السيارات الصينية الجديدة

[يوكن]

السلام عليكم ياخواني اعضاء مكشات اخوكم يطلبكم الفزعة شوركم ياربع انا محتاج ونيت وابي من هصينية بس مادري كيف خدمتها وكيف تحملها تكفون شوركم ياربع انتظر ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[لن أمل من العطاء]

عندي هايلوكس موديل 85 محرك نوعه 3y سعة 2 ليتر مكيف

وعن خوي لي دير موديل 2006 شكلها مثل الديماكس ايسوزو

والله نفسي المحرك لكن مركبين عليه بخاخ ودركسون هواء

تويوتا مستعمل او نيسان او ميتسوبيشي افقضل بكثيير

هذا رايي

[الذيبه]

لا وبعد بالنسبه للدير منزلين منها ثلاثه ابواب

انا بصراحه ارى بانها سيارة العام الواحد فقط

[يوكن]

والله حيرتوني مادري وش اختار محد اعطاني رآي سنع .

[Bader-M]

عندي هايلوكس موديل 85 محرك نوعه 3y سعة 2 ليتر مكيف

وعن خوي لي دير موديل 2006 شكلها مثل الديماكس ايسوزو

والله نفسي المحرك لكن مركبين عليه بخاخ ودركسون هواء

كما قالها لن امل العطاء

السيارة بالعربي

هايلكس مديل 1985 م ولكن مع بعض التعديلات (التي ذكرها لن امل العطاء)

عن نفسي اعتقد انها ممتازه و خاصه ان سعرها مناسب جدا

تحياتي اليك

[كبسولة2]

توكل على الله وخذها فيه شركة مقاولات جنب بيتنا ومعهم ونيت غمارتين دير صيني مكيف موديل

2001 وسواقها مصري سألته مرة وحنا طالعين من المسجد قلت له كيف الموتر

يقول أقسم بالله نشغله من بعد الفجر ولا تطفي مكينته الا بعد صلاة المغرب كل يوم

وتحميل خشب وسمنت وحديد ولاعنين ابو جده كرف ولا يوم طلب غير قماشات وبنزين

وزيت فقط حمار كرف بمعنى الكلمة زي التويوتا والنيسان وسعره بلالالالالاش

[ابو النادر]

تبي الشور خلك في الي تعرفه وسعره فيه
الهايلوكس او الددسن وانصحك بالثاني

[غرة سهيل]

يارجال مالك ومال الغلب

سياره تعرفه ولا سياره تجهله

ولو به خير ما عافه الطير

لو به زود او حول النيسان والتايوتا

كان شفته بكل فيضه ووفوق كل نفود

ومنتشره بكل مكان

وجهة نظر لا اقل ولا اكثر

[ابوايلاف]

اذاشريتها كدهاسنة اللة يعينك وبعدها لاتفكرفي بيعهافي المعارض00بتقولي وش اسوي اقول لك اللة يحفظك دورارض فاضية بعيدة عن العمرن وقفهافيها بس لاتنسى تشيل اغراضك اللي فيها واللة يعوض عليك بخيرمنها\ملاحظة بتجيهابعدسنة بتلقاها مثل ماخليتهاماانسرق منها شي بس متغيرلون الاسطبات ومشهبة البوية000

[بو بندر]

خذ نصيحة مجرب ....انحش منها ...من اول شهر ابشر بالخراب

[سالم غانم]

هلا بك اخي
سعرها جديد في حدود 45 الف دفرنسين فل كامل بس فيها عيب ((الحراره ))
مدري عن المديل الجديد الكلام عن 2008 وانا ماشفتها الا مره وسئلت عنها
وبتوفيق

[وادي غران]

توجد سيارات صناعة صينية ممتازة لكن تجارنا الجشعين لا يستوردون منها إلا أردأ الأنواع !! :mad:

السيارات الصينية دخلت السوق السعودي حديثاً, ونصيحتي لك هي أن تسأل أي شخص قد جرب قيادتها لمدة سنتين عن عيوبها ومميزاتها, لكن عند بيعها قيمتها منخفضة للغاية.

[abu morya]

اسمع ياخوي


نصيحة لوجه الله


ابعد من ذا السيارات
اللي ماتجيبلك الا وجع الراس


والله لاشكل زين ،،،، ولا مكاين زي الناس ،،، والاردى اذا جيت تبيع ماحد يشتري

[fox1]

تذكرون يوم جت السيارات اليابنيه يقلون ماتنفع كانويفضلون الامريكي والبيجو وبعدين جات الكوريه وقالو ماتنفع والحين اكثر السيارات يابانيه وكوريه والحين الصيني يقولون ما تنفع وصبرو لها بتملي الديره التاريخ بيحكي... تحياتي للجميع

[احمد الحمد]

الصيني دمار لاتقربه

[االديحاني]

تذكرون يوم جت السيارات اليابنيه يقلون ماتنفع كانويفضلون الامريكي والبيجو وبعدين جات الكوريه وقالو ماتنفع والحين اكثر السيارات يابانيه وكوريه والحين الصيني يقولون ما تنفع وصبرو لها بتملي الديره التاريخ بيحكي... تحياتي للجميع

احسنت انا ما اشبها الا باليباني من حيث بداية تواجدها بالاسواق
ما ارتاح الا راعي اليباني وممكن ييكرر السناريو على الصيني

[محمد باحاج]

أي شي صيني حض ونصيب
حاله مثل حال الإلكترونيات والأجهزة المنزلية
يا عاش طول العمر يا رميته بعد شهرين

والكلام ليس افتراضا بل من تجربة
وأعرف من اشترى وانيت دير وبعد ستة أشهر غير مكينة هايلكس
والجيوب الدير موديل 2006 مالية المعارض ب 20 و25 ألف

إذا استخدامك (حنان ) على مايقولون وتحب الصيانة الدورية فهو لك
أنا لقيت جيب دير 2005 بالمعارض شبه جديد وقفته روعة أكياس المقاعد جديدة ب 28000
ولكن لقيت علبة الدركسون السفلى تهرب زيت وتركته

[آخر العنقود]

هالسياره توافيق يعني ممكن تشتري جديد ويخدم معك خمس سنين ابلراحه وممكن يقعد معك سنتين ويبدأ خراباته والخساره بموتر تعرفه احسن من موتر جديد وتمشي فيه وانت متخوف من اعطاله لأن صناعته رديئه وانت وشورك .....

[مسير عليهم]

لكم الظاهر ولغيركم الباطن

السياارت الصينه اغلبها تجميع ياباني يعني السيارة مبنية على هيكل ياباني

مجرك الكماليات والامور التي ليس اساسيه هي اللي تصنع في الصين اما البقية فيه مكائن يابانية

اخبر سيارة نزلت السوق وصينيه والمكينة والقير تويوتا

[حبل الوريد]

ابعد ابعد ابعد

خلك على الدقس ولا هليكس

[الواصل111]

السلام عليكم ورحمة الله
الى جميع الاخوان اللي ردوا على الموضوع مشكلتنا نتكلم عن كل شئ ونصدر الاحكام على كل شئ نعرفه او ما نعرفة
المفروض اللي ما جرب هالنوعية من السيارات او ما سأل احد جربها ما يحكم عليها
وليكن عندنا نوع من الجدية في الرد واعطاء الرأي في ما نعرفة فقط
ولا تنسون اغلب شركات السيارات تصنع في الصين يعني سنوات قليلة وستجد الصيني مالي السوق قال احد الاعضاء نسيتو اول ما نزل الهونداي الكوري كم كان سعره وكيف كانت النظرة له كلام صحيح 100% وتحياتي للجميع

[قناص 28 عفيف]

تذكرون يوم جت السيارات اليابنيه يقلون ماتنفع كانويفضلون الامريكي والبيجو وبعدين جات الكوريه وقالو ماتنفع والحين اكثر السيارات يابانيه وكوريه والحين الصيني يقولون ما تنفع وصبرو لها بتملي الديره التاريخ بيحكي... تحياتي للجميع
انشهد لحقت على نزله الكوري ويقولون ماتنفع وكانت رخيصه والحين شوف كم اسعارها وفوق هذا الشعب اغلبه سياراتهم كوريه

[الطبيب]

الخرابات وارده على كل السيارات ..

ولكن الأهم .. اسأل عن الوكيل .. وتوفر قطع الغيار .. والصيانه .. لأن هذولي روح السياره ...

أما الخدمه .. ومدتها .. وهرقلة السياره .. تعتمد على رجل السواق واستخدامه .. إجلد موترك .. يجلد جيبك ..

هذا رأيي الخاص ..

هذا والله أعلم
والسلام ختام

[azoz2011]

اخوي انا اعتقد ان السيارة على حسب استخدامك لها يعني يفرق اذا تبية لبر او لنقل داخل الديرة ف اعتقد اذا كان داخل الديرة فهو جيد لكن اذا كان للبر و الطلعات ف ما اعتقد ذلك
و تقبل مروري

[سلكي نت]

اخوي نا اخذت دير موديل 2002 وكالة ومشيت بها 190 كيلو فقط وبالتمرين شفت راس الماكينة كله زيت مع جوانبه وبعد ما وديتها للوكالة نضفو الماكينة وغسلوها وسلموني اياها ومن خلصنا تمرينها اشغلتنا بحرارتها مرتفعة ونمشي فيها مشاوير البيت وممشيه الحال مع اني قلت انها ما تكمل شهر وبعدين ما تمشي وعزمها ماش وبالمكيف تنقص واجد ... المهم اننا نداريها مداراه ...
وسبب شروتي لها مع اني عايف الصيني قلت اعطيها السواق وسعرها رخيص بحدود 30000 ومدارس العيال قريبة وما نخرج بها خارج حدود الحي او المدينة ابداً
واستخير والخيرة في ما يختاره الله