أصابتنا الحيره من الباثفندر ؟ ونبي شوركم ؟؟؟

[مكيف]

السلام عليكم ..

حيا الله الشباب جميعا .. ياجماعة الخير انا مفكر باذن الله أشتري باثفندر 2005 أو 2004 ولأكن بعض الناس قالو مايتحمل وكثير مشاكله وأعطاله والبعض قال لاتدور غيره . وحترنا ماندري من نصدق . ونبي شوركم يالاجاويد؟ :confused:

[بوسلطان *****]

أخوي مكيف حياك الله بين اخوانك في هذا المنتدى الغالي وبالنسبة للباثفندر حقيقة واسأل مجرب انها سيارة عائلية وموتر بر لقوتها وأنا عندي باثفندر موديل 2002 من وكالته ماشي 275000 كم والحمد لله ماشي زي الحلاوة أهم شئ وفي أي سيارة لابد من الصيانة الدورية لحماية محركات السيارة أتمنى اني أفدتك.

[مكيف]

الله لايهينك وماقصرت لا كن تقول القواله أن 2002 اجود من 2003 وما فوق والله أعلم ...

[Wolf Eyes]

السلام عليكم ورحمة وبركاته ومساكم الله بالخير

أخوي مكيف كانك ناوي عليه فنعم الراي عز الله انه موتر انا معي 2005 ماشاء الله تبارك الله الله لايضره ماشفت الى كل خير وهو على ماقال حمسه قناد انه للبر ماله مثيل واهم شي صيانته الدورية وبعد الله لاتخاف من اي شي واهم شي احرص على النظيف.
وبنسبه للجود او الردا ما سبو الى 2003 لانه تغيرت مكينته كبروه وخبرك لابد اول مديل يتغير يطلع فيه خلل ولا 2004 أو 2005 اخذه وانت مغمض والله يكتب فيه الخير .
واذا بغيت اي استفسار راسلن على الخاص

[مكيف]

الله يعطيك العافيه وماقصرت ...

[escape_man]

اكيد اراء الناس تختلف وانا اخوك

انا معي باث 2005 وماعمري طبيت به البر لاني اخاف من خراباته وقربعته واطلع على جمسي القديم آمن ..

الباث زين للي بيحافظ عليه ويعمل له صيانة دورية .. فلاتر وصفايات هواء وزيت وبنزين ويرفق عليه بالبر .. اما اذا شغلك قاسي فابعد عنه .. تراه مايتحمل ابد

[أخو شيخة]

أخوي مكيف أولاً السلام عليكم ورحمة الله وبركاته ..
ثانياً بالنسبة للباثفندر فالشباب أعطوك أراهم وكلها موفقه وجميله والأجمل من ذلك أنك سألة أنا معي باثفندر 2004 وبصراحة وبشهادة من معه موتر باثفندر من موديل 2003 وفوق فهو موتر بما تعنية الكلمه أن بغيته في البر تحصله في البر وأن بغيته في الديره فهو موتر ديره وأما ماكان من موديل 2002 وتحت فهذا فيه اختلاف كثير من ناحية القوة والمكينة على كلاً لا اريد ان أطيل عليك فأنا سوف أحيلك إلى موقع رابطة ملاك الباثفندر وادخل وشف بعينك الاشكلات وكذلك الميزات . تقبل فائق تحياتي

[سحابه]

أخوي مكيف لاأزيد على كلام الأخوان
خذ الموتر ولاتشاور
وجهة نظر مجرب

[arrow]

بسم الله

انا كان معي باث 2005 توماتيك ,,,,,طلع براسي نخل بارتفاع الحرارة,,,

ماخليت ورشة يمدحونه مامريته,,,ولاعرفوله ..

الين فكن الله منه وارتحت ......

هذي مجرد تجربة حبيت اعرضه عليك ....

الله يوفقك ..

[مربط القعاسي]

انا معي 2001 كديته سنه كامله ولله الحمد ماشفت منه شي بالعكس قمت الراحة وسيارة عائلية وسبب البيع راع تحميل واحتاج صندوق ولا مايطري ابيعه سيارك وسترح غزروب بصيط قطع الغيار غير متوفر بالنسبه للمنطقه الى انا موجود فيها لاكن بالرياض والقصيم متوفر وفي المناطق الكبيرة

اخووووووكم مربط القعاسي

[ابوسعودد]

اولا انا اسمع ان اكثر مشاكله هي مسامير الثلاجه وهذي حلها بسيط وكل ميكانيكي الحين يعرف حله ويمكن اذا اخذت مستعمل اسال راعيه اذا اشتريته منه عنها يمكن يكون شايف لها حل .
والشي الثاني نقص الزيت بعد ال3000الاف .
الشي الثالث حسب افادة بعض الاخوان بعد يقولون ان عليه مطب قاسي .
الشي الرابع بخصوص الحراره سمعت ان علاجها بالكنداسه بس مدري وشي بالضبط .
الشي الخامس عامة السياره من وجهة نظري انه حلوه ومميزه بعد ماتتاكد من الملاحظات المذكوره .

[مكشاتي كوكتيل]

شف يامكيف وأنا أخوك . أكثر ماأدوخنا في هالقسم هم أعضاء رابطة ملاك الباثفيندر . ثلاثة أرباع المواضيع في القسم عن موترهم ماشاء الله عليهم . تقول واحدهم جالس في الشارع قدام موتره واللابتوب بين يدينه وكل ماشاف حاجه في موتره حتى لو إنه خدش بسيط في جنط الإستبنة كتب فيه موضوع طويل عريض وربعه مايقصرون بالردود (خلوني أفشّ خلقي فيكم يا أصحاب الباثات :))

الزبدة ماراح تطلع من موضوعك هذا إلأا وأنت مكوّن فكرة كااااااملة عن الباثفيندر بفضل الله ثم بفضل ملاك الباث الأشاوس (من ذل سلم:))

[معدي المرقاب]

اذا كنت راعي طلعات خفيفه خذ ولاتشاور

[مكيف]

على العموم الله يجزاكم خير كلن باسمه وكل من رد على الموضوع ولاهنتو ...

[المنبسط]

اخوي مكيف
جعلك دايم مكيف
المثل يقول ما يمدح السوق الا الرابح
لكن الباث سياره تصلح للي عنده أقل من أربعة بزران
والسياره شعبية يعني كل خراب تلقى له حل
والسيارة لا تكون شعبيه الا اذا كانت جيدة
هذا مجرد رأي
المنبسط

[أبوالطيب]

اهم شيء انك ما تقدم على موتر الا وانت مقتنع تمام الاقتناع بعد السؤال والتأكد
من الموتر من جودة ومشاكله ... الخ

ولا تستعجل بشراء السيارة تأكد منها وافحصها
والله يكتب الي فيه خير وصالح
ويرزقك

[راعي الشبات]

الباثفندر سيارة حلوة أن بغيت خط و أن بغيته بر وأن بغيته رسمي تلقاه قدامك
ولاتشاور تخير الطيب والنظيف وخذ وانت مغمض ومثل ماقالوا الشباب لا تاخذ ألا من موديل 2003 وطالع لكبر الماكينة فيه وبأذن المولى عزوجل يبي يعجبك


غير الباث لا تدور

[البهلواني]

الباثفايندر موتر ما شاءالله تبارك الله

انا معي 2002 فاكه من الوكاله والحمدلله مازال زي الحلاوة

سافرت عليه الى مناطيق كثيره بعيده أو قريبه ولا أحلا

ولكن عيب الموديلات مابين 2003 و2005 فيه عيب واحد

وهو مسامير الثلاجه أما غيرها فكل شي تمام وعلى مايرام

[أطلال نجد]

أشتر ولا تشآور إذا السيارة تناسبك من حيث السعة بس أنتبه لا تطب إلا في النظيف

السيارة غنية عن التعريف تماما ً

أنظر إلى شعبيتها في مدينة الرياض فقط وأنت الحكم

ملاحظة بسيطة

الباثفدر صيانتة غالية حبتين

وبالتوفيق

[عاشق الديرة 4]

اخوي مكيف اشتري الباثفندر وانت مطمن