استشارة مالية يا جماعة الخير افيدوني جزاكم الله خيرا

[كاشت24]

بسم الله والصلاة والسلام على رسول الله

انا محتار يا جماعة الخير ولا اعلم ماذا افعل - مابي اطول عليكم بتفاصيل ولكن هذي زبدة الموضوع
اخذت قرض للزواج حدود 60 الف ومرت سنه عليه والقسط 1300 ريال طبعاً باقي الحين اذا كنت بدفع كاش 41 الف ريال
ثاني شي انا مطلع سيارة من عبداللطيف جميل من موديل 2006 حتى الأن تأجير منتهي بتمليك ودفعت حتى الأن 75 الف ريال بتقسيط شهري مقداره 2300 ريال ويبقى لهم حسبي الله ونعم الوكيل حدود 60000 الف ريال اذا كنت بدفع كاش

استفساري من اهل الاستشارة بارك الله فيكم

استطعت جمع 60 الف ريال حتى الأن لذالك بماذا تنصحوني ايهما اسدد أو أكمل التقسيط أو ماذا افعل لاني بصراحة محتار ؟
- ملاحظات :
السيارة هي فورتشنر 2006 فل كامل قيمتها بسوق الأن حدود 70 الف ريال
اسكن مع الوالد اطال الله بعمره وعمر الجميع يعني الحمدلله ماعندي هم الأجار
والراتب قرابة 8 الاف ريال الحمدلله وما شاءالله مع ان موقفي لا أحسد عليه ولكن
قدر الله وما شاء فعل والحمدلله رب العالمين

[بو خليفه]

سدد اللي أكثر عمولة يخصمون لك

[كبسولة2]

للمعلومية فقط فورنتشر 2007 مبيوع بــ 51 ألف ريال قبل يومين ماشي 80 ألف كيلو !!!

ثانياً سدد البنك لأنهم سوف يخفضون عنك الفائدة المتبقية أفضل لك من تسديد السيارة

[GX_V8]

الله يعينك اولا
ثانيا انت شوف اللي فوائده اكثر وقصده اقل وفك روحك منه
والله يعينا وياك
تقبل مروري

[ذيب صعافيق]

أنا اقترح عليك تسوي مشروع ----

[راعي الطلعات]

القرض ياخذون منك 1300 ريال ***** عبدالطيف ياخذ منك 2300 ريال ولو انا منك والله ما اشتري سياره كذا

النصيحه ادفع قرض السياره وافتك منهم تدفع 1300 ريال شهري افظل من 2300 ريال

واجمع مره اخرى وحاول تسوي مشورع صغير او حاول تقتصد في مالك والسنه الجايه تفتك من هم قرض الزواج

واكيد بيج لك يوم تبي تطلع من بيت الوالد الله يحفظه لك وبتدور شقه وهاك يالاسعار والمصاريف وان شاءالله الله يرزقك بالذريه الصالحه وبتزيد المصاريف هههههههه ترى انا ما اخوفك بس ابي اقولك ركز في كل خطه تسويها

ملاحظة انا مابعد تزوجت بس اجمع معلومات من كل الشباب ومنك انا استفدة

تمنياتي ودعائي لك بالتوفيق الدائم

دمت بحفظ الله ورعايته

[مقلع الرمث]

ياخي انا انصحك تكمل الاقساط حقت ابو جميل لان السياره هذا سعرها الان على قولك وباقي نفس السعر يعني كانك شاريلك سياره بعدين لو تركتها تبي تروح تلعب بالستين هالي معاك بسياره لكن انصحك انك تكمل مع ابو جميل وسيارته تعرفه ولا سياره تجهلها وتوكل على الله وكل شي يتيسر والسلام عليكم

[محمد الصرير]

أنا أقول والشور ما هو إجباري ، إنك تسدد شركة عبداللطيف جميل وتفتك من القسط الكبير ما دام عندك مصروف بيت وزوجه ومناسبات واجتماعات بين الأهل وتراها ما هي سهله مصاريف الزوجة ، ويبقى لك القسط الأقل تقدر تدبر أمورك ، والله يبارك لك وعليك في زواجك ، ويبارك لك في سيارتك وأسأل الله سبحانة وتعالى أن يسدد عنك الدين ( وأهم شي في ذلك أنك تنوي سداده حتى يعينك الله ) ، وإن شاء الله يجون العيال القروم من نسلك وتنسى الدين وأبوجميل والبنوك ، وصلي اللهم على سيدنا محمد وعلى آله وصحبه وسلم أجمعين . ودمتم سالمين

[راعي المعازل]

والله انا اشوف انك تكمل اقساطك كما كنت

وبالستين تفتح لك مشروعين من اللي ما يبن راس مال وكل واحد يبي يدخل عليك

وبكذا تسدد من ارباح المشروع اقساطك

هذا شوري