحيات أخوك..الضاري

[أبو تركي القطامي]

أخوي ضاري
فيها مكان لكرت الذاكره وتخزين أكبر عدد من الصور والمقاطع
وفيها شاشة عرض في الخلف,,, والصوره للكامره غير متوفره لي في الوقت الحاضر
وهذي الكامره ذكرتها لك علي حسب فليساتك ولكن مثل ماقال مهيلان يمكن ماتصلحلك وهو مجربها
ولكني انه أستخدمه وماشيه معاي كويس وصور جمال الطبيعه من الحره مصورها بالكاميره التي ذكرت

http://www.mekshat.com/vb/showthread.php?s=&threadid=18721
وهذا رابط الموضوع والصور
ولكن أكرر قد لا تجوزلك أخوي ضاري
أخوك القطامي

[الضاري]

أخي العزيز ابوهنا القطامي

عزالله أنك ماقصرت وياعلك تسلم..

الله لايهينك.

[مفتون صيد]

السلام عليكم
اولاً ارجو المعذرة على الانقطاع الطويل .......
اما من ناحية الكميره فانا مجرب الكريتف ولا هو تشكيك في كلام اخوي أبوهناالقطامي لكن الكميره مهيب ذيك القوة في التصوير واقل نوع في السوني اقوى منها في التصوير ... ليه .... لانها تعتمد على عراقه الصنعه وتخصص الشركة كذلك في هذا المجال اما كريتف فهي تمشي الحال لكن مهيب زينه ...
اما الاشياء التي لازم تسأل عنها .... قوة الوضوح بالبكسل كلما كثر العدد كانت افضل
ثانياً الزوم الرقمي والزوم البصري ان وجد ...وهل هناك امكانيه لتركيب عدسة في المسقبل تقرب اكثر ... حجم الذاكره ..... تقنية الفلاش
وانا انصحك بالسوني او كوداك لاني سبق وشفت صورها مع ناس اعرفهم اما النكيون والكنون لم ارى لها صور ولكن هي من الصناعات القوية ...

[الضاري]

أخي العزيز مفتون صيد

حياك الله .. والله يعطيك العافيه على المشاركه..

وأشكرك على النصيحه.

تقبل تحيات / الضاري

[مهيلان]

اخوي الضاري
سلام عليكم

الفرق بين الرقم المكتوب على الكمره والرقم الفعلي للبكسل فالسالفه ان

الكثير من المنتجات يجبر الصانعون فيها الكسر مثلا الهايلوكس

قوته المكتوبه : 2700 والفعليه اللي بالكتلوج 2650

ومعالج الكمبيوتر : يقولون مثلا : 2400 والسرعه الفعليه2360

وقس على ذلك الكثير
والكسر دائما يجبر لصالح الشركه

اضنك فهمت

اما الموقع اللي يشرح المواصفات

فتفضل هنيا (http://www.dpreview.com/reviews/specs/Sony/sony_dscp32.asp)

واي مساعده مهيلان في الخدمه


والسلام

[الضاري]

أخي العزيز / مهيلان

وعليك السلام ورحمه الله وبركاته

الله يعطيك العافية عزالله أنك ماقصرت..وبيض الله وجهك

آمل منك تقبل تحيات أخوك / الضاري

[الكروان]

السلام عليكم ورحمة الله وبركاته

حياكم الله والله انكم ماقصرتوا واوفيتو لان فيه مشكله واهى الاهم ويمكن انها تساعد المشترى علا اى سلعه يطلبها

الا وهى انك اذا انك تعرف عن مواصفات الكمرا او تكون عندك ياليت ان الواحد مايبخل علينا ويضهر لنا صورتها

ومشكوريييين

[الضاري]

السلام عليكم ورحمه الله وبركاته

أخواني الأعزاء..

أحب أن أشكركم على مشاركتكم في هذا الموضوع بتزويدنا ببعض خبراتكم وتجاربكم في هذا المجال..

واسأل الله العظيم أن يجعل كل ماكتبتوه لكم لاعليكم وأن يحفظكم ويزيدكم علما على علمكم.

تقبلوا تحيات أخوكم / الضاري

[fama]

السلام عليكم ورحمة الله وبركاته

اولاً اشكركم ياشباب على المعلومات التي ذكرتموها .. والصراحة انكم ريحتون عن البحث والسؤال عن الكمرات ...

لاكن سؤالي هو ( هل يتوفر محلات في القصيم يتوفر فيها المواصفات المذكورة أو يكون فيها كمرات من النوعيات الجيدة ) .

تحياتي

[بن محارب]

مساكم الله بالخير جميعا أخواني



والحقيقة كلامكم يسطر بماء الذهب




لكن ان ودي اشتري كميرة ديجتل سوني اكرر سوني



وميزانيتها تقريبا من 1000-1200ريال



واذا فيه صور من النوع اللي تنصحون فيه اكون شاكر ومنون لكم



للجميع التحية بن محارب شاب ناره

[fama]

السلام عليكم ورحمة الله وبركاته

اخوي ( بن محارب ) امس اشتريت كمرة سوني والصراحة أنها ممتازة من ناحية الوضوح ..

ومواصفاتها كالتالي :

رقم الكمرة هو DSC-P52

Effectve 3.2 Mega pixels
optical zoom 2x
smart zoom
mpeg movie VX
Voice memo

والسعر 980 ريال سعودي

وفيه نوع نفس المواصفات لاكن زيادة الزوم إلى 3 .. والسعر 1300ريال سعودي

[الضاري]

أخي العزيز ..بن محارب

وجدت نفس الكميرتين من سوني اللي ذكرهن fama في ردة السابق..

الكميرة الأولى اللي ذكرها بنفس القيمه

أما الكميرة الثانية اللي فيها زووم فوجدتها بسعر 1200 ريال في وكالة سوني بحائل..

وبصراحة حاولت آخذها .. بس سعرها غالي شوي.. والميزانية قصرت شوي

أتمنى لك التوفيق

[الضاري]

السلام عليكم ورحمه الله وبركاته

الأخوة الأعزاء..

أود في هذة السطور أن أتقدم ببالغ الشكر لكل من شارك في هذا الموضوع وساهم بتقديم بعض ما لدية من الخبرة في هذا المجال فأسئل الله الكريم أن يجزيكم خير الجزاء وأخص بالشكر..

الأخوة..
عليان الليل..صقر.. ابوشكاع .. مهيلان .. أبوهنا القطامي .. مفتون صيد .. الكروان .. fama .. بن محارب


أسئل الله العظيم أن يوفقكم لما يحبه ويرضاة..

تقبلوا تحيات أخوكم .. الضاري