الله يخلي الشروكي بلا لانكروزر بلا بافندر [الأرشيف]

السالمي

30/04/2004, 02:32 AM

السلام عليكم ورحمة الله وبركاته

انا الصراحه احترت قبل فتره وش اشتري للوالد من موتر خصوصا انه يبغى جيب

وسألت ناس كثيره واكثر الناس نصحني بالتايوتا والنيسان

لاكن انا كان براسي الشروكي وكثيرررررررر اللي قالو انحش قطع غيار غالي

المهم رحت للرياض وحصلت لي شروكي نضيف بمعنى الكلمه وشريته

موديل 94 وهو من النوع الـ 6 سلندر واقسم لكم بالله من اروع مايكون

اولا قوه مع النفود ماتعادل قوة التايوتا والنيسان ثاني شي قلت صرفيه بالبنزين

لدرجت ان التانكي يوصلني من الشرقيه الى الخرج وباقي الربع وانا على سرعة 140

والحين افكر ابيع اللومينا وادور على شروكي 2000 لان الشايب طردني عن موتره من كثر ما اخذه

وانا استغرب الللي يسبون قطع غياره مع انها مقارنه مع النيسان والتايوتا تجدها حول السعر

والشروكي بحجم البافندر صح لاكن ماهو حواله ابد لاصرفيه لا عزم لا مواصفات

البافندر ذا اللي انتم تمدحونه صار موضه فقط لاكن مايعطيك زي الشروكي ابد

واذا قصدكم الحراره انا ركبت لشروكي اللي عند الشايب مراوح لومينا ثنتين والحراره الان من افضل مايكون

طبعا الشروكي الا موديل 2004 والدبل حقه دفرنس ماتغير ماهو اعكوس زي الهقط الاند كلوزر

اتمنى رايكم بكلامي

رفيع الشان

30/04/2004, 03:31 AM

اخونا الطيب السالمي ... مسيك بالخير ..

في كذبه بين السيارات ان الشروكي يسخن ... من المعلوم ان السيارات الامريكيه غالبا ترتفع درجة حرارتها الى النص وبعضها تسخن لأن الجو عندنا مخصص للضبان ...

عندنا واحد اوفر لاند 2002 طبعا افضل من اللمتد ... لاكن قسم ان الكرف عليه على داير المليم تقول هايلكس ... ومع ذلك ماشاء الله بس موديله حديث ...

قريب لي عنده واحد موديل 95 ومايخلي ديره الا ويوقع على جبالها ووديانها ... وماشي تمام

صح سعر القطع غويلي شوي بس موتر راسي ومريح وفخم وممشا واللي تبي ...
اتمنى اكون قدمت لك شي

سلملي

الكروان

30/04/2004, 02:21 PM

السلام عليكم

نعلم ان الشيروكى نشيط وقوى وايضا ممتع بالقياده وايضا المنضر الخارجى
لاكن المشكله اهى كثرت خرابه ومشاكله واجد عشان كذا الناس ماياخذونه ونا خوك

المهم الله يطعمك خيره ويكفيك شره

اخوك الكروان

مهند

01/05/2004, 11:52 AM

افااااااااااااااااااااااااااااااا:( :(
تراكم اخطيتوا في حق هالشايب الله يسامحكم:)

http://www.landcruiser.4wd.ru/foto/fullsize/landcruiser_03.jpg

اللي مايعرف الصقر يشويه

القناص

01/05/2004, 05:14 PM

والله انك يالسالمي احسنت احسنت احسنت
يا اخي سمعة اليابانيات فوق المعقول "شعب كامري"
ولا يعجب في الياباني ،،،، الا اللي ما جرب غيرها
يا اخي السوق مليان جيوب اشكال والوان

يعجبني السالمي جرب ولا يصح الا الصحيح
لقا الشيروكي جيب فعلا جيب
واللي ما يدري يقول مهوب زين ،،،،،إلا زين وغصب عن جميل وحمراني كمباني
والميدان يا حميدان
يعني اذا تعدين المئتين الف ريال دور الالماني المصفح
ولكم في التوقيع فكرة
ودمتم

..

ابو شكاع

01/05/2004, 07:31 PM

ولا يهون ال yukon:)

الشيروكي صار لي فرصة يوم من الأيام اني اجربة في النفود

الموتر قوي لدرجة أنك تشعر معه بالرضا التام عن آدائه

شكرا لك

ولاهنت

السالمي

01/05/2004, 10:39 PM

ياشيخ تسلمون لي على الردود

امـــــــــــا انت يامهند فيه مثل يقول هب بلا لب

هذا تراه مقيول على الاند كلوزر كبر حجم بس نفع مامن نفع

وبعدين وينا فيه فوق الميه اذا بتعدا الميه شريت جيب لكزس نضيف مامشى واجد

بقيمة لاند كلوزر جديد وفخامه وقوة وعزم مايعادلها الـ vxr

راعي الحمره

02/05/2004, 02:05 AM

الله يعطيك العافيه يا خوي السالمي على موضوعك الطيب , وانا من اكثر الناس الي يحبون الشروكي , بس يا خوي انا استغربت من بعض الشباب في السعوديه يقولون ان سعر قطع غيار الشروكي غاليه جدا مع ان قطع الياباني اغلى قطع غيار في العالم تقريبا الياباني اغلى قطع غيار من الالماني والامريكي .

واما بالكويت عندنا قطع غياره كنها قطع غيار الكابرس 89 واذا رحت السكراب تلقاها رخيصه بالحيل يعني مثلا تاخذلك مكينة شروكي من السكراب موديل 97 او 98 تبدي من 1800 ريال الى 2500 النظيفه جدا ومكفوله شهر وشرط الفحص .

مع تحيات
اخوك راعي الحمره

السالمي

02/05/2004, 10:53 PM

هذا الصحيح اخوي

والله يبعدنا عن السكراب ولايحدنا عليه

بس فعلا هم هنا بالمنتدى يشتكون من ارتفاع سعر المساعدات حقت البافندر

ومساعدات الشروكي ارخص منه

مهراس

04/05/2004, 05:07 PM

السلام عليكم:
يوجد سيارات شعبيه بعض القطع فيها أغلى من الشيروكي وليست في مستواه!!!!!.
أي سؤال عن الشيروكي 93-98.

الكاشت . كوم

04/05/2004, 09:57 PM

أنا أتوقع(( مجرد توقع)) إن الناس يهجون عن الشروكي لكثرة الخرابات مب علشان قطع الغيار لأن الي يصبر يستاهل ....أما إذا كان الموتر قطع غياره رخيص وكل يوم تحضر بالصناعية فلا تقربه أبد...

السالمي

06/05/2004, 12:25 AM

وين الموتر اللي يصبر الحين بالله عليك قلي

الهقط الاندكلوزر يصبر يهبا ذاك يصبر

والشروكي انا اقولها وانا مجرب خرباته قليله ويكفي ان بديه اقوى من الاند كلوزر

ساري نجد

08/05/2004, 01:20 PM

سلاااااااااااااااااااااااااااااااام

اخوكم مجرب ثلاث سيارات:

شيروكي 92 : مستعمل ونظيييييف ، حلو ووذف بس طلب قطع غيار ورّاني العين الحمراء، وصيانته مزعجه، ووين السوق وبعته، جلس معي سنه

باترول ربع 90 : رهيييييييب بمعنى الكلمه، وبعد سنه بعته بنفس قيمته

الآن باثفيندر 2001 : زي العسل، يمكن يكون حق مدينه اكثر من كونه للبر، لكن في البر معي مثل الصقر

يعني ترى الموتر يعتمد على السواق اولا ثم وضعه في السوق علشان الصيانه

وسلاااااااااااااااااااااااام

Y&Y_4X4

08/05/2004, 10:38 PM

ترفق على روحك يابعدي !

وبدون تعصب ( وتك على العين ) ؟

انا اقول اذا قطعة الغيار المستهلكة تجلس في الامريكي سنه نفس القطعه في الياباني 5 سنين بدون تكلفة تذكر في عملية التركيب هذا مهم جدا ؟

والي مايطول العنب يقول حامض:D

جميل جمال

09/05/2004, 03:22 AM

:D :D على قولة اخوي Y&Y_4X4 اللي مايطول العنب حامض عنه يقول ..

ولا اللي عنده مبلغ دسم ويبي جيب ما راح يفكر بغير اللاند :D ولا انا مخطي يا Y&Y_4X4

ما اقول الا هداكم الله بس :p

نقا هشال

09/05/2004, 06:55 AM

اخوي السالمي

هل جربت اللانكروزر الجديد

اكاد اجزم انك لم تجربة

فيوجد طبقة من السيارات

مستواها مرتفع ولن يظيرها

كلماتك التهجمية الغريبه!!!!

يكفي اللاندكروزر انه اكثر سيارة شعبية فهو يتواجد في كل شوارع الرياض

وفي كل البران تخيل بدوي معة شروكي هههههههههههههههه الشروكي موتر زفلت

وبس اما دهنا وصمان شحوووووووو

اما الشروكي لاالموتر ولا شكلة ولاوكالته ولا صغره من جوا اذا ركبت تصفطت رجليك

وشلون اذا كنت بتقطع الآف الكيلو مترات

الفي اكس آر ولاغيره مهما كثرت الاقاويل

أبوفيصل

09/05/2004, 02:14 PM

مع احترامي لك وللشروكي .. لا يمكن مقارنته بالـ لاندكروزر ومن كل النواحي.

الدبل الثقيل

10/05/2004, 12:59 AM

ياخوي اذكر الله شيروكي صنعة يهود تقارنه بتويوتا صنعة اليابان.. الوالد كان معه شيروكي قيمة مروحة التبريد 2500 ريال وقيمة الأصطب الخلفي البلاستيك فقط للجنب الواحد 500 ريال بعد الخصم .. والتجاري ب250 ريال لكن ترتيب الألوان مختلف .. يعني لازم تغير الجنبين.... وبعد هذا تمدح الشيروكي لكن ما اقول الا مثل ما قالوا الأخوان اللي مايطول العنب يقول حامض.

أبوفيصل

11/05/2004, 10:07 AM

ما ودي أزيد على الموضوع لكن راح أذكر معلومه بسيطه للأخ اللي يمدح بالشروكي .. شف يا غالي كان عندي شروكي موديل 94 زي الحلاوه نظيف ولا به شيء .. بس حسيت بعد فتره أن بدة فيه قرقعه من قدام وديته لكذا ورشه كلهم يقولون الركبه .. المهم ركبه ركبه ..

طبعا أي سياره ودك تغير لها ركب .. حدها إن طقت طقت 150 للجهتين .. تدري بمكم شريت ركب الشروكي ؟؟

بـ 950 ريال .. تجاري من عند بن زينان اللي بالدمام مقابل وكالة تويوتا.. ولمعلومات بعد حب الخشوم والواسطات .. تقول كني مقدم على الكلية الأمنية .. وأزيدك من الشعر بيت الأصلي عند الوكالة للجهة الوحده فقط 1350 - 1500 .. وما خفي كان أعظم.

وسلملي على الشروكي .. قال شروكي قال.

راعي الحمره

12/05/2004, 01:34 AM

السلام عليكم ورحمة الله وبركاته

والله يا شباب انا قالولي ان قطع غيار الشروكي بالسعوديه غاليه بس ما كنت متوقع انها بهذا الغلو , بالكويت القطع ارخص يعني مثلا الاخ ابو فيصل يقول الركب ب 950 تجاري وبالكويت 500 ريال الاصلي والتجاري ب 120 ريال وانا شاريهم .

بس يا شباب تراكم نسيتو ان قطع غيار التيوتا والنيسان اغلى من الشروكي بكثير ولا قي مقارنه بعد .

مع تحيات
اخوكم راعي الحمره

القناص

12/05/2004, 10:37 AM

مع احترامي لكل الاراء
بس حبيت اشارك بما اعرف على الرغم من قلة ما اعرف.

والله ان اصطب الكورلا اصلي اغلى من اصطب الفياغرا 2003
وقيمة طقم توظيب مكينة 8 سلندر ياباني بقيمة مكينة جديده شغالة ومضمونه من العيسى او الجميح او المتحده.

وراحة مرتبة الامريكي تسوى واجد
انزل من امريكية او المانية بعد السفر
وانزل من يابانية بعد السفر
وشف فرق الاجهاد

يا اخوان لنعترف ان الالماني والامريكي اريح حتى لوتحبون التايوتا او النيسان
ولا ينطبق عليكم قول الحب اعمى

الشي الوحيد في الياباني هو انه مرغوب عند "بعض الناس" في البيع وبس
اما اللي يفهم في تقنية السيارات وجرب الموجود في السوق كله..فيبصم بالعشره على ان غير الياباني وغير الكوري اريح وارخص مشترى وصيانه.

هاه شرايكم في الياباني والكوري صنعة الوثنيين
على الاقل المسيحين يعرفون الله
بلاك الوثنيين اللي في احسن حالاتهم يعبدون بقره

اقول قطع غيار الياباني الاصليه نار الله الموقده
لكن الناس معميتها الدعايات وما ينلامون
لان الدعايه تحسن السيء
وتقنعك ان مافي البلد احسن من منتجها

عموما قطع غيار الياباني في الوكالات اغلى بكثير من الالماني
والامريكي قطع غياره بلاش بلاش بلاش ولو ما اعترفوا بعض الناس
والله الهادي
وكلن بهواة
بس الحق حق
واحق ان يتبع

أبوفيصل

12/05/2004, 03:00 PM

أخوي القناص

ولد عمي مغير نص مكينه بـ 12000 ريال .. مكينة شروكي عادي موديل 94 . شرايك.

أبو صقر

12/05/2004, 05:47 PM

السلام عليكم ورحمة الله وبركاته
والله الشروكي عسل
بلا باثفايندر بلا بطيخ احمر والله لاقطع غيار ولا شي
بس الصيانه
وكان عندي شروكي والله عسل
شيطون
لا وبعدين عملي
دفرنسات يعني مثل حركات الشاص من تحت ابد والله مايفرق
ولا 4.0 لتر يعني يغطي على الباثفايندر وأشكاله
يعني عزمه حول التيوتاالGXR

بس في الرمل عزمه ولا ااحلى كان يربع على الطعوس
ولا تحط رجلك على البانزين شوي ياخذبك خمسه
الا مهب صاحي وسلموني على اللي صنعه
وخاصه ابواربع ابواب
ابو باب لا يهمك
من وسعه عشان تشتري ابو بابين
وشكرا

مهراس

12/05/2004, 06:44 PM

الأخ اللي يقول نص مكينه بـ12000 ريال ،،، تأكد يمكن مزود صفر.
اللي يقول ان السيارات الأسيويه وعلى رأسها التويوتا والنيسان سيارات ويمدحها اسمحولي أقول انه مايعرف الا الطاره والبنزين حتى مفتاح العجل ما يدرى كيف شكله واللي عنده ذوق في السواقه يتفل على القرنبع الياباني.
بعض السيارات اليابانيه قزاز ماتحصل وخاصة الموديلات الجديده والأمريكي أي واحد عنده كم كلمه انقليزي يقدر يطلب من أي محل في أمريكا وتجيه القطعه بالبريد وبارخص الأسعار هذا اذا ما حصل القطعه هنا،،،،، هيا قوللي تقدر تطلب مسمار من اليابان...... يا شيخ ماابغى اتكلم بس،،،،،
والأخوان اللي يقولوا صناعه يهوديه ولا وثنيه صدقوني مافي روسكم سيارات،،،،
أما الأخ ابو عكوس بـ900 ويشوفها غاليه ،،،، اسال عن بعض قطع الياباني قبل ماتقول غالي بعدين انت كل يوم بتغير عكوس،،،، خلاص القطعه خربت شوف غيرها وحافظ عليها.
,اتمنى من الأخوان لايدخلوا عباس في دباس نحنا نتكلم عن السيارات فقط وهذا ليس مجال لأي أراء أخرى.

أيمن

12/05/2004, 11:20 PM

موضوعكم رائع ومحاورتكم جميلة ..
لولا أني تمنيت أن البعض يترك أسلوب التحدي والتشنج في بعض الردود .. والمراء إن صح التعبير ..
يعني حتى نخرج بفائدة كما أرادها الكاتب ويريدها القارئ ..
أن نضع المميزات والعيوب والعاقل خصيم نفسه، وبعدين ليس كل فرد ملزم بأن يقنع الطرف الآخر والأمر في مجمله ليس فيه أي فائدة نرجوها نحن من تسويق آخر على آخر إنما كل الأمر مناقشات وأخذ وعطا ليتشكل للجميع تصور عام قد يكون مخالف لما هو طاغي على الناس وعلى قرار أفهام المستهلكين ..

تحيتي

ابوبندر

13/05/2004, 07:59 AM

يعطيكم العافيه
احب اظيف ملاحظتين
1- انه لا يوجد سيارة تطابق جميع الرغبات او المواصفات يعني كل سيارة ولها ميزات وعيوب ونلاحظ ان عيوب التايوتا تغطيها النيسان او العكس مثال النيسان احيناً اريح من التايوتا ولكن التايوتا اقوى تحمل لكن اغلى من النيسان ,,, أو نقارن الامريكي بالالماني صحيح ان الامريكي مريح ورخيص ولكن الاماني افضل جوده واريح ولكن سعره ناااار

2- لايمكن ان نقارن سيارتين مختلفة الفئه يعني مثل شيروكي و GX-R يجب ان تكون المقارنه من نفس الفئه مثل شيروكي وباثفايندر , باترول سفاري و GX-R ,,, انت احسب كم تدفع قيمة السياره مع قيمه الصيانه وقطع الغيار واستهلاك الوقود ثم قارن

وجهة نظري الشخصيه اني اقسم انواع السيارات على نوع الاستخدام
1-الشيروكي حق تطعيس وموتر ديره لا يعلى عليه ,, ولكن صغير الحجم ولا يمسك سعره عند البيع
2- الباثفايندر برضو تطعيس وموتر ديره لكن اقل عزم من الشيروكي بس اوسع بالحجم ويمسك سعره عند البيع
3- GX-Rلاندركروزر موتر شخصيه موتر بر موتر سفر طويل موتر ديره ولكن ثقيل اذا تبي تطاعس وصرفية البنزين كثيره شوي ولكن يمسك سعره عند البيع
4- الباترول مريح وموتر بر و سفر طويل ورخيص جدا مقارنه بالاندركورزر لكن يصرف بنزين وليس بجودة التايوتا

علماً انني كنت احلم ان اشتري شيروكي بس يوم تغير شكله فكرت بالـ GX-R والباثفايندر ثم اخترت الباثفايندر لاني ماني ملزوم بسيارة كبيره وانا مو محتاج لها
----------------------------------
في ناس تحافظ على السيارة تستاهل انها تشترى اغلى سيارة ولكن بعض الناس يكرف ابواللي جابها ليش تشتري سياره غاليه وتخسر فلوس
-----------------------------------
http://www.mekshat.com/pix/upload/images5/mk6827_pathfinder.jpg

القناص

13/05/2004, 11:56 AM

عشت بوبندر
كلامك جميل وموزون
خصوصاً

في ناس تحافظ على السيارة تستاهل انها تشترى اغلى سيارة ولكن بعض الناس يكرف ابواللي جابها ليش تشتري سياره غاليه وتخسر فلوس

والخلاف في الرأي لايفسد للود قضية اخوي ايمن

شكرا لمن اختلف او اتفق معي

ولكن أأكد لكم جرب كل الجيوب من الفئة اللي ترغب قبل الشراء ثم اعقلها وتوكل
خصوصا ان الوكالات الان تعرض قيادة تجريبية لسياراتها ..يعطونك اياها وتجربها وانت الحكم.

سلام ومحبة وتقدير للجميع

أبوفيصل

15/05/2004, 08:04 AM

الأخ المحترم مهراس

أتمنى أن تكون لديك بعض الإجابات عن هذه الأسئلة؟ وأن تتقبلها برحابة صدر؟

1- هل سبق وأن استخدمت شروكي.
2- ماذا تعرف عن شيء اسمه ((الركبه)) طبعاً في السيارات؟ هل سمعت أحد ذكر أسم عكوس؟ وهل تعلم ما هو سعر العكس الخلفي؟
3- ماذا تعرف عن الحساس حق االزيت اللي في الشروكي؟ وهل تعلم أين يوضع بالضبط؟ وهل لديك علم أنه لو تحرك قليلاً عن مكانه لأجبرت على تغير ماكينه كامله؟
4- هل تتوقع أنه يوجد نصف مكينه لشروكي بـ 1200 ريال؟

لمعلوماتك. سبق وأن استخدمت شروكي موديل 94 وأنا أنصح به للبر وأعرف قوته أكثر من أي شخص لم يجرب الشروكي .. وقد دخلت به أماكن لو دخل به موتر ثان لم يخرج منها .. من ناحية قوة سيارة أنا معك .. ولكن يا أخي من ناحية أن يقارن بـ لاند كروزر .. فلا وألف لا .. يا أخي العزيز .. الشمس لا تحجب بغربال .. هذا لاند كروزر .. وفي النهاية .. أنا أسف إن كنت قد سببت إزعاج لأي شخص.

وسلامتكم

مهند

15/05/2004, 09:13 AM

اللي مايطول العنب
http://www.landcruiser.4wd.ru/foto/fullsize/landcruiser_03.jpg

حامضن عنه يقول:p

مهراس

16/05/2004, 06:23 AM

ج1: نعم.
ج2: لا ، ممكن ، لا.
ج3: حساس الزيت في الجيب الشيروكي والقراند / 4 لتر ، نوعين:
الأساسي هو ما يسمى الساعه في الجهة اليمنى للمحرك، مكانه ثابت لا يتحرك وسعره 120 ريال.
الأخر أختياري وهو متصل بلوحة الكمبيوتر داخل السياره لتحذير السائق بانخفاض مستوى الزيت ، مكان الحساس في وعاء الزيت(الكرتير) في الجهة اليمنى ومحله ثابت لايمكن تحريكه وسعره 220 ريال.
ج4: لا ، ولكن ليس من الحقيقي 12000 ريال ثمن نصف محرك لأي سياره من هذا النوع.

السالمي

16/05/2004, 05:33 PM

اول شي خشمك يالقناص بعدي والله جبت اللي بقوله

الحين ابرجع اقرا ردك والردود اللي بعدك

وقبل اروح بقولكم شي شركة تايوتا افضل ما انتجت من سياراتها

الشااااااااااااااص والربع والهايلوكس وغيرها زيرو من اليسار مع احتراماتي لهم

انتم تبون المركب والراحه والوساع

تلقونها بالجيب الكادلك واللي يبطي ماجا الاند كلوزر مثله

ماتبون الكدلك مااااااااااااااشي فيه الجيب الموستبيشي باجيرا الجديد

فخامه يحبها قلبك بس وجهيته لك عليها شوي

وعندكم الفورد اكسبدشن حلو وساع وفخامه ومركب وقطع ارخص

السالمي

16/05/2004, 06:18 PM

لي رجعه معك ياراعي العنب

ومشكورين على ردودكم جميعا والمقصد

ابداء راي واظهار حقايق وغير كذا مالنا مقصد

جميل جمال

17/05/2004, 02:28 PM

مع احترامي الشديد لك اخوي السالمي ..

انا مستغرب تهجمك على اللاندكروزر ..

لكن انت تقول ان الشاص من افضل ما انتجت تويوتا وانا اقول مكينة الشاص هي نفس مكينة اللاند يعني وش فرق ؟؟

واذا حنا نبغى مركب تقولي الكادلك ؟؟!! انا اقولك اركب الكادلك وقارنه مع مركب الفكس ار الهيدروليك شرط ان الفكس ار اطلق مركب ..

بعدين انت من صدقك تبي تاخذ لك كادلك وتطامر فيه بالصمان ولا بالدهنا ولا بنفود حايل ؟؟ !! لا تنسى انه امريكي يعني (( خوااااااااااان )) انواع الخرابات ولاهوب مظمون زي اللاند ..

اما الباجيرو فانت اللي مدحته وبعدين سبيته بقولتك وجهيته مالها داعي .. ومهما وصل من مواصيل الباجيرو ما يوصل اللاند كروزر ..

وصدقني وانا اخوك ما صار سعر الفكس ار 180000 ميه وثمانين الف عبث ..

اخر كلامي وانا اخوك انه يبطي اي جيب يجي زي اللاند كروزر ولولا انه موب الافضل كان ما تشوفه هو الاكثر شعبيه في السعوديه والخليج .. وهو الاغلى ايضا ..

شبوب

17/05/2004, 10:07 PM

تم خذف المشاركه

لتجاوز الادب العام

تم التعديل من قبل

طاير بالعجه

العنكبوت

17/05/2004, 10:42 PM

قد يكون كلامكم سليم ,,, لاكن المويه تكذب الغطاس

ماذكر بحياتي اني شفت لاند ناكب راعيه بالبر
ماذكر بحياتي اني شفت لاند متعطل ,,, الا كفر والا سير
دائما مانسمع ((الشروكي الفلاني اعتلق بالنفود)) <= يعني احترق
اذكر اني اكثر من مره شفت شروكي بالنفود واقف واخرهن عام
1422 بنفود البعيثه واذكر العيال كلموه وقال العمود وانا مامن خبره
بس الظاهر انهم يقولون عمود القير طاح واسمع ان ذي من مشاكل الشروكي

الناس تختلف حاجاته من الجيوب لاكن الحظ بالسعوديه ان اغلب الناس
جيبه مثل سلاحه تهمه سمعته وهيبته ,,, والشروكي بذي ولا بريااال

الشروكي مايصلح الا لصغار الحجم يعني واحد نحيف ومامن عرض

كلمه حق لا بد منها ...
ان الموتر عليه نشاط مووب طبيعي الا عام 2000 الين مانزل الربع
البخاخ وغطا عليه بكللل المقاييس وام دباب تشهد
والشروكي يصلح للتفحيط <= ذي ميب لكم ياشيبان:D :D :D
لانه ماتنطبق عليه خطوره الجيوب

وزي ماقالو الاخوان يالسالمي مقارنتك ميب سليمه
تبي تقنع واحد يبي لاند بانه يهون ويشري شروكي!!!
لا بغيت تقارن قارن من نفس الفئه يعني شروكي مع ربع تيوتا ربع نيسان

عموما اامل ان يكون النقاش هااادي وكلن يقول الي عنده

تحياتي

صقر الليل

18/05/2004, 12:08 AM

http://www.mekshat.com/pix/upload/images5/mk8570_Land Cruiser 2004.jpg

اللاند كروزر V8 VXR زئير في الصحراء

وهادي وسلس في المدينه

مع احترامي للأنواع الاخرى ولولا اختلاف الاذواق لبارت السلع

حقيقة اللاند جبّار على رمال الصحراء ويقهرها ويخلفها ورائه غباراً

مهند

18/05/2004, 01:03 PM

يابعد قلبي والله ياعشاق اللاندكروزر

جميل جمال + شبوب + العنكبوت + صقرالليل ولايهونون الباقين ولكن هؤلاء اللي ظهرت اسمائهم في الصفحة 3

اقول شفت يالسالمي كم عدد عشاق اللاند(هذا من غير اللي ماردوا) اللي انت اخطيت عليهم خطأ فادح ولازلت تصر على خطاك والمشكلة اللي اكبر من كذا ان المشرفين عدوها لك وتغاضوا عنها

خطاك ياسالمي باختصار انك تعصبت لسيارتك الشيروكي وهذا لااعتراض لدينا نحن العقلاء عليه
ولكنك استخفيت وحقرت سيارات اخرى لها عشاقها ومحبوها وهذا هو الخطأ
يعني كان بامكانك تكتب عنوان موضوعك بصيغة ثانية مثل:
((الشيروكي وبس ولاغيره)) ((الشيروكي افضل انواع سيارات الدفع الرباعي على كوكب الارض قاطبة)) وحط من العبارات اللي تكبرك عند نفسك الى مالانهاية
لكن ان تبدأ بذكر اسماء اخرى بصيغة تدل على الاستخفاف وانك وسيارتك الافضل فهذا الاسلوب غير لائق للمحاورة والمناقشة مع الاخرين ولكن نلتمس لك العذر فربما انك جديد في المنتدى ولم تلاحظ مستوى الاحترام الكبير للنفس اولا وللاخرين الذي يتمتع به اغلب اعضاء هذا المنتدى كما يمكن ان يكون عمرك يشفع لك في ذلك واتمنى ذلك
وأخيرا ايها السالمي الاحترام لاذواق الاخرين هو من الاحترام لذواتهم ولأرائهم فيجب ان نحترم الجميع سواء اللي يركب شيروكي والا لاندكروزر والا ددسن والا هايلوكس والا كرولا والا لادا (تعرف اللادا؟؟)
وعمر السيارة لم تكن مقياس للرجال ولكن في هذا العصر اختلفت المقاييس والله المستعان

واخيرا هذه هدية لكم ياعشاق اللاند
تفضلوا لاهنتوا (http://www.chatdubai.net/upload/Array/landcros.zip)

السالمي

18/05/2004, 07:14 PM

يالمهند انا ماتكلمت عليك او على احد من الاخوان

انا اناقش معكم رأي وموضوع يمكن يكون ما اعجبكم لان حب الاند تأصل فيكم

السالمي

18/05/2004, 07:49 PM

اخوي اللي تقول اتكلم عن عطالاته والعمود

يالغالي الشروكي فيه ميزه انه يطفي اذا زادة الحراره عن النص

وثاني شي انا مجرب الشروكي وطلعت فيه للبر وطلعة مسافات طويله للبر ومع نفود والله ما اشتكا من شي

بالعكس الا اكثر راحه من الاند واقوى وماتخاف من شي لاكن الاند اذا نشب نشب مايطلع

وانا وسبق وطلعة لاند كلوزر جس اكس ار الجديد ابو انوار زنون انا وجيب ربع تايوتا لانه كان داق الا الدفرنش

وبعدين اذا بتتكلم عن الدهنا والربع الخالي ذا مايطلعها الا جيب من الجيوب القديمه واللي تتحمل

قد شفت لاند كلوزر 2003 يتمشى بالربع الخالي شاص انا معك وانا يوم امدح الشاص امدح خفه

وصحيح نفس الماكينه هو والاند بس الحجم والخف يختلف

ثاني شي انا اجي معكم في شغله ان قطع غيار الشروكي مومتوفر زي التايوتا

بس ماهو اغلى

البارح شدني كلام احد الاخوان عن نصف الماكينه حقت الشروكي

تدروني بعد ماسعرتها بنفسي كم طلعة قيمتها

نصف ماكينه شروكي 2000 لاريدو 6 سلندر بـ 5500 ريال والاند كلوزر جي اكس ار 2000 بـ 8500 ريال

وسعر الشروكي يالمهند الاريدو 6 سلندر 2004 بـ 136000 والاند كلوزر 2004 جي اكس ار 6 سلندر

بـحدود 114000 ريال

وفي الاخير يالمهند قوانين المنتيات وطريقة التعبير عن الراي عارفينها يالغالي

وانا محترم رايك وراي الجميع والدعوه اخذ وعطى

والاند مالله عطاني منه ولو جاني هديه ابخذه وابيعه وازيد عليه واشتري شروكي 2004

الناس وصل فيها حب الاند الى ان البعض منهم يرا فيه النقص اذا ما اخذ لاند كلوزر وصار مثل فلان وعلان

ياعمري يالاند 97 اما الي انتم تتكلمون عنه واقصد الموديلات اللي فوق 98 هذي

ما احد مدحها من اهل القنص واهل طلعات البر اللي لاكشتو للربع الخالي راحو اربع خمس اسابيع على وجههم

فايز العامر

18/05/2004, 10:52 PM

السلام عليكم ورحمة الله وبركاته....

بادئ ذي بدء....

انا ممن عانا من مشاكل الشيروكي، كلاسيك موديل 96 قير عادي....

اول شي شريته نظيف بمعنى الكلمةب30000ريال... الا اللهم الدبل لعب على راعيه الله لا يحله...

رحت عليه لحايل بعد ماشريته بأقل من شهر، وانا راجع انفرط القير وصار يلعب ولا يعشق الا الرابع.. يعني لا اول ولا ثاني ولا ثالث ولا خامس ولا حتى الريوس... المهم اني مشيت به ودخلت الرياض بالرابع ورحت الصناعية ووديته لفني وقال -بعد الفحص- هات لي القطعتين هذولي قلت بس هالثنتين!! قال بس.. رحت الوكالة وعطيت خدمت العملاء القطعتين -صغار تحطهم بمخباك بس شوي ثقال- وقام يقطق بالكمبيوتر وقال هذولي الله يسلمك ب 6400 ريال!!!!! ابوي معي بغت تجيه جلطة بس الله فكه... قال ابوي اجل كم القير الكامل قال ب15000 ريال.... قال ابوي الله لا يبلانا امش ياوليدي والله لو اني ناسي عقلي بالبيت ماشريت هالقطعتين... المهم رحنا يم الحاير التشليح ماهو السجن:p ولقيت لي قير بعد معاناة حوالي اربع اشهر ب5800 ريال....

باختصار خسرت عليه حوالي 11000 ريال وبعته ب17000 تحت المكرفون ريال يعني خسارة 24000 ريال. بس الحمد لله اللي فكن منه ومن شره... والحمد لله انه جت على كذا....

القصة ماانتهت لكن راح اذكرها كاملة ان شاء الله في منتدى القصيد لأن الوالد -الله يرفع قدرة- قصد فيه قصيده...

السالمي

18/05/2004, 11:11 PM

وليه تشتري عايدي من الاساس

الشروكي امريكي يعني القير الاوتماتيكي هو المرغوب فيه

طيب انت سعرة القير العادي بالنسبه للاندكلوزر سعر ورد لي خبر

واي وكاله في الدنيا تلقى اسعارها غاليه

والشروكي اذا حطيت القطعه الاصليه فيه خلاص انساها

جميل جمال

19/05/2004, 01:28 AM

هلا اخوي السالمي مره ثانيه ...

اخوي السالمي تعتبرها ميزه انه يطفى اذا وصلت الحراره للنص ؟؟ طيب ليه من الاساس ترتفع الحراره ؟؟ هذا اذا دل على شي وانا اخوك انما يدل على ردى الصناعه ..

بالله قد شفت لاندكروزر مرتفعه حرارته ؟؟ لا ما اقول لاند خلني اقولك سيارة تويوتا او ياباني عموما ؟؟ صدقني نادر واذا لقيت تلقى السياره قديمه شوي وفيها بلا ..

اخوي عندنا بالقصيم يقولون عن السيارات الاميريكيه انها (( اذا صرت في مكان ما احد فيه التفتت السياره ==> انتي يالامريكيه وناظرت يمين ويسار واذا مالقت احد طفت )) وهذا ما قالوها عن عبث او قل تجربه هذي قالوها لانهم عرفوا الامريكي انه خوااااااااان على اللي صانعه

ياحبيبي انا معي لاند جديد ولله الحمد وخويي معه شيروكي 2000 واذا طلعنا للنفود وشبينا على المواتر شوي ما ناخذ عشر دقايق الا مرتفعه حرارة الشيروكي مع انه مركب مراوح كهرب .. وانا موتري شد بلده لا مراوح ولا هم يحزنون ...

اما من ناحيه الراحه اسمح لي وانا اخوك اللاند اريح من الشيروكي وبمراحل يكفيك من اللاند وانا اخوك انه ياكل المطب ويمشي اما الشيروكي ياكل المطب ويستمر يلعب .. الشي الثاني الشيروكي انواع القرقعه كانك راكب جيب عشه وانواع تسريب الهوا عكس اللاند .. اللاند اتحداك تسمع قرقعه او تسمع تنسيم هوا الا اذا كان مصدوم ..

من ناحيه القوه بالنفود انا اشهد ان الشيروكي اقوى من اللاند وبمراحل بعد .. اما مسالة ان اللاند ينشب كل السيارات تثولث وتنشب وهالشي عادي خصوصا اذا كان اللي يسوق غشيم وياكثر الغشم اللي معهم جيوب .. وياكثر ما طلعت شيروكيات خصوصا ان الشيروكي ماهنا زود ارتفاع يعني تلقاه دايم متعلق ..

اما عن قولك الدهنا والربع الخالي .. وانا اخوك قطعنا به نفود حايل ومترنا به الدهنا وكل مكان ولاهوب عجز عن الربع الخالي انشالله .. (( مع العلم ان موتري قير توماتيك ))

اذا جاك لاندكروزر (( بعد عمر انشالله )) وبعته وشريت شيروكي لا تنسى اول ما تطلعه من الوكاله تنصى الصناعيه ترهم له مروحة كهرب عشان ما ترتفع الحراره عليك :D :D :D

ومن ناحية ان السبع وتسعين افضل من الجديد .. فكل انسان له وجهة نظر وكل انسان له استخدام وكلن يختار اللي يعجبه .. انا انسان تهمني الراحه والجديد اريح .. ويهمني العزم والجديد اقوى .. وتهمني الفخامه والجديد افخم واوجه ...

في ردك الاخير تقول ليش تشتري عادي من الاساس .. اخوي السالمي انا اخبر دايم ان القير العادي هو العملي .. فاذا كانت هذي مشاكل العادي وش راح تكون مشاكل التوماتيك ..

على العموم اخوي كل انسان وله وجهة نظر ويبديها وارجو انه ما يكون فيه بالخاطر شي ..

مجنونها@@

19/05/2004, 03:17 AM

الشيروكي

استغرب من قال مايصلح للبر

اذا جينا بالمعيار الي يقولة صاحبنا بنتفق جميعا مامثل الشاص
موتر

انا معي شيروكي وكل مكان اروحلة ودايم اردد اللهم باركلي في مارزقتني

لو قلتولي وش يقهرك بقول ان قطع غيارة مهيب موجودة في كل مكان

يعني ببعض المدن ماتلقا السيفون

بالرحلات الطويله اخذ مايلزمني سير - سيفون

من عيوبة ان سعره يطيح بس من صالحي لاني شريت الي عندي اخو الجديد يعني بعد ماطاح سعرة

الاند كروزر
كثير من الشباب يقول ماارخصت موتري للبر

ان ماعزني الجيب وخلاني اقول من يركب معي مهوب اقول من انا معه

سعرة غالي مقارنة بالشيروكي المستعمل

تصل للنص احيانا بس

نقدر نعتبرها ميزة

انا اخترت الشيروكي وقلت الفرق بينة وبين الاند كثير الفرق بحطه بقطع الغيار
بس الحمدلله ماشفت منه الى كل خير

اخيرا اسف على الاطالة

ولنعلم لولا اختلاف الاذواق لبارة السلع

العارض

19/05/2004, 05:16 AM

السلام عليكم ورحمة الله وبركاته 0
صحيح كل صاقط له لاقط 0تحياتي للجميع 0

مهند

19/05/2004, 08:23 AM

هيييييييييييييييييييييه يالسالمي خلوهاااااااااااا

يقول اللاندكروزر للشيروكي:

اذا اتتك مذمتي من ناقص ========= فهي الشهادة لي بأني كامل

ياخي قلنا لك

امدح الشيروكي لين تشبع

لكن لاتذم اللاندكروزر؟(حتى ماتعرف تكتب اسمه صح) ليه تذمه؟ هذا موضع اعتراضنا

فهمت

أبوفيصل

19/05/2004, 09:03 AM

الأخوة الأحبه

أسعد الله أوقاتكم بكل خير.

الأخ العزيز .. السالمي .. انا اللي قلت إن نص مكينة الشروكي موديل 94 (شروكي عادي .. مو قراند) انا اللي قلت إنها كلفت على ولد عمي 12000 ريال .. وما زلت مصر على رأي وبإمكاني أن أثبت لك وبالفواتير .. أو إنك تجي معي أو أي شخص تنتدبه للذهاب للوكالة على طريق الخبر الدمام السريع .. وأنا مستعد وفي أي وقت ..

حبيبي السالمي .. أنا ما ني ضدك ولا أحد من الشباب ضدك .. كلهم يقولون أن الشروكي موتر محترم وما عليه زود .. وأنا معك .. بس ياعمري يا عيوني .. أنت بكذا تظلم الشروكي وربي تظلمه يوم إنك تقارنه بالاند .. شف راح أقولك كلام وربي ما زليت فيه .. وتسألني عنه أمام الله عز وجل.

شف يا غالي .. قبل شهر تقريباً كنا في منطقة تسمى سيلين في دولة قطر .. وأعتقد أن أكثر الشباب يعرفون المنطقة فهي صحراوية جداً وأصغر صعس فيها أكبر من أكبر طعس من الطعوس اللي عندنا في ((الهاف مون)) .. كنا رايحين على ثلاث سيارات ..
1- شاص 94
2- لاند جي أكس أر 2002 قير اتوماتيك
3- شروكي 98 قير عادي

المهم .. صاحب الاند .. عليمي ما هو حق سواقه .. ومخلي واحد من الشباب يسوق عنه .. واللي يسوق الشاص سواق هندي .. أما سواق الشروكي فهو أحسن وأفهم سواق .. وسواق سواق راعي طاره .. وهاذا هو ثالث شروكي عنده .. ويتعامل مع الشروكي من موديل 94 .. تصدق انه يحلف بالله يقول .. وربي أن ما قوى قلبي إلا شوفت الشاص والاند بجنبي ولا لو على الشروكي لحاله .. كان رحت من صيد أمس .. يا خوي وربي الشروكي قوي لكن ما يصف جنب الاند ..

وفي الختام يا الغالي ارجو ان لا أكون اثقلت عليك وعلى الأخوة القراء.

نسيت أقولك .. كان عندي شروكي موديل 94 استخدمته تقريباً أربع سنوات .. بس يوم جربت الاند حق أخوي .. بعت الشروكي على طول. والحين معي باثفايندر 2003 ومبسوط منه أكثر من الشروكي .

وسلامتكم

السالمي

19/05/2004, 02:57 PM

اخوي جمال الف شكر لك على مرورك وردك

لاكن لي ملاحظه على كلامك انا معي قراند شروكي 6سلندر 94 حق الشايب

والله ماقد سمعت قرقعه والاصوت هوا والحراره ماعمرها وصلت النص

وانا دايم اطلع عليه لهافمون والهن جده بالطعوس ترتفع الا الثلث بس

يمكن تاصل النص مع المسافات الطويله اذا كنت تبي تقطعلك عرق وانت معشق الدبل لمسافات طويله

اما بالنسبه للراحه والله االلي الشروكي اللي جربته ماشفة منه شي يقلق من ناحية الراحه

هذا وهو 94 اما الجديد 2001 فما فوق والله اريح واريح منه ماشفت والجلد اللي فيه افضل

من سيارات كثيييييييير

والف شكر لمرورك وردك

السالمي

19/05/2004, 02:59 PM

اخوي مجنوناها الف شكر لمرورك

وفعلا عيبه عدم توفر قطع غياره زي الاند ما الغلا والله ماهو اغلى

السالمي

19/05/2004, 03:01 PM

الأصل كُتب بواسطة العارض
السلام عليكم ورحمة الله وبركاته 0
صحيح كل صاقط له لاقط 0تحياتي للجميع 0

8
8
8
هذا اسلوب مناقشه

وينا فيه ترى نهرج في سيارات مانهرج في حريم

السالمي

19/05/2004, 03:08 PM

والله يامهند انا ماذميتك انا ذميت الاند كلوزر

الا اذا انت ضايفه بدال المره ذا شين ثاني

العنكبوت

21/05/2004, 10:52 AM

الاخ الي يقول يطفي الشروكي لاوصلت حرارته النص

واللع ياعيوني حنا مانصدق الي بالكتلوجات والا بالمجلات

والا الاستكرات الي على الوكاله ,,, حنا نسال ربعنا الي

جربوه ونسال راعين الخبره .

وانا والله ماني مكذبن عيوني بسالفه انه يحترق لا رصيت

عليه لان ااخر ماشفت ببريده بنقره الفنجال قبل خمس سنين

شروكي يطعس لما شب , وخلاه راعيه وراح

ومن ناحيه مطلعين جي اكس ار ذا سالفه للوناسه بس مايستفاد

منه بشي , لان الكلام على السواق قدر يستفيد من قدرات موتره

والا لا ؟؟

وانا قلت لك واعيد الشروكي قوي قوي قوي بس شكله قبييييييييح

يبي له واحد صغيرحجمه والاهم من ذا انه ماله امان مايتكل عليه

بالبر باي لحظه يطيح قيره غير العيوب الثانيه الي ذكروها الشباب

والشي الثاني اعتقد ان التضاريس الي انت مريت عليها ميب مقياس

وعرفت ذا منيومك تقول (( ليش تاخذ عادي اساسا ))

وترا لكل منطقه شي يتحمل تضاريسها , فيه مناطق اللاند يالله يعيش به

وبه مناطق لو تبي جيب الهونداي ابدع فيها

تحياتي

السالمي

21/05/2004, 02:58 PM

الغالي العنكبوت

كونك تاخذلك موتر وتقعد تلعن والديه

تسييف وتحدي مع الطعوس لمده طويله ولا بعضهم كل خميس وجمعه

يبي ينعدم سواء شروكي والا غيره لاتقولي فيه موتر يتحمل

اللي نشوفه دايم بالتحدي ولعلمك اغلبهن مرهمات

وانا تحداك انت والاغيرك انك تشتري موتر من عقب واحد تدري انه راعيي تسييف او تحدي

رجالن تحافظ على موترك وتطلعبه للطعوس وللبر بالطرق الصحيحه والسليمه

يبي يعيش معك تبي تلعن والديه وتبي تجور عليه ماراح يعيش معك

وبعدين الشروكي اللي احترق انت تدري وش سبب الاحتراق

يمكن راعيه مسويله ترهيمات ولعبة فيه او صار فيه ماس كهربائي

او اي مشكله من المشاكل اللي تطراء للسياره

وبعدين ماقد سمعت شروكي طاح قيره وهو يمشي وينا فيه

مشبوك على مسامير سيكل هو يوم يطيح بالسهوله ذي

انا رجال استخدمت الشروكي ماشفت منه اي مشكله ولله الحمد

فيه مشكله بسيطه اللي هي الحراره

وهذي ابرهمله مراوح ويصير زي الحلاوه وسبق واعدني راعي محل

انه يرهمله مراوح لومينا واما سالفت انه يطفي نعم يطفي في الانواع العاديه منه

انا خوالي اثنين كل واحد منهم معه شروكي بس كلها من النوع العادي

واحد مهم الشروكي حقه مايطفي لاوصل النص حتى لو تطلع المفتاح وتخليه في مخباك

مايطفي الا بعد مايبرد والثاني لاوصل النص يطفي

اما القراند شروكي انا مادري عنه الصراحه واللي معي قراند شروكي بس ماقد تعدا النص

لاكن الحراره مع ترهيم المروح المناسبه له واللي تركب عليه راح تنحل المشكله

وبعدين حجم الشروكي هو الحجم المناسب للسياره الدفع الرباعي

ويكفيك انه يشيل 6 اشخاص وثاني شي تقدر تشيل معك عزبه حقت يومين ثلاث

والخيمه تربطها فوق

اما اكثر من كذا يبيلك سيارة حوض

مهند

22/05/2004, 08:34 AM

الأصل كُتب بواسطة السالمي
والله يامهند انا ماذميتك انا ذميت الاند كلوزر

الا اذا انت ضايفه بدال المره ذا شين ثاني

---------------------
اثرك طايرن بنا في العجة ومضيق صدورنا بذا الموضوع نحسبك تذم اللاندكروزر واثرك تذم الاند كلوزر ؟؟؟ من وين جبت اسم هالسيارة:p ؟؟؟

ازعجنا ابو شكيم

ذيب البر

22/05/2004, 09:35 AM

أنا عن نفسي وهذا رأيي الشخصي

اذا طلعاتي ثمامه وتطعيس وتحديات وإن خربتها بالربيع رحت للخفس وراعي خطوط

فأنا مارايح اتعدى الشروكي بصراحة

لكني اخاطر فيه واروح للصمان والرملة والمناطق هذي فهذا أعتبره هباااااااااال

وعز الله انكم اخطيتوا بحق الشايب على ما قال مهند

والدليل دورلي شروكي قديم وابجيبلك تويوتا قديم وشف الفرق هذا

ان لقيت شروكي قديم كلها بالتشاليح

تحياااااااااااااااااااااااااااتي

أبوفيصل

22/05/2004, 12:18 PM

الاند كلوزر

اسمح لي يالسالمي .. توقعت إن المقارنة بين الـ لاند كروزر .. والشروكي .. عشان كذا زعلت .. مادام كذا لا ياخوي الا كلنا معك الشروكي أقوى من ذا السيارة اللي ماعرفتها.

وسلامتكم.

السالمي

22/05/2004, 02:22 PM

شف مهند احترامن للمنتدى واعضائه

والمشرف طاير بالعجه ابسفهك

ولاني برادن عليك ويكفي رد ابوفيصل

السالمي

22/05/2004, 02:29 PM

ذيب الارض مشكور يابعدي على مرورك

بالنسبه لي انا لا والله مستعد اطلعبه اي مكان

اذا اني رهمتله مروحة تبريد ورجعت حرارته للربع

مستعد اطلع فيه اي مكان

طبعا فيه احتياطات يأخذها معها اي واحد ينوي انه يطلع الديار ذي

اذا وفرت الاحتياجات ذي معي مستعدج اطلع على الشروكي لاي مكان

وفي فصل الشتا ووقت الربيع مايعوقني عن الصمان شي ابد

وانا اعرف ناس سبق وطلعت على شروكيات يم الشمال يم جهة عرعر ولينا

ماأشتكو من شي

والشروكيات الاوله امهات تخشيبه متوفره عندنا بالشرقيه وسبق وشفت منها الكثير

وهذي هي باقيه مع دوريات امن الطرق في بعض المناطق

السالمي

22/05/2004, 02:37 PM

ابوفيصل هلابك يالغالي

والمقصد من البدايه انا ماقارنت بين الشروكي والاند كلوزر

انا فضلت الشروكي على الاند والسبب راجع لي انا

لاني اول شي ماني صاحب عائله ثاني شي ما رغبت الاند كلوزر من موديل 99 وفوق

لاكن من 97 وتحت لو والله سلملي عليه والدليل على كلامي ان اهل المقناص يفضلون

97 على الجديد وازيدك بالشعر بيت رح شف كم قيمت الـ 97 و 98 تلقى الـ97 اغلى

واشكرك على مروك اللي اسعدني ......

مهند

22/05/2004, 02:48 PM

والله انك من جمبها

ولاتفهم وين الله حاطك والدليل انك مافهمت رد ابوفيصل ولاتدري هو لك والا عليك

ووالله انا عارفين انا عطينا هالموضوع وجه اكثر من اللازم ولكن وش نسوي بك
صرت شوكة بحلوقنا وقل مابغينا الموضوع يهجد طلعته لنا مره ثانيه بكلام ماخوذن خيره <---قابلني ان فهمتها

أبوفيصل

22/05/2004, 02:57 PM

مهند ..

هذا وانا ادافع عن الشايب .. أنت شكلك يوم إنك في الإبتدائي .. يحطونك عريف الفصل .. لأن شكلك من النوع اللي بسرعة يعترف .. ويعلم عن المشاغبين!!

بعدين يا مهند .. ترى أخونا السالمي كان قصده واضح ولا كان يقصد مقارنة اللاندكروزر والباثفايندر مع الشروكي .. واذا منتب مصدق .. ارجع وأقرأ العنوان من جديد؟؟؟؟

الله يخلي الشروكي بلا لانكروزر بلا بافندر.. ؟؟؟؟كما كتبه أخونا السالمي.

شفت إنه ما يقصد!!

مهند

22/05/2004, 03:19 PM

وانت عريف مدرسة المشاغبين يابوفيصل:p

وسع صدرك واناخوك واذا وصلت عندنا الاند كلوزر يمكن ماتعجبنا ونغير راينا;) ونصير مثل السالمي

السالمي

22/05/2004, 04:07 PM

هههههههههههههههههه

لاند كلوزر او لاند كروزر او زفت كلوزر

القصد واضح من كلامي والذيب يفهمها وهي طايره

ورد ابوفيصل انا اخذته عن طيب نيه ولادققت فيه لان مالي في باطن الهرج

انا لي ظاهره بس اما بقعد احرث ورى ردود الاعضاء واقول ذا يقصد كذا وذا يقصد كذا

هذا ماهو من فعلي والله يبعدنا عنه لاني ماني بحاجته ابد

وكلامي خيره منه وفيه انشاء الله

ولا ابغى ازيد اكثر من كذا وانزل نفسي

لان الموضوع القصد منه واضح

واللي يشوفك يقول اني قالطن في مجلسك

يوم تبي تسد حلقي ما اعجبك لاترد وانا ادري ان يدك ماتخليك

وبعدين قلة المواضيع الا موضوع السالمي يومك ناشبلنا فيه

ولارد واحد من ردودك اعطيتنا كلمه نستفيد منها حتى لو هي ضدي انا اقبلها

يمكن ما اقتنع فيها لاكن اقبلها سؤاء عملت فيها او لا

السالمي

22/05/2004, 04:37 PM

ياجماعة الخير

القصد من الموضوع هذا ابدا رأي في الشروكي

لان اغلب الناس يذمه ويقول مشاكله واجد وانا عن نفسي جربته ماشفت منه شي

سواء الحراره وحتى الحراره ما اذكر زادت عن النص

وانا طالع الحين بعد كتابة الرد ذا لواحد مواعدني يركبله مراوح لومينا

وغيري جربه من اعضاء المنتدى وماسبوه ابدا

وكثير من الناس وخاصتن اهل الاند كلوزر <<<<<<< انا ابي اسمه كذا

يفضلونه على الشروكي والقراند شروكي بالذات لان كلامي منصب على القراند شروكي

ويعتقدون ان الاند افضل واقوى

واتمنى اني ماكون اخطيت على احد سواء من يحرث عنه

واذا تعتقدون ان الموضوع زاد عن حده والكلام خاص بالمشرف طاير بالعجه

اتمنى ايقاف الموضوع

العنكبوت

22/05/2004, 10:16 PM

يالسالمي ياحبيبي ياعمري ياعيوني الموضوع صغييير ولا يبي له كل هالي صار

الي يبي موتر دللع وشغل اطراف نفد وان تهور جلد 5 كيلو وحجمه صغير ياخذ

شروكي وهو مغمض بس الله يعينه لا جا يبيع ...

والي يبي شق عروق ويمسك جلد بالميه وفوق وطرد بوسط الحصا وشكل ياخذ

لاند كروزر ...

مع ان المقارنه خسرانه منولها زي ماقالو الاخوان اللاند مايقارن مع الشروكي

الشروكي قارنه مع باث فايندر ربع شي حوله موب مع لاند

والشي الثاني اشوفك بناقشك عليك مغالطات كثيره وبعض كلامك بالاول تغير

وحلوه سالفه لاجاك لاند اببيعه (( وازيد )) واشري لاند كروزر ؟؟؟؟؟

وبعدين يومي اهرج عن القير موب قصدي سياكل لااا قصدي شروووكي

لاني دااايم اشوفه متعطل بسبب القير

وللمعلوميه والله ماحرصت اجي للنت وارد عليك حب عناد والا اني ابيك

تغير رايك والا والا ,,, انا مابي يصير الموضوع مغالط للحقيقه لانه به

ناس تجي للمنتدى تبي معلومات خبره تبي شور حرام يشوفون هرجك

ويجيبون العيد

اتمنى منك كلمه حق تنهي بها النقاش

تحياتي