فزعتكم ياهل الباترول تكفون

[جخرحسو]

انا عندي باترول 93 والحرارة توصل فوق الربع يعني تكون بين النصف وبين الربع
هل هذا عادي او فيه مشكله واذا كان فيه مشكله ماالحل

[(((القناص)))]

السلام عليكم
اخوي ماهو عادي اذا كان بدون مكيف وبدون جوووووووووور على الموتر
اكيد فيه مشكله
اما عن الحل فالمشاكل كثير انت شيك على ماء الاديتر اذا ينقص ولا لا

[جيب بيج]

ياخوي أختصرها لك إذا الاديتر مافيه سدد وتلحيم خذها مني راس المكينه فيه شعر يبغاله مسح طبعاً إذا تماتيك المروحه سليم ولاتستشير

[المميـز]

الحراره تجي من عدة أشياء

أول شيء شيك على ماء الراديتر هل هو ناقص والا لا ؟؟

ثاني شي ماء الراديتر لازم يكون اصلي خاصه مع الحر اللي نمر فيه

بالسعوديه مايبي له الا الاصلي وسعر الاصلي من 50 - 70 ريال

ثالث شي تأكد ان ماء الراديتر ياخذ الدوره بشكل طبيعي

يعني شف الخرطوش اللي طالع من الراديتر ورايح للمكينه اللي فوق

هل هو سليم ؟

وعندك اللي الثاني اللي جاي من المكينه وداخل للراديتر

شيك عليه

رابع شيء تأكد من المروحه هل هي تشتغل بشكل طبيعي ؟؟

خامس شي وهو الأهم

هل السياره عانت قبل كذا من حراره وكان المؤشر يتعدى النص ؟؟؟

اذا كانت الاجابه ( ايه )

فمعنى هذا ان راس المكينه تأثر بسبب الحراره الزايده

فيحتاج الى مسح ووجه جديد وبعض الاحيان يحتاج الى وجهين

ولا تنسى تغيير جميع الوجيه اذا فكيت الراس


أتمنى اني فدتك

وان شاء الله يجي من هو أخبر مني ويفيدك اكثر :)

[salih100]

اول شي الله يعينك وبالنسبه للنيسان بصفه عاااااااااامه حرارته ما تعدى الربع واذا زادة عن كذا يعني فيه شي مو طبيعي حتى لو كانت المويه تبع الرديتر مو اصليه ,,,,,, المهم اول شي تسويه طبعا اذا كان الرديتر زين ,,,,,,,,,,غير غطى /غطاء الرديتر طبعاً تبداء بلارخص والاسهمل مو تطب ع راس المكينه ع طول بعدين اذا ما نفع ,,,,,,,,,,,,,تشوف بلف الحراره قيمته تقريبا 40 ريال واذا ما نفع ,,,,,,,,,,,,,,,تفحص تماتيك المروحه ( اذا تبي تعرف ان التماتيك خربان ,,اذا مسكت خط ترتفع الحراره وانت ماسك خط ورفعت رجلك عن دعاسة البانزين -الابنص تنزل الحراره ) فاذا كان كذا غير تماتيك المروحه والبلف مره وحده .
بقولك شي راس المكينه ما يمسك الحراره الا اذا جلست تمشي عليه واجد والحراره فوق الربع الاخير او عليه اما اذا وصلت للفل مره ولا مرتين بس ع طول توقف او تطي الموتر ترى باذن الله الراس ما يجيه شي ,,,,,,,,,,اتمنى اني افدتك والله يسترها معااااااااااااااك.

[جخرحسو]

اشكركم يالذيابة على كل الردود بس ترتفع الحرارة فوق الربع بشوي واذا مسكت خط نزلت للربع او تحت شوي ابي الرد منك ياصحاب الخبره

[المميـز]

اشكركم يالذيابة على كل الردود بس ترتفع الحرارة فوق الربع بشوي واذا مسكت خط نزلت للربع او تحت شوي ابي الرد منك ياصحاب الخبره


وووووووووين كلامك هذا يوم تنززززل المووووضووووووع !!!!!!!!

انت تقول بالنص بين النص والربع :confused:

اذا كانت هذي سالفتك

فالموتر طبيعي جدا ومافيه شي

الله يهديك مره ثانيه اشرح المشكله زين

ترا الرد ياخذ وقت من العضو وياخذ تفكير :)